1 Oras ciana, en smat sifis ta rfabinga Yesus du smat Galilea ta Gubernur Pilatuse npun nfamat sina. Si rpun famat si na oras ta si rpo aiwani ndadi sadaka mali Ebai Sombayang Mamagalcana. 2 Yesuse nua smat ta rfabinga tina, "Mew fto smat tina rduk punpun ta nfalaina puli tinana, ningalena si riri salna foloi mali smat Galilea nesana? 3 Enpa! Ga Ya ikuwa mew e: Laisa fiwane wlomewna fderera Jou pa, mew farumi ma osta fmat laisa re si. 4 Fare en bena smat yafasa re siwai ta rmat re menara ta ndahle Siloam mali bendar Yerusalemca ntabi sina. Mew fto si tina rmatna ningalena si rpei dosana foloi mali smat nesa ta en mali bendar Yerusalemna? 5 Enpa! Ga Ya ikuwa mew hawe, laisa fiwane wlomewna fderera Jou pa, mew farumi ma osta fmat laisa re si."

6 Fola tina, Yesuse nu andeande isa laitane, "En smat isa ta na ai ara mali i na bet anggurca. Bahnga na, i nfan lali niyawa ai cia piyona. Ga piyo pusa ma i nduk pa. 7 Gabe i nua smat ta njaga bet cia laitane, ‘Mem, taun faicole to ya ilolai ma ilolai ikiyawa ai ara tae piyona, ga bahnga pa ya idukna. Tcelapi to ai tae! Pesa bo i ntub puis rakrak tae gabe laisa i piyo pa!’

8 Ga smat ta njaga bet cia nu laitane, ‘Matina su apa. Tfabiar i su taun bahnga hawe.’ Lomane ya ipacol iyela i taga ikafrao i pupuk. 9 Ise nto taun tatbo tae i piyo. Gabe laisa piyo pa, tcelapi to."

10 Bahnga na Yesuse nfafcule smat mali ebai sombayang agama Yahudina. Oras ta Yesuse nfafcule tina, neta wol Sabat, wol ta smat agama Yahudina bisa rkarajan pa. 11 Mana, en maping isa ta nowil taun yafasa re piwai e to, ningalena setanca nkawasa i denabe i npugut, fare nosalna ma molang pa. 12 Oras ta Yesuse nem maping cia, I nololaw i taga nu laitane, "Ngolo, mmafia to mali aw nim owilna." 13 Nu laina hola, Yesuse nising kakamona lali maping cia, tina to i ma nosalna molang. Gabe maping cia ncuba re nfamamagal Jou Lahatalla.

14 Nem tina, ta nfaboboko ebai sombayang agama Yahudi cia ntole, ningalena Yesuse nfamafia smat mali wol Sabatca. Gabe tina, i nua smat lalo ta manana, "En wol piwonam ite tpake bo tkarajan. Gabe laisa mew failow, flafo mali wol tina, mati mali wol Sabatcana."

15 Gabe Jou Yesuse nua smat cia, "Ee, mew smat ta fmadarawa! Makse cia wol Sabat i hawe, mew jaga fsapnga nimew sapi re keledai mali gagaorina, taga ffan faroma si waya. Tina ma karajan bena! 16 Maping tae Abrahame ntu re hbu i laisa re mew. I taun yafasa re piwaie to Setane ni Kolanoca nkawasa ina. Gabe, paisa pa laisa Ya ikowe i mali Setane ni Kolanoca ni kawasana, makse tane wol Sabat."

17 Rlonga Yesuse nmauting laina, farumi smat ta jaga rfakotale re Ina rdadi rmai. Ga smat laloca, si rcangnangna gaole ningalena farumi ta Yesuse npei tina mafia.

18 Yesuse nu hawe, "Jou Lahatalla nkawasa ndadi Kolano mulain mali smatna lal pa, gabe wol de wol nbang i ga lal. Ya bo ifatailo tina re ahai? Tina ifatailo laisa re andeande tae: 19 En gei pusa ta smatna rtiwa i mali beti. Makse gei cia nnenena, ga laisa ntube to, i ndadi oslo aisa. Taga manina rlafo rpei fafual mali ni magalna." 20 Fola tina, Yesuse nu hawe, "Jou Lahatalla nkawasa ndadi Kolano mali ni smatna, mulain mali smatna lal pa, gabe wol de wol nbang i ga lal. Tina Ya bo ifatailo re ahai hawe e? Laisa re andeande tae: 21 En maping isa nyal ragi taga nfulta re tirigu liter yafafat. Ragi tina npei denabe tirigu ta rfulta tina nca ndadi lal."

