1 Mimvu kumi na miya mihyoka, navutuka dyaka ku Yelusalemi na Banabase. Ni nanata mpe Tito. 2 Natomboka kuuna mu dyambu ti Nzambi wu nzabikisa bobo. Mu kimoko kinkutikisa na minanga, nababangudila Musamu Wumbote wu nasamuna ku yobobo balembolo ba Bayudayo. Natya ko ti kisalu kyani kiba kimpamba. 3 Kansi Tito mwisi-Ngeleke wuzyeta naani, bamukwika mu zengoso bu bakala bwandi ko, 4 mpeleko ha kati dyeto haaba na zimpangi zimbi. Zikota mu madyela mu kimvuka kyeto, mwanki ziketa kimpwanza kyeto ki tutambula ku Yesu-Klisto mpe batuvutula mindongo. 5 Kani ntangu yimosi, yeto tubatumimina ko, mwanki kikedika ki Musamu Wumbote kisikila mu yeno. 6 Bantu bebobo mpe baba minanga, naba nawu mfunu ko bonso bu baba, mu dyambu ti Nzambi kaswasikisanga bantu ko. Bantu bebobo bankwika kani musamu wuhiika ko. 7 Kansi yawu bayena ti Nzambi wunsoola mu samuna Musamu Wumbote ku yobobo balembolo ba Bayudayo, bonso bu kasoola Petelo mu samuna wo ku Bayudayo. 8 Kadi yondowo wusa Petelo ntumwa ku Bayudayo, yandowo mpe sidi ti naba ntumwa ku balembolo ba Bayudayo. 9 Zaki, Sefase na Yoane baba bonso makunzi ma dibundu, babakula ti Nzambi wumpana kiyeko bekyokyo. Ni hahoho meno na Banabase batuhaanina mbote yi kooko bonso kidimbu ki kintwadi, mwanki yeto twenda tusadila ku balembolo ba Bayudayo, na yawu benda ku Bayudayo. 10 Batulomba kwandi mu bambukila bamputu moyo, mpe mu vema dimvimba na sadila bobo.

11 Kansi meno nasemba Sefase bu kayiza ku mbanza Antiose, mu misamu mimbi mi kahidika. 12 Mu dyambu ti tekila bantu batambika Zaki batuula, wedi dyanga kintwadi na balembolo ba Bayudayo. Kansi bu batuula, wutatuka na wuyenda ba ha lweka, mu dyambu di bunkuta bu bantu bazengoso bu bakala bwawu. 13 Bayudayo bahiika mpe basadila nandi bobo. Mpe yandi bende Banabase bamuhukumuna mu nsadulu awu yi diisu ku nsye lukaya. 14 Kansi bu nayena ti kedi dyatila bonso budi kikedika ki Musamu Wumbote ko, ni nateela Sefase ha ntadisi yi bantu bamvimba ti: «Ngeye wudi Muyudayo, tala ti wuna dyatila bonso yobobo balembolo ba Bayudayo, kansi ka bonso ba Bayudayo ko. Buna bwedi lenda kwika balembolo ba Bayudayo badyatila bonso Bayudayo e?»

15 Yeto Bayudayo bambutuka tudi, mpe tudi minsumuki mi nsi zihiika ko. 16 Kansi tuzebi ti muntu kakwe nungusungu ko mu dyambu ti wuna vumina Misiku, kansi mu dyambu di kiminu kyandi mu Yesu-Klisto. Ni hahoho, yeto mpe tusiidi kiminu kyeto mu Yesu-Klisto, mwanki tunungusu mu kiminu ki Yesu, kansi ka mu tumimina Misiku ko. 17 Kansi tumana sosa ti tuba balunungu mu dyambu di Klisto, yeto bende mpe tuna yenika minsumuki, buna bwaayenika ti Klisto mundongo wu masumu kadi e? Kaani, ka bobo ko! 18 Tala ti, ntungidi dyaka Misiku mi na bisidi, meno bende nina yenika kisafudi ki Misiku. 19 Mu dyambu ti ni Misiku misidi ti na ba bonso muntu wufwa, mwanki nazinga mu Nzambi. Mpe bankomini ha kulunsi ha kimosi na Klisto, 20 ka meno ko nina zinga, kansi ni Klisto wuna zinga mu meno. Kizingu kyani ki kinsuni, nina zinga kyo mu kiminu mu Mwana Nzambi wuntiidi na wuheeni luzingu lwandi mu dyambu dyani. 21 Mbisidi mulemvo wu Nzambi ko, kansi, tala ti mu Misiku tukwe bakilanga lunungu, buna mu mpamba Klisto kafwila.