1 Mu bilumbu bebyobyo kwandi, pumbu yi bantu yiyinene yikutakana dyaka mpe yiba na kima kye dya ko. Yesu wutumisa milongoki myandi na wubateela ti: 2 «Kyadi kikingi nina yenina mpumbu yi bantu beyiyi, mu dyambu ti kii ni kilumbu ki bitatu ki baa kintwadi naani, mpe baa na kima kye dya ko. 3 Tala ti na bavutudi mu zinzo zawu na nsatu, baba na ngolo ko mu nzila, mu dyambu ti ha kati dyawu, bahiika kukula bafumini.» 4 Milongoki mi muvutudila ti: «Kwedi twabakila mampa mu badikila bayukuta haha ha kibuka ki kilembolo kima e?» 5 Yesu wubafuula ti: «Mampa makwa maa neeno e?» Bavutula ti: «Nsambwadi.» 6 Wulomba ku mpumbu yi bantu bazakala ha nsi. Mboki, wubonga mampa nsambwadi, bu kavutula matondo, wubukuna mo na wuhaana mo ku milongoki myandi mu kabula mo ku bamvimba. 7 Yawu baba mpe na mwa ndambu yi zimbizi zifyoti. Yesu wusakumuna zo, mpe wulomba ku milongoki myandi bakabula zo mpe. 8 Bamvimba badya, bayukuta. Mboki batota mikuta nsambwadi mifuluka mu bibuku bisadila. 9 Bantu badya baba kampe mafunda maya (4000). Mboki Yesu wubavutula, 10 yandi wutumbu kota mu mulungu na milongoki myandi mpe wuyenda ku kizunga ki Dalamanuta.

11 Bafalisi bayiza na batona mu sa mpaka na Yesu. Mu mutonta bamulomba kidimbu kyaafuma ku yulu. 12 Yesu wuhumuna mu kitezo kingolo na wuta ti: «Bila nki mbandu beyiyi yina lombila kidimbu e? Kedika nina luteela, nakani kidimbu kimosi bahaana kyo ku mbandu beyiyi ko.» 13 Mboki wusala basisa, wukota dyaka mu mulungu na wuyenda ku simu dihiika.

14 Milongoki bazimbakana mu nata mampa. Dimpa dimosi kwandi diba nawu mu kati di mulungu. 15 Yesu wubahaana ntumunu eyi: «Kebeeno kweno! Mu kima kikwe vimbisanga kiputi ki Bafalisi na ki Elode.» 16 Milongoki mita yawu na yawu ti: «Mu dyambu ti tuu na mampa ko.» 17 Yesu wubakula mayindu mawu na wubateela ti: «Bila nki luna telasana ti luu na mampa ko e? Luna bakula ko e? Mpe luna zaba ko e? Mitima myeno mikangama midi e? 18 Luu na meso, kansi luna yena ko e? Luu na makutu, kansi luna yuwa ko e? Luna bambuka ko 19 bu nakabula mampa matanu ku mafunda matanu (5000) ma babakala, mikuta mifuluka mu bibuku, mikwa luyonzika e?» Yawu bamuvutudila ti: «kumi na myole (12).» 20 «Mpe bu nakabula mampa nsambwadi ku mafunda maya (4000) ma babakala, mikuta mikwa mifuluka mu bibuku lunata e?» Yawu bavutula ti, «Nsambwadi.» 21 Mpe wubateela ti: «Bwedi luna lembolo bakudila e?»

22 Bayenda ku mbanza Betesayida. Banata mpofo yimosi ku Yesu na bamubombidila kamusimba. 23 Wusimba mpofo mu kooko na wumunata ku mbazi yi bwala, mboki wumutuula mante mu meso, wumutentika moko na wumufuula ti: «Nganunu wuna yena kima e?» 24 Mpofo wuzibula meso na wuta ti: «Nina yena bantu, baa bonso miti mi nakwe yendi.» 25 Yesu wusimba dyaka meso mandi. Mpofo bu ka zibula meso wutoma yena bumbote, wunyaka mpe wuswasisa bimvimba bi kayena. 26 Buna Yesu wumuvutula ku nzo andi na wumuteela ti: «Kukotandi ku bwala ko.»

27 Yesu na milongoki myandi bayenda ku mabwala maba lukufi na bwala bu Kayisali yi Filipi. Mu nzila, wubafuula ti: «Mu nzonzolo zi bantu, meno nani nidi e?» 28 Bamuvutudila ti: «Yawu bana ta ti Yoane Mumbotiki wudi, bahiika ti Eliya, bahiika dyaka ti wumosi mu mimbikudi.» 29 Na wubafuula ti: «Mbo mu yeno, meno nani nidi e?» Petelo wumuvutudila ti: «Ngeye ni Klisto!» 30 Ku manina, Yesu wubakanikina mu nkasu mulembolo we ta ku kani muntu.

31 Yesu wutona mu longa milongoki myandi ti: «Mwana Muntu fweti yena mpasi zizingi, baamunyafuna ku bakuluntu, ku zimfumu zinganga-Nzambi na milongisi mi Misiku. Baamuhonda na mu kilumbu kibitatu, waafuluka mu bafwa.» 32 Wubateela myo na kabasweka kani musamu ko. Buna Petelo wumunata ha luhengo na wutona mu musemba. 33 Kansi Yesu wubaluka, wutala milongoki myandi na wusemba Petelo mu muteela ti: «Satana, nkatukila! Mu dyambu ti mabanza maku ka mabanza ma Nzambi ko, kansi ma bantu.»

34 Mboki, Yesu wutumisa mpumbu yi bantu na milongoki myandi, mpe wubateela ti: «Tala ti muntu tiidi mu ba mulongoki ani, kakizimbakana yandi bende, kananguna kulunsi dyandi na kandanda. 35 Mu dyambu ti wonso muntu waasosa mu vuukisa luzingu lwandi, lwaakahombisa. Kansi wonso muntu waahombisa luzingu lwandi mu dyambu dyani na mu Musamu Wumbote, lwaakavuukisa. 36 Nkye ndandu kwandi ku muntu waabaka bimvwama bi nza yimvimba, tala ti hombisi luzingu lwandi e? 37 Nki muntu kalendi haana mu hingisa luzingu lwandi e? 38 Mu dyambu ti, wonso muntu waayena nsoni mu meno na mu Mambu mani ha kati di mbandu beyiyi yi kinsuza na yisumuka, buna Mwana Muntu mpe mbo kamuyenina nsoni mu ntangu yi kaavutuka mu mukembo wu Tata andi na zimbazi zilongo.»