Reino dos céus

Kimvwama ki sweko

44 Kimfumu ki mazulu kifwanakani na kimvwama ki baswekidi mu mfuba. Muntu bu kabakudi kyo na bwesi toma kye sweka. Mu kyese bekyokyo wenzi teka bima bimvimba bii nandi, mboki sumbidi mfuba beyoyo.

45 Kimfumu ki mazulu kifwanakani dyaka bonso munkiti wumosi wuna kwe sosi palata zimbote. 46 Bu kabeki palata yi nkatika ntalu yiyingi, wenzi teka bima bimvimba bi nandi, mboki sumbidi yo.

Kingana ki nswanga yi mutaade

31 Yesu wubateela dyaka kingana kihiika ti: «Kimfumu ki mazulu kifwanakani bonso nswanga yi mwa muti wu nkumbu mutaade, yi bongidi muntu mpe kunini yo mu mfuba andi. 32 Mpeleko nswanga beyoyo yivudidi bukeke mu nswanga zimvimba, kansi bu yimenini, yavula bunene mu mwa miti mimvimba mi mfuba. Bu yeka mwa muti, banuni bakwiza tunga mazanza mawu mu bintala byandi.»

Kingana ki kima kikwe vimbisanga kiputi ki mampa

33 Yesu wubateela dyaka kingana kihiika: «Kimfumu ki mazulu kifwanakani bonso kima kikwe vimbisanga kiputi ki mampa ki bongidi mukento na vukidi kyo na bitezo bibingi bi faline natee kimvimba bu kivimbidi.»

Kingana ki kititi kimbi

24 Yesu wubateela kingana kihiika: «Kimfumu ki mazulu kifwanakani bonso muntu kunini nswanga yimbote mu mfuba andi. 25 Kansi mu mpimpa, bantu bamvimba bu balambalala, mbeni andi wuyiza na wukuna kititi kimbi ha kati dibele na wuyenda kwandi. 26 Nswanga bu yimena na bu yi duukisa mbutu, kititi kimbi kimena mpe. 27 Bisadi byandi biyiza muteela ti: "Mfumu, kadi wukunini nswanga yimbote mu mfuba aku ko e? Kwedi kufumini bwabu kititi bekiki kimbi e?" 28 Wuvutula ti: "Mbeni siidi bobo." Buna bisadi bimufuula ti: "Tiidi twenda tuvuza kititi bekyokyo kimbi e?" 29 Wuvutula ti: "Kaani! Mu dyambu ti bu luvuzidi kititi bekyokyo kimbi, lulenda vuza mpe bele. 30 Bikeeno bimenina ha kimosi natee bu tuna yonzika. Mu ntangu yaaba ngyonzokolo, naateela ku biyonziki ti: Katuleeno ntete kititi kimbi na kangeeno kyo mu mwita* mwanki luyoka kyo, mboki yonzikeno mbutu zibele mu kati di kilundulu."»

Yesu wubangula kingana ki kititi kimbi

36 Mboki Yesu wusala sisa mpumbu zi bantu na wuyenda ku nzo. Milongoki myandi mifinama na mi muteela ti: «Tubangudila kingana ki kititi kimbi ki mu mfuba.» 37 Yesu wubateela ti: «Yondowo wukwe kunanga nswanga yimbote, ni Mwana Muntu, 38 mfuba, ni nza, nswanga yimbote yena lonka baala ba ki Kimfumu ki Nzambi, na nswanga yimbi yena lonka baala ba Munga Mbi, 39 mbeni yikwe kunanga nswanga yimbi, ni nkadyampemba, ngyonzokolo, ni nsukunu yi nza, bisadi byayonzika, ni zimbazi. 40 Bonso bu bakwe katudilanga kititi kimbi mu tuba kyo ku tiya, bwabobo mpe bwaabeela nsukunu yi nza: 41 Mwana Muntu waatambika zimbazi zandi, zaakatula mu Kimfumu kyandi bamvimba bakwe bwisanga ba nawu mu masumu na yobobo bakwe hidikanga mimbi, 42 mpe wuna balosa mu kati di kifuudu ki tiya tungolo, kwakoko babingi baadila na baakwetisa meno. 43 Kansi bantu baludedomo baalezima bonso ntangu mu Kimfumu ki Tata awu. Wonso wuna makutu mu yuwa, bika kayuwa!

