1 Batula ku simu di kaka di dyanga di Ngalili, ku kizunga ki bisi-Ngelaseni. 2 Yesu bu katotoka mu mulungu, bakala dimosi ditumbu duuka ku kati di ndyamu na diyiza mubwana. Bakala bedyodyo diba dilwatu mu mpeve yimbi 3 Yandi ku ndyamu kedi zakidilanga na kuba nakani muntu ko wedi lendanga mu mubindika misinga, kaati ni miba misinga mi bisengo, 4 mu dyambu ti wedi vula banga wubinduku mu bisengo mu malu na mu misinga mi bisengo mu moko, kansi wedi zenganga misinga mi bisengo na wedi tabulanga bisengo. Mpe kuba nakani muntu ko wuba na ngolo mu mulemvola. 5 Ntangu zimvimba mpimpa na mwinu wedi kwe yimingi ku ndyamu na ku yulu milandu, mpe wedi kwe bulaningi na wedi kwe kilwekisingi mu matadi. 6 Bu kayena Yesu kitatu, wunooka na wufukama ha ntadisi andi 7 na wulooka mu ngolo ti: «Yesu, Mwana wu Nzambi Yihyokidi Kuzangama, nkye dyambu ngeye na meno e? Mulemvo aku mu nkumbu yi Nzambi, kunkwamisandi ko!» 8 Mu dyambu ti Yesu wedi muteela ti: «Mpeve yimbi totoka mu nitu yi muntu bewuwu!» 9 Yesu wumufuula ti: «Nkumbu aku nani e?» Yandi wuvutula ti: «Nkumbu ani "Babingi", mu dyambu ti babingi tudi.» 10 Buna yibombidila Yesu bubwingi mu lembolo batambika ku kizunga kihiika.

11 Kuba na kamba di zingulu dyedi kwe sosi bye dya mu mulandu. 12 Na mpeve zimbi zimvimba zibombidila Yesu ti: «Tutambika kweto mu zingulu bezozo, mwanki tukota mu yawu!» 13 Yesu wubahaana luve. Mpeve zimbi zitotoka mu bakala na ziyenda kota mu zingulu. Kamba bedyodyo di zingulu diba kampe mafunda mole (2000), dilundumuka tuuka ku yulu mulandu natee ziyenda bwa mu dyanga na zimana dyama. 14 Minkengi mi zingulu bawoka na bayenda mwangisa nsangu mu mbanza na mu mwa zinzo zi mimvungi. Bantu bayenda mu tala misamu bwedi mihyokila. 15 Batula ha beela Yesu, bayena muntu bewowo wuba wulwatu ku mpeve zimbi zizingi: wuba wuzakala, wulwata binkutu na kimuntu kyandi kisikama. Mpe bunkuta bubabaka. 16 Yobobo bayena mimvimba, babayadila mpolo zi misamu mitudila muntu wuba wulwatu ku mpeve zimbi na ku zingulu. 17 Ni hahoho, batona mu bombidila Yesu kakatuka mu kizunga kyawu. 18 Yesu bu kedi kota mu mulungu, muntu wuba wulwatu ku mpeve zimbi wumubombidila kenda nandi. 19 Yesu kamuhaanina dyo luve ko, kansi wumuteela ti: «Yenda ku nzo aku, ku kanda dyaku na bateela mimvimba Mfumu mi kakuhidikidi, na bwedi kakufwididi nkenda.» 20 Wuyenda, na wutona mu mwangisa nsangu mu kizunga ki Dekapoli mu mimvimba mi muhidikila Yesu na bamvimba bayituku bubwingi.

21 Yesu wuvutuka ku simu dihiika mu mulungu. Mpumbu yi bantu yikutakana na yimuzungidila ha kumu di mamba. 22 Buna wumosi mu zimfumu yi nzo yi lusambulu yi Bayudayo, nkumbu andi Yayilo, wuyiza. Bu kayena Yesu, wubwa ha malu mandi 23 na wumubombidila bubwingi ti: mwana ani wu mukento weka lukufi mu fwa. Yiza wumutentika moko, mwanki kavuuka na kaba wumoyo. 24 Yesu wuyenda nandi. Mpumbu yi bantu yedi kwe mulandi na yedi kwe mufyetikisi mu ndambu ka ndambu.

25 Kuba na mukento wumosi wuba na kimbevo kye kwe totokingi menga, kizingila mvula kumi na zole (12). 26 Wutoma yena mpasi zizingi mu moko ma mimbuki mimingi. Wumanisa mvwilu andi yimvimba yiba nandi, yandi kabaka mpe lunyakusu ko, kansi mpasi zihyoka dyaka kitezo. 27 Wuyuwa bu bedi zonzilanga Yesu. Wuyizila ki manima ha kati di mpumbu yi bantu na wusimba kinkutu kyandi. 28 Mu dyambu wuyindula ti: «Namana simba kwandi kinkutu kyandi, naanyaka!» 29 Hansi na nsi, menga ma tumbu kangama na wuzaba mu nitu andi ti nyeki mu mpasi zandi.

30 Mu kilokola bekyokyo kwandi, Yesu wutumbu zaba ti lulendo luduuka mu kati dyandi. Wubangumuka ku mpumbu yi bantu na wufuula: «Nani simbidi binkutu byani e?» 31 Milongoki myandi mimuvutudila ti: «Wuna yena mpumbu yi bantu yina kwe kufyetikisi mu ndambu ka ndambu, kadi wuna fuula ti: "Nani wunsimbidi e?"» 32 Kansi Yesu wutala bamuzungidila mu zaba yondowo wusa bobo. 33 Mukento bewowo wedi tekita mu bunkuta, mu dyambu ti wuzaba mi mutudila. Wuyiza bwa ha malu ma Yesu na wumuteela kikedika kimvimba. 34 Buna Yesu wumuteela ti: «Mwana ani, kiminu kyaku kikuvuukisi, yenda mu kiyenge na bika wunyaka mu kimbevo kyaku.»

35 Bu kedi tatamana mu zonza, bantu bayiza bafuma ku nzo yi mfumu yi nzo yi lusambulu yi Bayudayo na bamuteela ti: «Mwana aku wu mukento wufwidi. Bila nki wuna kwamisina dyaka Mulongisi e?» 36 Kansi Yesu bu katumbu yuwa misamu bemyomyo, wuta ku mfumu yi nzo yi lusambulu yi Bayudayo ti: «Kubandi na bunkuta, sa kwandi kiminu.» 37 Kabika nakani muntu wumosi kamulanda ko, kansi Petelo kwandi, Zaki na Yoane mpangi yi Zaki. 38 Batula ku nzo yi mfumu yi nzo yi lusambulu yi Bayudayo, Yesu wuyena bantu baba mutela-mutela mpe bedi dila na bedi bulana. 39 Wukota na wubateela ti: «Bila nki ludi mutela-mutela na luna didila e? Mwana wufwidi ko, kansi tolo kwandi wubwidi.» 40 Kansi, ni bamusehila. Buna wukuma bamvimba ku mbazi, wubonga nandi ngudi na tata yi mwana na milongoki myandi mya mitatu, mboki bakota mu kihinga kiba mwana. 41 Yesu wusimba kooko ku mwana na wumuteela ti: «Talita kumi!» Bangundulu ti: «Mwana ndumba, nina kuteela, telama!» 42 Mwana ndumba wutumbu telama na wutona mu kwe yendi, mu dyambu ti wuba na mvula kumi na zole (12). Bamvimba bayituku bubwingi. 43 Kansi Yesu wubakanikina balembolo we ta ku muntu. Mpe wubateela bamuhaana bindya.