1 Bilumbu byole bisala mu sa mukembo wu Pake, mpe wu mampa ma kiputi kilembolo vimba. Mfumu zinganga-Nzambi na milongisi mi Misiku basosa bwedi bakangila Yesu mu madyela, mwanki ba muhondisa. 2 Kansi bata ti: «Tumukangandi mu ntangu yi mukembo, mwanki mukangu wulembolo nangumuka.»

3 Yesu bu kaba ku Betani, ku nzo yi Simoni, yondowo wubeela kimbevo ki bwazi, bu kaba ha meza, mukento wumosi wuyiza kota na mbwata yi alabati yifuluka mu mananasi ma nale mamfuku yimbote na mantalu yiyingi, malembolo vwatana na kima kihiika. Wubula mbwata na wubulumuna mananasi ha yulu mutu wu Yesu. 4 Mwa bantu bahiika baba hoho bafwema na bata ti: «Bila nki mu fukisa mananasi e? 5 Nganunu tuyadikidi mananasi bemama mu ntalu yi hyokidi nkamatatu (300) zi mbongo zi bisengo, mpe bahaana zo ku bamputu!» Mboki, ni bafwemina mukento bewowo. 6 Kansi Yesu wubateela ti: «Mubikeeno! Bila nki luna mukwamisina e? Musamu wu kampidikidi nkatika wumbote wudi. 7 Mu dyambu ti bamputu baaba neeno ntangu zimvimba, mpe lulendi bahidikila misamu mimbote ntangu zimvimba bonso bu lutidi, kansi meno naaba neeno ntangu zimvimba ko. 8 Misamu mi kahidikidi ni myo mi kalendidi mu hidika, mpe kusidi mananasi mu nitu ani, mu kubika nzikulu ani. 9 Kedika nina luteela, mu nza yimvimba, konso ku baasamuna musamu wumbote bewuwu, mbo bazonzila mpe musamu wuhidikidi mukento bewuwu mu mubambukila moyo.»

10 Yuda Isikalyoti, wumosi mu milongoki kumi na myole, wuyenda ku zinkuluntu zi zinganga-Nzambi mu bayekodila Yesu. 11 Bu bayuwa bobo, bayangalala, mboki bamusila nsilulu ye muhaana mbongo. Ni kedi sosa hwahwa mu muyekola.

12 Kilumbu kintete ki mukembo wu mampa ma kiputi kilembolo vimba, kilumbu bekyokyo ki bakwe haananga munkayulu we yoka wu mwana dimeme mu dyambu di mukembo wu Pake, milongoki miyiza fuula Yesu ti: «Kwedi tiidi twenda tukukubikila bindya bi Pake e?» 13 Buna Yesu wutambika milongoki myandi myole na wubateela ti: «Yendeeno ku mbanza, lwaabwana bakala dimosi di nakwe naati sanga di mamba ha yulu mutu. Mulandeeno 14 natee mu nzo yi kakwe kota, mboki teeleeno mfumu yi nzo ti: "Mulongisi ebu kateedi: Kwedi kuu kihinga ki naadila bindya bi Pake na milongoki myani e?" 15 Waalulonka ku yulu yi nzo yi kibanga, kihinga kikinene kikubuku. Ni mwamomo lwaatukubikila bindya bi Pake.» 16 Milongoki miyenda na mitula ku mbanza, mpe bayenda bwana misamu bonso bu kabateedila myo na bakubika bindya bi Pake.

17 Mpimpa buyitula, Yesu wuyiza na milongoki kumi na myole. 18 Bu baba ha meza na bu bedi dyanga, Yesu wuta ti: «Kedika nina luteela, wumosi mu yeno wuna dya ha kimosi naani, waanyekola.» 19 Batona mu yena kyadi na wumosi-wumosi wumufuula ti: «Kadi meno e?» 20 Wubavutudila ti: «Ni wumosi mu kumi na myole, yondowo wuna tuula ha kimosi naani kooko mu ndonga. 21 Mwana Muntu wuna kwenda bonso bu wudi wusonama mu yandi. Kansi nkya mpila kyadi ku muntu bewowo waamuyekola. Buba bumbote ku muntu bewowo mulembolo butuka.»

