1 O Ngalatiya! Nkye buhulu bobo, nani wulusingidi e? Batoma lulonka Yesu-Klisto wukomo ha kulunsi. 2 Ntiidi ti lumpaana mvutu mu kyuhu bekiki: Lutambula Mpeve Yilongo mu dyambu ti luvumina Musiku, hoti bu luyuwa Musamu Wumbote e? 3 Bwedi lulendi bela na buhulu bubobobo e? Yeno lutonini mu Mpeve, bwabu lutidi mu sukina mu kinsuni e? 4 Mimvimba mi luhidika miba kwandi mimpamba e? Milendi ba mimpamba ko. 5 Nzambi kwe luhaananga Mpeve Yilongo, mpe kwe sanga bimangu ha kati dyeno, nga kwe hidikanga myo mu dyambu ti lukwe vuminanga Musiku, hoti lukwe yuwanga na lukwe kwikilanga Musamu Wumbote e? 6 Ni bwabobo mpe mu Abalahami: «Wukwikila mu Nzambi, na Nzambi wumubongila bonso muntu wu lunungu.» 7 Zabeeno ti yobobo baa kiminu, yawu badi baala ba Abalahami. 8 Masonama mana tuteela ti Nzambi waanungisa yobobo balembolo ba Bayudayo, mu dyambu di kiminu kyawu. Ni hahoho kateka teela Musamu bewowo Wumbote ku Abalahami ti: «Mu dyambu dyaku makanda mamvimba ma ha butoto maasakumunu.» 9 Yobobo bakwikidi, basakumunu ha kimosi na Abalahami muntu wu lukwikulu. 10 Bamvimba bakwe tumiminanga Musiku badi ku nsye nsingulu, mu dyambu wusonama ti: «Wonso walembolo tatamana mu sadila misamu mimvimba bemyomyo misonama mu buuku di Musiku, waabaka nsingulu.» 11 Mboki kunaani muntu wulendi ba wulunungu ha ntadisi yi Nzambi bu kavumini Musiku, kadi wusonama ti: «Muntu wulunungu waazinga mu dyambu di kiminu kyandi.» 12 Tuzebi ti Musiku wufwanakani na kiminu ko, mu dyambu ti wusonama ti: «Wonso waasadila Musiku, waazinga mu Musiku bewowo.» 13 Klisto wutukuula mu nsingulu yi Musiku, bu katambula mu ba nsingulu mu dyambu dyeto, bonso bu wusonama ti: «Wonso muntu wu baledika ha muti, kasingu.» 14 Ni bwabobo, lusakumunu lu Abalahami mu Yesu-Klisto lutula mpe ku balembolo ba Bayudayo, mwanki tutambula mu kiminu, Mpeve yi kasila nsilulu.

15 Mpangi zani, kifwani naabonga mu luzingu lu bantu: tala ti muntu sisidi mukanda wufwa, kunaani muntu lenda katula hoti lenda bwesa kima momo. 16 Ku Abalahami na nkuna andi basila nsilulu. Masonama mata ko ti: «na ku zinkuna zandi», yeka bonso ti bantu babingi, kansi ku muntu wumosi kaka: «na nkuna aku», mpila mosi ti, Klisto. 17 Ebu ntiidi muta: Nzambi wusa bonso bufwanakani mukanda wu fwa. Ka Misiku miyiza ku manima ma mimvu nkama ya na makumatatu mya katula wo ko, mpe myasa ti nsilulu yi Nzambi yikituka kima ki mpamba. 18 Tala ti ni mu Musiku tukwe tambudilanga fwa, buna tukwe tambudilanga dyo mu nzila yi nsilulu ko. Kansi tuzebi ti ni mu nsilulu Nzambi kalonkila bumbote bwandi ku Abalahami. 19 Mfunu yi Musiku ni nkye e? Babwesa Musiku mu lonka mavanga malembolo fwanakana na luzolo lu Nzambi, natee nyizulu yi nkuna yi Abalahami yi kasiila nsilulu. Bambazi bazabikisa Musiku bewowo mu nzila yi nzonzi yimosi. 20 Kansi nzonzi kasanga kinzonzi ko tala ti ndambu yimosi kwandi yidi, mu dyambu ti Nzambi yandi hika wudi.

21 Nganunu Musiku wulendi kakidila nsilulu zi Nzambi e? Kaani! Tala ti Musiku wuhaanu mu baka luzingu, nganunu ni mu Musiku mu fuma lunungu. 22 Kansi Masonama malonkidi ti nza yimvimba yi ku nsye kinanga ki masumu, mwanki minkwikidi mitambula nsilulu yiba sila Nzambi mu dyambu di kiminu kyawu mu Yesu-Klisto.

23 Tekila kiminu kiba, tuba ku nsye kinanga ki Musiku, mwanki kiminu ki zabakana. 24 Ni hahoho, kiminu kiyiza ba munkengi eto natee nyizulu yi Klisto, mwanki tuba basungama mu kiminu. 25 Bwabu kiminu bu kizi ba, tusidi dyaka ku nsye luyalu lu munkengi bewuwu ko. 26 Buna yeno bamvimba lweka baala ba Nzambi mu kiminu mu Yesu-Klisto. 27 Mu dyambu ti yeno bamvimba lutambula mbotokolo mu Klisto, lulweti Klisto. 28 Ni hahoho, kusidi Muyudayo na Mungeleke ko, kusidi nkole na muntu wukimpwanza ko, kusidi bakala na mukento ko, mu dyambu ti yeno bamvimba lweka muntu wumosi mu Yesu-Klisto. 29 Tala ti luvwihulu ku Klisto, yeno ludi mu nkuna yi Abalahami, na luna ba yobobo baabyadila difwa di kamusila nsilulu.