1 Bahnga na, neta wol ta smat Yahudina bisa rkarajan paca, Yesus I re ni muritna rfan rdel mali bet gandumca. Oras ciana, ni muritna rkati gandum ese, fare si rloba gicona rpake kakamorina taga dan. 2 Mana, smat Yahudi diranca ta rderera fatfato Farisina. Si du laitane, "Pesaga mew fkarajan fkati gandum mali wol Sabat taena? Tina mew fsapiyal animam agamaca ni fatfatona!"

3 Gabe Yesuse nua si, "Ga mew japa fbaca to mali Jou ni Kitabcana ga kolano Daut, oras ta i re ni smat ta rderera ina rbibisil. 4 Kolano Daute ncung namul Jou Lahatalla ni Ebaica, taga nan roti ta ndadi sadaka lali Jou Lahatalla i tona. I ma noce rotina lali smat ta rderera Ina. Ga roti tina, gabe tderera animam agamaca ni fatfatona, imamna be ta danna.

5 Ya iku farumi tina, ningalena Smat ta mali sorogaica, ni kawasa bo nfato ahai ta smatna bisa rpei mali wol Sabat taena." Yesuse ni muritna rkati gandum mali wol Sabatca

6 Bahnga na, mali wol Sabate nesana, Yesuse ncung mali ebai sombayang smat Yahudina ga nfafcule. Mana en smat isa kakamo welana nmat. 7 Mana bena en guru agama Yahudi ta rto Musa ni kitab silim tasa fare smat Yahudi ta rderera fatfato Farisina. Si jelyelo be Yesus, gabe laisa I bo nfamafia smat mali wol Sabat tae, si bisa rduk laling bo du I ncal. Gabe si dailowe bo rto ga Yesus osta nfamafia smat mali wol Sabat tae pare enpa. 8 Ga Yesuse nto wlorina, gabe nua smat ta kakamo pao nmat cia, "Mali aw mosal mali ta ibo tane!" Yesuse nfamafia smatna neta wol Sabat

Gabe smat cia i lali ga nosal mana. 9 Fola tina, Yesuse nfautno smat ta si manana laitane, "Ya ifautno mew. Gabe tderera ite smat agama Yahudina rir fatfatona, ahai ta ite nane tpei mali wol Sabat taena? Tpei okosesi ta mafia pare tpei okosesi ta mayai? Tfasalamate smat pare tpune smat?"

10 Gabe Yesuse natngalo si ndumi, fare nua smat ta kakamo pao nmat cia laitane, "Mtena kakamomna mali!" Smat cia npei laisa ta Yesuse nuna, fare kakamona ma mafia.

11 Dem tinana, smat ta rto Musa ni kitab silim tasa fare smat ta rderera fatfato Farisina, rtolena gaole. Gabe si mulaine rpei sogaro ta mayaina lali Yesus i.

12 Bahnga laitane, Yesuse nfan lali lolas isa bo ncombayang. Mana, I ncombayang doram pusa lolo lali Jou Lahatalla i. 13 Semaca dororam i sube, Yesuse nololaw smat ta jaga rderera Ina, taga I nfisang smat yafasa re silu mali sili. Smat yafasa re silu tasa ta bo rdadi I ni susula. Tane si ngahnyorina: 14 Simon (ta Yesuse jaga nololaw i Petrusca), Andreas (Simone teno i), Yakobus, Yohanes, Filipus, Bartolomeus, 15 Matius, Tomas, Yakobus (Alfeuse ntu i), Simon ta smatna du nfaungo smat roma ta rkawasa mali batang Israelna, 16 Yudas (Yakobuse ntu i), fare Yudas Iskariot ta hola bo nwage Yesus ca.

17 Fola tina, Yesuse nduri puis lolasca nfarerer re ni murit yafasa re silu tasa, fare si rhola mali gagaw isa ta ntutiyai. Mana lale to smat ta jaga rderera Ina, fare smate nesana lal bena ta rlafo mali batang Yudea, mali bendar Yerusalem, fare mali Tirus re Sidon, bendar silu ta si mali olat lapo tasa. 18 Si rlafo bo rlonga Yesuse ni fafculena, fare bo I nfamafia si mali riri owilna, fare smat ta setane ncung sina rdadi rmafia. 19 Farumi smat ta si manana rmario bo dice Yesus, ningalena en kawasa ta ncapang mali I ni badancana ta npei farumi si rmafia.

