1 Eyi ni ntonono yi Musamu Wumbote wu Yesu-Klisto, Mwana wu Nzambi. 2 Bonso bu wudi wusonama mu buuku di mumbikudi Yesaya:

«Nina tambika ntumwa ani ku mutwala aku,

mu ku kubikila nzila.

3 Ni ndinga yi muntu yina bokana ku nsi yinkatu:

"Kubikeeno nzila yi Mfumu,

mpe sungikeeno nzila zandi!"»

4 Yoane wutotoka ku nsi yinkatu, wedi kwe botikanga bantu, mpe wedi bateelanga ebu: «Viluleeno madyela, mpe botameeno, mwanki Nzambi kalulemvokila masumu meno!» 5 Bantu bamvimba ba kizunga ki Yuda na bantu ba mbanza yi Yelusalemi, bedi kwendanga ku yandi, bedi tambudilanga masumu mawu ha meso ma bantu bamvimba na Yoane wedi babotikanga mu nzadi yi Yolodani. 6 Yoane wuba wulwata kinkutu ki mika mi kibulu ki nkumbu samo, na wuba wulwata mu luketo lwandi, melika yi mukanda wu kibulu. Makonko na nyosi yi mpanda kedi kwe dyengi. 7 Yandi wedi tanga ku bantu ti: «Muntu wuna kwiza ku manima ani, wumvudidi lulendo: Nii wulunga ko mu kondama mu nyanguna misinga mi nsampatu zandi. 8 Meno nalubotikidi mu mamba, kansi yandi waalubotika mu Mpeve Yilongo.»

9 Mu bilumbu bebyobyo, Yesu wufuma ku mbanza Nazaleti mu kizunga ki Ngalili, mpe Yoane wumubotika mu nzadi yi Yolodani. 10 Yesu bu kedi tomboka mu mamba, wuyena mazulu mazibuka na Mpeve Yilongo yikulumuka ku yandi mu kifwani ki bembe. 11 Mboki ndinga yiyuwakana tuuka ku yulu: «Ngeye ni mwana ani wunkwe toma tyanga, kyese kyani kimvimba mu ngeye kidi.»

12 Hansi na nsi, Mpeve Yilongo yimunata ku nsi yinkatu. 13 Yesu wuba ku nsi yinkatu bilumbu makumaya (40), mpe wutonto ku Satana . Wuzakala koko na bibulu bimpanda, na zimbazi ziyiza musadisa.

14 Yoane bu kamana tuulu mu boloko, Yesu wuyenda ku kizunga ki Ngalili, wusamuna koko Musamu Wumbote wu Nzambi, 15 mpe wuta ti: «Kilokola kifweni, Kimfumu ki Nzambi kyeka lukufi! Viluleeno madyela, mpe kwikileeno mu Musamu Wumbote!»

16 Yesu bu kedi kwe yendi ha kumu di dyanga di Ngalili, wuyena Simoni na Andele mpangi andi, bedi loosanga mpwasa mu dyanga*. Mu dyambu ti baba bilobi bi mbizi. 17 Yesu wubateela ti: «Ndandeeno, mpe naasa ti luba bilobi bi bantu.» 18 Hansi na nsi, basala sisa zimpwasa zawu na bamulanda. 19 Bu kayenda mwa kitatu, wuyena Zaki na Yoane mpangi andi, baala ba Zebedayi. Baba mu kati di mulungu na bedi hidikanga zimpwasa zawu. 20 Hansi na nsi, Yesu wubatumisa. Basala sisa tata awu Zebedayi na bisadi mu kati di mulungu, ni bamulanda.

21 Yesu na milongoki myandi, bayenda ku mbanza yi Kapenawumi. Mu kilumbu ki saba, wukota mu nzo yi lusambulu yi Bayudayo na wutona mu longa. 22 Bantu batoma yituku mu ndongosolo andi, mu dyambu ti wedi longilanga mu lulendo, kansi ka bonso milongisi mi Misiku ko.

