1 Fare Yesuse nmauting hawe lali imamna riri ta rfabobokona, guru agama Yahudi ta rto Musa ni Kitab silim tasa fare simosimo Yahudina. I npake andeande laitane, "En smat isa npei bet anggur taga npei yaya nyel betca. Fare i n'gali lope bo ndadi gagaw bo nfo anggurna. Taga i npei hawe ebai bet isa tigo bo smat ta rjaga bet ciana. Fare i nfane tator re smat ta bo rkarajan mali bet ciana bo rfapepeya i na betca. Fola tina, i nfan lali batange nesa. 2 Ni oras ta bo tkati anggur na nlafo i, i ncula ni smat karajan isa nfan lali smat ta rjaga bet ciana bo rdore i na lowatna. 3 Ga si rwagfo smat karajan cia taga rpuni, fare rcula i nuwe nut paisapa. 4 Fola tina, smat ta na betca ncula smat karajan ta nesana hawe, rfan lali smat ta njaga bet cia. Smat karajan cia ma rpun i denabe bobokoca nmarapes, fare si rfamaimai i. 5 Fare i ncula i ni smat karajan ta nesana hawe rfan, ga smat karajan cia ma rpun i. Fare lal hawe ta i ncula sina, ga si tina en ta rduk punpun fare en ta rpun si ga rmat. 6 Oras tae motle smat isa, i ntu ta i n'gogoru ica. Morco napna i ncula ntuca nfan lali sili. I nu laitane, ‘Gabe laisa ya ntukca ta i lali, si osta rlonga i.’

7 Ga smat ta rjaga bet ciana rfauwo si laitane, ‘I tae ta bo ndadi waris mali bet taena. Gabe mali bo tpun famat i, bo bet tae ite rar i.’ 8 Fare rwagfo i ga rpun famat i. Taga ni mayatca rtopa i mali betca potalil."

9 Nafetang fola andeande cia, Yesuse nua si, "Tane, smat ta na betca bo npeo si ahai? I osta nlafo bo npun famat smat ta rjaga bet ciana. Taga betca i npo smate nesa bo rjaga i.

10 Mewe rasa fbaca to mali Jou ni Kitabcana ga pat ta rfatailo re Ya nik dirica, ga mewe ftaif pa tina. Laitane ta rlefona,

Pat ta basna rtopa ningalena rpake panto, Jou Lahatalla npei ga ndadi pat fandasi ta mafia fare cicoalna gaole.

11 Jou Lahatalla npei laina, denabe ite temna mafiana gaole."

12 Rlonga tina, ta rfaboboko agama Yahudina ndadi rtaif, smat mayai mali andeande cia, mali Yesuse wlona smat tina. Mana si diyawa lalinge bo rwagfo I, ga si damcait smat laloca gabe rfateam I.

13 Fola tina, ta rfaboboko agama Yahudina rcula smat sifis mali ta rderera fatfato Farisina fare smat ta jaga rderera kolano Herodesna, rfane rfautan lali Yesus I bo diyawa I na sal. 14 Si rlafo lali Yesus i taga du laitane, "Guru, amame kto guru smat ta mamolang, fare guru miyawa ngahnyom pa. Guru mfafculena molang mfalaisa tub tderera Jou Lahatalla ni mauna, ningalena guru mamcait isa pa. Gabe tane amame bo kfautan, gabe bo tderera ite rir agamaca ni fatfatona, ite tpalas pajak pare enpa lali kolano mamagal Romaca? Ite nane tpalas tina pare enpa?"

15 Ga Yesuse nto si wlorina molang pa, Gabe nua si laitane, "Pesaga mewe fiyawa Ya nak salna? Co ffaemo Ya tiwi ta mewe jaga fpake fpalas pajakna."

16 Gabe si rpo. Gabe I nfautno si laitane, "Ise ni gambar i fare ise ngahnyo tane?"

Si rcanglo, "Kolano mamagal Romaca ni gambar fare ngahnyo."

17 Gabe Yesuse nua si, "Fpo to lali kolanoca ahai ta mewe nane fpo kolanocana, fare fpo to lali Jou Lahatalla i ahai ta mewe nane fpo lali Jou Lahatalla Ina." Rlonga tina, si rherangna gaole.

18 En hawe smat sifis mali agama Yahudi ta rderera fatfato Saduki rlafo Yesus. Sadukina riri sogarona, smat ta rmatetona rpaling panto. Gabe si rfautno Yesus laitane, 19 "Guru, popisei nabi Musa npo parenta, ise be man ta rfasawe tona gabe laisa nmate ga nduke ntu pa, i tenoca nane nfasaw teno ta nmatca ni balo, bo teno ta nmatca ni durina en. 20 Ga tina ndadi i to laitane: En man smat sifit rfatenow. Ta aban ica nfasawa maping isa ga manca nmat nturi pa. 21 Ta failuica ma nfasawa maping cia. I ma namat rduke nturi pa. Laina bena re ta faicol ica. 22 Laina turus denabe ta suso rano ica nmat rduke nturi pa. Morco napna maping cia nmat. 23 Gabe, tane amame bo kfautan, lomanta mali wol kiamatca, oras Jouca bo nfapaling hawe smat, ta manca molang smat sifit tasa ta ndadi maping cia ni uat i? Ningalena smat sifit tasa farumi rfasawa i to."

