1 Yesu wutona mu bazonzila mu bingana: «Bakala dimosi dikuna mfuba yi miti mi vinu. Wuzunga yo mu lupangu, wutima bulu mu kamunanga mbutu zi vinu, mpe wutunga nzo yi kibanga yi munkengi. Mboki, wuhaana yo ku bisadi bi vinu mwanki bafutilanga yo, mpe wuyenda mu nzyetolo. 2 Ntangu yi nyonzokolo bu yifwana, wutambika mundongo andi wumosi ku bisadi bi mfuba yi vinu, mwanki katambula ku yawu kikunku kyandi ki mimbutu mi vinu. 3 Kansi yawu bamubwila, bamutuuta nkuba na bamuvutula moko na moko. 4 Wubwesa batambika dyaka mundongo wuhiika, kansi bamukata mu mutu na bamusafula. 5 Wutambika dyaka wuhiika, bamuhonda. Mboki bahiika, babingi batuuta nkuba na babingi bahonda. 6 Mwana andi wumosi wusaala wukatoma tya. Yandi katambika wumanunu ku yawu, mu dyambu wuta ti: "Baavumina mwana ani." 7 Kansi bisadi bi mfuba yi vinu bateelasana yawu na yawu ti: "Taleeno wabyadila fwa! Yizeeno, tumuhondeeno, mwanki tubyaadila fwa." 8 Bamubwila, bamuhonda na bamutuba ku mbazi yi mfuba yi vinu.

9 Yesu wubafuula ti: nki bwabu mfumu yi mfuba yi miti mi vinu kaasa e? Bu kaakwiza, mbo kahondoso bisadi bi mfuba yi miti mi vinu na mbo kahaana yo ku bantu bahiika. 10 Yeno lutanga ko masonama mata ti:

"Tadi dinyafuna bituungi bi nzo

dyeka tadi divudidi mfunu. 11 Mfumu wusidi ti bubela bobo:

musamu wungitukulu wudi ha meso meto!"»

12 Basosa mu mukanga, kansi bayena bunkuta bu mukangu. Babakula ti mu dyambu dyawu Yesu kateela kingana bekyokyo. Bu basala mu sisa, ni bayenda.

13 Batambika ku Yesu mwa ndambu yi bafalisi na bantu ba kimvuka ki Elode, mwanki bamulebikila mutambu mu mpova zi yandi bende. 14 Bayiza muteela ti: «Mulongisi, tuzebi ti kikedika kwe tanga na wukwe yenanga muntu bunkuta ko, mu dyambu ti ngeye wuswasikisanga bantu ko, nakwe longanga nzila yi Nzambi mu kikedika. Tuteeleti, nganunu tuu na luve mu futa mpaku yi Kayisali hoti kaani e? Tufweti futa hoti kaani e? 15 Kansi Yesu wubakula makani mawu ma diisu ku nsye lukaya, wubavutudila ti: bila nki luna ndebikila mutambu e? Ntwaadileeno mbongo yi kisengo yimosi, mwanki na tala yo.» 16 Bamutwadila yo na wubafuula ti: «Hambo kini na bisono, binani bidi e?» Bamuvutudila ti: «Bi Kayisali.» 17 Buna Yesu wubateela ti: «Vutuleeno bi Kayisali ku Kayisali, bi Nzambi ku Nzambi.» Yawu bayituku mu mvutu yi kabahaana.

18 Basaduki bayiza ha ntadisi yi Yesu, yawu bakwe kwikilanga mu mfulukulu yi bafwa ko, bamufuula ti: 19 «Mulongisi, Mose wutusonikina ebu: "Tala ti bakala difwidi mpe sisidi mukento wulembolo sala buta mwana, mpangi andi yi bakala fweti kwela foola, mwanki kahaana nkuna ku yondowo wufwidi." 20 Kansi kuba na babakala nsambwadi mu kimpangi kyawu. wuntete wukwela na wufwa, kasala buta mwana ko. 21 Wunzole wukwela foola na wufwa, kasala buta mwana ko. Bumosi mpe ku wumitatu, 22 Mu nsambwadi yimvimba, nakani wumosi kasala buta ko. Ku manima ma yawu bamvimba, mukento mpe wuyiza fwa. 23 Mu kilumbu ki mfulukulu mu bafwa, mukento wunani waaba e? Mu dyambu ti yawu nsambwadi bamukwela!» 24 Yesu wubateela ti: «Bazimbala ludi, mu dyambu ti luzebi masonama na lulendo lu Nzambi ko. 25 Mu dyambu ti, haaba mfulukulu mu bafwa, bakento na babakala baakwela ko, kansi baaba bonso zimbazi zi mazulu. 26 Mu myo mitadidi mfulukulu mu bafwa, nganunu lutanga ko mu buuku di Mose misamu mi muteela Nzambi ha vunda di mwa muti: "Meno nidi Nzambi yi Abalahami, Nzambi yi Isaaki na Nzambi yi Yakobi!" 27 Nzambi kaa Nzambi yi bafwa ko, kansi yi bamoyo. Nkatika yeno bazimbala ludi.»

