1 Yesu wubateela ti: «Kedika nina luteela, mwa ndambu bantu mu yobobo ba haha, baakifwila ko tekila bayena kimfumu ki Nzambi kyaakwiza mu lulendo.»

2 Bilumbu bisambanu bihyoka, Yesu wubonga Petelo, Zaki na Yoane na wubanata ha yawu hiika, ha lweka ha yulu mulandu wuwula. Yesu wukituka ha ntadisi awu 3 binkutu byandi bikituka na vekoveko, bitoma ba bimpembe, mpe nakani muntu ha butoto kalendi duukisa mpembe yibobo ko. 4 Mpe Eliya na Mose bayenika ku yawu na ya babole bedi mokana na Yesu. 5 Petelo wuteela Yesu ti: «Mulongisi, bumbote ti tuzakala ha. Tutungeeno zinzo zitatu zi bikapu, yimosi yi yaku, yimosi yi Mose na yimosi yi Eliya.» 6 Kedi zaba ko nki ka ta, mu dyambu ti bayena bunkuta bubwingi. 7 Buna tuti diyiza bafuka ku nsye mposi andi. Mpe ndinga yimosi yiyuwakana ku nsye tuti: «Yandi ewu ni mwana ani wu ntomini tya. Muyuwileeno!» 8 Hansi na nsi, bazungisa meso ha babela, kansi bayena muntu wuhiika ko, Yesu yandi hiika kwandi wuba nawu. 9 Mu ntangu yi bedi kulumuka mulandu, Yesu wubahaana ntumunu eyi: «Lutandi misamu mi luyeni ku muntu ko, natee Mwana Muntu bu kaafuluka mu bafwa.» 10 Bavumina ntumunu beyoyo, mpe yawu na yawu bakifula ti: «Mfulukulu mu bafwa, bangudulu nki e?»

11 Mboki, milongoki mifuula Yesu ti: «Bila nki milongisi mi Misiku mikwe teelanga ti Eliya fweti kwiza ntete e?» 12 Wubavutudila ti: «Eliya fweti kwiza ntete mu sungika misamu mimvimba. Bila nki Masonama mana teela dyaka ti Mwana Muntu, fweti yena mpasi zizingi, mpe bafweti mu bisa e? 13 Kansi meno nina luteela ti: Eliya wuyiza na bamuhidika mi batya mu muhidika. Bonso bu midi misonama mu yandi.»

14 Bu bavutuka ku bela milongoki mihiika, bayena mpumbu yi bantu yi bazungidila na milongisi mi Misiku myedi bindana nawu mpaka. 15 Mpumbu yi bantu bu yitumbu yena Yesu, bapamuka na bayenda mu ntiinu mu kwe muhaana mbote. 16 Yesu wubafuula ti: «Nkye musamu luna bindasana mpaka nawu e?» 17 Muntu wumosi ha kati di mpumbu yi bantu wuvutula ti: «Mulongisi, nikutwadidi mwana ani wu bakala, mu dyambu wuu na mpeve yimbi yikwe mu kitulanga baba. 18 Konso-konso kuma ku yikwe mulwatanga, yikwe mubwisanga ha nsi, mwana wukwe duukisanga mafulu mu munwa, wukwe kwetisanga meno, mpe nitu andi yikwe kangamanga. Ndombidi ku milongoki myaku bakuma yo, kansi balembani kwawu.» 19 Yesu wubateela ti: «Ha! Yi mbandu yilembolo ba na lukwikulu! Ntangu zikwa naaba neeno e? Mpe ntangu zikwa naaluvibidila e? Mutwaleeno ehaha.» 20 Bamutwadila wo. Mwana bu wutumbu yena Yesu, mpeve yimbi yi muningisa mu ngolo, wubwa ha nsi, wuvindumuka na mafulu ma muduuka mu munwa. 21 Yesu wufuula ku tata ti: «Yeka ntangu zikwa misamu bemimi mikwe mutudilanga e?» Tata wuvutula ti: «Tuka bumwana bwandi. 22 Mpeve yimbi yikwe vula mubwisanga ku tiya na mu mamba mu muhonda. Tala ti lendi sa dyambu, tufwila nkenda na tusadisa.» 23 Yesu wumuvutudila ti: «Ebu teedi ti tala ti lendi sa dyambu! Misamu mimvimba mikwe hilamanga ku wonso muntu kwe sanga kiminu.» 24 Hansi na nsi tata di mwana wubulana ti: «Nkwikidi, nsadisa mu dyambu ti nii na kiminu ko!» 25 Yesu wuyena ti mpumbu yi bantu bayiza mu muswalu, buna wubamina mpeve yimbi ti: «Mpeve yimbi yifwa makutu, mpe yi bubaba, nina kutuma duuka mu mwana bewuwu, mpe kubwesandi vutuka mu yandi!» 26 Mpeve yimbi yi bulana, yi ningisa mwana mu ngolo mpe yiduuka. Mwana wukituka bonso muntu wufwa, bantu babingi bata ti: «Fwidi.» 27 Kansi Yesu wumusimba mu kooko, wumutedimisa, mpe mwana wutelama.

