1 Oras ta Yesuse ncapang mali Ebai Sombayang Mamagalca ni kintalna, I ni murit isa nua Yesus laitane, "Guru, ga gedung tane mafia! Mem pat mamagal ta si rfato tina!"

2 Fare Yesuse nua i, "Fatutua, gedung tina mafiana gaole. Ga lomanta ni oras, farumi tina osta rfajakam denabe fasafsafo re nyinyenca, gabe patna pusa bere enpa ta rfato mali gagaonana."

3 Gabe, Yesuse nfan lali popo Zaitun taga ntotolang mali gagaw isa ta nbo lali Ebai Sombayang Mamagalca. Gabe Petrus, Yakobus, Yohanes fare Andreas rdahle Yesus bo si re I be, gabe si rfautno I, 4 "Guru, mfabinga ame lae, ta Guru mu nanai tina. Opfis Ebai Sombayang Mamagalca bo dewisina. Fare ahai i ni fafayalna gabe laisa farumi tina ndadi i?"

5 Yesuse nua si, "Mewe fjagjaga, matina denabe dakale mew. 6 Ningalena smatna lal osta rlafo rpake Ya ngahnyokna, fare si du laitane, ‘Ya tane to, Kolano ta Jou Lahatalla njaji bo nfasalamate smatna!’ Ga si tina dakale smatna lale to bo rderera si. 7 Gabe laisa mew flonga parang mali batangna, penepa mali gagaw nesana, mewe mati famcaitna. Farumi tina nane ndadi i, ga tina ni oras paube dunia tae bo nkiamatna. 8 Ga lomanta suku re suku osta rfaparang, kerajaan fare kerajaan ta nesa osta rfaparang. Fare osta en fawe sui manca-manca, fare en hawe smatna rmata an. Ga farumi tina taga mulain kangela kiamatca nlafo paube, tina laisa kangela ta mapingna rbasam orase nturina ntub.

9 Gabe mewe nane fpei famafia! Ningalena mew fdela Ya, smatna bo rpo mew bo dadili mew mali agama Yahudina riri ta rfabobokona. Mew bena bo fduk punpun mali ebai sombayang agama Yahudina. Si rfabo mew lali gubernurca fare kolanona. Fare si bo rfautno mew. Mana mew nimew orase bo fabinga Ya lali sili. 10 Ningalena farumi suku bangsana nane rlonga su Abar Mafia cia, taga kiamat. 11 Gabe laisa en ta dute mewe bo dadili mew, mati famcaitna ahai ta bo funa. Mewe fu beto ahai ta Jou ni Rohca ncula funa.

12 Osta en ni orasna, smatna rpo tenori fare ramarina bo rduk punpun denabe rmat. Laina bena re apana, si osta rpeo nturina laina. Fare osta en bena wai nenenana rlawage hma re hnyerina, si rpo hma re hnyerina bo rpun famat si. 13 Gabe farumi smatna osta riri le mew ningalena fderera Ya. Ga smat ta ndela Ya turusca denabe nmat, Jou Lahatalla bo nfasalamat i."

14 Yesuse nu, "Lomanta en smat isa nmakotalena gaole mali Jou Lahatalla, i bo nlafo. Smat cia bo nosal mali Ebai Sombayang Mamagalca, mali gagaw ta pantasa pa bo ina. (Ise ta nbaca tane, ftarokira famafia bo ftaife ningalena). Gabe laisa smat ta nmakotaleca nosal mana to, smat ta en mali batang Yudeana, ta mafiana rfarera bo fgogane mew mali lolasna. 15 Smat ta si puis ebaina popo, mati fduri bo fyal okosesi mali ebai lolona, ga fduri fare ffarera to. 16 Laina bena re smat ta en mali betina, mati flolai mali ebai i bo fyal pakena. Fatoale bo ffarera! 17 Ga ta rkangela foloi oras ciana, maping ta riri badanna fare ta nturina ncus subena.

