1 Bahnga na, Yesuse ncombayang mali gagaw isa. Ncombayange hola, murit isa nua Yesus laitane, "Guru, Yohanese nfafcule i ni muritna rcombayang. Gabe, ame kdor Guru mfafcule ame bo ksombayang."

2 Gabe Yesuse nua si, "Laisa mew fsombayang, fsombayangna laitane:

‘Apa, farumi kfamamagal re ksuba Apa,

ningalena Apa ngahnyomna mafiana gaole.

Ame kdor Apa mlafo bo mkawasa mdadi Kolano mali nimam tub tae.

3 Moce am an na wol re wol bo nlafo am.

4 Fare mampunge nimam dosana,

ningalena amame ma kampunge smat ta rcal mali amamina,

fare mati mfabiar am bo kpei okosesi ta mayai nana.’ "

5 Yesuse nfaturusa ni sogarona ga sombayangna laitane, "Andeande, laisa smat isa mali mewi, oras ta wop fapaluan nfan lali i ni del isa ni ebaica taga nu, ‘Wataw, mfabawo ya nam rotina fapitol su, 6 ningalena nik del isa bo nfanna laspa taga nlafo mali nik ebai i, ga ya nak paisa pa bo ikoce ina.’

7 Mfalaisa smat cia bo ncanglona, ‘Mati mfasusa yana, ya ikait bawaca to, ningalena ya re ntukna kamtuli to. Gabe ya osta ipaling pa bo igali awna.’

8 Ya, flonga bo ikuwa mewe: i ni del ta mali ebai cia japa nailow pa npalinge bo n'gali ni del ta nlafo cia. Ga laisa i ni del cia nmaipa ga ndor turus, morco napna, i ni del ta pumul ebai cia osta npaling gabe n'gali i ahai ta i nparluna.

9 Laisa re tina, Ya ikuwa mew, fdore to lali Jou Lahatalla i ahai ta mew fparluna, lomanta I osta npo ahai ta mew fdor tina. Fiyawa to mali Jou Lahatalla i ahai ta mew fparluna, lomanta mew osta fduk tina mali I. Ftoke to Jou Lahatalla ni bawaca, I osta ncupati bawaca bo n'gali mew. 10 Ningalena smat isa ta ndor lali Jou Lahatalla i, i osta nduk. Smat isa ta niyawa ni parluna lali Jou Lahatalla i, i osta nduk. Fare smat isa ta ntok-ntok Jou Lahatalla ni bawaca, Jou Lahatalla osta ncupat bawaca bo n'gali i. 11 Mew ta fdadi apa tona, osta bisa pa gabe laisa ntumewca rdor iyan ga mew foce i guna? 12 Pare foce i mamyatif gabe laisa i ntuca ndor tatale tolo? Osta bisa pa o? 13 Gabe makse mew wlomewna mayai, mew fto bena mfalaisa fpo okosesi ta mafia lali ntumew nana. Laina bena nimew Apa ta mali sorogaica! I osta npo Rohca lali smat ta rdoro Ina."

14 Bahnga na, en smat isa nmomow ningalena setane ncungi, gabe Yesuse nfaungo setanca, mali smatca. Oras ta Yesus nfaungo setanca ga ncapang, smat ta nmomow cia mulaine nmauting. Gabe smat lalo ta rfayalo si manana rherangna gaole. 15 Gabe smat ta manana rfauwo si du laitane, "Ta molangna I npake Beelzebul, setanna riri kolanoca nikawasa, denabe I bisa nfaungo setan tina."

16 Fare en bena ta nesa bo diyawa Yesuse na sal, gabe si rdore bo Yesuse npei mujizat, bo si rto fatutua Yesus cia I mali Jou Lahatalla i mali.

17 Ga Yesuse nto si wlorina, gabe I nu andeande isa laitane, "Gabe mali kerajaan isa ni smatna rfakotale gabe rfasak-sake si, kerajaan cia osta namewis. Fare laisa man re maping ese rfakotale be morco napna rfasak-sake si. 18 Laina bena gabe laisa setanna riri Kolanoca nfaungo ni wawaina setanna, si tina osta rfasak-sake si, fare setanna riri Kolanoca ni kerajaanna osta ntahan pa. Ya iku laina, ningalena mew fu, Ya ifaungo setanna ipake kawasa mali Beelzebul. 19 Gabe fatutua laina, smat farisi ta rderera mewna si tina rfaungo setanna rpake ise ni kawasa? Gabe mew fu si ma rpake setan ni kolanoca ni kawasa, si osta du ta mew fu lali sili re Ya i tina ncal! 20 Gabe Ya ifaungo setanna npake Jou Lahatalla ni kawasa, tina ni ngalena Jou Lahatalla nkawasa ndadi kolano mali hapaluwno mewna.

