1 Yesu wukatuka huma behoho, mpe wuyenda ku kizunga ki Yuda, kusimu dihiika di nzadi yi Yolodani. Mpumbu yi bantu yikutakana dyaka ha kaba, mpe bonso buba kifu kyandi, wubalonga dyaka. 2 Bafalisi bafinama ha kabela mu mutonta. Bamufuula ti: «Nganunu, bakala wuu na luve mu kuma mukento andi e?» 3 Wubavutudila ti: «Nkye ntumunu Mose kaluhaana e?» 4 Bamuteela ti: «Mose wuhaana luve ku bakala mu sonika mukanda we hondila makwela mpe kakuma mukento.» 5 Buna Yesu wubateela ti: «Mu dyambu di mutima ngolo eno, Mose ka lusonikina ntumunu beyoyo. 6 Kansi ku mbadukulu yi nza, Nzambi "wuhidika mukento na bakala," 7 "ni hahoho, bakala kaafweti sisa nzo yi ngudi andi na tata andi mu kwenda ba na mukento andi 8 mpe ya babole baaba muntu wumosi." Buna basidi dyaka bantu bole ko, kansi muntu wumosi. 9 Ni hahoho, muntu kalendi hambisa yobobo babundidi Nzambi ko.» 10 Bu bavutuka ku nzo, milongoki mifuula dyaka Yesu mu musamu bewowo. 11 Wubavutudila ti: «Tala ti bakala dikumini mukento andi na kwedidi wuhiika, sadidi kinsuza ku mukento andi wuntete, 12 mpe tala ti mukento bisidi mulumi andi na kwedidi bakala dihiika, sadidi kinsuza.»

13 Bantu banata baala bafyoti ku Yesu mwanki kabatentika moko. Kansi milongoki mi basemba. 14 Yesu bu kayena bobo, wufwema na wubateela ti: «Bikeeno baala bafyoti biza kuu meno, lubakakidilandi ko mu dyambu ti kimfumu ki Nzambi kifwanakani ku yobobo ba bonso yawu. 15 Kedika nina luteela, yondowo walembolo tambula kimfumu ki Nzambi bonso mwana wufyoti, kalendi mwe kota ko.» 16 Mboki, Yesu wubabonga mu moko mandi, wubatentika moko mu basakumuna.

17 Yesu bu katamana nzila andi, muntu wumosi wunooka mpe wufukama ha ntadisi andi mpe wumufuula ti: «Mulongisi wumbote, nki nafweti sa mu tambula luzingu lu mimvu ka mimvu e?» 18 Yesu wumuvutudila ti: «Bila nki wuna ntumisina muntu wumbote e? Ka kuu muntu wudi wumbote, tala ti ka Nzambi kaka ko. 19 Misiku myazebi: "Kuhondandi ko, kusadilandi kinsuza ko, kuyibandi ko, kutandi kimbangi ki luvunu ko, kusandi bumbi ku muntu ko, zitisa tata aku na ngudi aku"» 20 Wumuvutudila ti: «Mulongisi, tuuka kintwenya kyani, nakwe toma vuminanga misiku mimvimba bemyomyo.» 21 Bu kamutala, Yesu wumutya na wumuteela ti: «Musamu wumosi kaka wulembolo ba naku: yadika bima byaku bimvimba, haana byo ku bamiwelo, mbo wubaka kimvwama ku mazulu. Mboki, yiza mpe ndanda.» 22 Kansi bu kayuwa bobo, bito bimunooka mpe wuyenda ku nsye kyadi, mu dyambu ti wuba na bimvwama bibingi.

23 Yesu wusungimina milongoki myandi mi muzungudila na wubateela ti: «Mpasi zizingi ku yobobo baa na bimvwama mu kota mu kimfumu ki Nzambi!»

24 Milongoki miyena bunkuta bu bayuwa bobo. Yesu ni kabateela dyaka ti: «Baala bani mpasi zizingi zidi mu kota mu kimfumu ki Nzambi! 25 Bulutidi nayaki-yaki ku kibulu ki nkumbu yi samo mu lutila ha mwa bulu di ntumbu, kansi ka mvwama ko mu kota mu kimfumu ki Nzambi.» 26 Milongoki mivula yituku na bakifulasana yawu na yawu ti: «Buna nani kwandi waavuuka e?» 27 Yesu wubasungimina na wubateela ti: «Misamu mii mpasi ku bantu mu hidika, mii mpasi ku Nzambi ko, mu dyambu ti Nzambi kalembananga dyambu ko.»

