1 Fola tina, Yesuse nuwe lali I ni pnu Nasaret, gabe ni muritna rderera I. 2 Neta wol Sabat, Yesuse nfafcule mali ebai sombayang agama Yahudina. Smat ta manana rlonga Yesuse ni sogarona, si rherangna gaole, gabe rfauwo si laitane, "Ya, ga smat tae ni sogaro tina nto manca mali ga e? I npadena gaole? I nduk kawasa manca mali denabe npei mujizat tina? 3 Ga I cia bas I, I ni aye Maria, tenona Yakobus, Yoses, Yudas fare Simon. I ramana ma en farerer re amam mantane paga?" Ningalena smat mantanena rto tina, gabe dailow I pa.

4 Gabe Yesuse nua si laitane, "Ga fatutua, manca be, smatna daraga nabi ta jaga rfalafo Jou Lahatalla ni fatnaw. Mali I ni pnuna tutuling, mali teno re ramana tutuling, fare mali i ni ebai tutuling si dailow i pa."

5 Mali gagaw cia, Yesuse npei mujizatna lal pa, ningalena smat ta manana rdela I pa. I nfatig be kakamona mali smat sifis ta dowil fare si le ma rfamafia. 6 I nherang, ni ngalena si rdela pa.

Fola tina, Yesuse nfane nfafcule mali pnu isa fare mali pnu ta nesana. 7 Yesuse nololawe ni murit yafasa re silu tasa, taga ncula si rfanna smat sililu. I ma npo si kawasa bo rfaungo setanna. 8 Yesuse nfatnawe si bo mati dut fapaisana mali riri fanfacana. Ta si dutna titial be. Roti, nokon, tiwi mati dutna. 9 Rpake nal, pake afiann mati dutna. 10 Gabe Yesuse nua si hawe laitane, "Gabe mali gagaw isa en dailowe mewe to mali riri ebai i, fteteam mana denabe fsapang mali gagaw cia. 11 Gabe laisa smat ta mali gagaw ciana dailow pa fare rlonga mew pa, mewe fateam si to. Pepesa ta mali ficomewna ffatartara mana to, bo ffauloyaneto si rcal mali Jou Lahatalla I."

12 Rlonga fola tina, muritna rfane ga rfabinga smatna bo diwane wlorina rderera Jou. 13 Si rfaungo setan, fare si le ma rmomsa egat lali smat ta dowilna bo smat ta dowilna rmafia.

14 Manca-manca smatna dafetang Yesus, ningalena I ngahnyona ncapange to manca-manca, denabe kolano Herodes nlonga tina. En ta du, "Yesus cia Yohanes ta nfasisopca ta popiseica nmat, ga npaling hawe laha? Denabe I npei mujizat talalo i tina!"

15 En bena ta nesa du, "I cia nabi Elia!"

Fare en bena ta du, "I cia nabi nesa i ta nfalafo Jou Lahatalla ni fatnaw lali smatna, laisa nabi tantubana."

16 Oras ta kolano Herodese nlonga smatna dafetang tina, i nu laitane, "I cia Yohanes ta nfasisopca, ta ya ikati bobokocaca. Oras tae i npaling hawe!"

17 Kolano Herodese nu laitane, ga popise ina ya ta ifasula rwagfo Yohanes, taga rpitan i re rante, taga rfasungai bui. I npei lainana poko be Herodias. Ni caritana laitane: kolano Herodes nyal Herodias taga npeo ni ngolo i. Naga, Herodiase nfasawe to re Filipus, kolano Herodese teno tutuo i. 18 Gabe Yohanese ntolea kolano Herodesna nlolai ma nlolai, i nu laitane, "Apa mcapial Jou Lahatalla ni fatfatona, ningale apa mnyale nim tamai tutuoca taga mpeo nim ngolo i." 19 Oras ta Herodiase nlonga laina, i wlo ya mgo i mali Yohanes i, gabe i nusaha bo npun Yohanes denabe nmat. Ga Herodiase nduk oras paube, 20 ningalena kolanoca ncula tentarana rjaga Yohanes famafia mali bui ciana. Kolano Herodes namcait Yohanes, ningalena i nto, Yohanes cia smat ta ntubna molang fare wlona beresi mali Jou Lahatalla nbona. Gabe tina, i nceya Yohanes. Biarega kolanoca wlona sangnang pa ga laisa Yohanese nmauting, i nlokolo nlonga.

21 Bahnga laitane, Herodiase nduk oras bo nbalco Yohanes wlo ta kangelana. Oras ciana kolano Herodese ni umurna nbangi gabe npei rame, i nololaw pamarentana fare tentara fare smat mamagal ta nesana mali batang Galilea. 22 Oras rameca ndadi i, Herodiase ntu mapingca ncunge ga nowa. I nowana mafiana gaole, denabe kolanoca i re ni smat ta rlafona rcangnang. Gabe kolanoca nololaw Herodiase ntuca. Kolanoca nua i laitane, "Awe bo mdor ahai, mua ya mali, lomanta ya ipo!" 23 Fare kolano Herodes njaji denabe ncasi mali wai mapingca, i nu, "Ahai be ta awe mdorna, ya osta ipo. Biarega nik kerajaan tae lowat fapaluane bo ipo aw."

24 Nlonga kolanoca nu laina, wai mapingca nfan lali hnyei Herodias taga nfautan laitane, "Aye, ya bo idor ahai mali kolanocana?"

I ni aye ncanglo, "Awe mdor Yohanes ta nfasisop bobokoca."

25 Fare waica fatoal be nlolai hawe lali kolano Herodes i. Taga nu laitane, "Ya idor Yohanes ta nfasisop bobokoca, fising i mali loyang faisa tane to!"

