1 Oras cia, smatna re calan ta rlafo rfayalo si mali Yesus ina. Rfakoskoso si denabe rfafilfilo. Fare oras cia to, Yesus mulaine nfafcule. Nfafcule ntubana I ni muritna, I nu, "Mew fpei famafia re smat ta rderera fatfato Farisina, matina denabe mew fderera si riri tabeatna. Si rfaemo smatna si tina ta jaga rderera Jou Lahatalla, ga ta molangna si rdarawa. Si riri tubca jaga dakal be smat, tina fatailo laisa ragi okoce tfulta re tirigu gabe tiriguca nca." 2 Ga ahai ta oras tae fgoganna, osta smatna bo rto, fare farumi ta fgoganna osta ncapang. 3 Gabe, ahai ta ffauwo mali gagaw ta isa nto pana, tina osta rto mali smat lalo uhngo. Fare ahai ta mew fauwo pumul kamarina, tina osta isa nfabinga puis ebaica gabe smat laloca nlonga.

4 Yesuse nu hawe, "Ya nik dele mew, flonga famafia ta Ya iku tane, mati mew famcaite smat nana. Smatna dafenana rpun famat be nimew badanca, ga si bisa pa bo rtibane mew fan lali sorogacana. 5 Tane, Ya bo ifafcule mew ise ta nane mew famcaitica. Mew nane famcait be Jou Lahatalla, ta ni kawasa npun famat nimew badanca fare en kawasa bo nfasale mew mali narakaca. Gabe, Ya ikuwa mew, mew nane famcait be I!

6 Co mew fikir, mani budubadang silim ta smatna rwage, mulorina okocebe. Ga makse laina, isa pa ta Jou Lahatalla bo nlupana. 7 Laina bena mew, mati famcaitna, ningalena mew foloi mali mani budubadang tina, denabe uta ta mali boboko mewna Jouca nto nilalona."

8 Gabe Yesuse nu hawe, "Flonga tane famafia, ise ta nfatuwo ndela Ya mali smat laloca uhngo, Lomanta smate Ntu ta mali sorogai malica ma osta nfatuwo I nfayala i mali Jou Lahatalla ni malaekat ta mali sorogaina uhngori. 9 Ga ise nmanyakal Ya mali smat laloca uhngori, Ya ma osta imanyangkal i mali Jou Lahatalla ni malaekatna uhngori.

10 Gabe laisa smatna du okosesi ta rlawang Smate Ntu ta mali sorogai malica, i osta nduk ampung sube. Ga ise nu ta mayai lali Jou ni Rohca, i osta nduk ampung pa.

11 Gabe laisa smatna dute bo duruse mew, makse tina mali ebai sombayang agama Yahudina, pare mali smat mamagal ta rkawasa batang taena, mew mati famcaitna ahai ta bo funa fare mfalaisa bo fbela nimew diricana. 12 Ningalena mali oras cia to, Jou ni Rohca osta nfabinga ahai ta mew bo funa."

13 Gabe smat isa mali smat ta lal tina nua Yesus laitane, "Apa Guru, muwa tenokca bo nloate namam warisna."

14 Gabe Yesuse nua i, "Ee wataw, ise ta nafcul Ya bo idadi hakim bo ilowate smate mew lu namew warisnana."

15 Gabe Yesuse nmauting lali smat lalo ta en manana, "Fpei famafia fare fjaga nimew dirica famafia, matina denabe nlafo mew pa re ahai ta namewna. Ningalena smatna rtubna mali aratana be pa makse smatca ni re na." Smat ta nkayang ga nlupa Jou

16 Gabe, Yesuse nafetngo si andeande isa, "En smat isa ni re na, na betna anona lal denabe ebai ta nafrao i okosesica nkos. 17 Gabe i nu mali wlona laitane, ‘Ya nik gagaw panto bo ikisinge nak an bet tanena, fare an bet ta gleo nesana bo ikising manca? Ahai ta ya nane ipeina?’ 18 Gabe nututa hawe, ‘Tane ta ya bo ipeina: ya bo iluka okosesi gagaona, taga ipei ifamamagal i hawe. Mana ya bisa ikising farumi nak an betna fare okosesi ta nesana. 19 Hola tina, ya iku: Ya bo ifasangnang ya su. Ya ikising an fare okosesi ta nesana lal ta ya bisa ipake re taun-taun. Gabe ya motle iseli, idom fare ifasangnang ya.’

