1 Tiberiuse ndadi kolano mamagal mali Roma, ga oras ta ncung taun yafasa re hailim, Pontius Pilatus ta ndadi gubernur mali batang Yudea, fare Herodes ndadi kolano mali batang Galilea, Herodese tenoca ngahnyo Filipus ndadi kolano mali batang Iturea fare batang Trakhonitis, taga Lisanias ndadi kolano mali batang Abilene. 2 Ta rdadi imam mamagal mali Agama Yahudina, si ngahnyorina Hanas re Kayafas. Oras cia Jou Lahatalla nmauting lali Yohanes i, Zakharia ntuca, puli Yudea mali Padang gurun gagaw ta namliley, fare nalaspa mali pnu i.

3 Gabe tina, Yohanese nfan lali farumi batang ta ndahle waya Yordan, taga nfabinga smatna laitane, "Fiwane wlomewna bo fderera Jou Lahatalla, fare laina Jou Lahatalla osta nampunge mew. Gabe failowe to bo rsisope mew, tina ningalena mew ffailowe fderera Jou Lahatalla."

4 Yohanes cia smat ta popise i Jou Lahatalla nu bo nlafo, ga tina rlefo mali kitab Nabi Yesaya laitane,

"Osta en smat isa bo nmautingna nfacicoali lali smat ta rfayalo si mali padang gurunna gagaw isa ta namliley fare nalaspa mali pnuna

I nu, ‘Famawah lalingna bo failow Jou,

faolang lalingna bo ftotoman I.’

5 Ga ta npei lolona nane rpuco re rakrak,

ga lolas re popona nane ffarata.

Laling ta molang pana ffaololang,

fare laling ta nmapei lopna fpuco bo ffasafsafo.

6 Fare farumi smatna osta dem mfalaisa Jou Lahatalla bo nfasalamate smatna mali riri dosana."

7 Smatna lal rlafo lali Yohanes i bo ncisop si. Gabe Yohanese nua si, "Ee, mew tane smat ta fmayai! Nimew mayaina laisa gu ta nbisana. Mati fu mew flafo mali ga fduk sisope to, mew bisa fsalamat mali Jou Lahatalla ni sal-salna.

8 Gabe mew fatutua fiwane wlomewna fderera Jou, mew nane fpei okosesi ta mafia bo ndadi fafayal mew failow fderera Jou weto. Tina laisa ai ta nbokana, piyona mafia. Mati mew ffikir mew fbebas mali sal-sal ningalena mew Abrahame ntu re bbu. Ya ikuwa mew, gabe Jou Lahatalla nailow, I bisa npei pat tane ndadi Abrahame ntu re bbu. 9 Jou Lahatalla nfapepeya I to bo nfasal farumi smat ta rderera I wlona pana. Tina ifatailo laisa smat isa nfapepeya i re bacu bo ncelap ai ta piyona mayai, taga ntopa ai cia lali yapca."

10 Gabe, lal smatna rfautno i, "Ahai ta amame nane kpeina bo Jou Lahatalla mati nfasal am na?"

11 Yohanese nu, "Ise gabe ni kabayana ailu, isa nane noce smat ta ni kabaya paca, fare ise ga na an, nane noce smat ta na an paca." Yohanese ncula farumi smatna diwane wlorina rderera Jou

12 Smat ta rfayalo pajak nama rlafo Yohanes, rdore bo Yohanes ncisop si. Si rfautno Yohanes, "Guru, ahai ta amame nane kpeina?"

13 Yohanese nu laitane, "Oras ta mew fayalo pajak, ffayalona mati foloi mali ta pamarentana rcula mew ffayalonana."

14 Mana, en bena tentara ta rlafona. Si rfautno Yohanes, "Gabe amam, ahai ta nane kpeina?"

Gabe Yohanese ncanglo si, "Mati ftolea smatna taga fyale riri tiwinana, fare mati fu smatna rcalna bo si doce mew tiwi. Fennyo mew re nimew sagige mulo ta fdukna."

