1 Fola tina, Yesuse nu andeande isa hawe lali ni murit-muritna laitane, "En smat kayang isa ta ni smat karajan. Smat karajan tae ta nurus farumi smat kayang cia nina. Bahnga na, en ta rfabinga du smat karajan cia nfayei ndumi ta ndadi ni tuan cia nina. 2 Gabe tina, smat kayang cia nololaw smat karajan cia taga nu laitane, ‘Ya ilonga aw mfayei ndumi ya nik tiwinana. Mut mali farumi smatna riri lingan ta aw mlefona re ta murusna, ningalena ya bo ifafola aw.’

3 Gabe smat karajan cia nu mali wlona laitane, ‘Ao, ya nik tuanca bo nfafola ya. Tane ya bo ipei karajan ahai? Bo ibapacol, ya ikafena pa, bo idor-dor mali smatna, ya imai. 4 Aa, ya ito ahai ta nane ya ipeina, gabe laisa nik tuanca nfafola ya, en ta bo dololaw ya iteteam mali riri ebai ina.’

5 Gabe, smat karajan cia nololaw isa-isa lali smat ta rpei lingan mali ni tuancana. Mali smat tantuba cia i nu laitane, ‘Aw nim lingan mali ya nik tuancana laisa?’

6 Gabe smat cia ncanglo, ‘Ya nik lingan egat zaitun liter lalanfat.’

Gabe smat karajan cia nu, ‘Tae nim karatas linganca, aw mtotolang mana fare mlefo fatowal liter lalanlu be.’ 7 Fola tina, i nu lali smat ta failu ica, ‘Laisa aw nim lingan mali nik tuancana?’

Smat cia ncanglo, ‘Gandum karung lalanca.’

Gabe smat karajan cia nua i, ‘Tae aw nim karatasca. Tane to mlefo karung slubiwai be.’

8 Oras ta smat kayang cia nlonga ni smat karajan ta namolang pa cia npei laina, nfamamagal i. Ningalena, i ni smat karajan cia nto nyal smatna wlorina bo si bisa rgali i. Meman smat ta jaga rderera dunia taena rto rfatoitoya, laisa pa re smat ta rtub pumul planganca ta rderera Jou Lahatalla nuna. 9 Gabe tane ta Ya bo ikuwa mewna: Fpake nimew arata mali dunia taena bo fgali smatna bo fduke nimew delna lal. Gabe laisa nimew aratana abise to, mew osta fduk gagaw ta dailowe mew ftetemo mali sorogaina.

10 Smat ta rdela i bo npei okosesi ta nenena mafia, i osta rdela i bena bo npei okosesi ta mamagal. Fare, smat ta rdela i pa bo npei okosesi ta nenena, i ma rdela i pa bena bo npei okosesi ta mamagal. 11 Gabe laisa bisa rdela rfakawco mew pa arata mali dunia tae, enpa ta bo rdela rfakawco mew arata ta mali sorogaina. 12 Gabe laisa mew bisa fjaga pa smate nesana riri okosesi ta smatna rdela rfakawco mew, enpa ta osta bo rpo mew okosesi bo ndadi nimewna.

13 Smat karajan isa bisa pa nkarajan bahnga be mali tuan siluna. Ningalena laisa i ni tuanna silu, osta nlokolo i pa tuan ta isaca taga i nmasie tuan ta nesana. Penepa i osta nmanahan be mali i ni tuan ta isaca, mali ta nesana i nmanahan pa. Laina bena re mew, laisa mew ftubna fayalo be arata mali dunia tae, osta bisa pa mew fkarajan bo Jou Lahatalla re tutuona."

14 Oras ciana, smat Yahudi sifis mali ta rderera fatfato Farisina rlonga ndumi ta Yesuse nu tina. Gabe si damamlifa I, ningalena si rlokolo tiwi. 15 Gabe Yesuse nua si, "Mali smatna uhngori, mew fafcule nimew dirica namolang, naga enpa. Jou Lahatalla nto wlomewna. Flolam e, ahai ta smatna rlokolona gaole, tina ta Jou Lahatalla nlokolo pa.

