1 Bahngana neta wol Sabat, wol ta smat Agama Yahudina bisa rkarajanpa, Yesuse nfan nceli mali smat ta nfaboboko smat Farisina isa ni ebai. Puli tina, si farumi rtarokira be Yesus bo diyawa Ina sal. 2 Garayanna, en smat isa ta nowil, nlafo mali Yesus i, i ni owil tina npei denabe fico re kakamona nbosbos. 3 Gabe Yesuse nfautno guru agama Yahudi ta rto ndumi Musa ni kitab silim tasa re smat Farisi tina, "Gabe laisa tderera ite rir agamaca ni fatfatona, bisa tfamafia smat mali wol Sabatca, pare enpa?" 4 Ga farumi si tina rcanglo pa. Gabe Yesuse nkawce smat cia, fare nfamafia i. Hola tina, Yesuse ncula smat cia nuwe. 5 Gabe Yesuse nua si, "Gabe laisa ntumewca lae ma nimew sapica lae marapawil mali sumu i neta wol Sabat, osta mew fgali fsapnga i bena paga?"

6 Rlonga Yesuse nu laina, smatna isa pa ta bo ncanglo Yesuse ni mauting tina.

7 Oras ta Yesuse nceli mali smat Farisi cia ni ebaica, I ntarokira smat ta rlafona rlokolo rtotolang mali gagaw ta potaona. Gabe tina, Yesuse nfafcule si npake andeande laitane, 8 "Gabe laisa dololawe mew mali rame fasaw, mati mew flokolo ftotolang mali gagaw ta potaonana. Ningalena faramane smat ta ni rame cia nololaw smate nesa ta nmamagalna foloi mali mewi. 9 Mati denabe ta ni rame cia osta nlafo re nu laitane, ‘Tabea e, gagaw tae smatna riri i to.’ Gabe re fbasamna fmai nane fdirake mew ftotolang pumulo. 10 Mafiana, gabe dololawe mew puli smatna riri rame, mew nane ftotolang pumulo. Ise nto smat ta ni rame cia nlafo re nua mew laitane, ‘Mali, ftotolang potao.’ Re laina, si daraga mew mali farumi smatna uhngori ta rceli farerer re mew manana. 11 Ningalena, ise ta nu i ni ngale, Jou Lahatalla osta npei i ndadi ni ngale pa. Ga ise ta npei i ni dirica laisa re smat ta ni ngale pa, Jou Lahatalla bo npei i ndadi smat ta ni ngale."

12 Fola tina, Yesuse nu hawe lali smat ta nololaw Ica, "Bahnga hawe gabe laisa apa mpei rame seli, wolwolo lae dorame lae, apa mati mololaw nim del-delonana tenom re ramamnana ma apa nim smat ta fadahdahle ebai ta rkayangnana. Ningalena osta si bo rbalco rfaseli apa bena. Re laina, ahai ta apa noce sina, si bo rbalco apa bena. 13 Ga laisa apa mpei rame seli, ta mafiana mololaw smat ta rcusa, smat ta rpanyaket, smat ta rfanfan pana, fare smat ta rbiafna. 14 Gabe laisa apa mpei laina, Jou Lahatalla ta osta npo ni mafiana mamagal mali apa i. Ningalena makse si rari paisa pa ta bo doce apana. Lomane Jou Lahatalla ta osta nbalco apa ni mafiana mali wol kiamatca, oras ta Jou Lahatalla nfapaling hawe smat ta damolang mali I uhngona."

15 Oras ta Yesuse nu laina, smat isa mana ta ntotolang nceli farerer manaca, nua I laitane, "Ncangnangna gaole smat ta bo rceli farerer mali gagaw ta Jou Lahatalla nkawasa ndadi Kolanoca."