21 Andeande laitane, gabe laisa smat isa ncicoal fare npake snapan paisa nkurang pa njaga i ni ebaica, farumi ni okosesina osta pepaisa pa. 22 Ga laisa smat isa ncicoalna foloi mali i ina nlafo ga npun i nafena i, smat ta ncicoal foloi cia osta nyale ndumi smat cia ni snapan ta nmaulango bo npei i npepaisa pa. Fola tina, smat ta ncicoalna foloi cia osta ncefto ndumi ni okosesina taga nlowto ni del-delona. 23 Smat ta rderera Ya pana, i cia ni le Ya. Fare smat ta n'gali Ya pa nfayalo smate bo rdela Ya, i cia ta npei smatna dalaspa mali Ya ina."

24 Yesuse nu hawe, "Gabe laisa setanca ncapang mali smat isa, i nfan nyelyel mali gagaw ta mninna, niyawa gagawe bo nfafolfola i ga i nduk pa, gabe nututa laitane, ‘Ta mafiana ya nlolai lali smat ta ya itetemo i to ntubaca.’ 25 Oras ta i nlolai lali smat cia, i nem smatca wlona lolo paisa pa, laisa ebai isa ni paisa pa rlesani ga nberesi fare rfato nmafia. 26 Gabe setan cia nfane nololaw ni del sifit ta wlorina mayaina foloi mali i ina. Fola tina, si rcunge smat cia taga rteteam mana. Ni morco napna, smat cia ni tubca ncangsarana foloi mali tantuba malina."

27 Oras ta Yesuse nmauting sube re smat laloca, en maping isa nmautingna nfacicoali lali Yesus i, "Ta ncangnangna gaole cia Apa hnye to. I ta ndadikna fare nfamamagal Apa toca."

28 Ga Yesuse nua i, "Ta rcangnangna, smat ta rlokolo rlonga Lahatalla ni mauting fare rderera tina!"

29 Oras ta smatna nbang i ga lal rjel Yesus, fare I nu, "Smat ta rtub oras tae, si rmayai. Si rdor Ya ifaemo si mujizat faisa bo ndadi fafayali, Ya mali Jou Lahatalla i mali. Ga Ya osta ifaemo si pa mujizatna, Ya ifaleneto si okosesi ta ndadi i ntuba mali Nabi Yunus ina. 30 Ningalena tantuba, oras ta nabi Yunus i pumul iyan mamagalca hnyaona, ga Jou Lahatalla ncapnga i, tina ndadi fafayali mali mewi smat Niniwena, Jou Lahatalla ta ncula i. Laina bena re Smat ta nlafo mali sorogai, en ta bo ndadi i mali I ina, bo ndadi fafayal mali smat ta oras taena.

31 Loman ta mali oras Jouca bo nadili farumi smat, kolano maping ta potao malica osta npaling hawe nfarere re mew smat ta oras taena, fare i osta nfasal mew bo mew fduk sal-sal. Ningalena, tantuba oras ta i nlonga kolano Salomo ni fafculena, makse i nalaspa i nfane bo nlonga. Ga oras tae mantane, en smat ta nfoloi mali kolano Salomo i ta nfafcule mewca, ga mew flonga pa tina! 32 Lomanta oras Jouca bo nadili farumi smat, smat Niniwe tantubana osta rtub hawe farerer re mew smat oras taena, fare si osta rfasale mew. Ningalena smat niniwena diwane wlorina to oras ta Yunuse nfabinga Jou Lahatalla ni fatnaw lali silina, ga oras tae mantane, en Smat ta nfoloi mali nabi Yunus i, ga mew flonga pa bo fiwane wlomew nana.!"

33 Yesuse nu andeande isa hawe laitane, "Smat isa pa ta ntaping padamaraca taga nising i mali ebaica ni sasunna penepa ntabaki re paisa nesa bo plangnona mati ncapangna. Ga ta molangna i osta nisini mali gagaoca bo farumi smat ta rcung mali ebai ciana si dem padamaraca plangnona. 34 Mew mtamewna laisa padamaraca bo nfaplangno nimew dirica. Gabe laisa mtamewna femna mafia, nimew tubca ma ndadi naplangan. Gabe laisa mtamewna femna mayai, nimew tubca ma ndadi ndororam. 35 Gabe tina, mew nane fjaga famafia, mati denabe plangan ta en mali nimew tub cia ndadi ndororam. 36 Gabe farumi nimew tub tae naplangan fare enpa ta dororam makse okocebe, ta molangna nimew tubca osta naplanganna gaole laisa padamaraca plangnona ta nfaplangno mew."

