1 Oras ta Yesuse nmautinge fola re smat laloca, I nfan lali bendar Kapernaum. 2 Mali bendar cia, tentara Romawina riri ta nfaboboko sica. I ni smat karajan isa ta n'gogoru ica. Nowilna mamagal, denabe bo nmat. 3 Oras ta komandan cia nlonga ga du Yesusna, i ncula simosimo diranca mali smat Yahudina rfane bo dololaw Yesus, ndore bo nfamafia ni smat karajanca. 4 Gabe oras ta simosimo Yahudi tina rlafo Yesus, si rdore bo I n'gali komandan cia. Si duwa Yesus, "Apa e! Komandan tae ta mafiana Apa mgali i. 5 Ningalena, i n'gogoru am smat Yahudina fare i bena n'gali am kfaosale nimam ebai sombayangcana, naga i cia, agama Yahudi i pa." 6 Gabe Yesuse nfan nfarerer re si. Oras ta Yesuse ndahle komandan cia ni ebaica, komandan cia nua ni del-delona bo rfadukduk re Yesus taga du laitane, "Apa! Mati mfakangela awe bo mlafo mali nik ebai taena, ningalena ya pantas pa bo ikailow Apa mali nik ebai taena. 7 Gabe tina, ya ibasamna imampo pa bo ibo Apana. Ta mafiana Apa mu mauting fapusa mali mantane, osta nik smat karajan cia nmafia. 8 Ningalena, ya ito Apa msula smatna rdadi rmafia, laisa amam tentarana bisa kparenta tentarana. Ya nik atasan ta nkawasa ya, fare ya ma nik wawai ta rlonga ya. Gabe laisa ya iparenta nik wawaina, ‘Mfan!’ Osta i nfan. Gabe laisa ya isula nik wawai ta nesana, ‘Mlafo!’ Osta i nlafo. Fare ya isula nik wawai karajan ta nesana, ‘Fpei tane!’ Osta rpei ahai ta ya isula si tina."

9 Nlonga komandanca ni mauting ta rfalafo tina, Yesuse ndadi nherangna gaole ningalena komandan cia ni delana cicoal. Gabe Yesuse nfulasi nbo smat lalo ta rderera Ina taga nu laitane, "Flonga famafia ta Ya ikuwa mew tane, bahnga paube Ya iduke smat isa mali batang Israel ta ni delana cicoal laisa smat ta mali batang Roma taena!"

10 Oras ta smat ta komandanca ncula si tasa rlolai lali komandanca ni ebai i, si dem smat karajan cia nmafia to.

11 Fola tina, Yesuse nfan lali bendar isa ta ngahnyo Nain. I ni muritna fare smate nesana lal bena rfan rfarerer re I. 12 Oras ta Yesuse i re smat laloca bo rdahle lali bawa ta bo rcung bendar cia, en smat diranca rcapang rpapa smat isa nmat. Ta nmat cia ngolo baloca ntu man i, taga isa cia be. Fare lal bena smat mali bendar cia ta rderera ngolo cia ga rfagaile. 13 Oras ta Jou Yesuse nem ngolo balo cia, I nbasamna nmasie i. Gabe I nua ngolo cia, "Ngolo, mati mtangisna to e!"

14 I ndahle smat ta rpapa smat ta nmat cia, fare I nice babailean cia. Fare smat ta rpapa smat ta nmat cia rhola. Gabe Yesuse nu laitane, "Wai man po! Ya ikuwa aw, mpalinge to!" 15 Yesuse nu hola tina, wai ta nmat cia npaling hawe. I ntotolang, taga nmulaine nmauting. Gabe Yesuse npo wai cia lali hnye i.

16 Farumi smat ta dem ahai ta ndadi i tina, si damcait gabe rfamamagal re rcuba Jou Lahatalla laitane, "Nabi mamagal isa i mali iti mantane! Jou Lahatalla fatutua nlafo to bo n'gali I ni smatna!" 17 Abar ahai ta Yesuse npei tina ncapange to mali farumi gagaw puli batang Yudea re farumi batang ta ndahle manana.