Kingana ki mpwasa

47 Kimfumu ki mazulu kifwanakani dyaka bonso mpwasa yi balosidi mu mubu na yibeki mbizi zimpila mu mpila. 48 Bu yifulukidi, bilobi babendidi yo natee ha kumu di mamba, mboki bazakadi mu soola zimbizi: zimbote batudidi zo mu mikuta mpe balosidi zimbi. 49 Bwabobo mpe bwaaba mu nsukunu yi nza: zimbazi zaakwiza hambisa bantu bambi na bantu ba lunungu, 50 mu loosa bantu bambi mu kati di kifuudu ki tiya tungolo, kwakoko baadidila na baakwetisila meno.

3 «Kyese ku yobobo ba bamputu mu kimpeve,

kadi kimfumu ki mazulu kyawu kidi!

4 Kyese ku yobobo bana dila, kadi bana bombwa!

5 Kyese ku yobobo ba na lembami, kadi bana tambula nsi yi lusila Nzambi nsilulu!

6 Kyese ku yobobo bana yena nsatu na mpwila yi lunungu, kadi bana yukutusu!

7 Kyese ku yobobo bakwe fwilanga bahiika nkenda, kadi Nzambi waabafwila nkenda!

8 Kyese ku yobobo bana mitima mivedila, kadi bana yena Nzambi!

9 Kyese ku yobobo bakwe tukisanga kiyenge, kadi bana batumisina baala ba Nzambi!

10 Kyese ku yobobo ba ku nsye mfyetokoso mu dyambu di lunungu, kadi Kimfumu ki Mazulu kyawu kidi!

11 Kyese ku yeno ti bana lutuka, bana lufyetikisa, na bana luhunina misamu mimvimba mimbi mu dyambu dyani.

12 Yangalaleeno mu kilumbu bekyokyo na duzumukeeno mu kyese, mu dyambu ti musendo eno waaba wuwunene ku mazulu. Bwabobo mpe bedi zominanga mimbikudi mi lutekidila.»

Nani hyokidi bunene ha kati dyeno

1 Mu kilokola bekyokyo kwandi, milongoki miyenda ha ntadisi yi Yesu, na mimufuula ti: «Nani hyokidi mfunu mu Kimfumu ki mazulu e?» 2 Yesu wutumisa mwa mwana wufyoti na wumutuula ha kati dyawu, 3 na wuta ti: «Kedika nina luteela, tala ti lusenzi ndyatulu eno ko na ti lukitukidi bonso mwana wufyoti ko, lwaakota mu Kimfumu ki mazulu ko. 4 Ni hahoho, wonso muntu waakikulula bonso mwana wufyoti, ni yandi waavula mfunu mu Kimfumu ki mazulu.

14 Yesu ni kabateela ti: «Bikeno baala biza ku meno, lubakakidilandi ko mu dyambu ti kimfumu ki Nzambi kifwanakani ku yobobo ba bonso yawu.»

23 Yesu wuteela milongoki myandi ti: «Kedika nina luteela, mpasi ku mvwama mu kota mu kimfumu ki mazulu. 24 Nalutedidi dyaka ti: bulutidi nayaki-yaki ku kibulu ki nkumbu yi samo mu lutila ha mwa bulu di ntumbu, kansi kamvwama ko mu kota mu kimfumu ki Nzambi.» 25 Milongoki bu bayuwa bobo, bayituku bubwingi na bata ti: «Nani kwandi bwabu lenda baka mpulusu e?» 26 Yesu wu basungimina na wubateela ti: «Misamu mikwe lembananga bantu, mii mpasi ku Nzambi ko.»

5 Mpangi zani zizola, yuweeno: Nzambi wusoola bamputu mu nza beyiyi, mwanki bakituka zimvwama mu kiminu, na babyadila Kimfumu ki mazulu ki kasiila nsilulu ku yobobo bakwe mu tyanga.

