1 Orasna dororami sube, imamna riri ta rfaboboko rfayalo si hawe fare simosimo Yahudi, guru agama Yahudi ta rto Musa ni kitab silim tasa, fare farumi Mahkama Agamana riri wawai ta manana, si jal faorit. Gabe si rpitan Yesus taga dut i, taga rpoi lali Pilatus i bo nfasalina denabe nmat.

2 Rlafo puli tina, Pilatuse nfautno Yesus, "Fatutua Apa smat Yahudina riri Kolano Aw?"

Yesuse ncanglo, "Apa tutuling ta mu laina."

3 Imamna riri ta rfabobokona du Yesuse, lale to npei okosesi ta tamayaina.

4 Pilatuse nfautno I hawe laitane, "Mlonga tina! Si du to Apa mpei okosesi ta mayaina lale to. Pesaga Apa mgali nim dirica pana?"

5 Ga Yesuse lio pa, denabe gubernur Pilatuse nherang.

6 Etnga be taun, oras wol mamagal Paska, gubernurca jaga nfabebas smat isa mali buica. Smat ta i nfabebas i cia nderera smat lalo ni mauna. 7 Oras tina, En smat isa ngahnyo Barabas. I re ni delna rlawang Pamareta Roma ta mali batang Israel. I ncunb bui, ningalena i ire ni delna rpune smat oras ta si re pamarenta Roma rfakotalena. 8 Gabe mali wol mamagal cia, smatna lal ta rlafo mali gubernur Pilatus i. Si rdore bo nfabebas smat faisa mali buica laisa re ta i npeie tona.

9 Gabe Pilatuse nfautno si, "Mewe fmauna ya ifabebas smat Yahudina nimew Kolano tae?" 10 Pilatuse nu laina, ningalena i nto, imamna riri ta rfabobokona rpo Yesus lali ii ningalena si riri le Yesus. Gabe Pilatuse nuna ma smat lalo tae osta rdore bo rfabebas Yesus, Barabas pa.

11 Ga imamna riri ta rfabobokona dua smat laloca bo si rdor Pilatuse nfabebas Barabas.

12 Gabe Pilatuse nfautno si hawe, "Gabe laina, ahai ta ya nane ipeo smat ta mew fu smat Yahudina riri Kolano i tae?"

13 Rlonga laina, si rgigam hawe, "Salipi to I ya!"

14 Gabe Pilatuse nfautno si, "I npei ahai ta mayaina?"

Ga smat laloca rgigamna rfacicoal si hawe, "Fsalipi to I ya!"

15 Ga Pilatuse bo nfasangnang smat laloca wlorina, i nfabebas Barabas bo sil, taga i ncula rpun Yesus rpake wala ta mali cicapona mdalim. Fola tina, i npo Yesus lali sili bo si rcalip I.

16 Fola tina, tentarana dut Yesus lali gagaw ta i mali gubernurca ni istanaca ni kintalna, taga dololaw si riri del tentarana farumi ta en manana rfayalo si. 17 Si rfapake Yesuse juba ungu laisa ta kolanona jaga rpake, taga si rpei siseping isa mali wala ta ni sogana taga rfapake Yesus mali bobokona. 18 Fola tina, si dakale rcuba I, si du laitane, "Susa to smat Yahudina riri kolanoca!" 19 Fare si rpun Yesuse bobokoca rpake sop, si ditfo I, taga si rlu nap dakale rcuba I. 20 Si rngengeo fola I, folana si du I, si rcalawe i hawe juba ungu ta rfapake i cia, taga rfapake i hawe I ni juba molangca.

21 Mali lalingca fapaluan, si rfadukduk re smat isa ngahnyo Simon. Simon tae smat Kirene i, Aleksander fare Rufuse hma. I taga nlafo mali Bendarca potalil mali. Gabe tentarana rgega i bo npapa Yesuse ni salipca.

22 Si dut Yesus lali gagaw isa ngahnyo Golgota, ta ningale, ‘Gagaw ta long bakbako i.’ 23 Rlafo mali gagaw cia, tentarana rpo Yesus anggur ta rfulta i re lalaw ta ngahnyo mur. Ga Yesuse nailow pa bo ndomna. 24,25 Fola tina, orasna ttok faisiwe dororam isube si rcalip Yesus. Fare si rcibit lot bo rto ise ta bo nduk Yesuse ni kabayaca. 26 Ta npei denabe Yesuse rcalipina en rlefo mali fafan ungo isa taga rpakuai mali salipca puisona. Ni lefoanna laitane, "Tae smat Yahudina riri kolanoca."