18 Yohanes ta nfasisopca en i ni murit. Murit tina rfabinga Yohanes ga farumi ta Yesuse npeina. 19 Nlonga tina, Yohanese nololaw ni murit silu taga ncula si lali Jou Yesus i bo rfautan laitane, "Apa, Apa to ta Jou Lahatalla njaji bo mlafo tina? Pare amame nane ktotoman ta nesana?"

20 Oras ta smat silu tasa rlafo lali Yesus i, si du laitane, "Yohanes ta nfasisopca, ncula am kfautno Apa laitane, ‘Apa, Apa to ta Jou Lahatalla njaji bo mlafo tina? Pare amame nane ktotoman ta nesana?’ "

21 Oras ta si rlafo tina, Yesuse nfamafia smatna lal mali riri panyaketna, panyaketna rupa lalo i. I ma nfaungo setan ta rcunge smatnana. Fare I bena nfamafia smat ta rbiafna denabe si bisa dem hawe. 22 Gabe Yesuse nua Yohanese ni muritna laitane, "Mew flolai lali Yohanes i taga fabinga ahai ta mew fem fare flongana: smat ta rbiafna ndadi dem, smat ta rfanfan pana ndadi rfanfan, smat ta rpadona rmafia, smat ta rlonga pana rlonga, smat ta rmatna rpaling hawe fare smat ta riri re rari pana rlonga Abar Mafia mali Jou Lahatalla i." 23 Fare Yesuse ncula si duwa Yohanes hawe, "Smat ta ntaf Ya pa ga nailow Ya fare ndela turus, i cia ta ncangnang."

24 Oras ta Yohanese ni muritna rfane to, Yesuse mulaine nua smat lalo ta si manana ga Yohanis. I nu laitane, "Oras ta Yohanese nfafcule mali padang gurun, gagaw ta namliley nalaspa mali pnu i, mew ffan lalina bo fpesa? Pare mew bo fem smat ta wol tae nu nesa mdoma nu nesa, laisa mom ta ngangala lali re mali ningalena latanca nufi? Osta enpa, pa ga? 25 Pare bo ahai mew ffan lalina? Pare mew bo feme smat ta rpake kabaya mafiana? Osta enpa, paga? Ningalena smat ta jaga npake kabaya mafia fare ta rtubna rcangnangna, si gagaori mali kolanoca ni ebai i. 26 Gabe bo ahai mew ffan lalina? Mew ffane fem Yohanes! Ningalena i cia nabi ta jaga rfalafo Jou Lahatalla ni fatnaw. Fatutua to! Ga mew flolam e, Yohanes cia nfoloi mali nabi ta biasana. 27 Ningalena ta ntuba mali be Jou ni Kitabca ene rlefo ga i laitane,

‘Ftarokira e! Ya bo isula nik susulaca bo ntuba mali Awi.

I cia ta bo ncalawe laling, bo nfasiape smatna wlorina bo dailow Aw.’ "

28 Yesuse nu hawe, "Flolam famafia e, mali farumi smat ta mapingna rdadikna si mali dunia tae, isa pa ta nmamagal foloi mali Yohanes ta nfasisopcana. Ga tane, ise be makse smat nenena i, gabe Jou Lahatalla nkawasa ndadi Kolano mali i ni tubca, smat cia nmamagalna foloi mali Yohanes i."

29 Farumi smat ta rlonga ahai ta Yesuse nu tina, fare smat ta rfayalo pajakna, si rfatuwo Jou Lahatalla tina fatutua, ningalena si rduk sisop mali Yohanes i to. 30 Ga smat Yahudi ta rderera fatfato Farisi re guru agamana, si dailow pa bo Yohanese nsisop sina, gabe re laina, si dailow pa bo rderera Jou Lahatalla ni rencana bo si riri tubcana.

31 Yesuse nu hawe, "Ya bo ifatailo smat ta rtub oras taena re ahai, ga si tina laisa ahai e? 32 Ya ifatailo si laisa re wawai ta rtotolang mali pasar ina, ga rfable rgigam lali riri del-delona laitane,

‘Amame kuf suling bo mew, ga mew fowa pa. Amame kmanyanyi nyanyian matmat, ga mew ftangis pa.’

