1 Yesu bu kaduuka mu nzo-Nzambi, wumosi mu milongoki myandi wumuteela ti: «Mulongisi, taleeti kwaku! Nkye kitoko ki matadi bemama, mpe nkye miyimba nzo!» 2 Kansi Yesu wumuteela ti: «Wuna yena miyimba nzo bemimi e? Kwaabwesa sala kaa tadi dimosi ha yulu tadi nandi ko, bimvimba byaamana mwangana.»

3 Yesu wuba wuzakala ha yulu mulandu wu Olive mpe wuba wutadisa ku nzo-Nzambi. Petelo, Yoane, Zaki na Andele bamufuula ha yawu hiika ti: 4 «Tuteeleti nkye kilumbu misamu bemimi myaatula, mpe mu nkye kidimbu baazabila ti mimvimba bemimi myaahilama e?»

5 Yesu wubavutudila ti: «Kebeeno kweno! Muntu ka luhukumunandi ko. 6 Mu dyambu ti babingi baakwiza mu nkumbu ani, na baaluteela ti: "Meno nii Klisto!" Na bantu babingi baahukumuna. 7 Lwaayuwa bu bazonzila zimvita na manyungu-nyungu ma zimvita, luyenandi bunkuta ko. Misamu mimvimba bemyomyo mifweti hilama, kansi yaaba, mpe nsukunu yi nza ko. 8 Bantu ba nsi yimosi baanwanisa bantu ba nsi yihiika, bantu bantinu yimosi baanwanisa bantu bantinu yihiika. Mu bizunga bibingi butoto bwaazakama na malema maaba. Misamu bemyomyo myaaba bonso ntonono yi misongo mi mukento weka lukufi mu buta. 9 Kebeeno kweno, mu dyambu ti bantu baalunata mu zinzo zi lufundusu, na baaluzuba bikoti mu zinzo zi lusambulu zi Bayudayo. Baalufundisa ha ntadisi yi zintinu na ha ntadisi yi minyaadi mu dyambu dyani, mpe kyaaba kimbangi ki lwaanteela ha ntadisi awu. 10 Kansi Musamu Wumbote wufweti teka samunu ku bantu ba nsi zimvimba. 11 Bu baalunata mu kwe luyekola, lutekandi kikwamisa ko mu misamu mi lwaazonza. Kansi teeno mpova zi baluhaana mu kilokola bekyokyo kwandi, mu dyambu ti ka ku yeno ko zaafuma, kansi ku Mpeve Yilongo.

12 Mpangi yaayekola mpangi andi bamuhonda na tata waasa bumosi ku mwana andi, baala baanangumukina bibuti byawu, na baabahondisa. 13 Bantu bamvimba baalubela mu dyambu di nkumbu ani. Kansi wonso waatatamana natee ku nsukunu, waavuuka.

14 Mu ntangu yi lwaayena "kimwangisi kinsisi" [kyo kizonzila mumbikudi Danyeli], kizakadi ha kibuka ki kaketi lembolo ba. – Bika muntu wuna tanga kabakula! – Buna yobobo baaba ku Yuda bafweti tinina ku milandu, 15 yondowo waaba ku yulu muludi wu nzo kakulumukandi mu kwiza bonga bima bii mu kati di nzo andi, 16 na yondowo waaba ku mfuba, kavutukandi ku nzo andi mu kwiza bonga kiyunga kyandi. 17 Mu bilumbu bebyobyo, nkye mpila kyadi ku bakento baaba na mazimi na baanwika baala mabene! 18 Sambileeno yilembolo ba mu nsungi yi kyozi kingolo! 19 Mu dyambu ti, mu bilumbu bebyobyo, mpasi zizingi zaaba zi tuteka lembolo yena, kutonina ku mbadukulu, Nzambi yi kahidika nza, natee mu ntangu beyiyi, mpe mpasi zibobo zaabwesa ba ko. 20 Tala ti Nzambi kabonga nzengolo ko mu kufika bilumbu bebyobyo, kunaani muntu wuketi vuuka. Kansi wukufika byo mu dyambu di yobobo ba kasoola.

21 Tala ti muntu wuluteedidi ti: "Taleeno Klisto ewu eha!" Hoti "Ehana kadi!" Lumukwikilandi ko. 22 Mu dyambu ti zi klisto zi luvunu na mimbikudi mi luvunu myaatelama, baahidika bidimbu na bimangu bingitukulu muhukumuna mpe, tala ti bulendi ba, yobobo Nzambi bakasoola. 23 Kebeeno kweno! Meno nalulwengisi mu mimvimba.

24 Kansi mu bilumbu bebyobyo kwandi, ku manima ma mpasi zibubu, ntangu yaabwesa lezima ko, ngonda yaabwesa kyenzola ko, 25 na zimbwetete ku yulu zaasotoka na bima bii na lulendo mu mazulu byaaningana. 26 Ni hahoho baayenina Mwana Muntu, wuna kwiza mu matuti mu lulendo lwandi lumvimba na nkembo andi yimvimba. 27 Buna waatambika mbazi zandi na waayonzika yobobo baakasoodidi mu ndambu ziya zi nza, baafuma ku sukina nza natee ku sukina yulu.

28 Bika kingana ki muti wu fike ki lulonga: bu lwatumbu yena bintala byandi byeka bimamba na makaya mandi matonini mu sasa, luzebi ti ntangu yi ntombo yeka lukufi. 29 Bumosi mpe ku yeno, bu lwaayena misamu bemyomyo ti mitudidi, zabeeno ti Mwana Muntu weka lukufi, na weka ha myelo myeno. 30 Kedika nina luteela, mbandu beyiyi yaahyoka ko tala ti mimvimba mitudidi ko. 31 Yulu na butoto byaahyoka, kansi Mambu mani maahyoka ko.

32 Mu dyambu ditadidi kilumbu na kilokola, ka muntu ko zebi, ka zimbazi zi mazulu ko, ka Mwana ko, kansi Tata kaka zebi.

33 Kebeeno kweno! Kayeeno meso mu dyambu ti luzebi ko nkye ntangu kilokola kyaakwiza. 34 Kyaaba bonso muntu wumosi, wuna kwenda ku nzyetolo, sisidi nzo andi mu moko ma mindongo myandi. Mpe heeni ku muntu-muntu kisalu kyandi ki kasala mpe teedidi ku munkengi wu mwelo kakaya meso. 35 Ni hahoho, kayeeno meso mu dyambu ti luzebi kilokola kyaakwiza mfumu yi nzo ko: mu mpimpa, hoti mu kati-kati di mpimpa, hoti mu ntangu yikwe kubanga zinsusu, hoti mu mene. 36 Bu kaakwiza, kizandi kalubwana balambalala. 37 Misamu bemimi mi nina luteela, kuyeno bamvimba nina teela myo: Kayeeno meso!»