1 Bahnga laitane, Yesuse nfafcule hawe mali talaga Galilea mtopona. Mana smatna lal rfayalo si rlafo lali I. Gabe I ndawil nais pelang ta rcowla si tasa, taga ntotolang mana, taga smat ta lalna si mali talaga ca mtopo. 2 Mana Yesuse nfafcule si okosesina lal, npake andeande. I nu laitane, 3 "Flonga famafia! En smat isa nfane ncake gei mali beti. 4 Oras i ncake gei tina, en gei ta marapawil mali lalingca, fare manina rlafo ga dan denabe mnyei. 5 En gei ta nesanaa marapawil mali rakrak ta ni pat, ta ni nyinyenna okoce be. Gei ta marapawil tina fatoal be ntubna ningalena ni nyinyenna okocebe. 6 Ga wolca nca, tatanam tina mlai fare mang, ningalena ni waca ncungna law pa. 7 Ga en bena gei ta marapawil mali rakrak ta ni momna soga. Gei tina ntub, mom ta ni sogana nbangi ga nmamagal gabe nbalat tanam tina denabe nmat, gabe tatanaman tina piyo pa. 8 Ga en gei nesa ta marapawil mali rakrak ta mafiana, ga ntub, fare piyo. Piyona denabe tutuaf yafatol, tutuaf yafawona fare en ta denabe tutuafe slubisa." 9 Yesuse nu hawe, "Flonga tina famafia fare fising mali wlomewna!"

10 Laina motle be Yesuse ntutuling, I ni murit smat yafasa re silu fare smat ta rderera I na, rfautno andeande cia ningalena. 11 Gabe Yesuse ncanglo si, "Jou Lahatala npei bo mew fto mfalaisa Jou Lahatala bo Nkawasa ndadi Kolano mali smat ta rdela I na, ga mali smate nesana, tina Ya ifabinga ipake andeande, 12 bo ahai ta Jou Lahatalla nuna ga si mali Jou ni Kitabcana tina ndadi to,

‘Biare ga si dem, si rtaif pa ahai ta demna.

Biare ga si rlonga, si rtaif pa ahai ta rlongana.

Si rtaif pa gabe si diwane wlorina pa fare rduk ampung pa.’ "

13 Fola tina, Yesuse nua ni muritna fare smate nesa ta rderera I na laitane, "Gabe laisa mew ftaif pa andeande tae, mfalaisa mewe bo ftaif andeande ta nesa hawena? 14 Andeande ta nanaica ningalena laitane: smat ta ncake gei mali nabetca, cia laisa re smat ta nfabinga Jou Lahatalla ni mauting. 15 Gei ta marapawil mali lalingcana, tina laisa smat ta rlonga Jou Lahatalla ni mauting. Rlonga fola, setanna riri kolanoca nlafo ga nyal Jou ni mauting tina mali si wlorina. 16 Gei ta marapawil mali nyinyen ta ni patna, tina laisa smat ta rlonga Jou Lahatalla ni mauting, tina si jal re wlorina sangnang. 17 Ga mauting tina, si dising famafia pa mali wlorina, gabe ntahanna mnu pa. Laina si rdu kangela fare sangsara ningalena si rdela Jou ni mauting tina, si rdela Jou panto hawe. 18 Gei ta marapawil mali rakrak ta ni momna soga, tina laisa smat ta rlonga Jou ni mauting, 19 ga si wlorina tengtengan pa re riri tubca, fare si le ma diyawa be arata fare rlokolo ta nesana. Gabe Jou ni mauting ta si rlongana rpeo pa, denabe mauting tina ni ningale pa. 20 Ga gei ta marapawil mali rakrak ta mafiana, tina laisa smat ta rlonga Jou Lahatalla ni mauting, nyal fare rdela. Si tina smat ta rtubna rderera Jou ni mautingna, laisa gei ta ntub denabe piyo. En ta piyona tutuaf yafatol, en bena tutuaf yafawonam, fare en bena tutuafe slubisa."