22 Fola tina, Yesuse nfaturusa I ni fanfanca lali Yerusalem. I nfan nyele pnu-pnuna, I ma nfafcule smatna mali gagaw tina. 23 Gabe en smat isa ta nfautno Yesus: "Guru, lal pa smat ta bo rduk salamatna?"

24 Yesuse nua smat ta manana, "Mew fmario to fsung fdelo bawa ta nkosca! Ningalena, smatna lal rmario bo rcung rdelo bawa ciana, ga si bisa rcung pa. 25 Ningalena oras ta si rlafona, smat ta niebaica nkait bawaca to. Gabe oras cia mew osta fososal potalil taga ftoktok bawaca. Mew osta fu, ‘Apa, msalawe bawa tae lae!’

I osta ncanglo mew, ‘Ya ifayala mew pa fare Ya ito pa mew manca mali.’

26 Gabe mew osta fuwa I, ‘Amam ta jaga kseli re kdom farerer re Apana. Apa bena ta mfafcule am mali nimam pnuna ni laling nana. Osta Apa mfayala am.’

27 Ga oras cia to I bo nua mew, ‘Flonga famafia ta Ya ikuwa mew tane, Ya ifayala mew pa fare Ya ito pa mew manca mali! Fdirake mewe to mantane, mew ta jaga fpei okosesi ta mayaina!’

28 Osta mew fem Abraham, Ishak fare Yakub rfarerer re farumi nabi ta rfalafo Jou ni fatnaw puli Jou Lahatalla ni gagaw ta Nkawasa ndadi Kolanoca, taga mew ta fsung mana pana, rfaungo mew fsapang, oras cia, mew osta ftangis re fkangelana gaole. 29 Osta smat mali gagawna lal mali dunia tae, mali polaw denabe polei, pap denabe pota, si tina, bo rtotolang rceli pumul Jou Lahatalla ni gagaw ta Nkawasa ndadi Kolanoca. 30 Ftarokira famafia, manana lal smat mamagal ta riri ngale mali dunia taena, osta rdadi smat ta riri ngale pa, fare smat ta riri ngale pa mali dunia taena, osta rdadi smat ta riri ngale."

31 Oras ta Yesuse nmauting sube, smat Yahudi sifis mali fatfato Farisina, rlafo I. Si du, "Apa, mfane to lali gagaw ta nesana, ningalena kolano Herodese bo npun famat Aw."

32 Yesuse nua si, "Mew ffan lali kolano Herodes ta nmapei akal cia, taga fu laitane, ‘wol pusa tae re mdoma Ya ifaungo setan re ifamafia smat ta dowil. Gabe wol pitolca, Ya nik karajanna bo myei to.’ 33 Ga makse laina ma, wol tae, mdoma re oplu, Ya nane ifan lali Yerusalem. Ningalena Jou Lahatalla ni nabi ta rfalafo I ni fatnawna nane rmat mali pnu Yerusalem, bisa pa mali pnu nesana.

34 Ali, sene mew, smat Yerusalemna! Mew ta fpun famat nabi ta ntuba ta rfalafo Jou ni fatnaw, re mewe ma ftig si re pat denabe rmat smat ta Jou Lahatalla ncula si lali mewina. Lao faifise to Ya ikailow ifayalo mew bo fdahle re Ya, laisa tatale ngolo ta ntabake ntu re fayona, ga mew failow pa. 35 Gabe tina, Jou Lahatalla osta nfalaspa i mali nimew bendarca, gabe bendar cia mamagal cia ndadi namliley. Flonga famafia e, mew osta fem Ya panto. Ga lomane oras ta Ya ilafo hawe, mew osta fem Ya hawe re fu laitane, ‘Tfamamagal I ta Jou Lahatalla ncula nlafo mali.’ "