16 Smatna jaga dafcule fatfato ta en mali Musa ni kitab silim tasa re ta en mali nabi-nabina riri kitabna, denabe oras Yohanes ta nfasisopca nlafo. Hola tina, smatna mulain rfabinga Abar Mafia ta Jou Lahatalla bo nkawasa ndadi Kolanona rlonga to manca-manca. Gabe smatna lal ta rmariona gaole bo rdadi I ni smat. 17 Makse laina ma, farumi ta rlefo mali Musa ni kitab silim tasa re mali nabi-nabi nesana riri kitabna fatutua bo ndadi i. Langit re batang tane bisa mjakam, langisa farumi ta rlefo mali Jou ni Kitab cana nane ndadi i."

18 Yesuse nu hawe, "Smat ta ntalake ni ngolota taga nfasaw hawe re mapinge nesa, mali Jou Lahatalla uhngona i ncale to, ningalena i nlokolo re mapinge nesa ta ni ngolo i paca. Taga, smat ta nfasaw re maping ta ni uwatca ntalak i cia, mali Jou Lahatalla uhngona i ma ncale to, ningalena i nlokolo re smat ta ni ngolo i paca."

19 Yesuse nafetang andeande isa hawe laitane, "En smat kayang isa. I jaga npake kabaya colo, tina kabaya mafia ta mulona mamagal. Wol de wol ntubna ncangnang re i ni aratana. 20 Taga mana en bena smat isa ncusa, i ngahnyo Lazarus. I ni badanca bakbaka re yabat. I jaga namamtuli mali smat kayangca ni bawa mamagal ebaica nbona. 21 I nbibisil gabe nlokolo bo nan an ta marapawil mali smat kayang cia ni mejacana. Ga i nduk paisa pa, ga hunna be ta rlafo gabe rlep i ni yabat tina.

22 Bahnga na smat susa cia nmat, gabe malaekatna duti lali gagaw ta nmafia, mali Abrahame lapona. Smat kayang cia ma nmat gabe smatna rgaile i. 23 Mali gagaw smat ta rmatna, smat kayang cia nkangelana gaole. Oras ta i ninga nais, mali laspa i nem Lazarus i mali Abrahame lapona. 24 Gabe smat kayang cia nmauting nfacicoali laitane, ‘Apa Abraham, mmasie ya lae! Msula Lazarus ncowla i loboca mali wayana taga nfasisongit ya papleok tae lae. Ningalena ya ikangelana gaole mali yap taena!’

25 Gabe Abrahame nu laitane, ‘wai ta awe, mlolam ta ntubana oras ta aw mtub sube mali dunia ina, aw mduke to farumi ta mafiana. Ga seni Lazarus, ntub malina, i nduk be farumi ta mayaina. Gabe tane i nduk ta sangnangna mantane, taga aw mduk kangelana. 26 Ahai hawe gelgelto ta aw re amamca, Jouca npei maratopas ta namlaman re namsaina gaole, bo smat ta en mantanena bisa pa si lalina, fare smat ta pulinana, bisa pa si malina!’

27 Gabe smat kayang cia nu hawe, ‘Gabe laina, idore mgali ya. Apa msula Lazarus nfan lali nik apa ni ebaica. 28 Ningalena pulina en smat silim ya tenokna. Msula Lazarus lali nua si bo diwane wlorina rderera Jou e to, bo si ma mati rcung mali gagaw ta nkangela taena.’

29 Ga Abrahame nu laitane, ‘Mali silina ene to nabi Musa ni kitabna re nabi-nabi nesana riri kitab-kitabna. Gabe mfabiar si rpei ahai ta rlefo puli kitab tinana to.’

30 Gabe smat kayang cia nu laitane, ‘Tina ncukup paube, apa Abraham. Nane en smat isa mali smat ta rmatna ta npaling taga nfane nfabinga si bo diwane wlorina rderera Jou.’

31 Abrahame nua i, ‘Gabe laisa si rpei pa ahai ta nabi Musa re nabi-nabi nesana duna, fatutua si ma osta rdela pa, makse smat ta rmatna rpaling ga rfabinga si hawe si osta rlonga pa.’ "