1 Yesuse ncung mali bendar Yerikho fare nfane ndelo pnu cia. 2 Mali bendar cia, en smat isa ngahnyo Zakheus. I cia ta nfaboboko rfayalo pajakna. I smat kayang i. 3 I nmario bo nem Yesus, ga bisa pa ningalena smatca n'gaole, ningalena i ni badanna kokope. 4 Gabe i nfarera ntuba mali smat lalo tina, taga ndawil mali ai ara isa bo nem Yesus ta bo ndel manana.

5 Oras ta Yesuse nlafo mali gagaw cia, I nninga nais taga nu, "Zakheus, fatoale mduri, ningalena wol tae Ya nane iteteam mali nim ebai i." Zakheus niwane wlona nderera Jou

6 Nlonga tina, Zakheuse nduri hatowal mali ai ara cia gabe i nailow Yesus mali ni ebai i re wlona sangnang. 7 Oras ta farumi smatna dem tina, si mulaine rmaumauting, si du, "Cei, Yesuse cia nteteam mali smat ta nbaradosaca ni ebaicana ba!"

8 Ga Zakheuse nosal taga nua Jou Yesus, "Apa, ya bo ilowat hapaluan nik arata tane bo ya ipo lali smat ta rari paisa pana. Re laisa en smat ta ya ikakal si, ya bo ihawe lali sili tuwtuaf pifat." 9 Gabe Yesuse nua Zakheus, "Wol tae, Jou Lahatalla nfasalamate to mew ta fteteam mali ebai taena, ningalena aw tane fatutua Abraham ntu re hbu aw. 10 Ya iku laina, ningalena Smat ta mali sorogaica nlafo bo niyawa smat ta dalaspa mali Jou Lahatalla ina, re nfasalamat si."

11 Yesuse ndahle bendar Yerusalem, oras cia, smat laloca rfikir du, Jou Lahatalla to ta nkawasa ndadi kolano mali ni smatna mali oras ciana. Ningalena Yesuse nto tina, gabe oras ta si rlonga I sube, Yesuse nafetang npake andeande isa laitane. 12 Yesuse nu, "En smat isa kolano ntu re hbu i, i nfan lali batang ta laspa ningalena bo rlange i ndadi kolano. Laisa i rlange i to, i bo nlolai hawe mali ni batangna. 13 Oras ta i bo nfanna, i nololaw ni smat karajan yafasa taga npo tiwi guraci lali sili isa-isa, taga i nu laitane, ‘Mew fpake tane bo ffawage denabe ya ilolai mali.’

14 Ga smat ta rteteam re i batang isa tina, si rlokolo i pa. Gabe, oras ta i nfan, si rfayeit riri smat isa bo nu laitane, ‘Amam kailow pa smat tae ndadi nimam kolano ina.’

15 Ga makse laina, i rlange i ndadi kolano, gabe oras ta i nlolai hawe mali i ni batang. Ncula smat bo dololaw ni smat karajan ta I npo si tiwi to tina. I bo nfautno si tiwi ta rpake rfawage tina nbang i pare enpa.

16 Smat karajan ta ntubaca nlafo mali gabe nu, ‘Apa, tiwi isa ta apa mpo ya cia, tane nbang i to ndadi tiwi yafasa.’

17 Gabe kolanoca nua ni smat karajan cia laitane, ‘Aw nim karajanna mafiana gaole, aw smat karajan ta mmafia. Aw mmanahan re okosesi ta nenena. Gabe tina oras tae ya bo ilange aw, bo mkawasa pnu yafasa.’

18 Fola tina, smat karajan ta failuica nlafo gabe i nu, ‘Apa, tiwi isa ta apa mpo ya cia, tane nbang i to ndadi tiwi silim.’

19 Gabe kolano cia nua ni smat karajan cia, ‘Gabe laina, ya ipo aw kawasa bo mkawasa bendar silim.’

20 Fare smat karajan ta nesana rlafo gabe du, ‘Apa, tae apa ni tiwi ta apa mpo yaca. Ya ikising i pumul tuwalana bo mati nilangna. 21 Ya ipei laina, ningalena ya ito apa cia smat ta wlomna cicoal gabe ya ikamcait. Laisa apa msula smatna diyawa ni bangbang apa ni tiwi cia, apa mmaulango i bo nduk bangbangna lal. Gabe laisa apa msula smatna rfatiwa, apa mmaulango si rfakatina lal.’

22 Gabe kolano cia nua ni smat karajan cia, ‘E, aw smat karajan ta mmayai!’ Ya bo ifasal aw laisa re ahai ta aw muna. Aw mto ya tane smat ta wlokna cicoal: ya jaga iyal ahai ta ndadi ya nik pana, re jaga ikati ahai ta ya itiwa pana. 23 Gabe laina, pesaga ya nik tiwi cia aw mising i puli smat ta dising tiwina pana, bo oras ta ya ikuwe, ya bisa iyal tiwi cia re i ni bangbangna.

24 Gabe kolano cia nua smat ta dosal manana, ‘Fyali to tiwi isa cia mali ina, taga fpo i lali smat karajan ta nduk tiwi yafasa cia.’

