1 Maralapis wol pifis lalina, Yesuse nlolai hawe lali bendar Kapernaum. Ga smat ta pulinana rlonga Yesus i mali ebai i. 2 Gabe smatna lal rlafo rfayalo si, denabe gagaw panto, mali bawaca nbona ma kose to ningalena smatna lal. Mana, Yesuse nfabinga si Jou Lahatalla ni mautingna. 3 Oras ciana, en smat sifate rlafo. Si dute smat isa nfanfan pa lali Yesus I. 4 Ga smatna lalna uatu, gabe smat cia duti lali Yesus I pa. Si rcalawe ebaica ni ta puisona, neta mali Yesuse bobokoca nais. Nmasalawe to, si rfadurea smat ta nfanfan pa cia, bahnga be re ni musala ta npake namtulo ica. 5 Oras ta Yesuse nem ahai ta si rpeina, Yesuse nto si rdela I. Fare Yesuse nua smat ta nfanfan pa cia, "Tenok taw, anim dosana Ya ifayangise to."

6 Ga en hawe guru agama sifis ta rto Musa ni kitab silim tasa rtotolang mana, ga si du mali wlorina laitane, 7 "I mdel pa ta bo nu laina. I npei ni dirica laisa Jou Lahatalla. Ningalena, smatna isa pa ta bo nfayangis smat na riri dosana, ga Jou Lahatalla be."

8 Ga Yesuse nto wlorina, gabe nua si laitane, "Pesaga mewe fututa lainana? 9 Oras ta Ya ikua smat ta nfanfan pa tae, ‘Anim dosana nduk ampunge to,’ mewe fdelana uatu pa smat tae ni dosana nduk ampunge to. Gabe laisa Ya iku, ‘Mpalinge bo mlange nim musalaca fare mfane to,’ mewe osta fto Ya nik kawasa ningalena mew osta fem i nfane to. 10 Gabe oras tae Ya bo ifamafia i bo mewe fto, mali dunia taena, Smat ta mali Sorogaica ni kawasa bena bo nampunge smatna riri dosa." Gabe Yesuse nua smat ta nfanfan pa cia, 11 "Ya ikua aw, mpalinge to, mlange nim musalaca, muwe to lali nim ebai!"

12 Gabe smat ta nfanfan pa cia npaling, tina to nlange ni musalaca taga ncapang natalil ndel mali smat laloca nbona. Farumi smatna rgarayane ndumi, gabe si rfamamagal fare rcuba Jou Lahatalla fare du laitane, "Momofia pa, bahnga paube bo ite tem ta mfalainana."

13 Yesuse nfan hawe lali Talaga Galilea mtopona. Pulina ma smatna lal rlafo I, gabe Infafcule si.

14 Fola tina, Yesuse nfan hawe, fare I nem smat isa ngahnyo Lewi. I cia Alfeuse ntu i. Lewi tae jaga nfautno pajak. I ntotolang mali gagaw ta si biasa rkarajanna, gagaw ta smatna rpalas pajakna. Yesuse nua i, "Mali, bo mderera Ya!" Lewi nlonga tina, nosale ga nderera Yesus.

15 Oras ta Yesuse I re ni muritna rfane rceli mali Lewi ni ebaica. Mana ma en bena smat ta biasa nfautno pajakna lal fare smate nesa ta smatna du si rbaradosa. Si rtotolang rceli farerer re Yesus fare ni muritna, oras ciana smatna lal ta rderera Yesusna. 16 Oras ciana ma, en guru agama Yahudi ta rto Musa ni kitab silim tasa, ga si bena ta rderera fatfato ta ngahnyo Farisi. Si dem Yesuse nceli farerer re smat ta rfautno pajakna fare smate nesa ta du si rbaradosa tina. Gabe si dua Yesuse ni muritna, "Ya, pesaga I nceli re smat ta rfautno pajakna fare smat ta rbaradosa nesanana?"

17 Yesuse nlonga si du tina, I nua si laitane, "Ga smat ta rcehatna pa, ta rparlu mamana, ga smat ta dowilna, tina ni ngale, Ya ilafo bo ikololaw smat ta damolangna pa, ga Ya ilafo bo ikololaw smat ta nbaradosaca bo rderera Ya."

18 Bahnga laitane, Yohanes ta nfasisopca ni muritna fare smat Yahudi ta rderera fatfato Farisina rpuasa. Ga smat diranca rlafo rfautno Yesus, "Pesaga Yohanese ni muritna fare smat Farisi riri muritna rpuasa, ga Apa anim muritna rpuasa pa?"

19 Gabe Yesuse ncanglo si npake andeande, "Ya tane fatailo laisa man ta nfasawca. Gabe laisa man ta nfasawca i mali rame fasawca sube, i ni deldelona osta rpuasa? Enpa'o bo ni deldelona rpuasa gabe laisa i nfarerer re sil sube. 20 Ga osta en ni orasna, smate nesa bo jal man ta nfasaw cia mali sili. Oras cia taga rpuasa."

21 Gabe Yesuse nu hawe npake andeande laitane, "Smatna osta isa pa ta rdilip obat po rpake pake agona, ningalena gabe laisa bo rtosfa obat cia, pake po ta rdilpe ica osta nfalululo i, gabe kabaya ago cia osta nmarasekanna mamagal hawe. 22 Laina bena, enpa smat ta dafrai anggur ta po mali anggur gagaw ta agona. Ningalena gabe laisa anggur gagao mali aiwani gico cia ago ito, i ni gicoca ncicoal. Gabe, laisa smatna dafrai anggur po mali gagaw ta agona, anggur ta pona nca, anggur ta pona osta nfarapes anggur gagaw ta agona, gabe anggur tina maraepa. Gabe, ta pona nane tising mali gagaw ta po bena."*

23 Bahngana, neta wol sabat, wol ta smat agama Yahudina bisa rkarajan pa, Yesuse I re ni muritna rfan rdel mali bet gandumca. Oras ta si rfanna, Yesuse ni muritna rkati gandum ese. 24 Mana, en bena smat Yahudi ta rderera fatfato Farisi, si dua Yesus, "Mem tina! Pesaga si rkarajan rkati gandum mali wol Sabat? Tina si rcapial ite rir agamaca ni fatfatona!"

25 Gabe Yesuse nua si, "Mew fbaca to, carita mali Jou Lahatala ni Kitabca ga kolano Daut. Oras ta i re smat ta rderera ina rari an panto gabe rbibisil. 26 Kolano Daute ncung namul Jou Lahatalla ni Ebai ta rpeo i Sombayangca, taga nan roti ta rpeo sadaka lali Jou Lahatalla ina. Ga roti tina, gabe laisa tderera ite rir agamaca ni fatfatona, imam nabe ta danna. I ma noce smat ta rderera i na. Oras ta tina ndadi ina, Abyatar ta ndadi imam mamagal."

27 Yesuse nmauting hawe lali sili, "Wol sabat cia, Jou Lahatalla npei bo smatna rfafolfola si, enpa ta bo ndadi kangela i bo smatna rderera. 28 Gabe, Smat ta mali sorogaica ni kawasa bo nfato ahai ta smatna rpei mali wol Sabat."