22 Mu ntangu yibedi dya, Yesu wubonga dimpa, bu kamana vutula matondo, wubukuna dyo na wubahaana dyo, mpe wuta ti: «Bongeeno, yi ni nitu ani.» 23 Mboki wubonga mbungu, bu kamana vutula matondo, wubahaana yo, mpe bamvimba banwa yo. 24 Yesu wubateela ti: «Ma ni menga mani, menga ma luwawanu [lumoona], matengolo mu dyambu di bantu babingi. 25 Kedika nina luteela, naabwesa nwa dyaka vinu ko, natee kilumbu ki naanwa vinu dinsonso mu Kimfumu ki Nzambi.» 26 Bu bamana yimbila mikunga, baduuka mu kwenda ku ndambusu yi mulandu wu Olive.

27 Yesu wubateela ti: «[Mu mpimpa beyiyi kwandi], yeno bamvimba lwaabwa, mu dyambu ti wusonama: "Naahonda mumvungi wu mameme, mpe kamba dimvimba di mameme dyaamwangana." 28 Kansi bu naafuluka mu bafwa, naalutekidila ku kizunga ki Ngalili.» 29 Petelo wumuteela ti: «Kati bamvimba bakusisidi, meno naakusisa ko!» 30 Yesu wumuteela ti: «Kedika nina kuteela: Mu mpimpa yi bubedidi kwandi, tekila nsusu yikuba nkumbu yinzole, ngeye waambisa nkumbu tatu.» 31 Kansi Petelo wutatamana musingisa ti: «Kati kufwa naasa naku, meno ndendi sala kubisa ko!» Mpe bamvimba bwabobo bazonzila.

32 Batula ha kibuka ki bakwe tumisinanga ti Ngetesemane, na Yesu wuteela milongoki myandi ti: «Zakaleeno ehaha, meno bu nina kwenda ku sambila.» 33 Wunata Petelo, Zaki na Yoane. Mpe wutona muyena kyadi na kingongo, 34 mpe wubateela ti: «Mutima ani wufulukidi mu kyadi mu dyambu di lufwa, zakaleeno ehaha na kayeeno meso.» 35 Mboki wuyenda mwa kitatu, wubwa ha nsi na wusambila, mwanki tala ti bulendi ba, kilokola bekyokyo kimutatukila. 36 Wuta ti: «Aba, Tata, ngeye wulembananga dyambu ko, nkatudidila mbungu beyiyi yi mpasi. Ka bu natiidi meno ko, kansi bu wutiidi ngeye.» 37 Bu kavutuka ku milongoki myandi, wubabwana balambalala, na wuteela Petelo ti: «Simoni, lambaladi e? Lembakani mu kaya meso ka mu mwa kilokola kimosi e? 38 Kayeeno meso na sambileeno mwanki lu lembolo bwa mu ntontolo. Mpeve yii na kinzodila, kansi nitu yii na lebakani.» 39 Wuyenda dyaka mwa kitatu na wuvutukila lusambulu belolo. 40 Mboki wuvutuka dyaka ku milongoki myandi na wubabwana balambala, meso mawu maba mavwembalala mu tolo. Na bazaba ko nki balendi muteela. 41 Bu kavutuka mu nkumbu yi tatu, wubateela ti: «Lutatamani kweno mu bwa tolo na luna huma kweno e? Bwabu bulungidi! Kilokola kifweni, Mwana Muntu wabayekodi bwabu mu moko ma minsumuki. 42 Telameeno, twendeeno! Yondowo wuna nyekola tudidi!»

43 Kakimanisina mu zonza ko, mpe Yuda, wumosi mu milongoki kumi na myole, wutula na mpumbu yi bantu yiba na mbele zi zimvita, mpe na bibono. Babatambika ku zimfumu zinganga-nzambi, milongisi mi Misiku na zinkuluntu zi Bayudayo. 44 Yuda, yondowo wedi yekola Yesu, wubahaana kidimbu eki: «Yondowo wu naafiba ni yandowo, mukangeeno na munateeno, mpe tomeeno kwe mukengi.» 45 Yuda bu katumbu tula, wufinama ha bela Yesu na wumuteela ti: «Mulongisi!» Na wumufiba. 46 Buna babwila Yesu, ni bamukanga. 47 Wumosi mu yobobo baba hoho, wuduukisa mbele yi mvita na wukata mundongo wu mfumu yi nganga-Nzambi, mpe wumuzenga kutu. 48 Mboki Yesu wubateela ti: «Kadi kimpumbulu nidi, mwanki lwiza lunkanga na mbele zimvita na bibono e? 49 Bilumbu bimvimba nabedi neeno mu nzo-Nzambi mu lulonga na lusosidi mu mbwila ko. Kansi bika bubela bobo, mwanki Masonama malunga.» 50 Buna milongoki mimvimba misala musisa na miwoka.