37 Oras ta Yesuse nmautinge hola, smat Yahudi isa mali fatfato Farisi nlafo nololaw Yesus bo nceli mali i ni ebai i. Gabe Yesuse nfane nceli mana. 38 Nbo nape bo nceli, Yesuse nuase kakamo napa, derera laisa agama Yahudina riri fatfato napa. Gabe smat mali fatfato Farisina rherang ningalena si riri fatfato cia dicena cicoal agama Yahudi ni fatfatona.

39 Gabe Jou Yesuse nua i laitane, "Mew smat Farisi tane. Potalil, temna frajin mew fpei agamaca ni fatfatona, naga mali wlomewna, mew flokolo fsefto smate nesana rari okosesi fare mew wlomewna mayai. Tina fatailo laisa smat ta duas galas fare dodai potalilna beresi, ga pumul lolona pererekna gaole. 40 Fto pana gaole mew tane! Jou Lahatalla to ta npei nimew badanca, I ma ta npei wlomewna, gabe tdarawa I pa, I nto mewe ndumi. 41 Gabe tina, fpo to ahai ta en mali mewina bo fgali smat ta rcusana fare wlomewna mafia. Bo re fpei laina, mew fatutua osta wlomewna ndadi beresi.

42 Fkapalange to mew smat mali fatfato Farisina! Mew, frajinna gaole fpei sadakana denabe namew ane ni rampa-rampa ta nenena bere fpeo sadaka lali Jou Lahatalla i. Naga mew famolang pa re smatna fare fmasie Jou Lahatalla pa. Mafia laisa mew fpei sadaka lali Jou Lahatalla i, fare mewe ma nane fpei ta molang lali smatna fare fmasie Jou Lahatalla bena. 43 Fkangela to mew smat mali fatfato Farisina! Laisa mali ebai sombayangca, mew flokolo ftotolang mali gagaw ta potao, fare mali gagaw smat lalo flokolo smatna rfamamagale mew. 44 Fkangela to mew ya! Ningalena, nimew tabeatna potalil temna mafia ga pumulna mew wlomewna mayai. Mew tina fatailo laisa piling ta ni fafayal pa, gabe smat ta rfanfan manana, si rto pa ahai ta en pumul lolona."

45 Ga en isa mali guru agama Yahudi ta nto Musa ni kitab silim tasa, nua Yesus laitane, "Apa Guru, Apa nim mauting ta nanai tina, laisa Apa mfamayai am hawe tina."

46 Gabe Yesuse nfulasi ga nua i, "Ee, mew guru agama Yahudi ta fto Musa ni kitab silim tasa, mewe ma fkangela! Ningalena mew fpei agamaca ni fatfatona lal fare tebtebna gaole, taga fsula smatna rderera tina. Naga mew fpei pa tina fare fgali smatna pa makse okoce be bo fderera fatfato tina. 47 Fkangela to mew ya! Ningalena, mew fpei famafia nabi tantubana riri piling, naga hma re bbu mew tantubana rderera si pa, taga rpun famat si hawe. 48 Gabe mewe famafia piling tina, tina ningalena, mewe fatuwo hma re bbu mew tantubana ta rpun rfamat nabi tina. Ningalena, si ta rpun famat nabi tina, gabe mewe fyal lowat mana ni lalingna famafia riri pilingna. 49 Farumi tina ndadi i, ningalena Jou Lahatalla ta nto ndumi, I nu ntuba to laitane, ‘Ya bo isula nik nabina re susulana bo rfalafo Ya nik fatnaw lali smat Israelna, gabe smat Israel tina ta bo rpun famat diranca mali sili, fare en bena ta nesana bo rfakangela si.’

50 Gabe re laina, Jou Lahatalla bo nfasale mew smat ta ftub oras taena, poko be farumi nabi ta fpun famat si tona mali oras ta Jou Lahatalla npei dunia taena, 51 mulain mali Habel i denabe nabi Zakharia, ta rpun famat si mali Ebai Sombayang Mamagalca, mali gelgelto ta jaga rtaping aiwani ta rpeo sadaka, fare gagaw ta nmafia ta Jou biasa nlafo i mana. Flonga famafia ta Ya iku tane: smat ta oras taena ta bo rduk sal-sal mali farumi ta ndadi ito tina.

52 Fkangela to mew guru agama Yahudi ta fto Musa ni kitab silim tasa! Mew fto laling ta bo tderera Jouna ga mew fderera tina pa. Mewe ma ta jaga ffabatal smate nesa ta bo rderera Jouna. Tina ifatailo laisa mewe fice kuci bawa, ga mew fising be kuci tina."

53 Nu hola tina, Yesuse nfane nowe gagaw cia. Gabe mulain oras cia, guru agama Yahudi ta rto Musa ni kitab silim tasa fare smat mali fatfato Farisina diyawa hal re Yesus. Si dakale rfautno I bo I nmautingna lal. 54 Si rpei laina bo rwafo I mali ni mauting ta ncal tina.