1 Oras tina, en hawe smatna lal rfayalo si mali Yesus i. Ga si rari anna mnyei to, Yesuse nololawe ni muritna, taga nu laitane, 2 "Ya ibasamna imasie si smat tane. Wol pitole to si re Yana, taga si rari an na enpanto. 3 Gabe laisa Ya isula si duwe re hnyaorina lolo pa, mfalaisa gabe rlamhan mali laling popo, si tane rlafo mali pnu ta laspa."

4 Oras ta si rlonga laina, Yesuse ni muritna du laitane, "Guru, gagaw tae nalaspa mali pnu i, mfalaisa ite bo tfatub farumi sina?"

5 Yesuse nfautno si, "Mew namew rotina pifis?"

Si rcanglo, "En pifit."

6 Fare Yesuse ncula smat ta lal tina rtotolang mali nyinyenca. Fola tina, I nyal roti pifit tasa, I nu tarima kase nais Jou Lahatalla i. I nfawogwogla roti tina taga noce ni muritna, taga si rlowto smat laloca. 7 Mali silina en bena iyan nenena diranca. Yesuse nyal iyan tasa taga nu tarima kase nais Jou Lahatalla i. Fola tina, Yesuse ncula ni muritna rlow to iyanna lali smat laloca. 8 Gabe farumi si rceli denabe rmosi. Fola tina Yesuse ni muritna rfayalo gleona. Lalona karanjang pifit bakbak. 9 Smat ta rceli oras ciana, sal pana lalan fat. Rceli fola, Yesuse ncula si farumi duwe. 10 Gabe Yesuse I re ni muritna tina to dawil pelang, rfan lali batang ta ngahnyo Dalmanuta.

11 Fare smat Yahudi ta rderera fatfato Farisina rlafo bo rfasangsanglo mauting re Yesus bo diyawa Yesuse na sal. Gabe si rdor Yesuse npei mujizat, bo si rto, Yesus cia mali Jou Lahatalla i mali.

12 Nlonga tina, Yesuse nfawana ndas falanga taga nu laitane, "Pesaga smat ta rtub oras taena rdor mujizat bo rto Ya mali Jou Lahatalla i mali? Ya ikuwa mew e, Ya osta ifaem mujizat isa pa lali smat ta rtub oras taena."

13 Fare Yesuse nfateam si. I ncapil hawe pelang tasa nfarerer re ni muritna taga rfan lali talagaca pulipao.

14 Oras ciana, Yesuse ni muritna rtalinga ga dut roti pa. Ta en mali silina, roti pusa i mali pelang i. 15 Fare Yesuse nua si, "Mew nane fpei famafia re smat Yahudi ta rderera fatfato Farisi rari ragina fare kolano Herodese na ragina."

16 Ga Yesuse ni muritna rtaif pa gabe rfauwo si laitane, "Pesaga Guruca nu lainana ningalena ite rar roti pa."

17 Ga Yesuse nto ahai ta rfauwo si tina, gabe I nua si, "Mewe fu Ya iku lainana, ningalena mewe fut roti pa? Tane, mewe fdela Yana uatu pa! 18 Mewe mtamewna en, pesaga fem pa ahai ta Ya ipeie tona? Pare, mew ftalinga to? 19 Mewe nane ftaife to! Ningalena mewe rasa flolam sube oras ta Ya ifawogwogla roti pilim bo ifatube smat lalan limnana. Oras tina, i ni gleona en karajang pifis ta mewe fayalona?"

Si rcanglo "Karanjang yafasa re pilu?"

20 Yesuse nfautno si hawe, "Oras Ya ifatub smat lalan fatnana re roti pifit tasa, ni gleona en karanjang pifis ta mewe ffayalo oras ciana?"

Si rcanglo, "Karanjang pifit."

