1 Gabe farumi smat ta rderera sidang ciana dosal, fare si dut Yesus bo nbo gubernur Pilatus. 2 Mana si rmulaine du Ina salna, du laitane, "I tae ta nua smat mali bangsa taena bo mati rpalas pajak lali kolano mamagal Romacana. I bena nu I cia Kristus, ta ni ngale Kolano ta Jou Lahatalla njaji nfasalamate smatca."

3 Gabe gubernur Pilatus nfautno I, "Fatutua Aw tane smat Yahudina riri Kolanoca?"

Yesuse ncanglo, "Apa awe to ta mu lainana."

4 Gabe gubernur Pilatuse nua agama Yahudina riri imam ta rfaboboko re smat lalo ta en manana, "Makse pusa ma ya iduk pa I na salna." Yesuse durus i mali gubernur Pilatus i

5 Ga rbange rfacicoal si du Yesuse na mayai, si du, "I tae ta nua smat laloca mali farumi batang Yudea, re I ni nfafculena bo rlawang pamarentana. I nmulain mali batang Galilea denabe nlafo mantane, mali bendar Yerusalem."

6 Oras ta gubernur Pilatuse nlonga Yesuse nfabinga mulain mali Galilea, gabe i nfautno si, "Gabe, fatutua Yesus cia smat Galilea i?" 7 Gabe i nto Yesus cia smat Galilea i, Pilatuse ncula si dut Yesus rfan lali Herodes Antipas i, ningalena Herodes ta nkawasa mali batang Galilea. Oras ciana, Herodes i mali Yerusalem.

8 Nem Yesus laitane, Herodes ncangnangna gaole, ningalena mnu to nlonga du Ina re mnu to bo nem Yesusna. Herodes nmaulango i bisa nem Yesuse npei mujizat. 9 Herodes nfautanna lal lali Yesus ina, ga Yesuse ncanglo paisa pa. 10 Oras cia, smat Yahudina riri imam ta rfaboboko re guru agama Yahudi ta rto ndumi Musa ni kitab silim tasa, rfan potao fare du na sal ta tebtebna lali Yesus i. 11 Gabe Herodes i re ni tentarana rmulaine du na sal fare rfamaimai Yesus, taga si rfapake I juba ta mafiana laisa kolanona rpakena. Taga, si rloila I lali Pilatus i. 12 Fare mulain wol cia to, Herodes re Pilatus rfadeldelo, naga ta ntuba malina si smat silu tasa rfasangnang pa.

13 Fola tina, gubernur Pilatuse nololaw imam ta rfabobokona, fare ta rfaboboko Yahudina re smat Yahudi ta nesana rfayalo si mali Pilatuse ni istanaca. 14 Fare Pilatuse nua si, "Mew fute Smat tae mali ya i, fu, I nua smatca n'gaole to bo rlawang pamarentana. Ga tane mew fem! Ya ikurus I to mali uhngo mew tane, ga makse pusa be ya iduke na salna pa laisa ta mew funana. 15 Herodese ma nduke I na salna pa, gabe i nfawe i hawe Smat tae mali amam i. Molang, I cia npei sal paisa pa, ta npei I denabe tfasali nmatna. 16 Gabe ya bo ipun I re wala, taga ikowe I."

17 Pilatuse nu bo nowe Yesus, ningalena etnga be taun oras ta smat Yahudina riri wol mamagal, I jaga biasa nowe smat isa. 18 Ga oras smat laloca rlonga tina, si farumi ta manana rgigam farerer, du, "Mpun famat I to, bo mowe Barabas mali amam i!" 19 Barabas cia smat ta nduk rcunga i bui, ningalena mali bendar Yerusalemna i re ni delna bo rfaungo pamarenta Romana, fare si npun famat smatna.

20 Ga Pilatuse nalow nowe Yesus. Gabe i nmauting hawe re liona nfacicoali lali smat ta en manana. 21 Ga si rgigamna rfacicoal si hawe, si du, "Msalipi I to! Msalipi I to!"

