Mateus 6

Mati wlomewna ncusa re nimew tubcana

25 Yesuse nu hawe, "Gabe tina, flolam famafia ta Ya bo ikua mew tane, mati wlomewyancusana re nimew tubcana, ahai ta mew bo fan fare ahai ta bo fdomna. Mewe ma mati wlomewna ncusa re nimew badan cana, ahai ta mew bo fpakena. Mew fto nimew tub cia npentingna foloi mali ahai ta mew bo fan fare fdomna. Fare nimew badan cia npenting foloi mali pake ta mew bo fpakena. 26 Co mew ftarokira mani ta dopana! Mani tina rcake gei pa, rfakati pa, re disinge rari an pa, ga hma mew ta mali sorogaica nfaseli si. Ahai ga mew! Jou Lahatalla n’gogoru mewna gaole foloi mali mani tina? 27 Gabe laisa mew wlo mewyancusana re nimew tubca wol de wol, ga mew bisa falanga nimew umurna? Bisa pa, o?

28 Fare mewe ma mati wlo mewyancusana re nimew kabayanana. Co mew ftarokira bungana ta rtub mali betina, mafiana gaole. Bunga tina rkarajan pa, fare rpei lawe pa bo rpei kabayana. 29 Gabe flonga famafia ta Ya bo ikua mew tane, kolano Salomo ta ni re naca, i ni kabayana mafia pa, mafia be bungana. 30 Bunga ta mali betina bere Jou Lahatalla neyan fare nfamafia, naga bunga tina wol pusa tae en, mdoma mang fare rtaping i to. Laina bena re mew smatna, Jou Lahatalla osta neyane mew fare famafia nimew tubca. Pesaga mewe fdela I uwatu pana?

31 Gabe, mew mati famcaitna bo fu, ‘Ahai ta amame bo kanna?’ Fare, ‘Ahai ta bo kdomna?’ Fare, ‘Ahai ta amame bo kpakena?’ 32 Ningalena, smat ta rdela Jou Lahatalla pana be ta wlorina ncusa farumi tina. Ga mew, mati wlo mewyancusana, ningalena nimew Apa ta mali sorogaica nto ndumi ahai ta mew fparlu tina. 33 Ta mafiana, mew fiyawa Jou Lahatalla to bo I ta nkawasa ndadi kolano mali nimew tubca, fare fpei ta molang mali I nbona. Re laina, Jou Lahatalla osta npo ndumi ahai ta mew fparluna. 34 Gabe, mew mati wlo mewyancusana ahai ta bo ndadi i mdomana, ningalena mdoma ni mularatna nesa bena. Nlafo ito mularat ta mew fbasam wol pusa taena, mati fikir wol ta mdoma tae ni mularat nana."