1 Mu mene na mene, zimfumu zinganga-Nzambi na zinkuluntu zi Bayudayo, milongisi mi Misiku na kimvuka kimvimba ki zinkuluntu zi Bayudayo zikutakana. Bu zimana bindika Yesu misinga, zimunata, mpe zimuyekola ku Pilatu. 2 Pilatu wumufuula ti: «Ngeye ni ntinu yi Bayudayo e?» Yesu wumuvutudila ti: «Ngeye wuna ta wo.» 3 Zimfumu zinganga-Nzambi zimufunda mu misamu mimingi. 4 Pilatu wumufuula dyaka ti: «Wuna vutula dyambu ko e? Wuna yuwa misamu mimvimba mi bana kufundila!» 5 Kansi Yesu kavutula dyambu ko, mpe Pilatu wutoma yituku.

6 Kadi mukembo wu Pake, Pilatu wuba na kifu kye yambulanga nkole yimosi, yo ya lomba mukangu. 7 Kuba na muntu wumosi nkumbu andi Balabase, wuba mu boloko na bimpumbulu bihiika mu dyambu ti bahonda muntu mu ntangu yi nangumuka mukangu. 8 Mukangu wutomboka ku nzo yi Pilatu na wutona mu mulomba mu ngolo musamu wu kedi bahidikilanga bonso buba kifu kyandi. 9 Buna Pilatu wuvutula ti: «Lutiidi na luyambudila ntinu yi Bayudayo e?» 10 Wuzaba ti, ni mu dyambu di musoki zimfumu zinganga-Nzambi ziyekodila Yesu. 11 Kansi zimfumu zinganga-Nzambi zisindisila mukangu, mwanki Pilatu kabayambudila Balabase. 12 Pilatu wuvutukila mu bafuula dyaka ti: «Nki lutiidi nasa ku yondowo wu lukwe tumisinanga ti ntinu yi Bayudayo e?» 13 Balookana dyaka ti: «Mukoma ha kulunsi!» 14 Pilatu wubateela ti: «Nkye musamu wumbi kasiidi e?» Kansi batatamana mu lookana mu ngolo ti: «Mukoma ha kulunsi!» 15 Pilatu bu katya mu yangidika mpumbu yi bantu, wubayambudila Balabase. Bu kamana zubusu Yesu bikoti, wumuyekola mwanki baamukoma ha kulunsi.

16 Mbulu-mbulu zinata Yesu mu kati di lupangu lu nzo yi munyadi. Zikutikisa kabu dimvimba di zimbulu-mbulu. 17 Zimulwika kiyunga kimbwaki, mpe zisyeta mpu yi nsende yi kintinu na zimutuula yo ha yulu mutu. 18 Mboki zitona mu muhaana mbote mu ta ti: «Mbote aku, ntinu yi Bayudayo!» 19 Zedi muzubanga dyadya ku mutu na zedi mulobolanga mante. Mboki ni zedi fukamanga na zedi kondamanga ha ntadisi andi. 20 Bu bamana muvweza, bamukatula kiyunga kimbwaki na bamuvutudila binkutu byandi. Ni bamunata ku mbazi yi mbanza mu kwe mukoma ha kulunsi.

21 Muntu wumosi wu mbanza yi Sileni, nkumbu andi Simoni, tata di Alezandeli na di Lufusi, wufuma ku mfuba. Zimbulu-mbulu zi mukwika mu nata kulunsi di Yesu. 22 Zimbulu-mbulu zinata Yesu ha kibuka ki nkumbu Ngolongota, mbangudulu ti: «Kikonzongolo ki mutu». 23 Batya mu muhaana vinu di bavwatisa na mile, kansi Yesu wubisa dyo. 24 Bamukoma ha kulunsi. Mboki bata hwadi mu kabana binkutu byandi, mu zaba nki kadi muntu kaa baka. 25 Kiba kilokola kivwa mu mene bu bakoma Yesu ha kulunsi. 26 Ha yulu kulunsi dyandi, basonika kibila ki bamukomina na basonika ti: «Ntinu yi Bayudayo.»