22 Gabe ta faicolna Pilatuse nua si, "I npei sal-sal ahai ga? Ningalena ya iduk I na salna pa, makse pusa be ta npei I bo nduk tfasali denabe nmatna. Gabe ya isula fpun I, hola tina ya bo ikowe I."

23 Ga si re rpaksa gabe du re liorina rfacicoal si bo rsalip Yesus. Ni morco napna, si duntung ningalena si rgigam turus re rpaksa. 24 Gabe Pilatuse nyal nfaorit nap nderera si duna. 25 Pilatuse nowe Barabas nderera ta si duna. Barabas cia smat ta nduk rcunga i bui ningalena nlawanng pamarentana fare npun famat smatna. Ga Yesus i npo i lali sili, lomanta si bo rpei laisa.

26 Fola tina, tentara Romana dut Yesus rcapnga i mali bendar Yerusalem. Gabe mali lalingca fapaluan, si rfaduduk re smat isa i ngahnyo Simon. Simon tae smat Kirene i, i taga nlafo mali bendarca potalil mali. Si rtahan i gabe rcula npapa salipca taga nderera Yesus mali taona.

27 Smat lalo ta rderera Yesus mali taona. En bena maping-maping ta rtangis re rgigam rfacicoal si ningalena rmasie Ina gaole. 28 Ga Yesuse nfulasi nyelyelo si, fare nu; "Ee, mew maping-maping Yerusalem! Mati ftangso Yana. Ga ftangso nimew dirica fare ntumewna! 29 Ningalena osta bo en kangela ta tebtebna gaoleca, gabe wol cia osta en smatna du laitane, ‘Rcangnangna gaole maping ta nturi pana, ta rdadikna pa re ta rfasuse nturina pana.’ 30 Gabe smatna osta du lali lolasna, ‘Maraciwe to bo ntabi amam bo kmat!’ Fare du lali popona, ‘Mpuco ame to.’ 31 Ya iku laina ningalena Ya ta ipei dosa pa bere si rsalip Ya laitane, ahai hawe laisa mew ta jaga fpei dosana. Ya laisa re ai ta mang pawbena gabe ikamgini ndumi pa. Ga mew laisa ai ta mange tona, gabe laisa feta yap famgini ndumi."

32 Oras ciana, tentara Romana dute smat silu bena, ta wlorina mayai, bo rsalip si farerer re Yesus. 33 Oras ta si rlafo mali gagaw isa ta ngahnyo "Gagaw Tengkorak", si rsalip Yesus mana. Sile ma rsalip smat silu ta wlorina mayai tasa bena, ta isaica i mali Yesuse ni welana fare ta isa benaca i mali Yesuse ni balitna. 34 Yesuse ncombayang, "Apa, mampung si ningalena si rto pa ahai ta si rpeina." Gabe tentarana rcibit lot bo rto ise re ise ta bo rduk Yesuse ni pakenana.

35 Smat lalo ta dosal manana deme ndumi ta ndadi ina, gabe ta rfaboboko smat Yahudinana du Yesuse na rfamaya i. Si du, "Smate nesana I nfasalamat. Tane inanai to bo I nfasalamat I ni dirica, gabe fatutua I cia Mesias, Kolano ta Jou Lahatalla nfisang I bo nfasalamate smatca." Yesuse rsalip i re smat silu tasa

36 Fare tentara Romana ma du Ina mayai, si rdahle I, taga rfaroma I anggur kakaninca. 37 Fare si du I hawe, "Gabe laisa fatutua smat Yahudina riri kolano Aw, mfasalamate nim dirica to!" 38 Fare puis Yesuse bobokona fafan ungo isa rlefo laitane, "Tae smat Yahudina riri kolanoca."

39 Fare isa mali smat mayai silu ta rsalip si tasa isaca nu Yesuse na mayai, i nu, "Aw Kristus, paga? Kolano ta Jou Lahatalla njaji bo nfasalamate smatca. Gabe laina, co mfasalamate nim dirica, fare amam bena!"

