1 Fola tina, Yesuse nfane nyel bendar fare pnuna, I nfabinga Abar Mafia ga Jou Lahatalla bo nkawasa ndadi Kolano mali smat ta rdela Ina. I ni murit yafasa re silu tasa rfarerer re I, 2 fare en bena maping diranca ta rfarerer re Ina. Mali maping-maping tina en bahngana Yesuse nfaungo setan, fare en bena ta Yesuse nfayangise riri owilna. Isa mali silina ngahnyo Maria, ta jaga smatna du Magdalena, bahngana Yesuse nfaungo setan sifit mali i ina. 3 En bena Yohana, Khuza ni ngolota. Khuza tae ta nfaboboko smat ta rkarajan mali kolano Herodese ni istanaca. Fare en ta ngahnyo Susana, re lal sube mapinge nesana. Farumi maping tane rpake riri aratana rgali Yesus I re ni muritna riri tubca wol de wol.

4 Bahnga na, smatna lal rlafo mali pnu-pnuna rfayalo si lali Yesus i. Oras ta si rfayalo ndumi si to, Yesuse nfabinga andeande isa laitane, 5 "En smat bet isa, i nfane ncake gei mali beti. Oras ta i ncake gei tina, en gei ta marapawil mali lalingca lapo gabe smatna rfilo. Fare manina rlafo ga dan gei tina denabe myei. 6 En gei ta nesana marapawil mali rakrak ta ni patna. Gei tina ntub ga ndadi mang ningalena nduk waya pa. 7 Ga en bena gei ta marapawil mali rakrak ta ni momna soga. Mom ta soga tina ntub farerer re gei tina ga mom ta sogana mamagalna foloi, gabe nlataf gei ta ntube to tina denabe nmat. 8 Ga en gei ta nesana marapawil mali rakrak ta nboka. Gei tina ntub fare piyona lal denabe tuwtuaf slubisa." Andeande smat ta ncake gei mali rakrak gagaw pifat

Nu hola andeande cia, Yesuse nu hawe, "Flonga tina famafia, fare fising mali wlomew!"

9 Fola tina, Yesuse ni muritna rfautno I, andeande ta nanai cia ni ngale ahai. 10 Gabe Yesuse ncanglo, "Jou Lahatalla npei bo mew fto mfalaisa I bo nkawasa ndadi Kolano, mali smate nesana, tina Ya ifabinga ipake andeande, bo re laina, ‘Makse si dem, si rtaif pa ahai ta si demna. Makse si rlonga, si rtaif pa, ahai ta si rlongana.’ 11 Tae andeande ta nana cia ni ngalena: Gei tina Jou Lahatalla ni mauting. 12 Gei ta marapawil mali lalingca lapona, tina laisa smat ta rlonga to Jou Lahatalla ni mautingna ga setane ni kolanoca nlafo fare nyal Jou ni mautingna mali si wlorina, bo si mati rdelana fare rcalamatna mali riri dosana. 13 Gei ta marapawil mali rakrak ta ni patna, tina laisa smat ta rlonga Jou ni mauting fare dailow tina re wlorina sangnang. Ga mauting tina si dising famafia pa mali wlorina, gabe ntahanna mnu pa. Gabe laisa si rduk susa re kangela, si rdela Jou panto. 14 Gei ta marapawil mali rakrak ta ni momna soga, tina laisa smat ta rlonga Jou ni mauting, ga si wlorina tengtengan pa re si riri tubcana, si diyawa be arata, fare rlokolo tubca ncangnang be. Gabe Jou ni mauting ta si rlonga tina si rpei pa, denabe mauting tina ni ngale pusa pa, laisa gei ta piyo pana. 15 Ga gei ta marapawil mali rakrak ta nbokana, tina laisa smat ta rlonga Jou ni mauting, si dising mauting tina mali wlori ta mafiana, fare si rpei turus mauting tina mali si riri tubca wol de wol."

16 Yesuse nu hawe, "Enpa smat ta rtaping padamara taga rtabak padamara cia re paisa nesa pene pa dising i mali baleca papapona. Ga ta molangna padamara cia nane rfatigi mali i gagaona bo farumi smat ta rcung mali ebai ciana dem padamaraca plangnona. 17 Tina ni ngale, ahai ta oras tae fgoganna, ga smatna bo rto, fare farumi ta ncapang pana osta bo ncapang bo smatna dem. 18 Gabe tina, flonga famafia ahai ta Ya iku tane. Gabe, laisa smatna rlonga ahai ta Ya iku tane, osta Jou Lahatalla n'gali i bo ntaifna foloi. Ga smat ta rlonga pa ahai ta Ya iku tane, ahai ta i nu ntaifna, Jou Lahatalla osta nyal hawe mali i ina."