27 Manana si rcalip perampok silu bena farerer re Yesus, isaca i mali Yesuse ni welana, isaca i mali Yesuse ni balitna. [28 Yesuse rcalipina nfarerer re perampok tasa, tina tderera ta rlefoe to mali Jou ni Kitabca, ta liona laitane, "Si rpei I laisa re smat ta wlorina mayaina."]

29 Smat ta rdel mali Yesuse ni salipca nbona jowa bobokorina ningalena riri le Yesus. Si du "He Amu, Awe osta mfamop Ebai Sombayang Mamagalca taga mpei hawe mnuwona wol pitol paga? 30 Gabe laina, tane to Awe mduri mali salip cia bo mfasalamate nim dirica!"

31 Laina bena re imamna riri ta rfabobokona fare guru agama Yahudi ta rto Musa ni Kitab silim tasa, si le ma riri le Yesus bena. Si du laitane, "Smate nesa I nfasalamat si, ga I ni dirica tutuling nfasalamat I pa! 32 Gabe laisa Aw Mesias, smat Israelna riri kolanoca, mduri to mali salip cia, bo ame bisa kem fare kdela Aw." Smat silu ta rcalip si farerer re Yesus tasa riri le Yesus bena.

33 Orasna ttok yafasa re failu wolca wlal, farumi batang tina dororam denabe ttok faicol malingin. 34 Neta ttok faicol malingin cia, Yesuse n'gigamna nfacicoal I npake mauting Aram, I nu, "Eloi, Eloi lama sabakhtani?" Ta ningale, ‘Jou Lahatalla, Ya nik Jou I, pesaga Jou mfateam Yana?’

35 Rlonga tina, smat sifis ta dosal mana tasa du laitane, "Ya mlonga, I nololaw nabi Elia," 36 Fare smat isa fatoal be nyal spons taga ncoula mali anggur ta nkakaninca. Taga sponca nising i mali sop isa taga nfadahle i lali Yesuse fmona bo ncoraf I. Oras smat cia npei laina, I nu laitane, "Ite ttotomanca bo tem, faramane ga nabi Elia nlafo nfadurea I." 37 Fare Yesuse n'gigamna nfacicoali, fare I wlaya morit.

38 Oras ta Yesuse wlaya moritna, kain mamagal ta i mali Ebai Sombayang Mamagalca, nmarasekan fapaluan puis denabe nap.

39 En komedan kompi isa nosal mali Yesuse nbona oras Yesuse rcalip ina. Oras cia, i nem Yesuse nmatna gabe mfalaina e, i nu, "Ga fatutua to I tae Jou Lahatalla Ntu i!"

40 Manana en bena maping sifis rningningo Yesus ga dalaspa. Mali sili tina, en Salome, Maria smat Magdala, fare Maria ta ndadi Yakobus ta poica fare Yosese hnye. 41 Si tane ta rderera fare rleleane Yesus oras si mali Galileana. En bena mapinge nesa mana ta rlafo mali Yerusalem farerer re Yesus.

42,43 En smat isa ngahnyo Yusuf. Yusuf tae smati mali Arimatea i, i re agama Yahudina pukpuk isa ta tigo molang ta ngahnyo Mahkama Agama. Gabe smatna lal rcuba i. I ma ntotoman Jou Lahatalla oras ta bo Nkawasa ndadi Kolano mali I ni smatna. Wol ta Yesuse nmatna, neta mali smat agama Yahudina riri wol ta si rciap. Wol cia, si nane rfatoto farumi riri karajanna wolca ncop paubena, ningalena mali wol sabat si bisa rkarajan panto. Gabe bo dorame to, Yusufe nfacicoale wlona nfan lali Pilatus i, ndor Yesuse ni mayatca bo n'gaile i. 44 Rlonga Yesuse nmate to, Pilatuse nherang. Gabe i nololaw komedan kompica taga nfautno i, "Fatutua Yesuse nmate to?"

45 Gabe komedanca nu, "Fatutua apa! Yesuse nmate to." Oras Pilatuse nto Yesuse nmate to, I npo kawasa lali Yusuf i nyal Yesuse ni mayatca bo n'gaile i.

46 Gabe Yusufe nfane ga n'gon kain bubulang ta mufufna, taga ndurea Yesuse ni mayatca mali salipca. Fola tina, i nopi Yesuse ni mayatca npake kain bubulangca taga nising i mali piling goa ta rgali to mali popo pat, taga i nfaulol pat mamagal isa bo ntiban bawa piling cia.

47 Tinana, Maria smat Magdala fare Maria Yosese ni mama, si rtarokira gagaw ta dising Yesuse ni mayatca.