1 Yesu wutona dyaka mu longa ha kumu di dyanga. Mpumbu yi bantu yiyiza kutakana ha kabela. Yiba nkatika yiyingi ni kayenda kota mu mulungu na wuzakala. Mpe mpumbu yimvimba yi bantu yiba ha kumu di dyanga 2 Wedi balonga misamu mimingi mu bingana na mundongosolo andi wedi bateelanga ti: 3 «Yuweeno! Kisadi kimfuba kiyenda mu kwe mwanga nswanga. 4 Bu kedi kwe mwangi nswanga, ndambu yi nswanga yibwa ha sambu di nzila: banuni bayiza na badya yo. 5 Ndambu yihiika yibwa ha butoto buu na matadi na butoto buba bubwingi ko. Nswanga yi tumbu mena, mu dyambu ti butoto buba bubwingi ko. 6 Kansi mwini bu wuteka, wuyoka na wuyumisa yo mu dyambu ti yiba na myanzi ko. 7 Na ndambu yihiika yibwa ha kati di bititi binsende. Bititi binsende bikula na bifyetikisa yo na yibuta nakani mbutu ko. 8 Kansi zihiika zibwa ha butoto bumbote, mwa miti mimena, mikula mpe mibuta mbutu mu bikanka: kimosi makumatatu (30) ma mbutu, kihiika makumasambanu (60) na kihiika dyaka nkama (100).» 9 Na Yesu wuta ti: «Wonso wuu na makutu mu yuwa, bika kayuwa!»

10 Mukangu bu wuyenda, yobobo bazungidila Yesu na milongoki kumi na myole bamufuula mu dyambu di kingana bekyokyo. 11 Wubavutudila ti: «Yeno baluhaana luve mu zaba mansweki ma kimfumu ki mazulu, kansi yawu baa ku mbazi bafweti bateela myo mu bingana, 12 mu dyambu ti

yawu bana tala, kansi bana yena kima ko,

mboki bana yuwa, kansi bana bakula nakani kima kimosi ko.»

Mwanki balembolo vilula madyela, mpe Nzambi kalembolo balemvokila.

13 Mboki Yesu wubateela ti: «Tala ti lubakudi kingana bekiki ko, bwedi lwaabakudila bingana bimvimba bihiika e? 14 Kisadi ki mfuba ni yondowo wuna kwe mwangisi Mambu ma Nzambi. 15 Bantu bahiika baa bonso sambu di nzila di tambudi Mambu ma Nzambi. Bu bayudi mo, Satana wizidi na wubakatudi Mambu ma Nzambi ma bayudi. 16 Bantu bahiika baa bonso butoto bu matadi bu tambudi Mambu ma Nzambi: bu bayudi Mambu ma Nzambi, bakwe tumbu tambulanga mo mu kyese. 17 Kansi malendi mena myanzi mu yawu ko, bakwe kwikilanga mu mwa ntangu yifyoti. Mboki, misamu mi mpasi hoti mfyetokoso bu zitudidi mu dyambu di Mambu ma Nzambi, bakwe bwisanga kiminu. 18 Bahiika mpe baa bonso bititi binsende bitambudi Mambu ma Nzambi: bakwe yuwanga Mambu ma Nzambi, 19 kansi nsatu zi nza, mpukumunu yi bimvwama na mpwila zi mumpila mu mpila, bu zikotididi mu yawu, zikwe fyetikisanga Mambu ma Nzambi na malendi buta mimbutu mu yawu ko. 20 Bahiika dyaka baa bonso butoto bumbote butambudi Mambu ma Nzambi: bakwe yuwanga Mambu ma Nzambi, bakwe tambulanga mo mpe makwe butanga mbutu mu bikanka, kimosi makumatatu (30), kihiika makumasambanu (60) na kihiika dyaka nkama (100).»