28 Buna Petelo wumuteela ti: «Bwabu yeto tumeni sisa bimvimba mu kulanda.» 29 Yesu wumuteela ti: «Kedika nina luteela, kunaani muntu waasisa mu dyambu dyani na di Musamu Wumbote, nzo andi hoti mpangi zandi zi babakala, bibusi byandi, tata andi, ngudi andi na baala bandi, hoti mfuba zandi, 30 waalembolo baka mu ntangu beyiyi nkumbu nkama (100): zinzo, mpangi zi babakala, bibusi, matata, zingudi, baala, na zimfuba na mfyetokoso mpe, na mu ntangu yina kwiza, luzingu lu mimvu ka mimvu. 31 Kansi babingi batekila baazimunina, mboki babingi bazimunina baatekila.»

32 Bu baba mu nzila mu tomboka ku mbanza Yelusalemi, Yesu wedi kwe yendi ku mutu wu milongoki myandi, miba ku nsye mayindu na yobobo bedi kwe mulandi baba na bunkuta. Yesu wubonga dyaka ha kimosi nandi milongoki kumi na myole (12), mpe wutona mu bateela misamu mya mutudidila. 33 «Tuna tomboka ku Yelusalemi mpe Mwana Muntu baamuyekola mu moko ma zimfumu zinganga-Nzambi na milongisi mi Misiku. Baamuzengila lufwa na baamuyekola ku bantu balembolo ba Bayudayo. 34 Baamuvweza, baamulobodila mante, baamuzuba bikoti na baamuhonda. Kansi mu kilumbu kibitatu waafuluka mu bafwa.»

35 Buna Yoane na Zaki, baala ba Zebedayi bayenda ha ba Yesu. Bamuteela ti: «Mulongisi, tutidi wutuhidikila misamu mi twaakulomba.» 36 Wubateela ti: «Nki lutidi naaluhidikila e?» 37 Bamuteela ti: «Sa ti tuzakala ha ndambu aku, wumosi ku kooko kwaku kulumoso na wuhiika ku kooko kwaku ku lubakala bu waaba mu nkembo aku.» 38 Kansi Yesu wubateela ti: «Luzebi mi luna ndomba ko. Lulendi nwa mbungu yi naanwa meno e? Hoti lulendi tambula mbotokolo yi naatambula e?» 39 Bamuvutudila ti: «Ninga, tulendi lenda.» Yesu wubateela ti: «Wu makedika, lwaanwa mbungu yi naanwa mpe lwaatambula mbotokolo yi naatambula. 40 Kansi ka meno ko nii na luve mu zenga nani lendi zakala ku kooko kwani ku lumoso mpe ku kooko kwani ku lubakala. Bibuka bebyobyo bidi bi yobobo ba kakubikila byo.» 41 Bu bayuwa bobo, milongoki kumi mihiika mitona mu fwemina Zaki na Yoane. 42 Yesu wubatumisa na wubateela ti: «Luzebi ti yobobo ba bakwe bongilanga bonso zimfumu, bonso zimfumu bakwe tumanga bantu. Mpe yobobo baa na lulendo bakwe yenisa bantu mpasi. 43 Kansi kaabubelandi bobo mu yeno. Yondowo tiidi muba muntu wumfunu ha kati dyeno kaba kisadi kyeno, 44 na yondowo tiidi muba wuntete ha kati dyeno kaba mundongo wu bamvimba. 45 Mu dyambu ti Mwana Muntu kayizidi ko ku bantu mwanki bamusadila, kansi mu sadila na mu haana luzingu lwandi bonso mufutu mu kuula bantu babingi.»

46 Batula ku mbanza Yeliko. Yesu bu kedi duuka mu mbanza na milongoki myandi na mpumbu yi bantu babingi, mpofo yimosi nkumbu andi Batimayi, mwana wu Time wuba wuzakala ha ntendo nzila na wedi sanga mundombila. 47 Bu kayuwa ti ni Yesu mwisi-Nazaleti, wutona mu bulana ti: «Yesu, Mwana Davidi, wumfwila nkenda!» 48 Bantu babingi ba mu bamina mwanki kakanga munwa andi, kansi wubulana dyaka mu ngolo ti: «Mwana Davidi, wumfwila nkenda!» 49 Yesu wutelama na wuta ti: «Mutumiseeno.» Batumisa mpofo na bamuteela ti: «Lwata kibakala, telama, wuna kutumisa.» 50 Mpofo wulosa kiyunga kyandi, wutelama mu manzangu, mpe wuyenda kubeela Yesu. 51 Yesu ti: «Nki tiidi na kusila e?» Mpofo wumuvutudila ti: «Labuni», mbangudulu ti: «Mulongisi, sa ti nabwesa yena dyaka!» 52 Yesu wumuteela ti: «Yenda, kiminu kyaku ki kuvuukisi.» Ni katumbu yena, na wulanda Yesu mu nzila.