19 Bahnga na, Yesuse hnye re rama re tenona rlafo bo dem I, ga si rdahle lali pa ningalena smatna lal. 20 Manana en smat isa ta nfabinga Yesus, "Apa, Apa hnyem ramamna re tenomna si po talil. Si dailow bo rfadukduk re Apa."

21 Gabe Yesuse nu, "Ise ta nlonga fare npei Jou Lahatalla ni mauting, si to Ya hnyek ramak re tenokna."

22 Bahnga na, Yesus i re ni muritna rdawil pelang asa. I nua si, "Mali to bo it lali talaga tae puli pao." Gabe si lali. 23 Orasta si rfalaina, Yesuse namtuli. Rgarayana, latanca nufna ncicoal gabe si riri pelang tasa bakbaka re waya, denabe si bo damduri.

24 Gabe Yesuse ni muritna dolol I gabe duwa I, "Guru, Guru, ite bo tmat tane ya!"

Yesuse npaling gabe nfahola latan fare mumat mamagal tina. Fare, latan re mumat tina nhola, gabe talaga cia ndadi namnin.

25 Gabe Yesuse nua ni muritna, "Pesaga mew ffdela Ya pana?"

Si rdadi damcait fare rherang, gabe rfauwo si, "Smat tae ise ga denabe, I ncula latan fare mumatna gabe latan fare mumatna rderera ta I nunana!"

26 Yesus I re ni muritna rfalai turus denabe rlafo talaga Galilea puli pao, mali smat Gerasana riri batang. 27 Oras ta Yesuse nduri mali pelang tasa, man isa nlafo lali Yesus i. I setanna lal rcung i. I nlafo mali bendar ta ndahle manana fare mnu to i npake kabaya pana fare mnu to nteteam mali ebai i pana, i nteteam be mali piling goana. 28 Laina i nem Yesus, i n'gigam fare naftiba pupuo tasa nap mali Yesuse nbona. Fare i nmautingna nfacicoali nu laitane, "Adodo Yesus Jou Lahatalla ta tigo molangca ntu Aw! Aw bo mpeo ya ahai? Ya idor mati mfasusa yana." 29 Smat cia nua Yesus laina, ningalena Yesus taga ncula setan tina rcapang mali smat cia. Ningalena setan tina ta jaga rkawasa i, denabe smat ta mali bendar ciana rpitane kakamo fare ficona rpake rante bo rtahan i. Ga smat cia nfaorit rante tina, gabe setanna duti lali padang gurun, gagaw ta namliley fare laspa mali pnuna. Yesuse nfaungo setan mali smat isa puli batang Gerasa

30 Gabe Yesuse nfautno setan ta en mali smat ciana, "Aw ngahnyom ise?"

Setan cia ncanglo, "Amame ngahnyomamna? Legion," Ligione ningalena lalna gaole setan ta rkawasa smat ciana.

31 Gabe setan tina rdor lali Yesus i, bo mati ncunga si namul gagaw ta jaga rtahan setannaca.

32 Lawpa mali tinana, bouna lal oras ta diyawa an mali lolase ppunana. Gabe setan tina rdor lali Yesus i, bo I nfabiar si rcung mali bow tina. Gabe Yesuse nderera ta si duna. 33 Gabe setan tina rcapang mali smat cia, taga rcung mali bowna. Hola tina, bowna rfarera lali ta maratopasna lapo, fare farumi rtasapil nap talagaca gabe rmat mana.

34 Smat ta rjaga bowna dem tina, si rfarera. Rlafo mali bendar fare pnu-pnu ta ndahle manana, si dafetang farumi ta ndadi i tina. 35 Fola tina, smat ta mali bendar cana fare mali pnu-pnu ta ndahle manana rlafo bo dem ahai ta ndadi ina. Si rlafo lali Yesus i ga dem smat ta setane ncungica ntotolang ndahle Yesuse ficona, i nmafia to fare npake kabaya to. Dem tina, si ndadi damcait. 36 Smat ta dem farumi tina, si dafetang lali smat ta rlafo manana, mfalaisa denabe smat ta setane ncungi cia nmafiana. 37 Gabe farumi smat ta mali batang Gerasana rdor lali Yesus I bo I nfanenowe riri batangna ningalena si farumi damcaitna gaole. Gabe tina Yesuse ndawil mali pelang tasa taga rfalai hawe.

