1 Motle wol pilu be smat agama Yahudina bo rpei riri wol mamagal ta ngahnyo Paska. Wol mamagal cia, si rlolam ta Jou Lahatalla nfabebase hma re bburi tantubana mali smat Mesir ta rfakangela sina, fare si bena rpei wol mamagal Roti ta npake Ragi Pa. Ga oras ciana, smat Yahudina riri imam ta rfaboboko fare guru agama ta rto Musa ni Kitab silim tasa rfatator re bo rwagfo Yesus ni lalingna rgogogan si bo rpun famati. 2 Si rfauwo si, "Mati twagfo i mali wol mamagal taena, matina denabe smat ta rlokolo i na rpei hal."

3 Oras Yesus i mali pnu Betania, I ntuli mali Simone ni ebaica. Simon tae popiseina panyaket pado. Oras Yesuse ntotolange ga nceli, maping isa nlafo nut egat pau mafia ta ngahnyo narawastu, mulona mamagal mali botol pat bubulang isa. Maping cia ncalawe egat gagao sapngoca, fare nduplo falalalo i mali Yesuse bobokoca.

4 Ga smat sifis ta dem tina, rcangnang pa gabe rfauwo si, "Egat pau mafiaca mulona mamagal pesaga nfable i na? 5 Gabe laisa twage i, mulona laisa re smat ta rkarajanna rari sagige mulo taun bahnga. Ga tiwi tina tlouto smat ta riri re rari pana." Fare si rtolea maping cia.

6 Dem tina, Yesuse nua smatna, "Pesaga mew ftolea maping taena? Inanai to. I npei okosesi ta mafia mali Ya i. 7 Smat ta riri re rari pana osta si mali mewi turus, gabe oras ahai be mew musti fgali si. Ga Ya tanei farerer re mew turus pa. 8 Maping tae npeie to ahai ta i musti npeina. I nduplo egat pau mafia mali Ya nik badan tae, tina laisa re i nfasiape to Ya nik mayatca oras ta bo rgaile Yana. 9 Flolam famafia ta Ya iku tane, manca be smatna rfabinga Abar Mafia mali Jou Lahatalla i mali farumi dunia tae, si osta dafetang ahai ta maping tae npeo Yana denabe smatna osta rlolam i."

10 Isa mali Yesuse ni murit yafasa re silu tasa, i ngahnyo Yudas Iskariot. I nfan lali imamna riri ta rfabobokona bo nfabinga si, i bo npo Yesus lali sili. 11 Oras ta si rlonga Yudase ni mauting tina, si rcangnang gabe si rjaji bo doce i tiwi. Fola tina, Yudase niyawa oras ta mafia bo npo Yesus lali sili.

12 Mali wol ta pusa ica oras si rpei wol mamagal Roti ta npake Ragi Pa, oras ciana si nane rkati domba Paska. Gabe Yesuse ni muritna rlafo I ga rfautan, "Guru, manca Guru mailowna amame kfasadia an wol mamagal Paska bo ite tceli farerer?"

13 Rlonga tina, Yesuse ncula ni murit silu. I nu laitane, "Mew lali Bendar Yerusalem, pulina mew osta faduduk re man isa npapa tampayang isa lolo waya. Mewe fderera i. 14 Flafo mali ebai ta i ncungica, mewe fua ebai ppuca, ‘Animam Guruca ncula kfautan, manca gagaw ta Guruca bo npake i nceli wol mamagal Paska farerer re I ni muritna?’ 15 Mana ebai ppuca osta nfafcule mew gagaw isa ta nmamagal puis paona fare farumi parkakasna en mana ndumi to. Mewe fasadia to an wol mamagal cia mana."

16 Rlonga Yesuse nu fola tina, I ni murit silu rfan. Rlafo mali bendar cia, si rduk laisa re ta Yesuse nua sina. Fare si rfasadia an wol mamagal Paska.

17 Orasna doram, Yesuse nlafo mali gagaw cia nfarerer re I ni murit yafasa re silu tasa. 18 Oras ta si rtotolange ga rceli, Yesuse nu laitane, "Flolam famafia ta Ya iku tane. Mali mewi ta ftotolange ga fseli re Ya tane, en smat isa ta bo nwage Ya."

19 Rlonga tina, si wlorina nmagogoru i gabe isa-isa dua I, "Ya pa, paga?"

20 Fare Yesuse nua si "Smat cia isa mali mew smat yafasa re silu tane, i ta ntuke roti galas isa re Ya. 21 Ga Smat ta mali Sorogaica osta nmat laisa re ta Jou Lahatalla nu ntuba tona. Nabina rlefo laina to mali Jou ni Kitabca. Ga nkapalange to smat ta nwage smat ta mali sorogaicana, i osta nduk salna tebteb. Smat cia ta mafiana mati ntub mali dunia taena."

22 Oras Yesus I re ni muritna rceli, Yesuse nyal roti taga ndor tarima kase nais Jou Lahatalla I. Fola tina, I nfawogwogla roti tina taga noce si, I nu, "Roti tane Ya nik badanca, fyale to."

