1 Oras ta Yesus i mali Ebai Sombayang Mamagalca sube, I ntarokira smat kayang ta rlafo dising si riri sadaka mali sadaka gagaocana. 2 Yesuse ma ntarokira balo isa ta ncusa nlafo nising ni sadakaca mali sadaka gagao cia. Ga, balo cia ni sadaka tasa tiwi sen silu. 3 Gabe Yesuse nu, "Flonga famafia e, mali Jou Lahatalla uhngo, balo ta ncusa tae ta npona foloi mali farumi smat ta rpo tina. 4 Ningalena, smat kayangna, makse si rpona lal, ga mali silina gleona lal sube. Ga balo tae, makse i ncusa ma, i npo farumi to ta i nina." Maping balo ta ncusaca ni sadaka

5 Oras cia, Yesuse ni murit sifis dafetang du Ebai Sombayang Mamagal cia nmafia, ningalena en patna mafia re okosesi rupa lalo i ta smatna rpo bo rhawe Jou Lahatalla ni mafiana. Gabe Yesuse nua si, 6 "Ta mew fem puli Ebai Sombayang Mamagal ciana, osta en ni orasna, farumi tina osta rduke rfajakam denabe rata, fare enpa pat pusa ta bo nteteam mali i gagaona hawena."

7 Gabe Yesuse ni murit-muritna rfautno I, "Guru, ta Guru mu nana i tina, oras ahai bo ndadi i? Fare ni fafayal ahai, laisa farumi tina bo ndadi i?"

8 Yesuse nua si, "Fpei famafia e, bo mati denabe dakale mewna. Ningalena lal smatna osta rlafo rpake Ya ngahnyok fare si du laitane, ‘Ya tane I to, Kolano ta Jou Lahatalla njaji bo nfasalamat smatca!’ Si ma osta du, ‘Wol kiamatca bo nalawpa nto.’ Ga mew mati fderera sina. 9 Gabe laisa mew flonga abar smatna rfaparang, fare smatna rfatotole re pamarentana, mati mew famcaitna. Farumi tina nane ndadi i ntuba, ga tina enpa ni ngale dunia tae bo tina to nkiamatna."

10 Gabe Yesuse nu hawe lali sili, "Lomane, smat mali batang isa osta rfaparang re smat mali batang ta pusa, fare kolano isa i re ni smatna osta rfaparang re kolano isa re ni smat ta nesana. 11 Fare osta en bena sui ta cicoalna gaole, re osta en panyaket ta nfasaplo lali smatna manca-manca, fare osta en bena smatna ncusa ina gaole diyawa anna. Fare osta bo ndadi i okosesi ta npei tamcait re fafayal-fafayal ta tgarayan mali langitca. 12 Ga laisa farumi tina ndadi i paube, osta rwafo re rfasale mew, ningalena mew fdela Ya. Si osta rpo mew lali ebai sombayang agama Yahudina, gabe bo duruse mew taga rcunga mew bui. Re osta rfabowa mew lali kolano re gubernurna. Farumi tina bo ndadi i mali mewi, ningalena mew fderera Ya. 13 Ga oras ta duruse mew tina, tina ndadi oras mali mewi bo fabinga Ya lali sili. 14 Gabe tina, facicoale wlomewna, bo mati mew ffikir ahai ta nane mew fu bo lomane fbela nimew diricana. 15 Ningalena, Ya to ta bo ipei mew fsanglona fto, denabe smat ta rlokolo mew pana rmampo rbalco nimew mautingna pa bo rbo re mewna. 16 Smatna osta rlokolo mew pa ningalena mew fderera Ya. Hma re hye mewna, tenomewna, ramamew ta nesana re nimew del-delona. Si ta rdela Ya pa tina bo rpo mew lali smat ta rkawasa bo duruse mewna. Re sifis mali mewina osta rpun famat si. 17 Farumi smatna osta rlokolo mew pa ningalena mew fderera Ya. 18 Ga mew mati famcaitna, ningalena isa pa mali mewi tane ta ni uta mali bobokona osta bo myangis. 19 Laisa mew fmanahan fdela Ya turus, mew osta fduk tub re Jou Lahatalla denabe lali-lali."