33 Mew laisa wawai tina. Ningalena oras ta Yohanes ta nfasisopca nlafona, mew failowi pa. I nan roti pa re ndom anggur pa, ga mew fu, ‘I setane ncung i’. 34 Tane, Ya Smate Ntu ta mali sorogai malica ilafo to. Ya ipuasa pa fare Ya ma jaga idom anggur. Ga mew fu, ‘Co fem! Smat tae nmasefsefat fare nmadom. I ma jaga nfadeldelo re smat ta rfayalo pajakna, fare smat ta rbaradosa nesana.’ 35 Ga makse mew failow Ya re Yohanes pa, Jou Lahatalla ni mafiana osta mew fem oras ta smat ta rderera Jou Lahatalla ni mautingna, nfaem si riri tubna mafia ndumi."

36 En smat Yahudi isa mali fatfato Farisina, i ngahnyo Simon. I nololaw Yesuse bo nceli mali ni ebai i. Yesuse nlafo lali i ni ebai i, gabe ntotolang nceli mana. 37 Mali pnu cia, maping isa ta smatna rto i maping mayai i. I nlonga Yesuse nceli mali smat Farisi cia ni ebai i. Gabe i nlafo mana nut egat pau mafia ta mulona mamagal mali botol isa. 38 I nosal mali Yesuse taona, ndahle Yesuse ficona, taga ntangis. I nfasisongit Yesuse ficona re i na oyangna, taga i ntolase ga nfamang re i ni utana. I nfatan Yesuse ficona, fare nepo egat pau mafia mali Yesuse ficona. Maping isa ta nbaradosa nmomsa egat pau mafia mali Yesuse ficona

39 Oras Simon ta nololaw Yesus ca nem ahai ta maping cia npeina, i nututa mali wlona laitane, "Gabe laisa Yesus fatutuwa nabi i, I osta nto ise maping ta nice Ica, fare mfalaisa maping cia ni tabeatna. I osta nto, maping cia maping mayai i."

40 Ga Yesuse nua Simon laitane, "Simon, en ta Ya bo ikuwa awna."

Simone nu, "Mu to, Guru."

41 Gabe Yesuse nu, "En smat silu rbawi tiwi mali smat isa ta jaga nfabawo tiwi. Smat isaca nbawi slubilim tiwi dinarna, fare isaca nbawi yafalim tiwi dinarna. 42 Ga smat silu tasa dafena panto bo rhawe tiwi tinana. Gabe smat ta nfabawo si tiwi cia nfayangise si riri linganna. Tane laisa aw Simon, ise mali smat silu tasa ta ni masiyena foloi mali smat ta nfabawo si tiwica?"

43 Simone ncanglo, "Japa smat ta rfayangise ni lingana lalca laha."

Yesuse nu, "Aw msanglo tina molang."

44 Gabe, Yesuse nning-ningo maping cia, fare nua Simon, "Simon, aw mem maping tae. Oras ta Ya ilaho lali aw nim ebai i, aw mfasiap waya pa bo Ya ikuwase ficok, laisa ta ite jaga tpeona. Ga maping tae, i nfaberesi Ya ficokna npake i na oyangna taga ntolas nfamang re i ni utana. 45 Nanai oras ta Ya ilafo malina, aw mfatan Ya pa laisa ta ite jaga tpei bo ttotoman smat ta rlafona. Ga maping tae, Ya ilafo denabe tane, i nfolhola pa nfatan Ya ficoknana. 46 Aw bena mduplo filifan pa egat mali Ya bobokok taena, tderera laisa ta ite ttotoman smat ta rlafona. Ga maping tae, i nduplo egat pau mafia mali Ya ficokna. 47 Gabe tina, flonga famafia e, maping tae ni dosa ta lal tina nduk ampunge to. Gabe i, nfaeme ni masie ta mamagalna mali Ya i. Ga laisa smatca ni dosana okocebe, okocebe bena i nfaeme ni masiyena, ningalena okocebe i ni dosa ta dampungna."

48 Fola tina, Yesuse nua maping cia "Aw nim dosana ikampunge to!"

49 Rlonga tina, smat ta rceli farerer re Yesusna, dututa mali wlori laitane, "I nu japa I Jou Lahatalla laha ta bisa nampunge smatna riri dosa?"

50 Ga Yesuse nua maping cia, "Aw msalamate to ningalena aw mdela Ya. Gabe muwe to re wlomna tengtengan!"