21 Gabe Yesuse nua si hawe, "Gabe laina, mewe nane fdela Ya, fare mati wlomewya nsusana re an tina."

22 Oras Yesuse I re ni muritna rlafo mali Betsaida, en smat sifis dute smat isa nbiaf lali Yesus i. Si rdor lali Yesus i bo nisinge kakamona lali smatca bo smatca nmafia. 23 Yesuse nice smat ta nbiafca kakamona taga nut i natalil mali pnu cia, bo rfalaspa si mali smat laloca. Fola tina, Yesuse nitfo smat ta nbiafca mtana fare nisinge kakamona mali smat cia. Fare Yesus nfautno I, "Awe meme to?"

24 Fare smatca ninga nata fare nu laitane, "Ya ikem smatna rfanfan laisa ai ta nfanna."

25 Yesuse nisinge kakamona hawe lali smat cia mtana, fare smatca nemna ma tutiyai. 26 Fola tina Yesuse nua smat cia, "Awe muwe to lali nim ebai i, fare mati mlolaina to mali pnu ciana."

27 Fola tina, Yesus I re ni muritna rfan lali pnu-pnu ta ndahle bendar Kaisarea Filipi. Mali lalingca fapaluan, Yesuse nfautno ni muritna laitane, "Ta mewe flongana, smatna jaga du Ya ise?"

28 Si rcanglo, "En ta du Guru cia Yohanes ta nfasisopca, ta nesana du nabi Elia, penepa isa mali nabi ta nesa ta jaga rfalafo Jou Lahatalla ni fatnaw lali smatna."

29 Yesuse nfautno si hawe, "Gabe laisa bo mew, Ya ise?"

Petruse ncanglo, "Guru cia to Mesias, Kolano ta Jou Lahatalla njaji bo nfasalamate smatna!"

30 Gabe Yesuse nua si, "Mdel pa ta bo ffabinga faisana Ya gabe Mesias."

31 Mulain mali oras cia, Yesuse nfafcule ni muritna, lomanta Smat ta mali sorogai nane nduk kangela lal, fare simosimo Yahudina dailow I pa, imam ta rfaboboko si na, fare guru agama Yahudi ta rto Musa ni Kitab silim tasa, si bo rpun rfamat I, ga wol pitol I npaling hawe. 32 Farumi tina Yesuse nu n'gogan pa. Ga Petruse ndas Yesus mali taona taga ntole I, "Guru, mati mu lainana. Ningalena Aw mkangelana denabe mmat."

33 Gabe Yesuse nfulasi ga neme ni muritna fare ntolea Petrus, "Awe mati liomna. Anim mautingna laisa setanna riri kolanoca ni mauting. Ningalena awe mfikir be ta smatna rfikirna, ta Jou Lahatalla nfikirna pa."

34 Fare Yesuse nololawe ni muritna fare smat ta lal tina, fare nua si, "Ise ta bo nderera Ya, i nderera i ni mauna pa, i nane nfasadia i denabe nmat ningalena nderera Ya, tina laisa i npapa i ni salipca tutuling bo nderera Ya. 35 Ni ngalena ise ga ntubna bo i ni dirica tutuling, i cia nmat osta i re Jou Lahatalla pa denabe lali. Ga ise npo ni tubca ningalena i nderera Ya fare i nfabinga Abar Mafia mali Jou Lahatalla i, i cia ta bo nduk tub re Jou Lahatalla denabe lali. 36 Ni ngale pa, gabe smat isa nduke ndumi arata ta mali dunia taena, ga i ntubna i re Jou Lahatalla pa denabe lali. 37 Ningalena enpa ta I npona bo nduk tub re Jou Lahatallana denabe lalina.

38 Smat ta rtub oras taena rmanahan pa rderera Jou Lahatallana. Si rlokolo rpei be dosa. Gabe laisa isa nderera Ya nik sogarona ga nmaya si tina, Ya ma Smat ta mali sorogaica imaya i bo iku, Ya ifayala smat cia oras ta Ya bo ilafo hawe re nik Apa ni kawasa ta mamagalna, farerer re malaikat ta si mali sorogaina."