20 Yesuse nua si hawe, "Lomane laisa mew fem tentarana jele bendar Yerusalem, mew osta fto, bendar cia mnu panto bo dewis i. 21 Oras cia, smat ta en mali batang Yudea mafiana fatoal rfarera lali lolasna. Re smat ta en mali bendarcana, mafiana fatoal rfane rcapang mali pnu cia potalil, re smat ta en mali pnu-pnuna, mati rcung namul bendar ciana to. 22 Ningalena wol-wol tina, Jou Lahatalla bo npo sal-sal, bo ahai ta ene njaji mali Jou ni Kitab cana farumi ndadi i. 23 Gabe ta kangelana gawle oras ciana, maping ta riri badan re ta nturina rcus subena. Ningalena, osta en kangela ta cicoalna gaole mali farumi batang Israel, fare Jou Lahatalla bo nfasal smat Israelna. 24 En ta osta rpun si re eta, en bena ta osta dut si rcung bui puli farumi bangsa. Gabe smat ta rfayala Jou Lahatalla pana bo rfafil-fila bendar Yerusalem, denabe sipat oras ta I nfato bo nfasale smat tina ndumi."

25 Yesuse nu hawe lali I ni murit-muritna, "Osta en fafayal ta npei smatna rherang mali wolca, ngaca fare ototafna. Re mali dunia tae, smat mali farumi batang tae osta ndadi damcait re rfatoto pa poko mumat mamagal ta liona cicoalca. 26 Smatna osta damdererna gaole bo rfikir ahai ta osta bo ndadi i mali farumi dunia taena, ningalena farumi ta en mali langitcana ndadi kacaw. 27 Gabe oras cia to, smatna osta dem Smate Ntu ta mali sorogai malica I mali metna hapaluan re farumi ni kawasana re naplangana gaole. 28 Gabe laisa farumi tina bo mulaine ndadi i to, fpaling taga facicoale wlomewna, ningalena bo mnu panto mew osta fduk salamat."

29 Gabe, Yesuse nafetang andeande isa lali sili. I nu laitane, "Co mew ftarokira famafia ai ara re ai ahai be. 30 Laisa mew fem ai tina ntipa i, mew ndadi fto, tina fafayal oras bo wolwolna ndahle to. 31 Laina bena, laisa wol-wol kangela ta Ya iku tina mulain bo ndadi i to, mew ndadi fto, mnu panto Jou Lahatalla nkawasa ndadi Kolanona mali I ni smatna.

32 Flolam famafia ta Ya iku tane, smat ta rtub oras taena, en ta rtub sube denabe farumi tina ndadi i. 33 Langit re batang tae bo myangis, ga Ya nik maumautingna osta en myangis pa denabe lali-lali."

34 Yesuse nu hawe, "Fjaga nimew dirica famafia, mati denabe mew ffikir be rame bena, re fdome bo nmone mewna, fare mati wlomewna ncusa nimew tubca wol de wolna. Ningalena gabe laisa mew ffikirna laisa laina, mew osta fsiap pa oras Smate Ntu ta mali sorogai malica nlafona, tina fatailo laisa aiwani ta nciap pa ta sisira nkiko sina. 35 Ningalena wol cia bo nlafo mali farumi smat ta mali dunia tae re tfatai-taifo pa. 36 Ga, mew nane fjaga dirica turus famafia, re fsombayang bo mew ndadi fcicoal fmanahan fbo farumi kangela ta bo ndadi i tina denabe mew fmaralapis mali tina. Re laina mew fsiape fbo Smate Ntu ta mali sorogai malica."

37 Wol de wol, oras wolwolo, Yesuse nfan nfafcule mali Ebai Sombayang Mamagalca, fare doram, I ncapang mali bendar Yerusalem cia, fare namtuli mali popo ta ngahnyo Zaitunca. 38 Fare etnga be dororami sube, smatna lal rlafo lali Yesus I mali Ebai Sombayang Mamagalca bo rlonga I nfafcule puli tina.