20 Yesuse natngalo ni muritna fare nu laitane,

"Fsangnangna gaole mew ta namew paisa pana,

ningalena, mew osta fdadi Jou Lahatalla ni smate mew ta I nkawasa ndadi Kolano.

21 Fsangnangna gaole mew ta oras tae fbibisilna,

ningalena Jou Lahatalla osta npei mew fbibisil panto.

Fsangnangna gaole oras tae ta ftangisna,

ningalena Jou Lahatalla osta npei mew famlif.

22 Fsangnangna gaole makse smatna riri le mew fare dailowe mew pa, daraga mew pa fare rfamayai ngahnyomewna, ningalena mew fderera Ya.

23 Fsangnange to oras ta mew fduk tinana fare fsenga,

ningalena Jou Lahatalla nfasiape namew sagige mulona mamagal mali soroga i.

Ga, laina bena ta si hma re hburi tantubana rpei ta mayai lali nabi ta jaga rfalafo Jou Lahatalla ni fatnawna."

24 "Ga mew ta oras tae fkayangna, osta fkapalange to mew ya, ningalena mew fbasam sangnangca to mali nimew aratana.

25 Ga mew ta oras tae fmosina, fkapalange to mew ya,

ningalena mew osta fbibisil.

Ga mew ta oras tae famlifna,

fkapalange to, ningalena osta fmagogoru mew fare ftangis.

26 Ga mew ta fiyawa taitail mali smat lalona, fkapalange to mew,

ningalena tina laisa ndadi i tantuba mali nabi ta damolang pana.

Nabi ta nesana du, dut Jou Lahatalla ni fatnaw, naga enpa.

Mew hma re hnye mew tantubana jaga rfamamagal si."

27 "Ga mew ta flonga Ya oras taena, Ya bo ikuwa mew laitane: mew nane fmasie smat ta wlori lolo mew pana, fare fpei ta mafia lali smat ta riri le mewna. 28 Fsombayange bo fdor Jou npo ta mafia lali smat ta rcasi mewna, fare fsombayang si bena smat ta wlorina mayai lali mewina. 29 Gabe laisa smat isa naspakale ngengeo mew paona, fpo hawe paona. Gabe laisa en smatna rcefto nim jubana, mfabiar i to nyale nimew kabayaca. 30 Gabe laisa en smatna rdor okosesi lali mewi, foce i to ahai ta i ndorna. Gabe laisa en smatca ncefto nimew okosesina, fabiar i to, mati mew fowla hawena ahai ta i ncefto tina. 31 Ga ahai ta mafia ta mew flokolo smatna rpeo mew, tina to ta mew nane fpeo smate nesana.

32 Ya isula laina, gabe laisa mew fmasiye be smat ta rmasiye mewna be, ni ngale pa mali Jou Lahatalla uhngona. Ningalena smat ta rderera Jou pana ma rmasiye smat ta rmasiye sina bena. 33 Gabe laisa mew fpei okosesi ta mafia lali smat ta jaga rpei okosesi ta mafia lali mewina, ni ngale pa mali Jou Lahatalla uhngona. Ningalena smat ta rderera Jou pana ma rpei okosesi ta mafia lali smat ta rpei okosesi ta mafia lali silina. 34 Gabe laisa mew ffabao tiwi lali smat ta fmaulango, bo niwan tiwi tina, ningale pa mali Jouca uhngona. Ningalena, smat ta rderera Jou pana ma jaga rpei laina bena, si bisa rduk hawe tiwi tina, enpa ta nkurang.