26 Oras ta kolano Herodese nlonga ahai ta wai mapingca ndorna, i wlona kangelana gaole. Ga i ncasi to mali wai mapingca fare smat ta rlafona rbona, gabe ntaf pan to ahai ta wai mapingca ndornana. 27 Gabe tina to kolano Herodes ncula ni wawai isa nfan lali buica bo nkati Yohanese bobokoca. Gabe smatca nfane ga nkati Yohanese bobokoca. 28 Fare smat cia nising i mali loyang isa Yohanese bobokoca taga npo wai maping cia. Taga waica npo hnye. 29 Laina Yohanese ni muritna rlonga Herodese nkati Yohanese bobokoca, si rlafo ga jale ni mayatca taga rgaile i.

30 Yesuse ni murit ta rdadi susula si tasa rlolai taga rfayalo si farerer re Yesus. Fare rfabinga Yesus farumi ta si rpeina fare ta si rfafcule tona. 31 Ga oras ciana smat ta rlafo fare ta rfanna lalna uatu, denabe Yesus I re ni muritna riri oras pa bo rcelina. Gabe Yesuse nua ni muritna, "Mali to ite tfan lali gagaw ta mlileina bo tfafolfola it faokoce!"

32 Gabe Yesus I re ni muritna rdawil pelang asa taga rfan lali gagaw ta ndahle pnu pana bo si rtutuling mana. 33 Ga smat ta lalna dem si ta rfanna, fare si rto gagaw ta Yesuse I re ni muritna bo rfanyo ica. Gabe smat mali farumi pnuna rfan mali gagaw cia. Si rfanye ficori, ga si rtuba mali gagaw ta Yesus I re ni muritna bo rfanyo ica.

34 Oras ta Yesuse nduri mali pelang tasa, I nem smatna lal ta rtotoman I manana. I nmasie sina gaole ningalena sina laisa domba ta riri tuan pana gabe isa njaga si pa. Mana, Yesuse nmulaine nfafcule si okosesina lal.

35 Orasna bo doram, Yesuse ni muritna rlafo I, fare du, "Guru, gagaw tae nalaspa mali pnu i, fare bo doram. 36 Gabe ta mafiana Guru msula smat lalo tae rfane to, bo si rgon an mali pnu ta ndahle mantanena."

37 Gabe Yesuse nua si laitane, "Mew ta nane ffaseli si!"

Si rcanglo Yesus, "Wataw, ga smat ta lalo itae! Ite nane tkarajanna re ningah su taga ite tduk tiwi bo tgone rari an ta lalo ica!"

38 Yesuse nua si, "Mewe fut rotina pifis lalona? Co fem!"

Deme fola, si dua Yesus, "Rotina pilim fare iyanna silu."

39 Fare Yesuse ncula smat laloca ntotolang rpei puk-puk mali momna popo. 40 Gabe si rtotolangna rpei pukpuk, pukpuk isa smate slubisa, fare en bena smat yafalim. 41 Fola tina, Yesuse nyal roti pilim tasa fare iyan silu tasa, I nbo nais langitca taga nu tarima kase lali Jou Lahatalla I. Taga nfawogwogla rotina, taga npo ni muritna, bo si rpo smat ta en manana. Laina bena re iyan silu tasa, I nlow to si ndumi. 42 Si rceli ndumi denabe rmo si. 43 Rceli fola, Yesuse ni muritna rfayalo roti re iyan ta gleona, karanjang yafasa re pilu bakbak. 44 Ta dan roti wol ciana smat lalan lim, detang be manna.

45 Fola tina, Yesuse tina to ncula ni muritna rdawil pelange, bo rfane rtuba lali pnu Betsaida ta i mali talagaca puli pao. Oras ciana, I nua smat laloca duwe. 46 Oras ta smat laloca duwe, Yesuse ndawil nais popoca ga ncombayang.

47 Orasna bo dorame to, Yesuse ni murit ta rdawil pelang tasa si mali talagaca fapaluan, Yesuse ntutuling sube po lei batang i. 48 Yesuse neme ni muritna dafena panto rcalina, ningalena latanca cicoal nuf mali uhngori mali. Lase bo sema Yesuse nlafo si, I nfanfan puis wayaca popo. Mali I wlonana bo naliw si, 49 ga oras ta si dem Yesuse nfanfan puis wayaca popo, si dunama setan i gabe rgigam, 50 ningalena si damcaitna gaole. Ga Yesuse tina to nua si laitane, "Fmalan, mati famcaitna, tae Ya!"

51 Fare Yesuse ndawile riri pelang tasa, latanca ma nfola. Fare farumi si rherangna gaole. 52 Ningalena, biarega si deme to Yesuse nfatube smat laloca, ga si rtaif pa ise I ya, ningalena si wlorina cicoal.

53 Yesuse I re ni muritna rlafo puli talagaca puli pao, si rcoal mali batang Genesaret. 54 Rduri mali pelang tasa, smat laloca tina to rfayala cia Yesus. 55 Farumi si rfarera lali farumi gagaw mali batang tina, fare dute smat ta dowilna lali Yesus I, ta si mali riri musalana popo, manca be si rlonga I mana. 56 Manca be Yesuse nfan mali pnuna, mali bendarna, denabe lalei smatna rari betna, smat ta manana dising smat ta dowilna mali gagaw ta mlelang ta Yesuse bo ndelona. Si rdor lali Yesus i bo npo si oras smat ta dowilna bo dice I, biarega dice ni jubaca cicapona be. Gabe farumi smat ta dowilna rmafia ningalena si dice I.