1 Wol Mingguca oras dororami sube, mapingna rfan lali piling goaca, dut egat pau mafia ta si rpei e tona. 2 Gabe rlafo mali pilingca, si dem pat ta mali pilingna cia, namolole to mali pilingca nbona. 3 Si rcung namul piling goa ciana, ga si dem Jou Yesus ni mayatca ini panto manana. 4 Oras ta si rfatoto pa ningalena farumi tina, garayanna en smat silu rpake kabayana sasaletam dosal rdahle si. 5 Maping-maping tina damcaitna gaole gabe si rlu nap denabe uhngorina neta rakrakca. Gabe smat silu tasa duwa si, "Smat ta rpaling hawena, mew mati fiyawa si mali gagaw taena, ningalena mantane smat ta rmatna gagaori. 6 I mantane pa, I npalinge to! Co mew flolam ahai ta I nua mewna oras ta I mali Galilea subena. 7 I nu, ‘Smatna bo rpo Smate Ntu ta mali sorogai malica lali smat ta rbaradosna, taga si rsalip I. Ga mali wol pitol I cia bo npaling hawe.’ " 8 Rlonga laina, taga si rlolam ahai ta Yesuse nua sina. Yesus nmat ga npaling hawe

9 Fola tina, si rlolai puli piling i mali gabe dafetngo farumi tina lali murit yafasa re isa tasa fare smate nesa ta en rfarerer re si manana. 10 Maping tina: Maria puli Magdala mali, Yohana, Maria Yakobuse hnye fare maping nesana. Si tina ta rfabinga lali Yesus ni muritna ta smatna du susula.

11 Oras ta Yesuse ni susulana rlonga mapingna dafetang tina, si rdela pa. Si du nama maping tina rpei mauting be ta ncung akal pa.

12 Ga Petruse nosal taga nfarera lali pilingca. Oras ta i nninga namul pilingcana, i nem be kaing bubulangca be, ta dopeya Yesuse ni mayatcana. Gabe i nuwe nututa mali wlona, ahai ta ndadi i tona.

13 Wol cia bena, smat silu mali sili ta jaga rderera Yesus, rfan lali pnu isa ngahnyo Emaus. Pnu cia laona bo sal pa kilo yafasa re pusa mali bendar Yerusalem. 14 Oras ta rfanna, si dafetang farumi ta ndadi ito mali Yesus ina. 15 Gabe oras si dafafetang sube fare rfapopo fikiran, Yesuse nlafo ndahle si gabe nfan farerer re si. 16 Si dem Yesus ga Jou Lahatalla npei si rfayala I pa, cia Yesusna. 17 Gabe Yesuse nua si, "Ga ta mew ffan tane, mew fafetang ahai?"

Gabe si rfola re wlorina ncusa. 18 Fare isa mali silina, ngahnyo Kleopas, nua Yesus, "Ga Apa be ta mlafo mali Yerusalem ga mto pa ahai ta ndadi i popise tanena?"

19 Yesuse nfautno si, "Ahai ta ndadi i tona?"

Si rcanglo, "Tane ta ndadi i mali Yesus i mali Nasaret. I cia Nabi ta jaga nfalafo Jou Lahatalla ni fatnaw. I reni kawasa nfafcule re npei mujizat. Jou Lahatalla fare farumi smatna du ahai ta I npei tina farumi fatutua. Yesuse nfaem I lali smat silu ta rfan lali Emaus tasa

20 Ga amam agama Yahudina nimam imamna fare ta rfaboboko Yahudina rpo I to lali pamarenta Romana bo rfasal i taga si rsalip I, denabe nmat. 21 Ga tantubana amame kmaulango I ta nlafo bo nfasalamat am bangsa Israelna mali pamarenta Roma ta rfasalamna. Ga tane maralapis wol pitole to I nmatna.

22 Ga maping sifis ta rfarerer re Jouca ni muritna tasa rfagarayan am. Oras dororam i sube si rfan lali pilingna, 23 ga si dem Yesus ni mayatca ini panto manana. Gabe si rlolai mali amam i taga rfabinga, ‘Amame kem malaekatca puli tina.’ Gabe malaekatca nua si, Yesuse npalinge to. 24 Rlonga tina, riri del dirancana rfan lali piling cia. Gabe rlafo pulina si deme ndumi laisa re ta maping tasa du tina. Ga si ma dem Yesus pa."

25 Gabe Yesuse nua si, "Ee mew smat ta fto pana gaole. Ta mnuo i tae mewe fdela paube farumi ta nabina rlefoe to mali Jou ni Kitabcana. 26 Nabina si du Mesias, Kolano ta Lahatalla njaji bo nfasalamate smatca, I cia nane nduk kangela su, taga rfamamagal re rcuba I mali sorogai." 27 Nu laina hola, taga nfaolang ahai ta rlefo bo Ina mali farumi Jou ni Kitabcana, mulain mali kitab ta nabi Musa nlefo denabe mali kitab nesa ta nabi nesana rlefona.

