1 Fola tina, Yesuse nfan lali batang Yudea fare mali batang waya Yordan puli pao. Mana bena smatna lal rlafo rfayalo si mali I. Gabe, Yesuse nfafcule si laisa re ta I peina. 2 Fare smat Yahudi sifis bena mali fatfato farisi rlafo lali Yesus I bo diyawa I na sal. Si rfautno I laitane, "Gabe bo tderera ite rir agamaca ni fatfatona, bisa pare bisa pa manca rfasawe to ga ntalake ni ngolota?"

3 Gabe Yesuse nfautno si laitane, "Mali Joue ni Kitabcana, nabi Musa npo mew parenta ahai?"

4 Si du, "Nabi Musa nu manna bisa rtalake riri ngolona ga nane rpei surat talak."

5 Fare Yesuse nua si laitane, "Poko be wlomew ta cicoalna, denabe nabi Musa npei fatfato tina! 6 Mulain tantuba be Jou Lahatalla npei dunia taena, I npei man re maping. 7 Gabe, manca osta fateam hma fare hnye taga ntub nfarerer re ni ngolota, 8 bo smat silu tasa ndadi pusa. Gabe smat silu tasine rtubna rfatutulnge panto, ga si rdadi pusa to. 9 Gabe tina, ahai ta Jou Lahatalla npei ndadi pusa, smatna bisa panto bo rfatalakna."

10 Nu fola tina, Yesus I re ni muritna rcung mali ebai i. Mana, Yesuse ni muritna rfautno I hawe ga sogaro ta nana i cia.

11 Yesuse nua si laitane, "Ise ta ntalake ni ngolota taga nfasaw hawe re mapinge nesa, mali Jou ca nbona i nyal cal mali i ni ngolo ta ntubaca, ningalena i nlokolo re smate nesa ta i ni ngolo i pa. 12 Laina bena re i ni ngolota. Gabe laisa i ntalake ni uata taga nfasaw hawe re mane nesa, mali Jou ca nbona i ncale to mali ni uat ta ntubaca, ningalena i nlokolo re smat ta i ni uat i pa."

13 Ga smatna dut wai nenena na lali Yesus I bo I nfatige kakamona puis sili taga ncombayang si. Ga ni muritna rtolea smat tina.

14 Yesuse nem tina, ntole gabe nua si, "Inanai to wai nenena tina rlafo mali Ya i. Mati ftolea sina, ningalena smat ta rcombong pana fare jampa be rdela laisa re wai nenena tane, si tina ta rpo riri tubca lali Jou Lahatalla i bo I nkawasa ndadi Kolano mali riri tubca. 15 Wlomewyaneto famafia ta Ya bo ikua mew tane: ise ta nailow Jou Lahatalla laisa re wai nenena ta rcombong pa, i osta ndadi Jou Lahatalla ni smat i ta I bo nkawasa ndadi Kolano mali I ni tubca."

16 Nu fola tina, Yesus n'gop wai nenena tina. Taga nfatige kakamona mali wai nenena taga nbarakati si.

17 Orasna Yesuse bo nfan hawe, en smat isa nfarera be lali Yesus I. Smat cia nlu nap Yesuse nbona taga nfautan, "Guru ta mafiana, ya nane ipei ahai bo iduk tub re Jou Lahatalla dena be lalina?"

18 Yesuse nua I, "Smatna isa nmafiya pa, Jou Lahatalla be ta nmafiyana. Pesaga aw mu Ya imafia? 19 Awe rasa mto to laha, Jou Lahatalla ni parentana: Mate mfapunna mate mnyal sal re smate ni uatna fare smate ni ngolona, mate mloise smatna riri okosesina, mate mdadi saksi ta molang panana, mate mdarawa smatna bo myale riri okosesinana, fare nane masie hmamca fare hyemca!"

20 Fare smatca nua Yesus laitane, "Guru, farumi parenta tina ya ipeie ndumi to, mulain mali ta yai wai man sube."

21 Yesuse neme smat cia nbasamna nmasie i, gabe nua i, "Ga motle pusa sube ta aw mpei pau bena. Aw mfane to bo mwage farumi nim aratana taga ni tiwina moce smat ta riri re rari pana. Gabe laisa aw mpei laina, aw osta mduk arata mali sorogai. Fola tina, aw mali bo mderera Ya."

22 Nlonga ta Yesuse nu lainana, smat cia wloyancusa gabe nfan i fare nmagogoru i, ningalena i ni aratana lal.

23 Fare Yesuse ningningo I ni muritna mali wela fare balit taga nu laitane, "Eh ncusa i na gaole smat ta ni re naca bo npo ni dirica lali Jou Lahatalla i bo nkawasa ndadi kolano mali i ni tub cana."

24 Nlonga tina, Yesuse ni muritna rherang. Gabe Yesuse nu hawe, "Ya nik deldelo ta igoru sina! Ncusa ina gaole bo rpo riri dirica lali Jou Lahatalla I bo nkawasa ndadi Kolano mali riri tubca. 25 Mafia sube unta isa ncung ndela mali paplaki mtana ga smat ta ni re naca osta bisa bo npo ni dirica lali Jou Lahatalla i bo ndadi Kolano mali i ni tubcana."

26 Nlonga tina, Yesuse ni muritna nbang i be rherang, gabe fauwo si, "Ali, gabe laina, ise ta bo ncalamatca?"

27 Yesuse ningningo si fare nu, "Smatna isa pa ta bo rfasalamate ni diricana. Ga Jou Lahatalla be ta bo nfasalamate smatna, ga Jou Lahatalla ahai be ndadi ndumi."

