1 Tane Abar Mafia mali Yesus Kristus i, Jou Lahatalla Ntuca. 2 Ta ntuba be, Abar Mafia tae rlefo i to mali Kitab nabi Yesaya laitane,

"Ftarokira e! Ya bo isula nik susulaca nlafo ntuba mali Awi.

I cia ta bo nfapepeya laling mali Awi,

bo smatna rtotoman aw.

3 Mali padang gurun, gagaw isa ta namlilei, fare nalaspa mali pnu i,

i bo nmautingna nfacicoali lali smat ta rfayalo si manana laitane,

‘Fapepeya lalingna bo failow Jou,

faolang lalingna bo ftotoman I.’ "

4 Jouca ni susula cia Yohanes ta nfasisopca. I bo nlafo mali padang gurun, gagaw ta namlilei fare nalaspa mali pnu i, manana I nfabinga smatna laitane, "Fiwane wlomewna to bo fderera Jou Lahatalla, fare laina Jou Lahatalla bo nampunge mew. Gabe fpo nimew dirica to bo ncisope mew, cia fafayali mewe nimew dirica bo fduk sisop, tina fafayali mewe fiwane wlomewna to."

5 Fare smatna lal si mali bendar Yerusalem fare mali gagawe nesana mali batang Yudea rlafo Yohanes. Si rfatuwo riri dosana, gabe Yohanese ncisop si mali waya Yordan. 6 Yohanese npake juba mali unta pluna. I ni pitpitane hnyaoca mali aiwani gico. I na an na mali kasiso fare madu ailolo. 7 Tane hawe ta i nua smat ta pulinana, "Lomanta ya fola, smat isa bo nlafo, I ni kawasana mamagal foloi mali Ya i. Bo isalawe ni nal tasa bere ya bisapa. 8 Ya isope mew ipake waya, ga I ncisope mewna npake Jou ni Rohca."

9 Oras ta Yohanese en ncisope smat, Yesuse nlafo mali Nasaret mali batang Galilea, gabe Yohanese ncisop I mali waya Yordan. 10 Yesuse bo ncapang mali wayacana, I nem langitca nmarapaw, Jou ni Rohca laisa mani pombona nduri nap Yesus I. 11 Gabe, rlonga Jou Lahatalla lio mali sorogaca laitane, "Aw tane Ya ntu Aw, Ya igogoru Aw. Aw ta mpei wlokna sangnang."

12 Folana tina, Jou ni Rohca nut Yesus lali padang gurun, gagaw isa ta namlilei fare nalaspa mali pnu i. 13 Yesuse nteteam mali padang gurun mnuwona wol yafafat. Mana setanna riri kolanoca nyakul I. I nteteam pulinana i re aiwanina gabe Malaikatna rleleyane I.

14 Oras Yohanes ta nfasisopca ncung bui, Yesuse nfan lali batang Galilea, nfabinga Abar Mafia mali Jou Lahatalla I pulina. 15 I nu laitane, "I ni oras ta Jou Lahatalla nuna nlafoito."

16 Bahnga laitane, Yesuse nnfan ndel mali talaga Galilea mtopona. I nem smat silu rfatenow, si ngahnyorina Simon fare Andreas. Smat silu tasine dajala iyan mali talagaca, ningalena si riri karajanca diyawa be iyan. 17 Gabe Yesuse nololaw si, "Mali bo fderera Ya! Mewe jaga fiyawa iyan, ga Ya bo ifafcule mew fiyawa smate bo rderera Ya." 18 Rlonga tina, smat silu tasa tina to rfateame riri jalana taga rderera Yesus.

19 Fola tina, Yesuse nfan lali faokoce hawe, I nem Yakobus i re tenoca Yohanes. Smat silu tasine Zebedeuse ntu si. Si rfapepeya riri jalana mali pelang tasa lolo. 20 Tina to Yesuse nololaw si, gabe si rderera Yesus. Si rfateame hmarica farerer re smat karajan ta en mali pelang tasana.

