1 Oras ta Yesus I re ni muritna rdahle Bendar Yerusalem, taga rlafo mali pnu Betfage fare pnu Betania ta mali popo Zaitun. Manana, Yesuse ncula ni murit silu, 2 fare nfatnawe laitane, "Mewe ffan lali pnu ta i potaoca. Laisa mewe fsung mana, mewe osta fduk keledai po isa rpitna i mana. Keledai cia smatna rcaplo i paube. Mewe fsalawe wala ta rpitna keledaicana taga fut i mali. 3 Gabe laisa smatna rfautan, ‘Pesaga mewe fpei lainana,’ me fu laitane, ‘Jouca bo npake keledai tae. Gabe npake fola i to tinato nhawe i mali.’ "

4 Yesuse nu fola laina, smat silu ta rfane ga dem keledai po isa rpitna i mali lalingca lapo. Gabe si rcupat keledai cia ni walaca. 5 Dem tina, smat sifis ta si manana rtolea si, "Ee, pesaga mewe fsupate keledai cia ni wala cana?"

6 Gabe si du laisa re ta Yesuse nfatnawena. Gabe smatna rfabiar si dut keledai cia. 7 Fare si dut keledai cia lali Yesus i, taga si difa keledai cia puis popona rpake riri jubana. Fare Yesuse ma ndawil keledai cia. 8 Oras ta Yesus ndel mana, smatna lal riri jubana rpeo ifif mali lalingca. En bena ta rpake ai maglo ta nenena ta wluna po sube, si jal mali beti bo rtotoman Yesus. 9 Smat ta rfan rdel mali Yesuse nbona fare mali taona, rfamamagal I fare liorina mamagal,

"Hosana! Tfamamagal I ta Jou Lahatalla ncula I nlafo mali.

10 Tfamamagal I tae ta bo ndadi Kolano, laisa re ite hma re bbur tantuba kolano Daut.

Hosana! Tfamamagal Jou Lahatalla ta tigo molangca!"

11 Rlafo mali Yerusalem, Yesuse nfan lali Ebai Sombayang Mamagalca ni kintalna. Mana I nyel ebaica bo nem farumi ta en manana. Ga bo dorame to, I ncapange ga nfan lali Betania nfarerer re ni murit yafasa re silu tasa.

12 Ni semaca, Yesuse I re ni muritna rfateam pnu Betania. Mali lalingca fapaluan, Yesuse nbasamna nbibisil. 13 Laspa sube Yesuse nem ai ara isa wluna lal. Yesus nfadahlei bo nem ai ara cia piyo pare en pa. Ga oras Yesuse nlafo mana, I nem ai ara cia piyo pa, wluna be. Ningalena, ni oras paube bo piyona. 14 Fare Yesuse nua ai cia, "Awe osta piyomna panto hawe, gabe smatna enpanto ta bo dane piyomna hawena!" Ta Yesuse nuna, ni muritna rlonga bena.

15 Yesuse I re ni muritna rlafo mali Bendar Yerusalem. Fare I ncung mali Ebai Sombayang Mamagalca ni kintalna. Manana smatna rfawage fare rfagon, gabe Yesuse nfaungo si. I nfapalpalna smat ta rfaiwna tiwina fare ta rwage mani pombona riri meja fare bangkona. 16 I ma nailow pa smatna bo dut ahai be bo rdel mali Ebai Sombayang Mamagalca ni kintalnana. 17 Taga I nfafcule si laitane, "Mali Jou ni Kitab cana rlefo laitane, ‘Ya nik Ebaica osta ndadi gagaw ta tcombayang bo farumi suku re bangsa.’ Ga mew fpe ina ndadi smat ta rmadarawana riri gagaw i bo rgogan si!"

18 Imamna riri ta rfaboboko fare guru agama Yahudi ta rto Musa ni Kitab silim tasa rlonga ta Yesuse npei mali Ebai Sombayang Mamagal ciana, gabe si diyawa lalinge bo rpun famat I. Ga si damcait I, ningalena smat laloca nlokolo nlonga ni sogarona. 19 Lase bo doram, Yesuse I re ni muritna rcapang hawe mali Bendar Yerusalem.

20 Ni semaca, Yesus I re ni muritna rfan hawe. Mali lalingca fapaluan, si dem ai ara ta Yesuse ncasi i poyangai cia namange to denabe ni wana. 21 Fare Petruse nlolam ahai ta Yesuse nu poyangaina. Gabe nua Yesus laitane, "Guru, co mem! Ai ara ta Guru msasi i cia namang!"

22 Gabe Yesuse nua si, "Mewe nane fatutua fdela Jou Lahatalla. 23 Flonga famafia Ya bo ikuwa mew tane, gabe laisa smatna du lolas tae, ‘Mlange awe bo mdirak awe to lalaw olatca,’ ta i nuna osta ndadi i, ga mali wlona mati nfaututanna ndela, ahai ta i ndorna ndadi i. 24 Gabe tina, flolam e, gabe laisa mewe fsombayang lali Jouca, ahai be ta mew fdorna, mewe nane fdela mew osta fduk, fare osta fduk tina. 25 Gabe mew fosale bo fsombayange ga wlomewna sangnang pa lali smat ta npei sal mali mewi, mewe nane fampunge ntuba isu smat cia, bo nimew Apa ta mali sorogaica ma osta nampunge mew mali nimew dosana." 26 Gabe mew fampunge smat ta rpei sal lali mewina pa, ta molangna nimew Apa ta mali sorogaica osta nampunge mew pa.

27 Yesuse I re ni muritna rlolai hawe lali Bendar Yerusalem. Pulina Yesuse ncung namul Ebai Sombayang Mamagalca ni kintalna, taga nfanfan mana. Oras ciana, imamna riri ta rfabobokona, guru agama Yahudi ta rto Musa ni kitab silim tasa, fare sire simosimo Yahudina rlafo I. 28 Si rfautno Yesus laitane, "Farumi ta Awe mpeina, mduk kawasa manca mali? Fare ise ta npo Aw kawasa tina?"

29 Gabe Yesuse nua si, "Ya bena bo ifautno mew. Fare mewe fsanglo Ya, taga Ya ifabinga mew ise ta npo Ya kawasa bo ipei farumi tina. 30 Co mewe fua Ya, ise ta npo kawasa lali Yohanes ta nfasisopca bo ncisope smat nana? Jou Lahatalla pare smatna?"

31 Rlonga tinana, si rfauwo si laitane, "Gabe laisa ite tu ‘Jou Lahatalla,’ I osta nua it, ‘Pesaga mew fdela Yohanes pana?’ 32 Ga tina osta ite tu, ‘Smatna ta rpo kawasa.’ Amame kamcaite smat lalo tae osta rtole, ningalena si danggap Yohanes tae fatutua nabi ta nfalafo Jou Lahatalla ni fatnaw lali smatna."

33 Gabe si dua Yesus, "Amame kkfato to pa!"

Gabe Yesuse nua si, "Gabe laina, Ya ma ifabinga mew pa, ise ta npo Ya kawasa ipei farumi tina."