27 Bakoma ha kimosi na Yesu bimpumbulu byole, wumosi ku kooko ku lubakala na wuhiika ku kooko ku lumoso.

[28 Bwabobo misamu mita mimbikudi miyendila detila: «Bamutanga ha kati di bimpumbulu.»] 29 Mimpyoka nzila myedi tuka Yesu, myedi ningisa mitu mu ta ti: «Ee! Ngeye waabula nzo-Nzambi na waatunga yo dyaka mu bilumbu bitatu, 30 kivuukisa ngebende mpe kulumuka bwabu ha kulunsi!» 31 Bumosi ku zimfumu zinganga-Nzambi na milongisi mi Misiku, bayodila Yesu mpe batelasana yawu na yawu ti: «Wuvuukisa bahiika, kansi kalendi kivuukisa yandi bende ko! 32 Bika Klisto, ntinu yi Isaeli, ka kulumuka bwabu ha kulunsi! Mwanki tumuyena na tumukwikila.» Yobobo babakoma nandi ha kulunsi, bedi mutukanga mpe.

33 Mu ntangu ambata, tombe kiyiza bwa mu nsi yimvimba natee mu kilokola kitatu ki manima ma ntangu ambata. 34 Mu kilokola kitatu ku manima ma ntangu ambata, Yesu wulooka mu ngolo ti: «Eloyi, Eloyi, lema sabakatani e?» Mpila mosi ti: «Nzambi ani, Nzambi ani, bila nki wunsisidi e?»

35 Mwa ndambu yi bantu baba hoho bamuyuwa na bata ti: «Yuweno, Eliya kana tumisa!» 36 Wumosi mu yawu, wunooka mu kwe bonga mwa musakasaka wu kavwanga mu vinu dinsa. Wusoka wo ha nsongi yi dyadya, mboki wumuhaana kanwa dyo na wuta ti: «Kingileeno tutala, tala ti Eliya waakwiza mu kulumuna ha kulunsi!». 37 Kansi Yesu wulooka mu ngolo na wufwa.

38 Mulele wu kihinga kilongo wukakuka ha kati-kati mu ndambu zole kutonina ku yulu natee ku banda. 39 Mfumu yi zimbulu-mbulu nkama (100) wuba ha ntadisi yi Yesu, bu kayena bwedi kafwila, wuta ti: «Kedika, muntu bewuwu Mwana Nzambi kabedi!» 40 Bakento baba batelama kitatu, bedi talanga. Ha kati dyawu ha ba na Maliya mwisi-Mangadala, Maliya ngudi yi Zaki wuntwenya na yi Yosi, mpe Salomi. 41 Bedi kwe landingi Yesu bu baba ku mbanza yi Ngalili mu kwe musadisi. Mpe na bakento babingi bahiika batomboka nandi ku mbanza Yelusalemi.

42 Nkokila yitula, kiba kilumbu ki bedi kubikanga mukembo, mpila mosi ti tekila kilumbu ki saba kitula. 43 Yosefi mwisi-Alimate wuyiza, mpe wuba kinama ki mfunu ha kati di kabu di zinkuluntu zi Bayudayo, na wedi kingilanga nyizulu yi Kimfumu ki Nzambi. Wuyenda yenikina Pilatu mu kibakala mu mulomba nitu yi Yesu. 44 Pilatu wuyituku bu kayuwa ti fwidingi. Wulomba batumisa mfumu yi zimbulu-mbulu nkama (100) mu mufuula, tala ti Yesu ntama kafwidingi. 45 Bu kamana yuwa mpolo ku mfumu yi zimbulu-mbulu nkama (100), wuhaana luve ku Yosefi mu bonga nitu yi Yesu. 46 Yosefi wusumba mulele wu lino, wukulumuna Yesu ha kulunsi, wuzinga yo mulele wu lino na wutuula yo mu ndyamu yitobolo mu tadi. Mboki wunengomona tadi didinene mu kanga nkotolo yi ndyamu. 47 Maliya mwisi-Mangadala na Maliya ngudi yi Yosi bedi talanga huuma ha bedi tuula nitu andi.