21 Yesuse I re ni muritna rlafo mali Kapernaum. Neta wol Sabat, Yesuse tina to ncung namu ebai sombayang agama Yahudina taga nfafcule mana. 22 Smat ta manana rherang rlonga I ni sogaronana, ningalena I nfafcule sina re kawasa, laisa guru agama ta rto Musa ni kitab silim tasa pa. 23 Oras ciana, en smat isa mali ebai sombayangca setane ncungi. Smatca n'gigam laitane, 24 "Ee Yesus smat Nasaret! Aw bo mpeo am ahai. Ya ito Aw ise. Aw tane smat ta mamolang mali Jou Lahatalla i mali."

25 Ga Yesuse ntolea si liona nuto mamagal lali setan ta ncunge smatca, "Mati liomna! Aw msapang mana!"

26 Fare setanca npei smatca denabe namderer. Oras ta smatca n'gigamna nfacicoal i, setanca ncapang. 27 Farumi smat ta en manana rherang, denabe si fauwo si, "Ya co mew ftarokira famafia! Tane sogaro po! I nmauting re ni kawasa, denabe setanna rderera ta I nuna."

28 Mana mali, Yesuse ngahnyona ncapang mali farumi gagaw mali batang Galilea.

29 Rcapang mali ebai sombayang agama Yahudi cia, Yesus, Yakobus fare Yohanes tina to rfan lali Simon fare Andrease riri ebaica. 30 Oras tina, Simone ohmo ta mapingica namtuli, ningalena nowil. Tina to si rfabinga ni owilna lali Yesus I. 31 Fare Yesus I lali Simone ohmo i, nice kakamona taga nfapaling i. Oras ciato Simone ohmoca nmafia gabe i nleleyane si ga rceli.

32 Orasna bo doram, en ta rlafo dute ndumi smat ta dowilna fare ta setane ncung sina lali Yesus I, 33 denabe farumi smat ta en mali bendar ciana rlafo rfayalo si mali ebai cia nbona. 34 Gabe Yesuse nfamafia smatna lal ta riri rpanyaketna rupa laloi, I ma nfaungo setan ta rcunge smatnana. Yesuse npo si oras pa setanna bo rmauting, ningalena setan tina rto Ya ise.

35 Lase bo sema, Yesuse npalinge ga ncapang mali ebaica. I nfan lali gagaw ta mlileina bo ncombayang mana. 36 Simone i re ni delna rfanega diyawa I. 37 Oras ta si rfadukduk re Yesus si du, "Guru, smatna lal diyawa Guru."

38 Yesuse nu, "Mali bo ite tfan lali gagaw ta nesana, mali bendar ta ndahle mantanena, bo Ya ifabinga Abar Mafia pulina hawe. Ningalena, Rcula Ya mali dunia taena bo ifabinga Abar Mafia tina."

39 Fare, Yesuse nfan lali farumi gagaw mali batang Galilea. I nfabinga Abar Mafia mali Jou Lahatalla I lali sili mali ebai sombayang agama Yahudina, fare nfaungo setan ta rcunge smatnana.

40 En smat isa npanyaket pado nlafo lali Yesus I. Smatca nlu nap ta Yesuse nbona taga ndor fagali laitane, "Apa, gabe laisa mailow, Apa mfamafia ya."

41 Yesuse nbasamna nmasie smat cia, gabe I nu laitane, "Ya ikailow aw mmafia. Gabe tane aw mmafia to!" 42 Oras tina to, smat cia ni padona mnyangis, gabe i ndadi nmafia.

43 Tina to, Yesuse nua smatca nfani. Ga Yesuse nfawloyaneto i laitane, 44 "Mlolam e, mdel pa ta bo fabinga smatna, Ya ta ifamafia aw. Ga aw mfan lali imamca, bo i nem aw mafia to, fare aw nane mpo nim aiwani faisa bo rpoi sadaka lali Jou Lahatalla I laisa re ta nabi Musa nfasulana. Aw mpei laina bo ndadi fafayali i lali smatna, aw fatutua mafia to."

45 Ga smatca nfanega nafetngo smate nesana ahai ta ndadi i mali ina. Gabe, Yesuse nfaemi panto mali Bendarna, I nteteam be mali gagaw ta mlileina mali bendarna potalil. Biarega laina, smatna mali gagaw ahai be rlfo be lali II.