15 Ga rlonga Yohanese ni mautingna, smatna dututa mali wlori, "Wahle Yohanes tae to Mesias, Kolano ta ite ttotoman fare tmaulango, ta Jou Lahatalla njaji bo nfasalamat it." 16 Ga Yohanese nua ndumi si, "Ya isisope mew re waya, ndadi fafayal mew failowe to bo fderera Jou Lahatalla. Ga osta, Smat isa bo nlafo, I ni kawasana foloi mamagalna mali ya i. Ga bo idadi i ni sulsula, ta bo isalawe ni wala nalna bere ya bisa pa. I cia ta bo ncisope mew npake Jou ni Rohca fare yap. 17 I bo nfara smat ta rderera Ina fare smat ta rderera I pana. Tina laisa smat ta rfisang gandum bo rfara ni irna. Gandum ta mafiana i nisin mali gagaona, taga ni irna ntopa lali yap ta nmat-mat paca."

18 En sogaro ta nesana lal ta Yohanese nua smat lalo tina bo si dailow rderera Jou, fare si rderera Abar Mafia mali Jou Lahatalla i.

19 Yohanese ma ntolea kolano Herodes. Herodes tae nkawasa mali batang Galilea. Yohanese ntolea Herodes, ningalena Herodese nfasawa Herodias, i ni tamai tutuwo i. Yohanese ma ntolea hawe Herodes, ningalena lalna gaole to npei okosesi ta mayaina. 20 Ga Herodese nailow pa nderera Jou. Taga i ntole nbang, i ncunga Yohanes namul buica.

21 Oras ta Herodese nfasunga Yohanes bui paubena, Yohanese ncisope smatna lal. Fare Yesus, i ncisop i. Oras ta Yesuse nduk ncisop, I ncombayang gabe langitca nmarasia.

22 Fare, Jou ni Rohca nlafo I. Jou ni Roh cia laisa mani pombona. Fare rlonga Jou Lahatalla nu mali langitca laitane, "Aw tane Ya Ntuk Aw, ta Ya imasiye Aw. Aw ta mpei Ya wlokna sangnang."

23 Yesuse nmulain npei ni karajanna oras ciana I ni umur sal pana taun yafatol. Smat puli nana rfayala, Yesus cia Yusufe ntu i. Tane I hma re bbu tantuba ngahnyorina, tetang mali Yusuf i.

Yusufe hma ngahnyo Eli,

24 Eli hma Matat,

Matate hma Lewi,

Lewi hma Malkhi,

Malkhi hma Yanai,

Yanai hma Yusuf,

25 Yusufe hma Matica,

Matica hma Amos,

Amose hma Nahum,

Nahume hma Hesli,

Hesli hma Nagai,

26 Nagai hma Maat,

Maate hma Matica,

Matica hma Simei,

Simei hma Yosekh,

Yosekh hma Yoda,

27 Yoda hma Yohanan,

Yohanan hma Resa,

Resa hma Zerubabel,

Zerubabele hma Sealtiel,

Sealtiel hma Neri,

28 Neri hma Malkhi,

Malkhi hma Adi,

Adi hma Kosam,

Kosame hma Elmadam,

Elmadame hma Er,

29 Er hma Yesua,

Yesua hma Eliezer,

Eliezer hma Yorim,

Yorime hma Matat,

Matate hma Lewi,

30 Lewi hma Simeon,

Simeone hma Yehuda,

Yehuda hma Yusuf,

Yusufe hma Yonam,

Yoname hma Elyakim,

31 Fare Elyakim hma Melea,

Melea hma Mina,

Mina hma Matata,

Matata hma Natan,

taga Natane hma Daut,

32 Daute hma Isai,

Isai hma Obet,

Obete hma Boas,

Boase hma Salmon,

Salmone hma Nahason,

33 Nahasone hma Aminadab,

Aminadabe hma Admin,

Admine hma Arni,

Arni hma Hezron,

Hezrone hma Peres,

Perese hma Yehuda,

34 Yehuda hma Yakub,

Yakube hma Ishak,

Ishake hma Abraham,

Abrahame hma Terah,

Terah hma Nahor,

35 Nahore hma Serug,

Seruge hma Rehu,

Rehu hma Peleg,

Pelege hma Eber,

Ebere hma Salmon,

36 Salmone hma Kenan,

Kenane hma Arpakhsad,

Arpakhsade hma Sem,

Seme hma Nuh,

Nuh hma Lamekh,

37 Lamekhe hma Metusalah,

Metusalah hma Henokh,

Henokhe hma Yared,

Yarede hma Mahalaleel,

Mahalaleele hma Kenan,

38 Kenane hma Enos,

Enose hma Set,

Sete hma Adam. Taga Adam cia, Jou Lahatalla to ta npei i, gabe i ndadi Jou Lahatalla Ntu i.