28 Fare Petruse nu laitane, "It tane tfateame ndumi to ahai ta ite rirna taga tderera Guruca!"

29 Yesuse nua si laitane, "Flolam famafia ta ya bo kuwa mew tane. Ise be ta ningalena nderera Ya fare nfabinga Abar Mafia mali Jou Lahatalla I, denabe i nfateame ni ebaica, tenona fare ramana, hnye re hma ntu fare na betna, 30 i cia mali dunia taena osta bo nduk hawe tutuafe slubisa: ebai, teno re rama, hnye, ntuna fare betna. Ga biarega mfalaina, i osta nduk kangelana lal hawe, ga i lomanta nduk tub re Jou Lahatalla dena be lali. 31 Ga smatna lal ta rfoloina mali dunia taena, ga osta rdadi smat ta foloi pa, ga smat ta rfoloi pa mali dunia taena, osta rdadi smat ta foloi."

32 Yesuse I re ni muritna rfan lali bendar Yerusalem. Oras ta si rfanna, Yesuse ntuba. I ni muritna wlori yancusa, fare smat ta rderera I nama damcait. Fare Yesuse nololaw ni murit yafasa re silu tasa rdahle I, taga nfabinga si hawe ahai ta bo ndadi i mali I na. 33 Yesuse nu laitane, "Flonga e! Oras tae ite bo tfan lali Bendar Yerusalem. Pulina, smatna bo rpo Smat ta mali sorogaica lali imam ta rfabobokona fare guru agama ta rto Musa ni Kitab silim tasa, bo si rfasal Ina denabe nmat. Si bo rpoi lali smat ta Yahudi si pana, 34 ga smat tina ta bo rngengeo I, ditfo I fare rpuni rpake wala ta mali cicapona mdalim, fare si rpuni ga nmat. Ga mali wol ta faicolca, I osta npaling hawe."

35 Fola tina, Yakobus fare Yohanes, Zebedeuse ntuna, rdahle Yesus taga du laitane, "Guru, en ta amame bo kdorna. Guru mgali am."

36 Yesuse nfautno si, "Mewe bo fdor ahai mali Ya i?"

37 Fare si du laitane, "Lomanta Guru mdadi Kolano fare mkawasa to, ame kdor Guru mnyalam smat am lu tane bo ktotolang mali Guru nim welana fare balitna."

38 Yesuse nua si laitane, "Mewe ftaif pa re ahai ta mewe fdorna. Ya tane osta iduk kangelana lal. Ga mewe bisa fpapa kangelana fare sangsara denabe fmat farerer re Ya."

39 Gabe si rcanglo, "Amame kailow!"

Fare Yesuse nua si, "Mewe ma osta fkangela fare sangsara denabe fmat laisa re Ya. 40 Ga ise ta bo ntotolang mali Ya nik wela fare balitna, tina Ya ifato pa. Gagaw cia Ya nik Apa ta nfasadia bo smat ta I nfisange tona."

41 Oras ta murit yafasa ta nesana rlonga ahai ta Yakobus i re Yohanese rdorna, si wlorina mayai lali smat silu tasa. 42 Fare Yesuse nololaw ndumi si taga nua si laitane, "Mew fto, ta rfaboboko mali bangsa ta rfayala Jou pana, si tina jaga rfaboboko riri rayatna cicoal. Laina bena, si riri smat mamagalna, si jaga rfakangela smat ta rfato sina. 43 Ga mewe mate fpei lainana! Ise mali mewi farumi ta flokolo bo ndadi smat ta cicoal foloi mali Jouca nbona, i nane ndadi laisa smat ta biasa be ta bo nleleyane mew. 44 Fare ise mali mewi ta bo nlokolo ndadi smat ta cicoal rfoloi mali Jouca nbona, i nane npei ni dirica laisa re smat rkarajan bo nleleyane farumi smat. 45 Ningalena smat ta mali sorogaica nlafo mali dunia tae bo tleleyani i pa, gabo nleleyane fare npo ni dirica bo nfayangise smat lalo ni dosa."

46 Yesuse I re ni muritna rlafo mali bendar Yerikho. Oras ta si rfan rcapang mali bendar cia, smatna lal ta rderera sina. Mali lalingca lapona en smat isa nbiaf ntotolange ga ndor. Smatca ngahnyo Bartimeus, i hma ngahnyona Timeus. 47 Oras ta i nlonga Yesus smat Nasaretca ndel mana, i n'gigam laitane, "Yesus, kolano Daut ni duri, mmasi ya lae!"

48 Rlonga i n'gigam laina, smatna lal rtolea i. Ga i n'gigamna nfacicoalo nbang, "Apa, kolano Daute ni duri, mmasie ya lae!"

49 Gabe Yesuse nfola, fare nu laitane, "Fololaw i mali!"

Gabe si dua smat ta nbiaf cia, "Msenga to, mosal, Yesuse nololaw aw."

50 Nlonga tina, smat ta nbiafca fatoal be ncalawe ni jubaca taga nfan lali Yesus I.

51 Yesuse nfautno i, "Awe mailowna Ya ipeo aw ahai?" Ga smat ta nbiafca nu, "Guru, Ya idore bo ikem hawe."

52 Nlonga tina, Yesuse nua i, "Ningalena mdela Ya to, aw mafia to. Gabe awe mfane to!" Oras cia to, smat ta nbiafca nem hawe, fare i nderera Yesus.