21 Fola tina, Yesuse nua si hawe laitane, "Enpa smatna rtaping poci taga rtabaki re paisa nesa penepa disingi mali baleca papapo, bo plangnona mati ncapangna. Ta molangna i osta nising i mali gagaoca. 22 Tina ningalena, ahai ta oras tae tgoganna, osta smatna bo rto, fare farumi ta ncapang pana bo ncapang. 23 Gabe flonga tina famafia fare fising mali wlomew."

24 Fare Yesuse nu hawe laitane, "Ftarokira famafia ahai ta mew flonga tona. Gabe laisa mewe flolam famafia, Jou Lahatalla npei bo mewe ftaif, fare I nbange npei denabe mewe ftaifna foloi hawe. 25 Ningalena, gabe laisa ise nyal ahai ta Ya ikuna, lomanta Jou Lahatalla n'gali i bo ntaifna lal. Ga smat ta rlonga pa ahai ta Ya ikuna, ahai ta i ntona, Jou Lahatalla osta nyal hawe mali ii."

26 Gabe Yesuse nu hawe laitane, "Jou Lahatalla nkawasa ndadi kolano lali I ni smatna, tina laisa re andeande tae: en smat isa ncake gei mali rakrakca. 27 Etnga be doram i namtuli denabe sema taga i npaling, ga wloyaneto panto gei tina. Ga gei tina ntub fare ntipa i denabe tigo. Smat ta ntiwa cia, i nto pa mfalaisa denabe gei tina mfalainana. 28 Ningalena rakrak cia tutuling ta nfapiyo i, mulaine ntipa ina, ohloca, denabe piyo. 29 Gabe laisa piyona ncimo to, smat cia tina to nkati i, ningalena ni orase to bo rfakati."

30 Fola tina, Yesuse nua si hawe, "Gabe laisa Jou Lahatalla Nkawasa ndadi Kolano mali I ni smatna, ite bo fatailo re ahai? Bo tfamolang re andeande ahai? 31 Jou Lahatalla Nkawasa ndadi Kolano mulain mali smatna ese be, ga wol de wol nbangi ga lal, tina laisa tatanam ta peona nenena ta rtiwa i mali rakrakca. Peo tina, peo ta nenena molang mali dunia tae. 32 Gabe laisa peo cia rtiwa ito, i ntub ga ndadi tatanaman ta nmamagal mali farumi tanaman ta nesana mali bet lilewingca, denabe ni magalna ma ndadi mamagal gabe manina rpei fafual mana."

33 Lal andeande laisa tinana, ta Yesuse npake bo nfabinga Jou ni mauting lali sili. I fafcule sina nderera ahai ta si osta rtaifna. 34 Yesuse jaga npake andeande, gabe laisa nfafcule mali smate nesana. Ga mali i re ni muritna, I nfaolang andeande cia ningalena.

35 Malingin cia, Yesuse nua ni muritna, "Mali to bo tfan lali talagaca pulipao." 36 Fare si rfateam smat lalo cia taga rcaplo pelang asa rfarerer re Yesus. Taga si rfalai, fare pelang ta nesana rderera si. 37 Mnu pana, latanca ncicoal fare mumatna nlafo ncipange riri pelang tasa denabe wayana ncapil, gabe riri pelang tasa bo damduri. 38 Oras ciana Yesuse namtuli mali pelang tasa ni famulena npake popoje. Gabe ni muritna rfapaling I taga dua I, "Guru, Guru mfaduli am pa ga? Ame bo kmate to tane ya!"

39 Yesuse npalinge ga nfafola latanca fare mumatna, I nu, "Mfola to!, Mnine to!" Latan fare mumatna nfola, fare talagaca namninna gaole.

40 Fola tina, Yesuse nua ni muritna, "Pesaga mew famcaitna? Fare pesaga mew fdela Ya pa na?"

41 Yesuse ni muritna damcait gabe rfauwo si, "Latan fare mumatna rderera ta I nuna! Smat tae isega?"