1 Yesuse nua si hawe, "Flonga famafia ta Ya ikua mew tane, mali smate mew fis ta mantanena, en ta osta rmat paube gabe laisa si osta dem paube Jou Lahatalla Nkawasa ndadi Kolano fare I ni kawasa ta mamagalna."

2 Maralapis wol piwonam, Yesuse nut Petrus, Yakobus fare Yohanes si rfarerer rdawil lolas isa tigo. Manana, smate nesana enpa. Si dem Yesuse ni rupana naiwan i ga nesai. 3 I ni kabayaca ndadi bubulang sasaletam. Mali dunia taena isa pa ta bo npei pake ta bubulang beresi laisa tinana. 4 Rgarayanna, si dem nabi Elia fare nabi Musa rmauting re Yesus 5 Petruse nem tina, Petruse nua Yesus, "Guru, amame ksangnangna gaole am mantanena! Gabe ta mafiana amame kfaosal ebai nenena fasitol: Isa bo Guru, isa bo nabi Musa, fare isa fawe bo nabi Elia." 6 Petruse nu laina ningalena i nfatoto panto bo nu ahai. Ningalena, smat sitol tasa damcaitna gaole.

7 Fare, metna nduri ga ntabak si. Gabe si rlonga mali metna lolo isa lio nu laitane, "Tae Ya ntukca, Ya igogoru i. Flonga i to!"

8 Si rgarayan oras ta si rninga lali re mali, deme smate nesa panto manana, motle be Yesuse ntutuling. 9 Oras, si rduri mali lolas cia, Yesuse nfatnawe si laitane, "Mati fafetngo faisana su ahai ta mewe femnana i na. Lomanta smat ta mali soroga Ica nmate to fare npaling hawe, taga mewe fafetang." 10 Gabe si dafetngo isa pa, ga oras ta smat sitol tasa rtutuling, si rfautan lali re mali ni ngale ahai ta Yesuse nu, "Nmate ga npaling hawe tina."

11 Gabe si rfautno Yesus laitane, "Pesaga guru agama ta rto Musa ni kitab silim tasa du, nabi Elia nane nlafo ntuba mali Mesias i, Kolano ta Jou Lahatalla njaji bo nfasalamate smatna?"

12 Yesuse nua si laitane, "Ga nabi Elia cia osta nlafo ntuba bo nfasiap farumi. Ga en bena rlefo, Smat ta mali sorogaica osta nkangelana lal fare osta dailow I pa. 13 Ga flonga famafia ta Ya bo iku tane, smat ta laisa nabi Eliana cia nlafo to, ga smatna rfakangela i rderera si riri mauna, laisa re ta rlefo mali Jou ni Kitabca."

14 Oras ta Yesus Petrus, Yakobus fare Yohanes rlolai lali murit ta nesana, si dem smatna lal rfayalo si mali murit tina. Guru agama Yahudi ta rto Musa ni Kitab silim tasa rfakotale re murit tina. 15 Smat ta lalna dem Yesus, si rgarayan gabe fatoal be si lali Yesus i.

16 Yesuse nfautno si laitane, "Mewe ffakotale ahai re guru agama Yahudi ta rto Musa ni kitab silim tasa?"

17 Isa mali smat laloca nu, "Guru, nanai ya ikute ntuk manca lali Awi Guru, ningalena setane ncungi gabe nmomow. 18 Etnga be setanca ncung i, setanca npesea i nap nyinyenca, denabe bukbukna ncapang mali fmona, fare i fmona lio, taga ni badanca n'ngangala pa. Ya idor fagali mali Guru ni muritna to bo rfaungo setan cia mali ntukca, ga si dafena pa."

19 Gabe Yesuse nua si laitane, "Momofia pa mew smat ta oras taena fdela pa! Opfis hawe Ya nane ifarerer re mewna? Fare denabe opfis hawe Ya nane imanahan re mewna? Futi mali to waica!"

20 Fare si dut wawai cia lali Yesus I. Oras ta setanca nem Yesus, taga nfangangala waica denabe sarpesa i nap nyinyenca gabe namolol. Fare bukbukna ncapang mali fmo.

21 Fare Yesuse nfautno waica hma, "Popise i be i ndadi laitanena?"

Waica hma ncanglo, "I mfalaitanena nenena sube. 22 Ga setanca ma jaga nut waica lali yapna, penepa mali wayana, bo nfamat i. Gabe laisa Guru masie am, mgali ame bo mfamafia i."

23 Ga Yesuse nu laitane, "Awe mati muna, ‘Ya ta ifamafia aw!’ Farumi tina ndadi i gabe smatna rdela Ya!"

24 Gabe wai cia hma tina to nuna, nfacicoal i laitane, "Jou ya idela, ga nfalaflafo i pa. Gabe mgali ya bo idelana foloi hawe."

25 Yesuse nem smatna lal mulaine rlafo rfayalo si mali II, gabe I nparentana cicoal lali setan ta ncung wawai cia laitane, "Oi setan ta mpei smatna rmomou fare rpongo. Awe msapang mali wai cia fare mati msungina to!"

