1 Bahnga laitane, en smat ta rderera fatfato farisi, fare guru agama Yahudina ta rto Musa ni kitab silim tasa, rlafo Yesus mali bendar Yerusalem. 2 Si dem Yesuse ni muritna rceli ga duase kakamorina ntuba pa rderera fatfato ta hma re bbur tantuba rfafculena. 3 Ningalena, smat mali fatfato Farisi, laisa smat Yahudi ta nesana, si dicena cicoal agamaca ni fatfatona. Gabe laisa totolange bo tceli, si duase kakamorina rderera hma re bburi tantuba riri sogarona bo Jouca nem tina molang. Gabe laisa duase kakamorina pa, si osta rceli pa. 4 Laina bena gabe laisa si duwe mali pasar i mali, si rceli pa gabe laisa rfaberesi riri badanca paube ya rderera si riri fatfatona. En bena fatfato nesa ta si dicena cicoal sube, laisa fatfato tuas galas, tampayang fare okosesi ta nesana.

5 Gabe smat Yahudi mali fatfato Farisi fare guru agamana rfautno Yesus laitane, "Pesaga Apa nim muritna rderera pa fatfato mali ite hmare re bbur tantubanana? Si rcelina duase kakamorina ntuba pa. Tina molang pa mali Jou Lahatalla nbona!"

6 Yesuse nua si, "Ee mew tane smat ta fmadarawa! Ahai ta Jou Lahatalla nua nabi Yesaya ntuba mew to tane ndadi i to, laitane,

‘Bangsa tae nfamamagal Ya re fmorina be, ga wlorina laspa mali Ya i.

7 Ni guna pa rfamamagal Yana, ningalena ta si rfafcule smatnana tina rderera be smatna riri fatfato.’

8 Nabi Yesaya nu laina, tina mewe to. Mewe ftafuso pa Jou Lahatalla ni parentana, smatna riri fatfato mewe fderera famafia." 9 Yesuse nmauting hawe lali sili, "Mewe fpandena gaole ftaul Jou Lahatalla ni parentana, ningalena mewe fderera be hma re bbu mew tantubana riri fatfato. 10 Tantuba nabi Musa nparenta laitane, ‘Mewe nane ffamamagal be hma re hye mewna.’ Fare ‘Ise ta nmautingna nu ta mayai lali ni apa i re ni aye, i nane nduk salna nmat.’ 11 Ga mew fafcule smatna, ahai ta si dailow bo rgali fmarica fare hnyerica, mati si rpona, ga ta mafiana rpeo sadaka lali Jou Lahatalla i. 12 Mewe fafcule laina, tina laisa re mew fua si mati rgali fmaricana fare hnyericana. 13 Mewe fafcule ta mfalainana, tina laisa re mewe fderera pa Jou Lahatalla ni parentana, mew fderera be mew nimew fatfato tutuling ta mew ffalafo lali smate nesa. Fare en bena fatfato ta nesana. Fare lal hawe fatfato ta mewe fpei laisa tanena."

14 Fola tina Yesuse nololaw hawe smat laloca taga nua si laitane, "Flonga famafia bo ftaif ta Ya iku tane. 15 Ahai ta ncung mali smatna fmorina, tina pa ta npei ndadi i rbaradosa lali Joucana. Ga ta ncapang mali smatna fmorina, tina ta npei denabe i nbaradosa lali Jou Lahatalla i." [16 Gabe, flonga famafia fare fising mali wlomewna.]

17 Yesuse I re ni muritna rfateam smat laloca taga rcung mali ebai isa. Fare ni muritna rfautno I andeande ta nanaica ni ngalena.

18 Gabe Yesuse nua si, "Ga mewe ma ftaif pa tina ni ngalena? Mewe rasa fto to, ahai ta smatna dan tina npei si rbaradosa pa mali Jou Lahatalla I paga? 19 Ningalena, an tina ncung namul wlorna pa, ga ncung namul hnyaorna, taga ttopa i natalil mali kakusna." Yesuse nu laina mali wlonana farumi an na tane ndumi.

20 Yesuse nu hawe, "Ga mauting ta ncapang mali smatna fmorina, tina ta npei smatna ndadi rbaradosa. 21 Ni ngalena, pumul smatna wlorina, farumi ta mayaina ncapang: fikiran ta mayai, nlokolo smat ta i ni uat i pa penepa ta i ni ngolo i pa, malois, nmafapun, 22 nyal sal, nlokolo smate nesa ni okosesi, tabeatna mayai, nmafulas mauting, wloya mamagal ni le smat, nfamayai smate ngahnyo, ncombong fare nmakotale. 23 Farumi ta mayaina tina ncapang mali smatna fmorina, gabe laisa smat cia nderera, tina ta npei i nbaradosa."

24 Gabe Yesus I re ni muritna rfateam gagaw cia, taga rfan lali batang ta ndahle Tirus. Tina to Yesuse ncung namul ebai i, ningalena I nailow pa bo smatna rto I mana. Biarega laina, smatna rto be Yesus I mana. 25,26 En maping isa, smat Yahudi i pa. I ntub mali batang Siria ndahle bendar Fenisia. I ntu mapingca setane ncungi. Maping cia nlonga Yesuse nlafo, tina to i nfane ga nlu nap mali Yesuse nbona. Fare i ndore bo Yesuse nfaungo setan ta ncunge ntuca.

27 Gabe Yesuse nua maping cia, "Ya igali smat Yahudina su. Ningalena gabe laisa Ya igali aw ntuba nuto birahi pa, laisa Ya iyal roti ta rfasadia bo wai nenenana ga ipo lali funna."

28 Fare maping cia nu, "Molang, Apa. Ga fun ta en mali-mali mejaca papapona ma dna ane gleo ta marapawil mali wawai nenenana rari mejaca."

29 Nlonga laina, Yesuse nua maping cia, "Maping ta aw, ta muna molang. Gabe, mfane to! Oras tae setanca ncapange to mali ntumca."

30 Nlonga Yesuse nu fola tina, maping cia nuwe. Nlafo mali ebai i, i neme ntuca namtuli mali baleca popo, ningalena setan cia ncapange to.

31 Fola tina, Yesus I re ni muritna rfateam batang Tirus, rdel mali bendar Sidon. Si rfan mali talaga Galilea mali batang Dekapolis. 32 Mana en smat isa, npongo fare nmomow. Smatna dut i lali Yesus i, si rdore bo Yesuse nisinge kakamona mali smat ta nowilca bo nmafia.

33 Gabe Yesuse nute smatca bo rfalaspa si mali smat laloca bo si smat silu be mana. Fola tina, Yesuse ncunga loboca mali smatca kanyo piluna. Taga Yesuse nitfo I loboca taga nfabasma smat cia papleoca. 34 Fola tina, Yesuse nbo nais langitca, nfawana ndasa, fare nu laitane, "Efata!" Efata ta ni ngale, ‘Masalawe to.’ 35 Gabe smatca nlonga to hawe, fare i nmautingna molange to.

36 Fola tina, Yesus nua smat ta manana, mati fafetang I lali smate nesanana. Ga I nua si, "Mdel pa ta bo ffafetngo smatna," ga si rfacicoulo dafetangna. 37 Smat ta rlonga carita tina, si rherang fare rgarayanna gaole, gabe si du, "Farumi ta I npei tina mafiana gaole! I npei smat ta rpongona rlonga hawe, fare smat ta rmomouna rmauting hawe!"