1 Klisto wutukuula, mwanki tuba nkatika bantu ba kimpwanza. Ni hahoho, syameno, na lutambulandi ko ti babwesa lukanga mu kihangu ki kinanga.

2 Yuweno! Meno Pawuli nalutedidi ti: tala ti luzengoso bubakala, Klisto kaabwesa ba mfunu ku yeno ko. 3 Nalutedidi dyaka ti wonso muntu wa zengoso bubakala, fweti vumina Musiku wumvimba. 4 Yeno lukwe sosanga mu ba bantu ba ludedomo mu vumina Musiku. Bu luna sadila bobo, luna ba kitatu na Klisto. Mpe mulemvo wu Nzambi wusidi neeno ko. 5 Yeto, mu kiminu na mu lulendo lu Mpeve Yilongo, tuna kingila Nzambi katusa bantu ba lunungu. Bwabobo buu kivuvu kyeto. 6 Kadi, ku yobobo baa bakangama mu Yesu-Klisto, kuzengoso bubakala na kulembolo bwe zengoso ku mfunu ko. Kansi dyambu di mfunu, ni kiminu ki tukwe lonkanga mu nzolasani.

7 Lutona mu noka ntiinu bumbote. Kansi nani wulukakididi mu tumimina kikedika e? 8 Ndongosolo beyoyo yimbi, yi fumini ku yondowo wu lutumisi ko. 9 Bonso bu bakwe tanga ti: «Mwa kima kikwe vimbisanga kiputi kivimbisi kiputi kimvimba ki mampa.» 10 Kivuvu ki nani mu Mfumu ti, mu myo mi lutadidi, luna yindula buhiika ko na meno. Kansi ku yondowo wu lutwadidi mvwanzi, ni kaba nani, waatambula kitumbu ki Nzambi.

11 Mpangi zani, mu myo mintadidi, tala ti bwabu nina tatamana mu longa nzengosolo yi bubakala, bila nki bana nzomina e? Tala ti bwabobo, nsamununu yi nkomono yi Klisto ha kulunsi yi lendi bwesa kwamisa muntu ko. 12 Bika bahokola yobobo bana sa mvwanzi ha kati dyeno!

13 Mpangi zani, balutumisa mu zinga mu kimpwanza. Kansi lu kitulandi kimpwanza bekyokyo kiba mpengomokono ku yeno mu sadila nsatu zeno zi kinsuni. Kansi lufweti twalasana yeno na yeno mu kati di zola. 14 Mu dyambu ti Musiku wu Mose wu kangamani mu Musiku wakwa wumosi ewu: «Zola mfinangani aku bonso nge bende.» 15 Kansi tala ti luna kwe kazasani mpe luna kwe sasasani yeno na yeno bonso bibulu, kebeno kweno: nganunu lwaahondasana yeno na yeno.

16 Misamu emi ntiidi mu luteela: dyatileeno mu ki Mpeve na nkatika luna hidika nsatu zi kinsuni ko. 17 Mu dyambu ti nsatu zi kinsuni zi bonso nsatu zi ki Mpeve ko, mpe nsatu zi ki Mpeve zi bonso nsatu zi kinsuni ko. Na zikwe nwanasananga yawu na yawu, mu dyambu ti lulendi hidika misamu mi lutiidi ko. 18 Ni hahoho, tala ti Mpeve Yilongo yina lutwadisa, buna lwaaba ku nsye lutumu lu Misiku ko.

19 Tutomini zaba kwedi nsatu zi kinsuni zikwe natanga: ku kindumba, ku busafu na ku misamu mi nsoni, 20 kusambila biteki*, ku kindoki, ku nkindu, ku mayuma, ku kimpala, ku mfiti, ku kitantu, ku nkabani na ku kabu di hambukidi mu dibundu, 21 ku nzinunu, ku kinduvu, ku kindyafu, na ku misamu mihiika mifwanakani. Nina lulwengisa bwabu bonso bu nateka bwe sa: yobobo bana mbelo beyoyo balendi kota mu Kimfumu ki Nzambi ko.

22 Kansi mbutu yi Mpeve Yilongo, ni zola, kyese, kiyenge, mvibudulu, nsalasani, mambote, kiminu, 23 lembami na kukiyaala. Musiku wukanikini misamu bemimi ko. 24 Yobobo baa mu Yesu-Klisto bakomini kinsuni kyawu ha kimosi na nsatu mpe na nzinunu zawu ha kulunsi. 25 Tala ti mu Mpeve tudi bamoyo, bika tu dyatila mu Mpeve. 26 Tubandi bantu bakwe kitumpidikanga ko, tusosandi nyungu ko, mpe tuzininandi baneto ko.