1 Mpangi zani, tala ti lu batikisi muntu wuna hidika musamu wumbi, yeno luna Mpeve yi Nzambi, lufweti muvutula mu lembami mu nzila yi sungama. Kansi kikeba nge bende, mwanki wulembolo kota mu ntontolo. 2 Natasaneeno bizitu yeno na yeno, ni bwabobo lwaalungisila Musiku wu Klisto. 3 Tala ti muntu wuna banzila ti mfunu kadi, mpeleko yandi muntu wumpamba kwandi wudi, wuna kihuna yandi bende. 4 Konso muntu ka fyongonina nkandulu andi, tala ti yilendi muyenisa kyese, kayena kyese mu dyambu di yandi bende. Kansi ka kifwanikisandi na wuhiika ko. 5 Mu dyambu ti kadi muntu kaanata kizitu kyandi.

6 Muntu bewowo wu bana longa Mambu ma Nzambi, kahaana mwa ndambu yi bimvwama byandi ku yondowo wuna mulonga.

7 Luhunukandi ko: basakininanga Nzambi ko. Kyonso kima ki kunini muntu, kyakyokyo mpe kaayonzika. 8 Tala ti muntu kunini mu yangidika nsuni andi, ni lufwa. Kansi yondowo waakuna mu yangidika Mpeve Yilongo waabaka luzingu lu mimvu ka mimvu mu Mpeve Yilongo. 9 Tubiikandi mu hidika misamu mimbote ko, mu dyambu ti byaatwayonzika mu ntangu yifwanakani, tala ti tubebidi ko. 10 Ni hahoho, bu tubeki hwahwa, tuhidikeeno misamu mimbote ku bantu bamvimba, sungula ku zimpangi zeto batudi kiminu kimosi.

11 Taleno nkye mutindu nsonikini meno bende mu kooko kwani bisono bebibi bi binene. 12 Bamvimba bebobo batidi mu kiyenikisa ha meso ma bantu, baalutuma lu zengoso bubakala, mwanki yawu bende balembolo kwamusu mu dyambu di kulunsi difwila Klisto. 13 Kadi yobobo bazengoso bubakala, yawu bende mpe bakwe vuminanga Musiku ko, kansi batidi ti luzengoso bubakala, mwanki bakizangula mu kidimbu bekyokyo ki balusidi mu nitu eno. 14 Mu meno, ndendi kizangula kaka mu dyambu di kulunsi difwila Mfumu eto Yesu-Klisto. Mpe mu dyambu di kulunsi andi, nza ku meno yifwa yidi, na meno mpe wufwa nidi mu dyambu di nza. 15 Ni hahoho, ni wuzengoso bubakala, ni wulembolo bwe zengoso, bu mfunu ko. Dyambu di mfunu, ni kubutuka mbutuka yimoona.* 16 Bika kiyenge na nkenda yiba ku bamvimba baalanda Musiku bewuwu na ku mukangu wumvimba wu Nzambi!

17 Tuka ntangu beyiyi, kani muntu kankwamisandi dyaka ko, kadi mu nitu ani nina bifu bimputa na myangala mu dyambu di Yesu.

18 Mpangi zani! Bika Mfumu eto Yesu-KListo kalusakumuna! Ameni.