1 Kilumbu ki saba bu kihyoka, Maliya mwisi-Mangadala, Maliya ngudi yi Zaki, mpe Salomi basumba mafuta mamfuku yimbote, mwanki benda bakusa mo mu nitu yi Yesu. 2 Kilumbu ki lumingu mu mene na mene, mwini bu wutona mu totoka, bayenda ku ndyamu. 3 Batelasana yawu na yawu ti: «Naani watunengomonina tadi dii ha nkotolo yi ndyamu e?» 4 Kansi bu basendola meso, bayena ti tadi diba nkatika didinene diba dinengomono. 5 Bakota mu ndyamu, bayena toko dimosi diba dizakala ku kooko ku lubakala na dilwata zwele dimpembe, mpe bayena bunkuta bubwingi. 6 Wubateela ti: «Luyenandi bunkuta ko. Yesu mwisi-Nazaleti luna sosa, yondowo wu bakomini ha kulunsi. Kasiidi ha ko, fulukidi mu bafwa! Yizeeno lutala huma ha bamutuudidi. 7 Yendeeno luta ku milongoki myandi na ku Petelo ti: "Wulutekididi ku mbanza yi Ngalili, kwakoko lwaamuyenina bonso bu kaluteela wo." » 8 Batotoka mu ndyamu na kintekoto, mayindu mawu yeku-yeku, ni bawoka. Mpe bata wo ku kani muntu ko, mu dyambu ti baba na bunkuta bungitukulu.

[9 * Yesu wufuluka kilumbu ki lumingu mu mene, wuyenikina ntete Maliya mwisi-Mangadala, yondowo wu kakuma mpeve nsambwadi zimbi. 10 Wuyenda zabikisa wo ku yobobo baba nandi na baba mu kifwidi, mpe bedi dilanga. 11 Kansi bu bayuwa ti wuu wumoyo na wumuyena, yawu bamukwikila ko.

12 Ku manima, Yesu wuyenikina milongoki myole myedi kwenda ku bwala mu kifwani kihiika. 13 Bu bavutuka, bayadila myo ku bahiika, kansi babakwikila ko.

14 Ku manima, Yesu wuyenika ku milongoki kumi na wumosi bu baba ha meza. Wubasemba mu dyambu ti baba na kiminu ko na babisa mu kwikila yobobo bamuyena wufuluka mu bafwa. 15 Mboki wubateela ti: «Yendeeno mu nza yimvimba mu samuna Musamu Wumbote ku bantu bamvimba. 16 Yondowo waakwikila na waabotoko waavuuka, kansi yondowo waalembolo kwikikila, waatambula nsembolo. 17 Taleeno bidimbu byaalanda yobobo baakwikila: mu nkumbu ani, baakuma mpeve zimbi, baazonza ndinga zinzenza, 18 baasimba zinyoka mu moko mawu, tala ti banwini bima bimbi bikwe hondanga, kani musamu wumpasi waababwidila ko, baatentika moko ku zimbevo, mpe yawu baanyaka.»

19 Bu kamanisa mu zonza bobo, Mfumu Yesu bamutombola ku yulu, mpe wuyenda zakala ha lweka lu lubakala lu Nzambi. 20 Milongoki miyenda samuna Musamu Wumbote ku ndambu ka ndambu. Mfumu wedi salanga kintwadi nawu mpe wedi lonkanga mu bidimbu ti Mambu mandi makedika madi.]