20 Ga Jou Lahatalla nua i, ‘Ee, aw tane mto pa. Doram tae to aw osta mmat. Gabe arata ta mising tina bo ndadi smate nesana rari.’

21 Ta lainana ta bo ndadi i mali smat ta rfayalo be arata bo i ni dirica. I ntafuso pa re Jou Lahatalla ni mautingna, i cia fatailo laisa smat ta riri ngale pa mali Jou Lahatalla uhngona."

22 Gabe Yesuse nua ni muritna laitane, "Gabe tina, Ya ikuwa mew: mati wlomewna ncusa re nimew tubcana, ahai ta mew bo ffanna, fare ahai ta bo fpake mali nimew diricana. 23 Ningalena nimew tubca nfoloi mali ahai ta mew bo ffanna, fare nimew dirica nfoloi mali kabaya ta bo fpakena. 24 Co mew ftarokira mani gokgokna. Mani tina rcake gei pa, fare rfakati pa, fare riri gagaw pa bo dising anna, ga Jou Lahatalla nfatub si. Taga bo mew! Mew foloi mali mani tina! 25 Gabe laisa wlomewna ncusa re nimew tubca wol de wol, mew osta falanga okoce nimew umurna? Bisa pa o? 26 Gabe fafena pa falanga nimew umurna makse okoce be, ta mafiana mew mati wlomewna ncusana re ahai ta bo fan fare fdomna. 27 Co ftarokira mfalaisa bunga tina ntubna. Bunga tina rkarajan pa, fare rpei lawe pa bo ndadi kabayana. Ga flonga famafia ta Ya ikuwa mew tane, kolano Salomo ta ni re na cia bere, makse ni kabayana mafiana gaole, ga foloi pa mali bunga tina ni mafiana. 28 Mom ta mali betina bere, Jou Lahatalla neyan fare npei famafia, naga mom tina en wol tae be, fare mdoma bo rtaping. Ga bo mew smatna, osta Jou Lahatalla neyane mew fare nfamafia nimew tubca. Ga mfalaisa mew fdela I uatu pana? 29 Gabe, inanai to mati wlomewna ncusana re ahai ta mew bo fan fare ahai ta mew bo fdomna. 30 Ningalena ga smat ta rdela Jou Lahatalla pana be ta wlorina ncusa farumi tinana, ga mew, mati wlomewna ncusana, ningalena nimew Apaca ta nto mew fparlu farumi tina. 31 Ta mafiana, mew fiyawa Jou Lahatalla to bo I nkawasa ndadi kolano mali nimew tubca. Fare laina, Jou Lahatalla osta npo ndumi ahai ta mew fparluna."

32 Yesuse nu hawe, "Mew ta fderera Yana falal pa, fatailo laisa domba gagaw isa. Ga makse laina mew mati famcaitna! Ningalena nimew Apaca ncangnangna gaole mew bo farerer re I fkawasa laisa Kolanona. 33 Fwage to nimew aratana bo ni tiwina foce smat ta rcusana! Gabe mew fpei laina, tina laisa mew fayalo arata mali sorogaca fare osta myei pa. Ningalena mali sorogaca enpa ta bo rloisna fare enpa gigoap ta bo rfamayai arata tinana. 34 Ya iku laina ningalena manca nimew aratana en, mana bena mew wlomewna."

35 Gabe Yesuse nu hawe, "Mew nane jaga fsiap bo fpei ta Jou Lahatalla nuna, fatailo laisa re smatna mali wol-wolo rpake kabaya karajan bo rciap oras ta bo rfane rkarajanna, laina bena smatna mali oras doram rtaping padamara bo rciap rkarajan doram. 36 Mewe ma nane fsiap laisa smat karajan ta rtotoman riri tuanca bo nuwe mali rame fasawca. Gabe laisa si riri tuan cia nuwena dorame to fare ntoktok bawaca, si rciap rcalawe bawaca. 37 Smat karajan tina rcangnangna gaole, ningalena oras ta si riri tuanca nuwe, ncuna si rtotoman i. Ya bo ikuwa mewe: si tina rcangnangna gaole, ningalena tuanca osta npake kabaya karajan. Taga i ncula ni smat karajan tina rtotolang bo rceli, lomanta i ta nleleane si. 38 Gabe laisa tuan cia nlafona oras wop fapaluan ma pota mdoma, ga i ncuna si rciap rtataman laisa tina sube, si tina osta rcangnangna gaole.