51 Toko dimosi diba dilwata mulele wumpamba, dyedi kwe landi Yesu. Bamukanga, 52 kansi wusala loosa mulele na wuwoka mpene.

53 Banata Yesu ku mfumu yi zinganga-Nzambi, kumana kutakana zimfumu zi zinganga-Nzambi zimvimba, milongisi mi Misiku na zinkuluntu zi Bayudayo. 54 Petelo wuba kitatu na wedi kwe mulandi natee ku nzo yi mfumu yi zinganga-Nzambi. Wuzakala ha mbazi mu kati di lupangu na minkebi na wedi yetila ha ntendo tiya. 55 Zimfumu zinganga-Nzambi na kimvuka ki zinkuluntu zi Bayudayo, basosa kimbangi mu Yesu mwanki bamuzengila lufwa, kansi babaka kyo ko. 56 Bantu babingi bayiza ta bimbangi bi luvunu mu dyambu dyandi, kansi bimbangi byawu byedi dedakana ko. 57 Mwa ndambu yi bantu batelama mu muteela kimbangi ki luvunu na bata ti: 58 «Tumuyuwa bu kedi ta ti: "Ndendi bula nzo-Nzambi beyiyi yitungu mu moko ma bantu, mpe mu bilumbu bitatu, ndendi tunga dyaka yihiika yalembolo ba yitungu mu moko ma bantu."» 59 Kansi, kaati mu mpova bezozo zibata, kimbangi kyawu kiba kidedakana ko. 60 Mfumu yi zinganga-Nzambi wutelama ha kati di bundu na wufuula Yesu ti: «Wuna vutula mvutu mu bimbangi bi bana ta mu dyambu dyaku ko e?» 61 Kansi Yesu wuba naswii na kavutula dyambu ko. Mfumu yi zinganga-Nzambi wumufuula dyaka ti: «Ngeye ni Klisto, Mwana wu Nzambi yi Lusakumunu e?» 62 Yesu wumuvutudila ti: «Ninga, ni meno! Mpe lwaayena Mwana Muntu wuzakadi ha lubakala lu Nzambi yi lulendo, wuna kwiza mu matuti maa ku yulu.» 63 Mboki mfumu yi zinganga-Nzambi wutumbu kakuna binkutu byandi na wuta ti: «Tusidi dyaka na nsatu yi zimbangi ko! 64 Luyudi bwedi kasafudidi Nzambi. Bwedi luna banzila e?» Bamvimba bavutula ti ku mbedi kadi na fweti fwa.

65 Mwa ndambu yi bantu bedi mulobola mante, bamufuka luse, bamuwinda zinkome na bedi muteela ti: «Bikula!» Minkebi mpe myedi mukaata zimbata.

66 Petelo wuba ku nsi, ku kati di lupangu, kisadi kimosi ki mukento ki mfumu yi zinganga-Nzambi kiyiza. 67 Bu kayena Petelo wuba wuzakala ha ntendo tiya, wumusungimina na wumuteela ti: «Ngeye mpe, na Yesu mwisi-Nazaleti lubedingi.» 68 Wubisa bu kata ti: «Nzebi ko, nina bakula ko myo ngeye mitiidi mu ta.» Mboki wuduuka, wuyenda ba ha mwelo wu lupangu. [Nsusu ni yikuba.] 69 Kansi kisadi ki mukento bekyokyo bu kamuyena, wutona dyaka mu ta ku yobobo baba hoho ti: «Muntu bewuwu, nkatika wumosi mu yawu kadi.» 70 Petelo wubisa dyaka. Ku manima, yobobo baba hoho bateela dyaka Petelo ti: «Ngeye mpe wudi wumosi ha kati dyawu, mu dyambu ti mwisi-Ngalili wudi.» 71 Buna Petelo wutona mu dya ndefi ti: «Bika Nzambi kansemba, tala ti kuhuna nina sa! Kedika, meno nzebi muntu bewuwu wu luna zonzila ko.» 72 Hansi na nsi, nsusu yikuba nkumbu yinzole na Petelo wubambuka moyo mu musamu wumuteela Yesu ti: «Teekila nsusu yikuba nkumbu zole, waambisa nkumbu zitatu.» Ni katona mu dila.