18 Fsombayange to bo tina mati ndadi ina mali wol ta orasna ulan. 19 Ningalena, wol tina kangelana gaole, foloi fawe mali kangela ta smatna rbasame to. Mulain mali ta Jou Lahatalla npei dunia taena denabe oras tae, enpanto kangela ta bo ndadi i laisa tinana, fare tina osta ndadi i panto. 20 Gabe laisa Jouca nfakokope wol ta nkangela cia, smatna osta rmate ndumi. Ga ningalena I n'gogoru smat ta I fisange tona, I nfakokope wol kangela cia.

21 Oras tina, gabe laisa en smatna dua mew, ‘Co fem! Mesias I mantane!’ Penepa si du, ‘Mesias I pulina!’ Mew mati fdelana ahai ta si du tina. 22 Ga lomanta en smatna lal rlafo du si Mesias, penepa du si nabi ta jaga rfalafo Jou Lahatalla ni fatnaw lali smatna. Fare si bena rpei mujizat fare fafayal ta nfafcule si riri kawasa bo smatna rdela si bo si mati rdela Jou Lahatallana to. Gabe laina, si le ma bo rpei smat ta Jou Lahatalla nfisang si tona rdele ncal laling. 23 Gabe, mewe nane fpei famafia to! Farumi tina Ya ikua mewe ntuba to tina ndadi paube."

24 Yesuse nu hawe, "Oras wol kangelaca bo morco, wolca fare ngaca plangno panto hawe. 25 Ototafna osta marapawil mali langitca, gabe farumi ta en mali langitcana ndadi rurang.

26 Ga oras cia, smatna osta demi Smat ta mali sorogaica nlafo nfarerer re metna fare farumi ni kawasa ta mamagalna. 27 Gabe, smat ta mali sorogaica osta ncula malaikatna rfayalo farumi I ni smat ta I nfisange tona mali farumi gagaw mali dunia tae, mali cicapo denabe lali cicapo."

28 Yesuse nu andeande isa laitane, "Coba mewe fbalajar mali ai ara tae. Gabe laisa ni magal nenenana, mulaine bisbis fare mulaine ntipa i, mewe fto wolwolna bo nlafo i to. 29 Laina bena gabe laisa mew fem wol ta kangelana ta Ya ikuna mulaine bo ndadi i to, mew ndadi fto, mnu panto hawe smat ta mali sorogaica bo nlafo hawe. 30 Flonga famafia ta Ya ikuwa mew tane, smat ta rtub oras taena en ta rtub sube denabe farumi tina ndadi i. 31 Langit fare bumi tae bo namnyei, ga Ya nik mautingna osta en turus denabe lali."

32 Gabe Yesuse nua ni muritna hawe, "Isa ntopa opfis Jou Lahatalla ntuca nlafo hawena. Malaikat ta mali soroga ina rtopa, Jou Lahata ntu cama ntopa, ga Jou Lahatalla be ta ntona. 33 Gabe mewe nane fpei famafia fare fjagjaga! Ningalena, mew ftopa opfis tina bo ndadi ina. 34 Oras ta Smat ta mali sorogaica bo nlafo hawe, Ya ipo andeande laisa ebai ppu isa nfateame ni ebaica, ningalena i bo nfana lali gagaw ta laspa.I nfn paubena, i nua ni smat karajanna rjaga ni ebaica, fare i nlowto si karajan isa-isa. I ma nua ta njaga manaca bo njaga turus. 35 I nane njagjaga to, ningalena i ntopa ebai ppuca opfise bo nlafona. Faramanega i nlafona malingine lae, doram wop fapaluane lae potamdoma penepa dororam isube. Laina bena re mew. Mewe nane fjagjaga turus. 36 Matina denabe Ya ilafo ga ikeme mew fsiap pa. 37 Ahai ta Ya ifatnawe mewna, Ya ifatnawe bena mali farumi smat: fjagjaga to!"