23 Mu kilokola bekyokyo kwandi, mu nzo yi lusambulu yi Bayudayo, muba na bakala dimosi diba na mpeve yimbi. Wulooka mu ngolo ti: 24 «[Ha!] Yesu mwisi-Nazaleti, nkye dyambu ngeye na yeto e? Wizidi mu kwiza tufukisa e? Nzebi ngeye nani wudi: Wulongo, Nzambi wu katambikidi!» 25 Yesu wubamina yo na wuta ti: «Kanga munwa aku na duuka mu nitu yi bakala bedyodyo!» 26 Mpeve yimbi yiningisa munkasu bakala bedyodyo na yiduuka mu yandi na muloko wungolo. 27 Bantu bamvimba bayituku na bafulasana yawu na yawu ti: «Nkye mpila dyambu di e? Ndongosolo beyiyi yimoona yidi, yina haanu mu lulendo! Wuna haana mpe ntumunu ku mpeve zimbi na zina mutumimina!» 28 Mpe hansi na nsi kikuumu ki Yesu kimwangana ku ndambu ka ndambu mu kizunga kimvimba ki Ngalili.

29 Bu baduuka mu nzo yi lusambulu yi bayudayo, bayenda ha kimosi na Zaki na Yoane ku nzo yi Simoni na Andele. 30 Buko bu mukento bu Simoni wuba wulambalala ha mbuka. Yuku-yuku diba nandi. Ni batumbu mu zonzila ku Yesu. 31 Wuyenda ba bela-bela nandi na wumutedimisa bu kamusimba mu kooko. Yuku-yuku diduuka na wutona mu bakubikila meza.

32 Mu nkokila, ntangu bu yidyama, bantu banata ku Yesu zimbevo zimvimba na yobobo baba balwatu ku mpeve zimbi. 33 Bantu ba mbanza yimvimba, bayenda kutakana ha mwelo wu nzo. 34 Yesu wunyakisa bantu babingi baba na bimbevo bi mumpila-mumpila na wukuma mpe mpeve zimbi zizingi. Wudika mpeve zimbi mu zonza mu dyambu ti yawu bazaba nani yandi kadi.

35 Na mene, mpimpa buna yakidi, Yesu wutemona, wuduuka mu nzo na wuyenda ha kibuka ki yandi hiika mu sambila. 36 Simoni na yobobo baba nandi batona mu kwe musosi. 37 Bu bamuyena, bamuteela ti: «Bamvimba bana kusosa.» 38 Kansi Yesu wubateela ti: «Twendeeno ku ndambu zi hiika, mu mabwala maa bela-bela, mwanki na longa mpe koko Musamu Wumbote, mu dyambu ti musamu wawowo nayizidi.» 39 Mpe mu kizunga kimvimba ki Ngalili, wedi kwe longingi mu zinzo zi lusambulu zi Bayudayo na wedi kwe kumingi mpeve zimbi.

40 Muntu wumosi wuu na bwazi wuyiza ku Yesu, wufukama ha ntadisi andi na wumubombidila bu kata ti: «Tala ti tiidi, wulendi mvedisa.» 41 Yesu wumuyenina kyadi, wulambula kooko, wumusimba na wuta ti: «Ntiidi, bika wuvedila.» 42 Hansi na nsi, bwazi butumbu manisa na wuvedoso. 43 Yesu wumuvutula hansi na nsi na wumuzonzila mu nkasu, 44 wumuteela ti: «Keba kwaku! Kutandi wo ku muntu ko. Kansi yenda wuyenika ku nganga-Nzambi, mpe nata munkayulu wutuma Mose mu balonka ti ngeye nyeki.» 45 Kansi muntu bewowo bu kayenda, wutona mu mwangisa ku bantu bamvimba musamu wu mutudila. Ni bwabobo, Yesu kedi bwesa kwe yeniki ko ku bantu mu zimbanza. Ku mbazi yi mbanza kedi kwe zakididingi mu bibuka bilembolo ba bantu. Kansi bantu bedi katukanga mu ndambu ka ndambu mu kwiza ku yandi.