25 Ga smat ta manana dua kolanoca, ‘Kolano, pesaga lainana? I cia ni tiwi yafasa to.’

26 Kolano cia nua si laitane, ‘Ya ifaleneto mew e, smat ta nrajin nurus ahai ta en rfakawco ina, i osta nduke rfakawco ina foloi hawe. Ga smat ta nurus pa ahai ta rfakawco ina, ahai ta en mali ina makse okoce be, osta jal.’ 27 Ga tane, farumi smat ta rlokolo rlange ya pa idadi si riri kolano yana, fwafo si taga ffut si mali, fare fpun famat si mali ya uhngok tane."

28 Yesuse nafetang andeande cia hola, I nfane ntuba mali smat lalo tina, nfan lali bendar Yerusalem. 29 Oras ta bo ndahle pnu Betfage re pnu Betania, pnu silu ta puis popo Zaitun tasa, Yesuse ncula ni murit smat silu, 30 re nfatnawe si laitane, "Mew ffane to lali pnu ta fboi cia. Laina mew fsung puli tina, mew osta fduk keledai po isa ta rpitna i, keledai cia smat isa ncaplo i pawbe. Mew fsalawe keledai cia taga ffut i mali. 31 Fare laisa smatna rfautno mew, ‘Pesaga mew fsalawe ina,’ mew fu laitane, ‘Jouca bo npake keledai tae.’ "

32 Gabe smat silu tasa rfan. Si rduke ndumi laisa re ta Yesuse nua sina. 33 Gabe oras ta si rcalawe keledai cia, ga smat ta ni keledai cia nu laitane, "Pesa ga mew fsalawe keledai ciana?"

34 Si rcanglo, "Jouca bo npake keledai tae." 35 Gabe si dut keledai cia lali Yesus i. Si difa keledai cia re riri jubana, taga rgali Yesuse ndawil nais keledai cia. 36 Oras ta Yesuse ncaplo keledai cia re ndelo lalingcana, smatna lal ta difa riri jubana mali lalingca bo rtotoman Yesus. 37 Oras ta Yesus bo ncunge to mali bendar Yerusalemna, neta mali laling ta nduri mali popo Zaitunca, farumi smat ta jaga rderera Ina, si mulaine rcenga re wlorina sangnang fare rfamamagal Jou Lahatalla. Si rpei laina ningalena farumi Mujizatna si deme to. 38 Si du laitane,

"Tfamamagal I ta Jou Lahatalla ncula I nlafo mali ndadi kolano!

Tane Jou Lahatalla ta mali sorogaica re smat mali dunia taena rfamafio si to.

Mali it tfamamagal re tcuba Jou Lahatalla ta tigo molangca!"

39 Ga en smat Yahudi sifis ta rderera fatfato Farisina ta si mali smat lalo tina, si dua Yesus laitane, "Guru, mtolea smat ta jaga rderera Guru tina bo rfatengtengan si." 40 Yesuse ncanglo, "Ya ikuwa mew, gabe laisa rfatengtengan si, pat-pat tane ta osta rgigam re rcenga rfamamagal Jou."

41 Oras ta Yesuse ndahle bendar Yerusalemna, I nem pnu cia fare I ntangis. 42 I nu laitane, "Ali, senimew, smat ta fteteam mali bendar Yerusalemna! Ya imaulango to, mew ftaif ahai ta mew nane fpeina bo fduke ffamafio mew. Ga tane famease to, gabe tina ffamafio mewna enpanto, laisa rgoganne to mali mew i. 43 Ningalena lomanta osta en ni orasna, smat ta rlokolo mew pana rlafo, si bo rpei titiban jele mew smat ta fdela Ya na mali nimew bendarca, taga si osta rpei e mew denabe mew ma ndadi fsapang pa mali tina. 44 Fare si bo rfajakam nimew bendar Yerusalem taga si bo rpun famate mew smat ta en fteteam manana. Re enpa pat pusa ta si osta rfateam ntotongo ta dirancana mali i gagaonana. Ningalena mew failow pa oras ta Jou Lahatalla nlafo bo nfasalamate mewna."

45 Yesuse ncung mali Ebai Sombayang Mamagal cia ni kintalna, taga I nfaungo ndumi smat ta rfawage puli tinana. 46 Yesuse nua si, "Mali Jou ni kitabca rlefo laitane, ‘Ya Nik Ebai tae ebai sombayang i.’ Ga mew fpei ndadi smat ta rmadarawana gagaori rgogan si."

47 Wol de wol Yesuse nfafcule puli Ebai Sombayang Mamagal cia ni kintalna. Smat Yahudina riri imam ta rfabobokona, guru agama Yahudi ta rto ndumi Musa ni kitab silim tasa, re simosimo nesana rmario bo rpun famat Yesus, 48 ga si rto pa mfalaisa ni fanfanna bo rpun famat Yesusna, ningalena farumi smat ta rteteam puli pnu ciana rlokolona gawle rlonga Yesuse ni fafculena.