35 Ga mew mati fpei lainana! Mew nane fmasiye nimew musuna fare fpei ta mafia lali sili. Mew ffabao si ahai ta me namewna, fare mati fmaulango bo rfaweo mew hawena. Gabe laisa mew fpei laina, mew osta fduk sagige mulona mamagal. Gabe laisa mew fpei laina, mew osta fdadi laisa Jou Lahatalla ta tigoca ntu mew. Ningalena, Jou Lahatalla ni mafiana mali farumi smat, makse si wlorina mayai fare rto pa rdor tarima kasena. 36 Mew nane faeme nimew masiyena lali smatna, laisa ite Hmar ta mali sorogaica nfaeme I ni masiyena lali farumi smat."

37 Yesuse nu hawe, "Mati mew ffasala smate nesanana, bo Jou Lahatalla ma mati nfasala mewna. Mati ffasale smatna, bo Jouca ma mati nfasale mewna. Fampunge smatna bena, bo Jouca ma nampunge mew bena. 38 Mew nane flokolo foce smatna okosesi, bo Jouca ma noce mew bena. Ngisngis ta nmafia Jouca bo npo mew, tina laisa smat ta rngis pinge denabe ngisngisca nbakbak, fare ntibe i bo nfaifif taga nbang hawe denabe nmaraepa. Gabe laisa mew ffaocena okoce be, Jouca ma osta noce mewna ma okoce be. Gabe, laisa mew ffaocena lal, Jouca ma osta noce mewna lal bena."

39 Yesuse nu hawe andeande isa laitane, "Ncung akal pa smat ta nbiafca bo nfafcule laling lali smat ta nbiaf bena cana. Smat silu tasa osta rmarapawlo lopna. 40 Enpa murit ta foloi mali ni gurucana. Gabe laisa i ni guruca nfacule i, i osta ndadi laisa ni guruca bena.

41 Mew mati ftarokira be smatna riri sal ta nenena nana, taga nimew sal ta mamagalna fatengtengna. Tina laisa ai mumuno mali ramamewca mtana, mew ftarukira i, taga balak ungo ta ntibane mtamew naca ftarokira i pa. 42 Gabe mfalaisa bo fuwa ramamcana, ‘Ramak ta aw, mali bo isalawe ai mumuno ta mali mtamnaca,’ taga balak ungo ta mali mtamnaca mfatengtengna i. Ee, mew tane smat ta fmadarawa, fsapnga isu balak ungo ta mali mtamew naca, taga mew femna mafia, bo mew bisa fsalawe ai mumuno ta mali ramamewca mtana."

43 Yesuse nu andeande isa hawe, "Ai ta nbokaca bisa pa bo piyona mayaina. Laina bena ai ta nboka paca, bisa pa bo piyona mafiana. 44 Smatna osta rto, ai ohlo aisa nmafia pare nmayaina mali piyona. Ga osta enpa tkati ara piyo mali ai ta ni soganana, fare osta bisa pa tkati anggur piyona mali mom ta ni soganana. 45 Laina bena smat ta rmafiana. I ni mautingna, fare ta i npei tina mafia, ningalena ta mali wlona okosesi ta mafia. Ga smat ta rmayaina, i ni mauting fare ta npeina mayai, ningalena ta mali i wlonana okosesi ta mayai. Ningalena ahai ta smat cia nuna mafia pare mayai, farumi tina ncapang mali smat cia wlona."

46 Yesuse nu hawe, "Pesa mew fololaw Ya, ‘Jou, Jou’, naga mew fpei pa ahai ta Ya ikuna? 47 Smat ta rlafo mali Ya i fare rlonga ta Ya ikuna fare rpei tina, i laisa smat ta npande mali andeande taena: 48 Smat ta npande cia nfaosal ebai. I n'gali rakrakcana mlaman, taga npei fandasi npake pat ta cicoalna. Taga nfaosal ebai cia puis fandasi cia popo. Gabe oras ta ipisca nlafo fare nyof ebai cia, ebai cia ncicoal ningalena ebai cia rfaosal i mali fandasi ta ncicoalca popo. 49 Ga smat ta nlonga ahai ta Ya iku ga i npei pa, i laisa smat isa ta nfaosal ebai mali nyinyenca popo, mali fandasica popo pa. Gabe oras ta ipisca nlafo, ebai cia namop, fare nmaraluka ndumi."