1 Yesuse I re ni muritna rlafo mali talaga Galilea pulipao, mali smat Gerasana riri batang. 2 Yesuse nduri mali pelang tasa, en smat isa nlafo mali piling goana. Smat cia setane ncung i. 3 I jaga nteteam mali piling goa tina. I ncicoalna gaole, denabe smatna isa pa ta bo dafena rpitan ina makse rpake rante besi. 4 Ningalena, lale to kakamo re ficona si rpitan re rante besi, ga i nfaorit be. Gabe smatna isa pa ta bo rtahan ina. 5 Dorame re wol i gagaona mali piling goana fare mali popona, n'gigam fare jaga npune ni badanca npake pat denabe nyabat. 6 Oras ta i nem Yesusna laspa subena, i nfarera lali Yesus i taga nlu nap Yesuse nbona. 7,8 Fare Yesuse nua i, "Ee, setan! Aw msapang mali smat cia!"

Ga smat cia n'gigamna nfacicoal i, i nu, "Ado Yesus, Jou Lahatalla ta tigo molangca Ntu Aw! Aw bo mpeo ya ahai? Ya isasi iku Jou Lahatalla ngahnyo, mati mfakangela yana!"

9 Yesuse nfautno setan ta i mali smat cia, "Aw nganyom ise?"

Setanca ncanglo, "Amame ngahyomamna Legion, ga amam tane reni calan." 10 Ga setan ta mali smat cia ndorna nfola pa lali Yesus I, gabe laisa mailow mati nfaungo si mali batang tinana.

11 Laupa mali tina, en bouna lal ta diyawa an mali lolase ppuna. 12 Ga setan tina rdor lali Yesus I laitane, "Msula ame ksung mali bou tina."

13 Yesuse nderera ta si duna. Fare setan tina rcapang mali smat cia, taga rfane ga rcung mali bou tina. Bou tina bo sal pa lalorina lalan lu. Fare bou tina rfarera rfacicoal si lali ta maratopasna, fare rtasapil nap talagaca gabe rmat.

14 Dem tina, smat ta rjaga bouna rfarera ga dafetang ahai ta ndadi i tina mali bendar fare pnu ta ndahle manana. Rlonga tina, tina to smatna rlafo bo dem ahai ta ndadi ina. 15 Oras ta smatna rlafo lali Yesus I, si dem smat ta setane ncungica ntotolang mana, i nmafia to fare i npake kabaya to. Dem ta i nmafia tona, si ndadi damcait. 16 Smat ta dem farumi tina, si dafetang ahai ta ndadi i tina lali smat po ta rlafona. Si dafetang ahai ta ndadi i mali smat ta setane ncungica fare ahai ta ndadi i mali bou tina. 17 Rlonga tina, smat ta rteteam mali batang ciana rdore bo Yesuse ncapang mali si riri batang tina.

18 Oras ta Yesus ndawil hawe pelang tasa, smat ta setane ncungi nanaica nlafo, i dore bo nderera Yesus. 19 Ga Yesuse nailow pa, gabe nua smat cia, "Ta mafiana, awe muwe to lali nim ebai i, taga mafetngo smat ta aw re si pnu isana, fare mua si ahai ta Jou ca npeo aw na, fare mu mfalaisa Jou ca nfaeme I ni masiena lali awi." 20 Fare smat cia nfane ga nfabinga smatna mali batang Dekapolis. I nfabinga ndumi ta Yesuse npeo ina, gabe farumi si ndadi rherang.

21 Fola tina, Yesuse I re ni muritna rdawil pelang asa taga rlolai hawe lali talaga Galilea pulipao. Rlafo mali talaga cia pili pao, smatna lal rlafo rfayalo si jel Yesus mali talagaca lapo. 22 En bena smat isa nlafo, i ngahnyo Yairus. Yairus cia nfaboboko mali ebai sombayang agama Yahudina isa. Laina i nem Yesus, i lali ga nlu nap Yesuse nbona. 23 Yairuse ndor fare wlona molang lali Yesus I, i nu laitane, "Apa, mgali ntuk mapingca lae. I nowilna mamagal, denabe bo nmat. Apa mlafo su mali ebai i bo Apa fatige kakamomna mali ii, bo i nmafia fare mati nmatna."