38 Smat ta nanai setane ncungi cia ndor lali Yesus i bo nderera Yesus. Ga Yesuse ncula i nfan i. Yesuse nu 39 "Ta mafiana, aw muwe to lali nim ebai i, fare mafetang farumi ta Jou Lahatalla npeo awna." Gabe smat cia nuwe fare nafetngo smatna mali farumi gagaw mali bendar cia farumi ta Yesuse npeo i na.

40 Oras ta Yesuse nlolai mali talagaca puli pao mali, smatna lal rtotoman I re rbasamna rcangnang, ningalena farumi si rtotoman I. 41 Oras ciana, smat isa nlafo Yesus, i ngahnyo Yairus. I cia ta nfaboboko si mali ebai sombayang agama Yahudina isa. I naftiba pupuo tasa nap Yesuse uhngona, ndore bo Yesuse nlafo lali ni ebai i. 42 Ningalena, i ntuca isaca be nowilna mamagal denabe bo nmat. I ntu cia maping i, ni umurna sal pana taun yafasa re failu.

Yesuse nfan lali Yairuse ni ebaica. Oras ta Yesuse rfan lalina, smatna lal ta rfakoskos lali bo rdahle Yesus. 43 Mali smat ta lal tina, en maping isa taun yafasa re failu to nkangela ningalena nfanye laflaf. I ni aratana mnyei to ningalena npake nfalalaw mali farumi dokter, Ga isa pa ta bo nfamafia ina. 44 Maping cia ndahle Yesus mali taona taga i ndumi Yesuse ni jubaca cicapona. Oras tina to, i nfanye laflafna ma nhola i. 45 Yesuse nfautan, "Ise ta ndumi Yaca?"

Farumi smatna isa ncanglo pa. Gabe Petruse nua Yesus, "Guru, en smatna lal ta rfakoskos re Guru tane!" 46 Yesuse nu, "Ga fatutuwa smat isa ndumi Ya, ningalena Ya ibasam en kawasa ta ncapang mali Ya nik badan tae bo ifamafia i." 47 Maping cia nbasam ahai ta i npei tina bisa n'gogan pa, gabe namderer i lali naftiba pupuo tasa nap Yesuse nbona. Mali farumi smat tamanana uhngorina, i nafetang mfalaisa denabe i idumi Yesuse ni juba ciana. I ma nu oras ta ya idumi Yesusna, tina to ya imafia.

48 Gabe Yesuse nua maping cia, "Ngolo, tane aw mafia to ningalena mdela Ya. Muwe to re wlomna tengtengan."

49 Ga Yesuse nmauting sube, smat isa mali Yairuse ni ebaica nlafo gabe nua Yairus, "Apa, apa ntumca nmate to. Gabe mati mfaboboko ntoi Gurucana to."

50 Oras ta Yesuse nlonga ahai ta smat cia nuna, I nua Yairus, "Mati mamcaitna, mdela be. Ningalena ntumca osta npaling hawe."

51 Oras ta si rlafo to mali Yairuse ni ebaica, Yesuse nailow pa bo smatna rcung namulna. Ga ta rcungna langisa Petrus, Yohanes, Yakobus fare wai cia hma fare hnye be. 52 Farumi smatna rtangisna rmasisewle mali wai ta nmat cia. Ga Yesuse nu, "Mati ftangisna. Wai tae nmat pa. I namtuli be." Yesuse nfapaling Yairuse ntu ta nmatca

53 Rlonga ta Yesuse nu lainana, si damlifa I, ningalena si rto wai cia nmate to. 54 Fola tina Yesuse nice wai cia kakamona fare nu laitane, "Wai ta aw, mpalinge to!" 55 Fare wai cia npaling hawe, fare nosal. Hola tina Yesuse ncula si rfaseli wai cia. 56 Wai cia hma re hnye tasa rherangna gaole. Ga Yesuse nua si, "Mdel pa fafetngo smatna ahai ta ndadi i tina."