28 Yesu bu kavutuka ku nzo, milongoki myandi mimufuula bu baba yawu hiika ti: «Bila nki yeto tulembinini mu kuma mpeve yimbi beyoyo e?» 29 Yesu wubateela ti: «Mpeve yibobo, mu lusambulu kaka yilendi duukila.»

30 Bu bakatuka ha kibuka bekyokyo, bahyokila mu kizunga ki Ngalili, mpe Yesu katya ko ti bantu bazaba. 31 Mu dyambu ti wedi longanga milongoki myandi na wedi bateela ti: «Baayekola Mwana Muntu mu moko ma bantu, baamuhonda, mpe kilumbu kitatu waafuluka mu bafwa.» 32 Kansi milongoki mibakula misamu bemyomyo ko, mpe myedi yena bunkuta mu mufuula.

33 Batula ha mbanza yi Kapenawumi. Bu kaba mu nzo, Yesu wufuula milongoki myandi ti: «Nkye musamu lukwe kwe bindisinini mpaka mu nzila e? 34 Kansi yawu bavutula kani mvutu ko, mu dyambu ti mu nzila babindasana mpaka mu zaba nani ha kati dyawu hyokidi bunene.» 35 Buna Yesu wuzakala, wutumisa milongoki kumi na myole (12) na wubateela ti: «Tala ti muntu tiidi mu ba wuntete, fweti ba wumansukina mu bamvimba, mpe kisadi ki bamvimba.» 36 Buna wubonga mwa mwana wufyoti na wumutuula ha kati dyawu, wumubumba, mpe wubateela ti: 37 «Wonso waatambula mu nkumbu ani wumosi mu baala bafyoti bebaba, meno bende katambudi, mpe yondowo ntambudi, ka meno ko katambudi, kansi tambudi yondowo wumfidisi.»

38 Yoane wuta ti: «Mulongisi, tuyeni muntu wumosi wuna kuma mpeve zimbi mu nkumbu aku, ni tusosidi mu mukanikina mu dyambu ti kana kwe tulandi ko.» 39 Yesu wumuvutudila ti: «Lumukanikinandi ko, mu dyambu ti ka kuu muntu wulendi hidika kimangu mu nkumbu ani, mpe ha manima katumbu zonzila bumbi mu meno. 40 Yondowo wulembolo ba mutantu eto, mukundi eto wudi . 41 Wonso muntu waaluhaana mbungu yi mamba mu nwa mu nkumbu ani, mu dyambu ti luvwihulu ku Klisto, kedika nina luteela, yandi kaahombisa musendo andi ko.»

42 Kansi wonso muntu waabwisa mu masumu wumosi mu baala bebaba bafyoti bakwe kwikilanga mu meno, bumbote ku yandi bamukanga tadi didinene mu nsingu na bamulosa mu mubu. 43 Tala ti kooko kwaku kukwe kubwisanga mu masumu, tabula ko, bumbote ku ngeye mu kota mu luzingu lukedika na kooko kumosi na mu tubu na moko maku ma mamole ku tiya tu mbungulu tukwe lembolo zimanga. [ 44 Kokoko kukwe lembolo fwanga bitatika, mpe tiya tukwe lembolo zimanga.] 45 Tala ti kuulu kwaku kukwe kubwisanga mu masumu, tabula ko, bumbote ku ngeye mu kota mu luzingu lukedika na kuulu kumosi na mu tubu na malu maku ma mamole ku tiya tu mbungulu tukwe lembolo zimanga. [ 46 Kokoko kukwe lembolo fwanga bitatika, mpe tiya tukwe lembolo zimanga.] 47 Tala ti diisu dyaku dikwe kubwisanga mu masumu, katula dyo, bumbote mu kota mu Kimfumu ki mazulu na diisu dimosi na mu tubu na meso ma mamole ku tiya tu mbungulu. 48 Kokoko kukwe lembolo fwanga bitatika, mpe tiya tukwe lembolo zimanga. 49 Mu dyambu ti, kadi muntu waahyokila ku tiya tu mpasi, mpe waayobila mungwa mu ba wuvedila. 50 Mungwa wumbote, kansi tala ti weka na zubulu, bwedi lulendi we vutudila nzenzo e? Beeno na nzenzo yi mungwa mu kati dyeno, mpe beeno mu kiyenge yeno na yeno.