16 Gabe Yesuse nua i npake andeande isa laitane, "En smat isa npei rame mamagal, fare nololaw smatna lal. 17 Oras ta okosesina farumi toto to, i nua ni smat karajanca nfane nfabinga smat ta i nololawna, laitane, ‘Mali to, ningalena okosesina farumi toto to!’ 18 Ga farumi smat ta nololawna rlafo pa re barang be du. Ta ntuba cia nu laitane, ‘Ya taga igon bet, gabe tabea mati mtolena e, ya nane ifan lali ikem bet tina su.’ 19 Ta nesa benana du laitane, ‘Ya, ya taga igone hola sapi karajan pasang pilim. Gabe tabea mati mtolena e, ya nane itohnga si rkarajan su nik sapi-sapi tina.’ 20 Taga ta nesa benana du laitane, ‘Ya taga ifasawe hola, gabe bisa ilafo pa.’

21 Gabe, smat karajan cia nlolai nfabinga ndumi tina lali ni tuanca. Gabe ni tuanca ntole, fare ncula ni smat karajanca laitane, ‘Gabe laina fatowale to aw mfan lali pnuca ni laling mamagalna denabe laling nenena. Aw mololaw re mut mali smat ta rcusa, smat ta rtempang, smat ta rbiaf, re smat ta rfanfan pana.’ 22 Nlonga parenta tina hola, smat karajan cia nfan npei laisa re ta ni tuanca nfasulana. Oras ta i nuwe, i nua ni tuanca, ‘Apa, farumi ta apa mparentana, ya ipeie to. Ga en sube gagaw ta rtotongo pawbena.’

23 Gabe tuanca nua smat karajan cia, ‘Gabe laina, aw mfan hawe lali laling mamagal, re laling nenena mali pnu tae potalilna. Aw mgega smat ta en manana rlafo mali bo ya nik ebai tae nbakbak.’ 24 Gabe flonga famafia ta Ya iku tane, farumi smat ta Ya ikololaw ga dailow pa tina, isa pa smatna ta osta nceli mali Ya nik rame taena."

25 Fola tina, smatna lal rfan rderera Yesus. Yesuse ntoi namul sili fare nu laitane, 26 "Smat ta nderera Yaca, i nane nmasie Yana foloi mali i nmasie ni ngolota, hye, hma, ntuna, tenona, ramana, fare i ni dirica. Gabe laisa i nmasie Ya laisa laina pa, i bisa pa nderera Yana. 27 Gabe ise ta npapa i ni salipca pa, tina ni ngalena i nciap nkangela pa denabe nmat re nderera Yana, i cia pantas pa bo nderera Yana. 28 Ifatailo laitane: gabe laisa isa mali mewi tane ta bo npei ebai, nane i netetang su, laisa ebai cia ni ongkosna. Re laina i ndadi nto, ni tiwina nlafo pare enpa bo nfatoto ebai ta i npeicana. 29 Gabe laisa i netange ntuba pa, ga i npei fandasi to, osta i nafena nfatotoi pa ebai cia, gabe smatna dem tina, si osta damamlifa i. 30 Si osta du, ‘Cei smat cia mulaine npei ebai cia ga i nafena nfatotoi pa.’

31 Fare, en fatailo nesa bena laitane: en kolano ise ta i ni tentara lalan yafasa, gabe bo nfaparang re kolano nesa ta ni tentarana lalan yafalu. Kolano ta ni tentara lalan yafasa cia, nfane nfaparang pawbena nane ntotolang bo nututa famafia su, nafena pare nafena pa. 32 Gabe laisa i nto ni tentarana dafena pa, i nane ncula ni tentara diranca bo rdor rfamafio si oras smat ta i nbo sina dalaspa sube. 33 Laina bena re mew. Gabe laisa bo fderera Ya, mew nane fututa famafia su, laisa mew fafena fateam farumi ta nimewna, mew bisa fderera Ya. Laisa mew fafena fateam tina pa, mew bisa pa fderera Yana."

34 Yesuse nu andeande isa hawe laitane, "Gasi tina mafia, ningalena nfamna an. Ga laisa gasi tina ndadi mtu, bisa panto bo npayasing hawena. 35 Gabe laisa laina to, ni ngale pusa panto. Makse bo tpake mali beti bo tfaboka rakrak re bo tpei pupuk, bisa panto. Ta mafiana ttopa to. Flonga tina fare ftaif, taga fising mali wlomew!"