23 Fola tina, I nyal cawan taga nu tarima kase nais Jou Lahatalla I. Fare I noce si gabe farumi rdom mali cawan cia. 24 I nua si, "Tane Ya nik laflafna. Oras Ya imat, Ya nik laflafna osta maraepa bo faolang Jou Lahatalla ni janji lali smatnana. Ga Ya nik laflafna maraepa bo nfayangise smat lalo ni dosana. 25 Flonga famafia ta Ya bo iku tane, mantane bo lali, Ya osta idom anggur panto. Lomanta Jou Lahatalla nkawasa ndadi Kolano mali I ni smatna, taga Ya idom hawe anggur ta pona."

26 Fola tina, Yesus I re ni muritna rmanyanyi nyanyian bo Jou Lahatalla, folana si rfan lali popo zaitun.

27 Fare Yesuse nua si, "Farumi mew ta fdela Yana osta fngangala denabe ffarera fateam Ya. Ningalena, Jou Lahatalla nu to mali ni Kitabca laitane, ‘Ya osta ipun smat ta rjaga dombana, gabe domba ta rjagana rfasaksake si lali re mali.’

28 Tina ningalena, Ya osta imat, ga oras Ya osta ipaling hawe, Ya osta ilafo ntuba mali mewi mali batang Galilea bo ite tfaduduk pulina."

29 Fare Petruse nua Yesus, "Biarega farumi si riri ta rdelana ngangala denabe ffarera fateam Guru, ya osta enpa."

30 Fare Yesuse nua i, "Mlonga famafia ta Ya bo ikua aw tane, doram tae to, failu paube tataleca nkuku awe osta mu mfayala Ya pana faicol."

31 Ga Petruse ncanglo i nu laitane, "Gabe laisa Guru mmat, ya bena osta imat, ga ya osta iku pa ifayala Guru pana." Ga Yesuse ni murit ta nesana ma du laina.

32 Fola tina, Yesuse I re ni muritna rfan lali gagaw isa ta ngahnyo Getsemani. Fare Yesuse nua si, "Mewe ftotolang mantane su e, Ya bo isombayang. 33 I nut Petrus, Yakobus fare Yohanes. Oras ciana, I nbasamna namcaitna gaole fare namderer. 34 Gabe I nua smat si tol tasa, "Ya wlok yancusana gaole, ibasamna laisa bo imatna. Mew mantane su e, fare fjagjaga."

35 Fola tina, Yesuse nfan lali faokoce, fare nlu nap denabe uhngoca neta nyinyenca, taga ncombayang. I ndor gabe laisa bisa, I mati nduk kangela ta Jou Lahatalla nu to bo I na. 36 I nu laitane, "Apa e, ya Apa, Ya ito farumi Apa bisa mpei, enpa ta Apa bisa mpeipana. Gabe Ya idor Apa mfalaspa farumi kangela tane mali Ya i, ga mati mderera Ya nik maunana, mderera be Apa nim mauna."

37 Yesuse ncombayange fola, nlolai hawe lali sili, ga I nem sina smat sitol tasa damtoal. Gabe nfapaling si fare nua Petrus, "Simon, aw mamtuli? Awe mafena pa bo mtotoman jam habanga be bo mjagjagana? 38 Fjagjaga fare sombayange to, bo mew mati fmarapaolo dosacana, ningalena biarega mew wlomewna floko fderera Ya, ga nimew badanca nmampo pa."

39 Fola tina, I nfan hawe ga ncombayang, ndor laisa ta nana i na hawe 40 Ncombayange fola, nlolai hawe lali smat sitol tasa, I nem sina damtoal hawe, ningalena si damtututilna gaole. Si rpaling, si rfatoto pa bo dua Yesus ahai.

41 Fola tina, I nfane ncombayang hawe ta faicol. Ga I nlolai lali sili, I nua si, "Mewe famtuli fare fafolfola mew hawe? Nlafo i to. Tane ni orasna nlafo i to. Co mewe fem, Smat ta mali Sorogaica bo rpoi lali smat ta rbaradosana. 42 Fosale to bo tfan. Smat ta bo nwage Yaca nalaw panto."

43 Oras Yesuse nmauting sube, garayanna isa mali Yesuse ni murit yafasa re silu tasa ta ngahnyo Yudasca nlafo. I nlafo farerer re smatna lal, en ta dut eta fare en bena ta dut ai motmoto. Smat tane imamna riri ta rfabobokona, guru agama Yahudi ta rto Musa ni Kitab silim tasa fare simosimo Yahudina. 44 Yudas ta nwage Yesusca npei fafayale to lali smat lalo ciana, i nu laitane, "Smat ta fola ya bo ifatan i cia, cia to ta mew nane fwagfo ica. Mewe fwagfo i fare futi, matina denabe I nfarera."

45 Gabe smat laloca nlafo mana, Yudase tina to ndahle Yesus taga nu, "Guru," fare nfatan Yesus 46 Gabe smat ta rlafo farerer re Yudasna rfadahle si, rwagfo Yesus. 47 Ga smat isa ta nfarerer re Yesus mana, i ncalawe ni etaca taga nkati imam mamagalca ni smat karajan isa kanyona denabe morit.

