1 Ebu ntiidi mu ta: ntangu zizingi tala ti muntu waabyadila difwa wakidi mwana wufyoti, kaa wuswasana na mundongo ko, mpeleko wudi mfumu yi bima bimvimba, 2 yandi wakidi ku nsye lutumu lu minyundudi na ku minkebi mi difwa natee mu kilumbu ki kubika tata andi. 3 Yeto mpe bumosi, bu tuba ntete baala bafyoti, tuba mindongo mi lulendo lu zimpeve zikwe yaalanga nza. 4 Kansi ntangu bu yilunga, Nzambi wutambika Mwana andi : wubutuka mu mukento, na wuba ku nsye lutumu lu Musiku, 5 mwanki kakuula yobobo baba ku nsye lutumu lu Musiku, na tuba baala ba Nzambi. 6 Mu dyambu ti ludi baala bandi, Nzambi wutambika mu mitima myeto Mpeve yi Mwana andi yina lookana ti: «Aba, Tata!» 7 Ni hahoho, sidi dyaka mundongo ko, kansi mwana. Tala ti mwana wudi, waabyadila mpe difwa di sila Nzambi nsilulu ku baala bandi.

8 Mu ntama, yeno luzaba Nzambi ko na luba mindongo mi binzambi-nzambi bi luvunu. 9 Kansi bwabu luzebi Nzambi, hoti bwabu Nzambi wuluzebi. Bwedi lulendi vutukila lulendo lu zimpeve zikwe yaalanga nza zilembolo ngolo na mfunu e? Lutidi mu ba dyaka mindongo myawu e? 10 Lukwe toma zitisanga bilumbu, ngonda, ntangu, na mimvu! 11 Kadi bunkuta bu nani, mu kisalu kimvimba ki nasedi mu yeno ki ba kwandi kimpamba e?

12 Mpangi zani, nina lubombidila mu ba bonso meno, kadi meno mpe bonso yeno nidi. Lumpidikidi kani musamu wumbi ko. 13 Bambukeeno moyo ti mu dyambu di kimbevo kiba nani, nayiza lusamunina Musamu Wumbote mu nkumbu yintete. 14 Lutoma kikwamisa mu kimbevo bekyokyo, kansi luntyaka ko, na lumbisa ko. Luntambula bonso mbazi yi Nzambi, bonso Yesu-Klisto. 15 Kyese kibedi neeno, kwedi kyenzi e? Mu dyambu ti meno ndendi luteela kimbangi eki: tala ti bulendi ba, yeno lulendi katula meso meno mu mpaana mo! 16 Neka bwabu mbeni eno bu nalutedidi kikedika e? 17 Bantu bebaba bana lonka vema didingi ku yeno, kansi mayindu mawu ma mambote ko. Batiidi mu lukatula ku kwani, mwanki luba na vema ku yawu. 18 Bumbote budi mu ba na vema ntangu zimvimba mu misamu mimbote, kansi ka bu nii kaka kintwadi neeno ko. 19 Baala bani, myangala dyaka nina yena mu dyambu dyeno, bonso mukento bu kakwe banga na misongo mye butila, natee bu lwaaba nkatika bonso Klisto. 20 Ngunda na luzolo yi bedi nani mu ba kintwadi neeno mu ntangu beyiyi, mwanki nasanza nzonzolo ani. Mu dyambu ti nina kikwamisa mu dyambu dyeno!

21 Nteleno eti, yeno lutidi mu ba ku nsye lutumu lu Musiku, lukwe bakulanga ko misamu misonama mu Musiku e? 22 Wusonama ti, Abalahami wubuta baala bole babakala, wumosi na mukento wu mundongo mpe wuhiika na mukento wu kimpwanza*. 23 Mwana wu mundongo wubutuka mu luzolo lu bantu, kansi wu mukento wu kimpwanza wubutuka bonso bubela nsilulu zi Nzambi.

24 Musamu bewuwu wudi bonso kimpa: Bakento ya babole bana lonka luwawanu lu mutindu zole. Lumosi lufuma ha mulandu wu Sinayi na luhaana mbutuka yi mindongo, luna lonka Angali. 25 Angali, ni mulandu wu Sinayi wu ku nsi yi Alabi. Wufwanakani na mbanza Yelusalemi yi ntangu beyiyi, mu dyambu ti mundongo kadi na baala bandi. 26 Kansi Yelusalemi yi mazulu yii kimpwanza, yawu yidi ngudi eto. 27 Kadi wusonama ti:

«Yangalala kwaku, mukento wu kisita, ngeye wulembolo buta!

Duzumuka mu kyese ngeye wulembolo yena mpasi zi misongo mi mbutulu!

Mu dyambu ti mukento wu babwongodi waavula ba na baala

ke na yondowo wu wukwela.»

28 Yeno, luzimpangi zani, yeno mpe baala ba nsilulu ludi bonso Isaaki. 29 Mwana wubutuka mu luzolo lu bantu wukwamisa yondowo wubutuka mu luzolo lu Mpeve. Bwabobo mpe mina bela mu ntangu eto beyiyi. 30 Kansi bwedi wudi wusonama e?

«Kuma mundongo wu

na mwana andi.

Kadi mwana wu mundongo

kalendi byadila fwa

na mwana

wu mukento

wu kimpwanza* ko.»

31 Ni hahoho, zimpangi zani, tudi baala ba mukento wu mundongo ko, kansi ba mukento wu kimpwanza.