24 Yesuse nua si laitane, "Mewe fsalna gaole, ningalena mewe ftaif Kitabca pa, fare mewe ma fto pa Jou Lahatalla nkawasa. 25 Ga lomanta Jou Lahatalla nfapaling hawe smat ta rmate tona, si rfasaw panto, ga si rtub farerer re malaikatna mali sorogai.

26 Ga smat ta rmate ga rpaling hawena, mew fbaca to carita ta nabi Musa nlefo ica? Oras i mali mom ta ni sogana ga planganna lapo, Jou Lahatalla nua nabi Musa laitane, ‘Ya tane to Jou Lahatalla ta Abraham, Ishak fare Yakub rcuba Ya.’ 27 Oras cia, Abraham, Ishak fare Yakub rmate to, ga rpaling hawe rtub farerer re Jou Lahatalla. Gabe, mew smat Saduki tane nimew sogarona ncalna gaole, ningalena Jou Lahatalla smat ta rmatna riri Jou i pa, ga smat ta rtubna riri Jou i."

28 Oras tina, guru agama isa ta nto Musa ni Kitab silim tasa nlafo. I ma nto Yesus I re smat ta rderera fatfato Saduki rfasangsanglo mauting nanaina, i nto to ta Yesuse nuna molang, gabe i ndahle Yesus taga nfautan, "Mali farumi Jou Lahatalla ni parenta tina, parenta ta manca ta foloina?"

29 Yesuse nua si laitane, "Parenta ta nfoloi cia laitane: Smat Israelna, mew flonga famafia, Jou Lahatalla cia ite rir Jou i, I cia isa be. 30 Mewe nane fatutua fmasie Jou Lahatalla, mew nimew Jou i. Mew fmasie i na foloi mali farumi ta mewe fmasiena, re ni lalingna flolam I, fare fpo nimew cicoalna bo fpei ta I nailowna. 31 Parenta ta failuca laitane, ‘Mewe nane fgogoru smate nesana, laisa re mewe fgogoru nimew dirica tutuling.’ Enpa parenta nesa ta foloi mali parenta silu tasine."

32 Fola tina, guru agamaca nua Yesus, "Fatutua to ta Guru mu tina. Jou Lahatalla cia isa be, enpa nto ta nesana ga I be. 33 Ite nane fatutua tmasie Jou Lahatalla, ite rir Jou I. Ite nane tmasie I fare ni lalingna wloryaneto I, fare tpo rir cicoalna bo tpei ta I nailowna. Fare it bena nane tmasie smate nesana laisa re ite tmasie rir dirica ntutuling. Farumi tina foloi mali farumi aiwani ta tpo sadaka fare sadaka ta nesana."

34 Yesuse nem i ncanglona mafia, gabe Yesuse nuai laitane, "Aw tane msiape bo mdadi Jou Lahatalla ni murit ta I bo nkawasa ndadi Kolano." Fola tina, smatna isa panto ta bo nfautno Yesus hawena.

35 Oras ta Yesuse nfafcule smatna mali Ebai Sombayang Mamagalca ni kintalna, I nua laitane, "Guru agama ta rto Musa ni kitab silim tasa jaga rfafcule, Mesias, Kolano ta Jou Lahatalla njaji bo nlafo, I cia kolano Daute ni duri i. Ga Mesias cia ise kolano Daute ni duri i bena? 36 Ga oras ta Jou ni Rohca ncung kolano Daut, kolano Daute nfabinga,

Jou Lahatalla nua Ya nik Jouca laitane,

‘Mtotolange to mali gagaw ta nmafia cia, mali Ya nik welana,

denabe Ya ifakala anim musuna ndumi.’

37 Gabe laisa kolano Daute tutuling be nu Mesias cia i ni Jou i, mfalaisa hawe ite bo tu Mesias cia ga kolano Daute ni duri i?" Ga smat ta lalna rlokolona gaole rlonga ta Yesuse nuna.

38 Yesuse nfabinga si hawe, "Mew nane fpei famafia re guru agama Yahudi ta rto Musa ni kitab silim tasa. Si tina gabe laisa rfanfan, rlokolo rpake juba mlanga bo diyawa be ngahnyori, fare si rlokolo smatna daraga si mali smat lalo nbona. 39 Gabe mali ebai sombayangna fare mali ramena, si tina rlokolo rtotolang potao. 40 Si ma rlokolo dakal balona taga jale riri ebaina. Fare si le ma gabe rcombayang, riri sombayangna mlanga, naga si bo rfalonga be smat. Si tina osta rduk salna tebteb."

41 Fola tina, Yesuse ntotolang nbo kibiya sadakaca taga ntarokira smat ta rtopa riri sadakana. I nem smat ta riri re rarina lal rtopa riri sadakana lalna gaole. 42 Yesuse ma ntarokira balo isa ta ncusa nlafo nising ni sadakaca mali sadaka gagao cia. Ga balo cia ni sadaka tasa tiwi sen silu. 43 Gabe Yesuse nololawe ni muritna taga nua si laitane, "Flonga famafia e, mali Jou Lahatalla nbona, balo ta ni re na pa tae npona foloi mali farumi smat ta rtopa sadakana mali kibiya sadakaca. 44 Ningalena, smat ta riri re rari tane, biarega si rpo tiwina lal, ga si riri tiwina welana lal sube. Ga balo tae, biarega i ni re na pa, i npo ndumi to ni tiwina bo i ni tubca."