28 Oras ta si rdahle pnu Emaus ta smat silu tasa bo rfanyo ica, Yesus npei laisa re I bo nfan turusna. 29 Gabe si duwa I "mtetemo amame to, ningalena tane malingine to, fare wolca bo ncope to." Gabe Yesuse ncung nteteam farerer re si smat silu tasa.

30 Oras ta Yesuse bo nceli farerer re si, I nyal rotina fare nu tarima kase lali Jou Lahatalla i. Taga, I nfawog-wogla roti tina taga nlow to smat silu tasa. 31 Gabe oras cia to Jou Lahatalla npei si rtaif, gabe si rto cia Yesus. Ga garayanna tina to Yesuse namnyangis mali si hapaluwnorina. 32 Gabe rfauwo si, "Fatutua oras ta I nmaumauting re it mali lalingcana I nfaolang Jou ni Kitab ciana, ite wlorna tcengana gaole e!"

33 Fola tina smat silu tasa dosal taga rlolai hawe lali Yerusalem. Pulina si rfadukduk re murit yafasa re isa tasa fare smate nesa ta jaga rderera Yesusna rfayalo si puli tina. 34 Gabe smat silu tasa rlonga abar mali riri delna laitane, "Ga fatutua to, Jou Yesuse npaling hawe, I nfaemi mali Simon Petrus i."

35 Gabe smat silu tasa dafetang ahai ta ndadi i mali lalingca nanaina, re mfalaisa si rfayala Jou Yesusna oras ta I nfawog-wogla roti tinana.

36 Oras ta muritna dafetang ahai ta ndadi i tina, garayanna Yesus nosal mali si hapaluwnorina fare nua si, "Jou, ni mafiana en mali mewi!"

37 Si rgarayan fare damcait, ningalena si duna ma si demica hantu i.

38 Ga Yesuse nua si, "Pesaga mew famcait re laisa fdela pa mali wlomewna? 39 Co mew fem kakamok fare ficok tane, tane gabe Ya. Co mew fem re fkawce Ya. Ya wangtok re nik long, laisa re hantuna pa."

40 Oras ta Yesuse nu laina, I nfaem kakamo fare ficona lali sili. 41 Oras cia, si rcangnangna gaole, ga si rdela paube re rherang. Gabe tina Yesuse nfautno si, "An ahai ta en mali mewi tanena?" 42 Gabe si rpoi I iyan sinanga kakati pusa. 43 Yesus nyal iyan tina gabe nan mali si uhngorina.

44 Gabe I nua si, "Oras ta Ya iku tane lali mewina, Ya ifarerer re mew sube: Farumi ta rlefo bo Yana mali Musa ni kitab silim tasa, re mali nabi nesana riri kitabna, fare kitab Mazmurna, farumi tina nane ndadi i."

45 Mana Yesuse npei si rtaif Jou ni Kitabca ni ngalena. 46 I nua si, "Mali Jou ni Kitabcana rlefo, Mesias, Kolano ta Lahatalla njaji bo nfasalamat smatca nane nkangela, nmat, gabe mali wol pitolca npaling hawe. 47 Fare osta Ya nik smatna bo dute nik Abar Mafia rpake Ya ngahnyok lali farumi suku ta mali dunia tae bo si diwane wlorina rderera Jou, bo Jou Lahatalla nampung si. Taga si bo rfabinga Abar Mafia tina lali smatna, mulain mali bendar Yerusalem. 48 Gabe mew ta feme re mtamew pilu ahai ta ndadi i mali Ya ina, mew nane fafetang lali smatna ahai ta mew feme to tina. 49 Fare Ya to ta bo idurea Jou ni Rohca mali mewi, ta Hmakca njaji tantubana. Ga mew nane fteteam mali bendar Yerusalem su, denabe kawasa ta mali Jou Lahatalla ina nduri nkawasa mew."

50 Gabe Yesuse nute ni muritna rcapang mali bendarca denabe laupa nto mali Betania. Si rfola mana, Yesuse nlange kakamona, taga nbarakati si. 51 Oras ta Yesus npo si barakat, I npupuang ndawil nais soroga i, fare mulaine nfateam si. 52 Gabe mana si daftiba pupuorina nap rcuba I. Hola tina, si duwe lali Yerusalem fare wlorina sangnangna gaole. 53 Si jaga si mali Ebai Sombayang Mamagalca, fare rcuba re rfamamagal Jou Lahatalla. Yesuse ndawil nais Soroga i