26 Fare setan cia ncapang, n'gigam fare nfangangala wai cia. Oras setan cia ncapang, waica n'ngangalapa nto hawe, laisa smat ta rmatna. Gabe smat lalo ta si manana du laitane, "Ya, i nmate to!" 27 Gabe Yesuse nice waica kakamona fare nfapaling i, fare wai cia npaling tina to nosal.

28 Fola tina, Yesus I re ni muritna rcung mali ebai i. Oras Yesus I re ni muritna rtutuling mana, ni muritna rfautno I, "Pesaga amame kafena pa tfaungo setan ciana?"

29 Yesuse nua si, "Setan ta mfalainana osta ncapang ga nane tcombayang be."

30 Yesuse I re ni muritna rfan mana fare rfaturusa riri fanfanca, rdel mali batang Galilea. Yesuse nailow pa bo smate nesa rto I mana, 31 ningalena I nfafcule ni muritna. I nua ni muritna laitane, "Lomanta smat ta mali sorogai bo rpoi lali smatna, fare bo rpun famati, ga bo npaling mali wol ta faicolca." 32 Yesuse ni muritna rtaif pa ahai ta I nu tina, ga si damcait bo rfautno I na.

33 Yesuse I re ni muritna rlafo mali bendar Kapernaum. Oras si rlafo mali ebai i, Yesuse nfautno si, "Nanai oras it mali lalingca fapaluan, mewe fafetang ahai?" 34 Farumi si liori pa, ningalena mali lalingca fapaluanna si rfakotale ise ta ndadi smat ta ncicoal mali farumi silina.

35 Yesuse ntotolang taga nololaw ni murit yafasa re silu tasa, taga nu laitane, "Ise ta nlokolo ndadi smat ta ncicoal mali Jou Lahatalla nbona, i nane ndadi laisa smat ta riri ngale pa mali dunia taena, fare i bena nane ndadi laisa smat ta biasa be ta rleleane farumi smat."

36 Fare Yesuse nyal wainena isa taga nfaosal i mali fapalunorina. Yesuse n'gop wai cia, fare nua si laitane, 37 "Ise ta nailow smat ta biasa be laisa re wai nenena tae ningalena smat cia ndela Ya, tina laisa re nailow Ya. Fare ise ta nailow Ya bepa, ga i bena nailow Jou Lahatalla ta ncula Ya."

38 Yohanese nfabinga Yesus laitane, "Guru, ame kem smat isa nfaungo setan npake Guru ngahnyomna. Gabe amame ktolea i, ningalena i cia animam del i pa."

39 Gabe Yesuse nua si laitane, "Mewe mati ftolea i na! Ningalena, ise npei mujizate ga npake Ya ngahnyokna, osta enpa i nlolaie bo nfamayai ngahnyok nana. 40 Ise ta nlawang it pa, i cia ite rir del i. 41 Gabe mewe flolam famafia: ise n'gali mew ningalena mewe fderera Kristus, biare ga i noce mew waya galas pusa be, smat ta n'gali mewca osta nduk sagige mulo mali Jouca."

42 Yesuse nua si hawe laitane, "Gabe laisa en smatna rpei denabe smat ta biasa be laisa re wai nena tae gabe ndela Ya panto hawe, ta mafiana pitane smat cia waoca fare tjagta pat mamagal fapusa mali i, taga ftopa i lalaw olatca. 43 Gabe laisa kakamomew pao ta pei denabe mew ndadi fbaradosa, fkati to kakamomew tina! Ga ta mafiana mewe fsung soroga re kakamomew pao be, biarega kakamomewna ntotim ga fsung naraka, pumul yap ta nmatmat paca. 44 [Mali narakacana, gigoapna nmat pa. Fare ni yapca ma nmat pa.] 45 Laina bena, poko be ficomew paona denabe mew ndadi fbaradosa fare fdela Ya panto, ta mafiana fkati to ficomew tina. Ta mafiana tcung sorogana ficor pao be ga ficomewna ntotime ga fsung naraka. 46 [Mali narakacana, gigoapna nmat pa. Fare yapna ma nmat pa.] 47 Poko be mtamew paona npei mew ndadi fbaradosa denabe ndadi fdela Ya panto hawe, flebateto mtamew tina. Ta mafiana mew fsung mali Jou Lahatalla gagaoca nkawasa ndadi Kolano re mtamew pao be, biarega mtamewna ntotim ga Jou Lahatalla ntopa mew lali narakaca. 48 Mali narakacana, gigoapna nmat pa. Fare ni yapca ma nmatmat pa.

49 Andeande, smatna dising gasi mali dagingna bo biarega tisingna mnu. Laina bena, Jou Lahatalla ntohnga smatna bo si rdela Jouna fatutua fare rmanahan na mnu.

50 Mew ta fderera Yana nane nimew guna laisa gasina. Gasina ni gunana npei anna ni jame, ga gasi cia ta ndadi namtu, osta enpa o bo tbasam gasi hawena. Laina bena re nimew tub ta mali dunia taena, nane ni guna bo smat ta mali dunia tae fare mewe ma ftubna fautut mafia isa re ta nesana."