Kilumbu kimfundusu

21 Ka bamvimba ko bakwe ntumisinanga ti: «Mfumu, Mfumu!» Baakota mu Kimfumu ki mazulu, kansi yobobo kwandi bakwe sadilanga luzolo lu Tata ani wu ku mazulu.

19 Ni hahoho, wonso waatinguna mwa musiku wuvudidi bukeke, na waalonga ku bantu mu hidika bo, yandi waaba muntu wuvudidi bukeke mu Kimfumu ki mazulu. Kansi wonso waavumina na waalonga ku bantu bahiika bavumina wo, yandi waaba muntu wuwunene mu Kimfumu ki mazulu. 20 Meno nalutedidi ti: tala ti lunungu lweno lu hyokidi lu Bafalisi na milongisi mi Misiku ko, yeno lwaakota mu kimfumu ki mazulu ko.»

9 Ebu lufweti sambidilanga:

«Tata eto wu ku mazulu!

Bika nkumbu aku yiba yilongo,

10 bika Kimfumu kyaku kiza,

bika luzolo lwaku luvangama ha butoto bonso mu mazulu.

Ndongolo yi Yoane Mbotiki

1 Mu ntangu beyoyo, Yoane Mumbotiki wutotoka ku nsi yinkatu, mu kizunga ki Yuda, ku kedi longila. 2 Wedi tanga ti: «Viluleeno madyela, kadi Kimfumu ki mazulu kyeka lukufi!»

17 Tuuka ntangu beyoyo, Yesu wutona mulonga,

mu ta ti: «Viluleeno madyela, kadi Kimfumu ki mazulu kyeka lukufi!»

7 Yendeeno, longeeno na teeno ti: "Kimfumu ki mazulu kyeka lukufi!"

11 Nkatika nina luteela, bantu babingi baafuma ku esete na ku wesete na baazakala kintwadi ha meza mu Kimfumu ki mazulu na Abalahami, Isaaki na Yakobi.

11 Kedika nina luteela, mu bantu bamvimba ba ha nza, kunaani muntu wu hyokidi Yoane Mumbotiki mfunu. Kansi, wumuvudi bu fyoti mu Kimfumu ki Nzambi, yandi wumuvudidi bunene. 12 Kutonina mu ntangu yi Yoane Mumbotiki natee mu kilumbu kibubu, Kimfumu ki mazulu kina kwamusu mu zimvita, ni yobobo bavudi ngolo bana bonga kyo.

28 Tuvutuleeno matondo mu dyambu ti tutambudi kintinu kikwe lembolo ningananga. Tulonkeeno mvutudulu yi matondo bemomo, mu sadila Nzambi mu nsadulu yina muyangidika, mu kivumi na bunkuta. 29 Mu dyambu ti Nzambi eto, tiya tukwe nyengisanga kadi.*

10 Ni hahoho, zimpangi, seeno ngolo mu ba bakangama nakekete mu mbokolo yi lutumisina Nzambi na nsoodolo yi kasa mu yeno, tala ti lusidi bobo, lwaabwa mu masumu ko. 11 Ni bwabobo lwaabakila luve mu kota mu Kimfumu ki mimvu ka mimvu ki Mfumu eto mpe Muvuukisi, Yesu-Klisto.

18 Mfumu waankuula mu nsadulu zimvimba zimbi, mpe waamvuukisa mu nkotisa mu Kimfumu kyandi ki yulu. Bika nkembo wuba ku yandi mimvu ka mimvu! Ameni!

Kimvwama ki yulu

32 Luyenandi bunkuta ko, yeno mwa kamba di mameme, mu dyambu ti Tata eno yeni ti bumbote mu luhaana Kimfumu.

5 Kansi tomeeno we zaba ti: kunaani muntu wukwe sadilanga kindumba, busafu, hoti zinzinunu zimbi (zidi mpe nsambudulu zi biteki) wulenda byadila difwa mu Kimfumu ki Klisto na ki Nzambi ko.