28 Wumosi mu milongisi mi Misiku wubayuwa bu bedi sanga mpaka, mpe wuyena ti Yesu mvutu zimbote kavutula ku basaduki. Wufinama, mpe wumufuula ti: «Nkye mwina wuu wuntete mu mina mimvimba e?» 29 Yesu wumuvutudila ti: «Mwina wuntete, ni ewu: "Isaeli, yuwa! Mfumu Nzambi eto, ni yandi kaka wuu Mfumu. 30 Zola Mfumu Nzambi aku mu mutima aku wumvimba, mu mwela aku wumvimba, mu madyela maku mamvimba, mpe mu ngolo zaku zimvimba." 31 Wunzole ni ewu: "zola mfinangani aku bonso ngebende." Kuu mina mihiika mivudidi mfunu ko na myamimyole bemimi.» 32 Mulongisi wu Misiku wumuteela ti: «Mulongisi, nkatika bumbote zonzidi! Kikedika teedi ti Nzambi yimosi kaka yidi, kuu Nzambi yihiika ko. 33 Zola Mfumu Nzambi aku mu mutima aku wumvimba, [mu madyela maku mamvimba] na mu ngolo zaku zimvimba, mpe zola mfinangani aku bonso ngebende. Mina bemimi mivudidi mfunu na minkayulu mye yoka kibulu kimvimba, mpe na minkayulu mimvimba mye yoka bibulu.» 34 Yesu bu kayena ti mu ndwenga kahaanina mvutu, wumuteela ti: «Siidi kitatu na Kimfumu ki Nzambi ko.» Ka muntu wubwesa muzika dyaka byuhu.

35 Yesu bu kedi longanga mu nzo-Nzambi, wufuula ti: «Bwedi milongisi mi Misiku milendi teela ti Klisto mwana wu Davidi kadi e? 36 Davidi yandi bende muntwadusulu yi Mpeve Yilongo, wuta ti:

"Mfumu Nzambi wuta ku Mfumu ani ti:

Yiza zakala ha lweka lu lubakala lwani,

Natee bu nasa ti mitantu myaku miba bitentokolo bi bitambi byaku."

37 Tala ti Davidi wuna mutumisina "Mfumu", bwedi kalendi bwesa bela dyaka mwana andi e?»

Mpumbu yiyinene yi bantu yedi mu yuwa mu kyese.

38 Mu ndongosolo andi Yesu wubateela ti: «Kebeeno kweno na milongisi mi Misiku, batiidi mu kwe yungingi mu mazwele mamala na benda bahekingi mbote mu byanzala, 39 bakwe tyanga mu sola bibuka bintete mu zinzo zi lusambulu zi Bayudayo na bibuka bi buzitu mu ndambisa. 40 Bakwe zyonanga bima bimvimba bi mafoola na bakwe sanga zinsambulu zizila mu kiyenikisa. Baatambula mfundusu yi hyokidi kitezo.»

41 Yesu wuzakala mu nzo-Nzambi ha ntendo kima ki bakwe haaninanga minkayulu, wuyena bwedi mpumbu yi bantu yedi haaninanga mbongo. Mvwama zizingi zedi haananga mbongo zizingi. 42 Foola dimosi di muwelo dituula momo mbongo zole zi kisengo zilembolo ba mfunu. 43 Buna Yesu wutumisa milongoki myandi mpe wubateela ti: «Kedika nina luteela, mu bamvimba foola bedidi di muwelo divudidi tuula mu kima ki bakwe haaninanga minkayulu. 44 Mu dyambu ti bamvimba baheeni mbongo zilembolo ba nawu mfunu, kansi yandi, mu bumputu bwandi, tudidi zimvimba zibedi nandi nsatu mu zinga.»