48 Fare Yesuse nua si, "Mewe fu rasa Ya tane smat mayai ya, denabe mew flafo fut eta fare ai motmoto bo fwagfo Ya? 49 Naga wol de wol Ya re mew oras ta Ya ifabinga Jou Lahatalla ni Abar Mafia mali Ebai Sombayang Mamagalca. Pesaga mew fwagfo Ya mana pana? Ga laina to, tina nane ndadi i, ningalena farumi tina rlefoe to mali Jou ni Kitabca."

50 Far e Yesuse ni muritna farumi rfarera rfateam I.

51 Manana waiman isa ntutup i re obat ndederera Yesus, ga si bo rwagfo i. 52 Ga waimanca nowe ni obatna ga nfarera wangat bakbako i.

53 Fola tina, si dut Yesus rfan lali imam mamagal ni ebaica. Mana, farumi imam ta rfabobokona, simosimo Yahudina fare guru agama ta rto Musa ni Kitab silim tasa, si rfayalo si mana. 54 Oras Yesus duti mana, Petruse nderera i ga nalaspa, denabe rlafo mali imam mamagalca ni kintal ebaica, rlafo rtotolang rdahle yapca taga rnana si farerer re ta rjaga manana.

55 Mana, imam ta rfabobokona fare farumi ta rfaboboko Mahkama Agama si diyawa smate bo rcaksi ta molang pa bo ndadi fafayal Yesuse ncal, bo rfasal Ina nmat. Ga si rduk pa. 56 Smatna lal ta rlafo rdadi saksi ta molang pa ga ta si rfabingana nfaiteta i pa isa re ta nesana.

57 En smat sifis ta dosal mana rfabingana molang pa, si du, 58 "Ame klonga smat tae bahngana nu, I osta npu Ebai Sombayang Mamagal ta smatna rfaosal ica, ga mali wol pitul I osta nfaosal ta nesana, ta smatna rpei pana." 59 Ga farumi ta si rfabingana nfaiteta i pa isa fare ta nesana.

60 Fola tina, imam mamagalca nosal mali Mahkama Agama ta rfayalo sina fapaluan, taga nfautno Yesus, "Smatna lale to ta du Aw sal, ga Aw msanglo pa?"

61 Ga Yesuse lio pa, I nu paisapa. Gabe imam mamagalca nfautno I hawe, "Apa fatutua Aw tane Mesias, Kolano ta Jou Lahatalla njaji tantuba be? Fare fatutua Aw tane ma Jou Lahatalla ta ite tfamamagal I ca Ntu Aw?"

62 Fare Yesuse ncanglo, "Fatutua, I cia Ya to. Mew osta fem Smat ta Mali Sorogaica ntotolang mali gagaw ta nmafiaca mali Jou Lahatalla ta nkawasa ni welana, ga bo nlafo mali langitca mali metna fapaluan."

63 Rlonga Yesuse nu laina, imam mamagalca ntolena gaole denabe ncekane ni jubaca taga nu laitane, "Ga, smat tae npei ni dirica laisa Jou Lahatalla! 64 Gabe ite mati tiyawa saksina to! Mew tutuling flonga, to? Oras tae gabe laisa bo mew mfalaisa?"

Fare farumi ta si mali Mahkama Agama tina dailow, Yesuse nduk salna nmat.

65 Fare smat sifis mali silina, sina taga ditfo Yesus. Si rpitane mtana rpake obat, taga si rpun I, taga rfautan, "Gabe Aw fatutua smat ta mut Jou Lahatalla ni fatnaw, co Awe mu, ise ta npunna Aw!" Ta rjaga manana ma rpun I.

66 Oras ciana, Petruse i mali imam mamagalca ni kintal ebaica, gabe imam mamagalca ni smat karajan maping isa nlafo. 67 Fare oras ciana mapingca nem Petruse nnana i mana, i natngalo Petruse uhngoca taga nu laitane, "Aw bena jaga mfarerer re Yesus, smat Nasaret cia paga?"

68 Ga Petruse nu enpa, nu nfayala Yesus pa. I nu laitane, "Ya itaif pa ta amuna." Fola tina, Petruse i lali pasebaica taga nfatengtengan i mana. [Oras cia to, tataleca nkuku.]

69 Mana, smat karajan mapingca nem Petrus hawe, gabe i nua smat ta si manana, "Smat taema jaga nfarerer re Yesus." 70 Ga Petruse npida hawe.

Mnu pana, smat ta si manana dua hawe Petrus, "Ncal panto, awe isa mali sili paga? Taga aw tane smat Galilea aw!"

71 Fare Petruse mulaine ncasi, "Sobe Ya re Jou, ya ifayala I pa smat ta mewe fu i tae!"

72 Ga oras cia to, tina to tataleca nkuku ta failu. Mana Petruse mulaine wloyaneto ta Yesuse nua ina laitane, paube tataleca nkuku failuna, aw mu nfayala Ya pana faicole to."