39 Ga mewe ma nane wlomew yaneto famafia andeande isa tae: Gabe laisa smat ta ni ebaica nto oras laisa ta bo nloisca nlafona, ga i osta nfabiari pa bo ncunge ni ebai cana. 40 Laina bena re mew, mew nane fsiap turus, ningalena Smate ta mali sorogai malica bo nlafo hawe mali oras ta mew osta fto pa."

41 Fola tina, Petruse nfautno Yesus, "Jou, andeande ta nanai cia bo ise? Bo amam be pare farumi smat?"

42 Gabe Jou Yesuse ncanglo si npake andeande laitane, "Gabe laisa en smat karajan ta nto okosesina lal fare nmanahan mali ni tuanca, ni tuanca osta nlange i ndadi nfaboboko bo nfatub farumi ni smat karajan ta nesana gabe laisa ni orasna nlafo ito." 43 Smat karajan ta nfaboboko cia osta ncangnangna gaole, gabe laisa ni tuanca nlafo, ncuna i npei ni karajan tina famafia. 44 Flolam famafia ta Ya iku tane, fatutua to ni tuanca osta nlange i fare ndela i bo njaga farumi tuanca ni ginana.

45 Ga laisa smat karajan ta nfaboboko cia wlona mayai, i osta nu mali wlona laitane, "Ya nik tuanca mnu sube taga nuwe. Gabe i nmulaine npun smat karajanna man fare maping, taga i nceli re ndom denabe nmoni. 46 Ga lomanta mali wol ta i nto pana, fare oras ta i ntopana, engarayanna i ni tuanca nuwe. Fare ni tuanca osta nfasal i re salsal ta tebteb. I nduk salsalna nmat. Gabe i laisa smat ta rdela Jou Lahatalla pana.

47 Smat karajan ta nto i ni tuanca nailowna ga nciap pa re npei pa ahai ta ni tuanca nuna, i cia bo nduk punpunna tebteb mali ni tuanca. 48 Ga smat karajan ta nto pa ni tuanca nailowna, ga npeina ncal denabe nduk punpun, i cia nduk punpunna okocebe. Ningalena ise ta Jou Lahatalla npoi cicoalna lal, Jou Lahatalla ma osta nfautno i na foloi mali ta nesana. Fare ise ta Jou Lahatalla ndela i na lal, Jou Lahatalla bo ndorna foloi mamagalna mali sili."

49 Yesuse nu hawe, "Ya ilafo mali dunia tae, tina ta npei denabe smat ta rdela Ya fare smat ta rdela Ya pana rfakotale. Ta rfakotale tina fatailo laisa Ya itigea yap nap dunia tae, fare imaulango yap cia nloblobe to. 50 Ga osta en hawe kangela ta Ya bo iduk. Ya wlokna tengtengan pa gabe laisa kangela cia iduki paube. 51 Mew fu japa ya ilafo mali dunia tae smatna bo rfamafio ndumi si? Enpa! Ga Ya ilafo, smat ta rdela Ya pana bo rfakotale re smat ta rdela Yana. 52 Mali oras tae rmulaine to, gabe laisa en smat silim ebai isa, sitol ta rderera Ya rfakotale re silu ta rderera Ya pa, pene pa silu ta rderera Ya rfakotale re sitol ta rderera Ya pa. 53 Si rfakotale isa re ta nesana. Apa i re ntu manna rfakotale. Mama i re ntu mapingna rfakotale. Malafaca nfakotale re ohmo ta mapingica."

54 Gabe Yesuse nua smat laloca, "Gabe laisa mew fem metna kapcut fare gogo polei, mew osta fu, ‘Wol pusa tae bo ulan,’ fare fatutua ulanca nduri. 55 Gabe mew fbasam latan simica nuf, mew fu, ‘Tae fafayali, wol tae bo mfanas,’ fare fatutua mfanasna gaole. 56 Mew tane fmadarawa! Mew bisa fto batang tae fem be fafayal mali langitca fare mali dunia tae. Ta Jou Lahatalla npei mali uhngo mewna, mew ftaif, ga ta ipeina mew fderera pa?"

57 Yesuse nu hawe, "Gabe laisa mew fatotole re smat, mewe to ta nane famafio mew. 58 Gabe laisa en ta du mew fsal, ga bo dute mew lali hakimna, ta mafiana famafio mewe to re i oras ta mali lalingca subena. Ningalena, gabe laina pa, i osta nute mew lali hakimna. Fare hakimna osta rpo mew lali smat ta rjaga buicana, taga si bo ncunga mew bui. 59 Flolam famafia, mew osta fsapang mali bui cia pa gabe laisa nimew linganna fpalas faye i paube."