40 Ga smat mayai ta isaca ntolea i, "Ya, aw tina smat ta imayai ta mduk sal-sal ta laisa re I, pesa aw mamcait Jou Lahatalla pana? 41 Ite smat it lu tane pantas tduk sal-sal tane ningalena ite rir mayaina, ga I pantas pa bo nduk sal-sal tanena ningalena I npei sal paisa pa." 42 Gabe i nua Yesus, "Yesus, mlolam ya oras ta mlafo mdadi kolanona."

43 Gabe Yesuse nua i, "Ya ikuwa aw, wol tae to aw osta mfarerer re Ya mali Firdaus."

44 Orasna japa tok yafasa re pilu, farumi batang cia ndadi ndororam denabe tok faicol malingin, 45 ningalena wolca ntul pa. Gabe oras ciana, kaing titiban mamagal ta rcakta i bo rtibane rfara gagaw ta Jou nlafo ni smat mali gagaw isa mali Ebai Sombayang Mamagal cia nmarasekan ndadi silu. 46 Gabe Yesuse n'gigam nfacicoal i, I nu, "Apa, Ya ipo nik jiwa tae lali Awi." Nu tina hola, Yesuse ulaya morit.

47 Oras ta komandan Romaca nem ahai ta ndadi i tina, i nfamamagal Jou Lahatalla fare i nu, "Fatutua, I tae smat ta ncal pa!"

48 Gabe smat lalo ta rfayalo si manana, oras ta si dem ahai ta ndadi ina si duwe, si rpakal be ularina ni fafayalna si rmanyasal. 49 Farumi smat ta rfafayala re Yesusna, fare maping-maping ta jaga rderera I puli Galilea malina, si dosalna laspa fare deme ndumi ta ndadi i tina.

50 En smat isa ngahnyo Yusuf. I cia smat isa mali agama Yahudina ta duruse smat ta nmamagal ta ngahnyori Mahkama Agama. I cia smat mafia i re ntubna fatutua mali Jou Lahatalla uhngo. 51 I mali Arimatea, bendar ta mali batang Yudea. I cia ntotoman Jou Lahatalla bo nkawasa ndadi Kolano mali I ni smatna. I nlokolo pa re Mahkama agama Yahudi ta rfaorit bo rpun famat Yesusna, re i ma nlokolo pa ahai ta si rpeina. 52 Gabe I nfane nbo Pilatus taga ndore bo Pilatuse npo Yesus ni mayatca mali Yusuf i. 53 Oras ta Pilatuse nalow, Yusufe ndureya Yesus ni mayatca mali ai salipca. Taga i nopi re kaing bubulang ta muhuf laisa re smat Yahudina jaga rpei oras rgaile smat ta rmatna, taga n'gaile I mali piling isa ta rgali i mali popo patca. Piling tina smatna rpake rfagaile bahnga paube. 54 Yesuse nmatna wol jumat, neta smatna rciap ningalena mdoma bo wol Sabat. Gabe mali wol jumatcana, smat Yahudina nane rfatoto riri karajanna ndumi oras ta wolca ncop paubena, ningalena mali wol Sabat ciana smatna bisa rkarajan pa. Gabe, oras Yusuf n'gaile Yesusna bo dorame to gabe wol Sabatca bo nmulaine to.

55 Fare maping-maping ta rlafo farerer re Yesus mali batang Galilea malina, si ma rderera Yusuf oras ta bo n'gaile Yesusna, si deme gagaoca, fare mfalaisa Yesus ni mayatca nising i pumul piling goa puli popo patcana. 56 Fola tina, si duwe gabe rfasiap rampa-rampa ta pauna mafia fare egat ta pauna mafia bo si rmomsa Yesuse ni mayatca laisa re smat Yahudina jaga rpeina. Ga oras ciana malingine to, gabe mulaine wol Sabate to, gabe si rfola karajanna ningalena rderera agama Yahudina ni fatfato ta bisa pa smatna rkarajan mali wol Sabat ciana.