24 Nlonga tina, Yesuse nfan nderera Yairus. Oras ta si rfan, smatna lal rderera Yesus denabe rfakoskoso si. 25 Mana en bena maping isa, i nowilna nfanye laflaf taun yafasa re failu to. 26 Maping cia nfaloloila i beto nfalalalawna mali mamana, denabe ni tiwina mnyei, ga i nmafia pa. Ga ni panyaketna nfacicoulo i. 27 Maping cia nlonga smatna dafetang Yesuse nfamafia smat. Gabe biare smatna lal, i nfagelgeta i lali smatna fapaluan. I dahle Yesuse mali taona, gabe ndumi Yesuse ni jubaca. 28 I ndumi Yesuse ni jubaca ga mali i wlonana nu laitane, "Biarega idumi ni jubaca be, osta imafiya." 29 Oras ta i ndumi Yesuse ni jubaca, tina to nfanye laflafna nfola i gabe nbasamna nmafiya to. 30 Oras ta ndumi i, Yesuse nbasamna en kawasa ta ncapang mali I. Gabe I nfulasi ga nfautno smat laloca, "Ise ta ndumi Ya nik jubacaca?"

31 Yesuse ni muritna du, "Guru, mem tutuling. Smatna lal rfakoskoso sina, ga guru mfautan, ‘Ise ta ndumi Ya nik jubacaca?’ "

32 Gabe Yesuse ninga lali re mali bo ntarokira ise ta ndumi ni jubacaca. 33 Maping cia namcaitna gaole denabe namderer, ningalena i nto i ta ndumi Yesuse ni jubaca denabe i nmafia. Gabe, i nlu nap Yesuse nbona taga nafetange ndumi mfalaisa denabe i nmafiana.

34 Gabe Yesuse nua maping cia, "Maping ta aw, mdela Ya gabe tane mfia to. Muwe to re wlomna tengtengan."

35 Oras ta Yesuse nmauting sube, en smat sifis rlafo mali Yairuse ni ebaica mali. Si dua Yairus laitane, "Apa, apa ntumca nmate to, gabe mati mfaboboko ntoi Gurucana." 36 Ga Yesuse faduli pa re ahai ta si du tina. I nua Yairus, "Mati mamcaitna! Mdela be." 37 Fare Yesuse nfan lali Yairuse ni ebai i, ga I nailow pa smat laloca rderera I na. I nut be Petrus, Yakobus fare Yakobuse tenoca Yohanes. 38 Si rlafo mali Yairuse ni ebai i, Yesuse nem smatna rtangis fare rmasisewle mana, gabe tina ndadi liyaw. 39 Nem tina, Yesuse ncunge ga, nfautno smat tina, "Pesaga mew fpei liaw fare ftangisna? Waica nmat pa, i namtuli be." 40 Ga si damlifa Yesus. Yesuse nua smat ta manana rcapang. Fola tina, Yesuse nut waica hma re hye, fare Yesuse ni muritna ta rfarerer Yesusna rcung mali waica ni kamar cia. 41 Pumul kamarca, Yesuse nice wai cia kakamona, fare nu, "Talita kum," ta ningale, ‘Males ta aw, mpalinge to!’

42 Yesuse nu laina, wai cia npaling fare nfan. Farumi smat ta dem ahai ta ndadi i tina, si rherangna gaole. (Wai cia ni umurna taun yafasa re failu.) 43 Fare Yesuse nua si, "Mdel pa ta bo fafetang ahai ta ndadi i to tina lali smate nesana." Fola tina, Yesuse nua si rfatub wai cia.