21 Yesu wubateela dyaka ti: «Nganunu kuu na muntu wulendi twaala mwinda mu tuula wo ku nsye kisiku hoti katuula wo ku nsye mbuka e? Bwedi, ka mu tuula wo ha yulu kikebolo ki mwinda ko e? 22 Mu dyambu ti misamu mimvimba mii miswama myaayenika, mpe mansweki mamvimba maazabakana mu mwini ngemba. 23 Wonso wuu na makutu mu yuwa, bika kayuwa!»

24 Yesu wubateela dyaka ti: «lwengeeno kweno mu misamu mi luna kwe yuwi! Kitezo ki lukwe tezilanga kyakyokyo mpe baalutezila, mpe baalubwesa dyaka kilutidi. 25 Mu dyambu ti baahaana ku yondowo wuu na kima, mbo bamubwesa kihiika, kansi ku yondowo wulembolo ba na kima, mbo bamukatula mpe kima kyo kii nandi.»

26 Yesu wubateela dyaka ti: «Tala nki bifwanakani na Kimfumu ki Nzambi. Kimfumu ki Nzambi kifwanakani na muntu mwengi nswanga mu mfuba andi. 27 Mpimpa na mwini, ni kaba wulambalala hoti ni kaba wutemona, nswanga yamena, mpe yakula yawu bende, kansi kana zaba ko bwedi yina kudila. 28 Butoto bwabende bukwe menisanga mbutu: hantete muti, mboki bikanka, mpe mu bikanka mbutu ziyedidi. 29 Mbutu bu zatumbu yela, babongidi kisalulu ki bakwe hedilanga mbutu, mu dyambu ti ntangu yi ngyonzokolo yifweni.»

30 Yesu wuta dyaka ti: «Na nkye kima twaafwanikisa Kimfumu ki Nzambi e? Na mu nkye kingana twaafwanikisa kyo e? 31 Kifwanakani na nswanga yi muti wu nkumbu mutaade, bu bakunini yo, ni nswanga yivudidi bukeke mu nswanga zimvimba zi ha butoto. 32 Kansi bu bakunini yo, bu yaamena, yaavula bunene na mwa miti mimvimba mi mfuba. Yaaduukisa bintala bivudidi bunene mpe banuni baakwiza tunga mazanza ku nsye mposi andi.» 33 Yesu wusadila bingana bibingi bibobo mu ndongosolo andi. Yandi wusadila bobo bonso buba mpisulu yi yobobo bedi mu yuwanga. 34 Kabazonzila wulembolo sadila bingana ko, kansi bu kedi saalanga na milongoki myandi, wedi babangudilanga myo mimvimba.

35 Mu nkokila yi kilumbu bekyokyo kwandi, Yesu wuteela milongi myandi ti: «Tusabukeeno ku simu dikaka di dyanga.» 36 Bu basala sisa mpumbu yi bantu, milongoki mimunatina mu mulungu wu kaba, na milungu mihiika miba nandi hoho. 37 Mboki kitembo kingolo kikukula mu dyanga, na bipo bimamba byedi bwanga mu mulungu mpe mulungu wutona mu teboka. 38 Kansi Yesu wubwa tolo ku manima ma mulungu na mutu andi wuba ha yulu mfika. Milongoki myandi mimusungika na mimuteela ti: «Mulongisi, tuna saka fwa! Mpe wuna kukwamisa ko e?» 39 Yesu wusungama, wubamina kitembo na wuta ku mamba ma dyanga ti: «Dingama! Huza napii!» Kitembo kidingama na kizunu kikinene kivutuka. 40 Yesu wuta ku milongoki ti: «Nki luna yenina bunkuta e? Bwedi lulembolo beela na kiminu e?» 41 Kansi milongoki miyena bunkuta bubwingi na myedi kifuulasananga yawu na yawu ti: «Muntu bewuwu nani kadi, mwanki kitembo na mamba mpe ma mubu bimutumimina e?»