Reino dos céus

रेटल्या खोजानाआ काईं

44 "होरगाआ राज एखा खेतोमेहें रेटल्या खोजानाआ होस होय. जो एखा माहुंहूं जोड़्यो आन तिये तो रेटी देदो, आन खुसीमेहें जात कोइत तियापोअ ओतो-नोतो तो आखो वेसी देदो आन तिया खेतोहो वेसातो लेत लेदो."

मोगला मोतीइ काईं

45 "फाशोअ, होरगाआ राज एका वेपारीइ माहुंउं होस होये, जो हाजा मोतीही होदतुतो. 46 जाहां तियाहा खुब किमती मोती जोड़्यू, ताहां तिये जात कोइत तिया पोअ ओतो तेतो आखो वेसी देदो आन तिया मोतीही वेसातु लेत लेदू."

रायीइ दाणाअ काईं

31 ईसु तियांहां फाश्यीइ एक काईं कोयी: "होरगाआ राज रायीइ दाणाआं होस होय, तों एखा माहुंउं होस जों लेत जात कोइत तियाहा खेतोमेहें ओइ देदू. 32 तो आखा दाणामेहें रोत हानू होय, पोन जाहां वोडो ओत जाहे, तो बिहीरा आखापोअ रोत वोडो साड़ बोणीत जाहे, ताहां जुगोमेर्‍येए सिड़े आवित तियाआ डालीपोअ पांजरु बोणावतेहे."

खमीरोअ काईं

33 ईसु तियांहां फाश्यी एक काईं कोयी: "होरगाआ राज खमीरोअ* होस होय, जियाहा एकी बोईं लेत जात कोइत तीन तागारी लोटोमेहें सान्बी देदू, आन रोता रोता तो आखु लोट खमीर वालू ओत गोयू."

रानठ्या बियाराआ काईं

24 ईसु तियांहां फाश्यी एक काईं कोयी: "होरगाआ राज✝ तिया माहुंउं होस होय, जिये तियाआ खेतोमेहें हाजू बियारु ओअयू. 25 पोन जेहलामेहें माअहें हुवतेते, ताहां तियाआ दुस्मोन आवित गोंवोंमेहें रानठ्यू बियारु पेइ देत जातु रोयू. 26 जाहां हुका निहीया आन जाहां निहींवे वोल्ये, ताहां रानठ्या बियाराआ खोड़ बी देखाअये. 27 ताहां कोअ धण्योअ पावरों आवित तियाहा कोयो, ‘मालिख, तुमे ताआ खेतोमेहें हाजू बियारु नाहां ओअयू के? ताहां रानठ्या बियाराआ खोड़ तियामेहें का रोत आयो?’ 28 तिये तियांहां कोयो, ‘ओं एखा दुस्मोनोअ काम होये.’ पावरों तियाहा कोयो के, ‘ताआ इश्शा होय के आमू जात कोइत तों उफड़ीत टाको?’ 29 तिये कोयो, ‘नाहां, एहलोहो ने ओवुहूं जोवे के, रानठ्या बियाराआ खोड़ उफड़ाहा, तेहेलाम तुमू तियांअरी गोंवें बी उफड़ीत लेहा. 30 वाडे ताअहूं जाआं बेनुहूं आरीज वोडे ओवुहूं द्या, आन वाडीइलोअ वेले आंय वाडनाराहां कोहीं के पेल रानठ्या बियाराआ खोड़ टोलू वालित पेटाड़ीलोअ काजे तियांआं पुला बांदी द्या, आन गोंवें माआं मोठीमेहें पोआ.’"

ईसु रानठ्या बियाराआ काईं फोड़ कोइत आपेहे

36 ताहां ईसु गर्दीही सोड़ीत कोअमेहें आवयू, आन तियाआ सेला तियाआ जागे आवित कोयो, "खेतोमेर्‍याआ रानठ्या बियाराआ काईं समजाड़ी दे."

37 ईसु तियांहां उत्तर आप्यो, "हाजा बियाराआ ओअनारु माहुंउं बेटुह्हू होय. 38 खेत कांय ए दुन्या होय, हाजू बियारु कांय देवोअ राज्याआ माअहें होय, आन रानठ्यू बियारु कांय पुतोअ माअहें होय. 39 जिये दुस्मोने तो बियारु ओअयू, तो कांय सैतान होय; वाडीइलोअ वेल का दुन्याआं आखरी होय, आन वाडनारा कांय देवदुत होय. 40 ताहां जेहें कोइत रानठ्या खोड़ोअ बियारु टोलू वालित पेटाड़तेहे तेहेंज कोइत दुन्याआ सेवट ओवे. 41 माहुंउं बेटुह्हू तियाआ देवदुतोंहों मोकले, आन ते तियाआ राजोमेहें जे पाप कोआड़तेहे आन खाराब कामें कोअनाराहां एकठे कोए. 42 आन तियांहां आगीइ दोर्‍यामेहें टाके, जिहीं रोड़ीइलोअ आन दात कोकराविलोअ रोय. 43 तिये वेले देवोअ माअहें तियांआं आब्हाआ राजोमेहें दिहोअ होस सोमके. जियाअ कान होय तो उनाइत लेय.

जालेए काईं

47 "फाश्योअ, होरगाआ राज तियी वोडी जालेए होस होये, जे दोर्‍यामेहें टाक्यी, आन आखी जातीइ मासे हारकीत लेतायी. 48 आन जाहां जाल पोआत गोयी, ताहां मासारा ते जाल मेरे काड्यी, आन बोहीत हाजे-हाजे मासे बोअनामेहें एकठे कोअये, आन बिगर कामोअ ते टाकी देदे. 49 दुन्याआं आखरीमेहें एहेंज कोइत ओवे. होरगाआ दुत आवित पाप्योहों धर्मी रोत अलग कोए. 50 आन तियांहां आगीइ दोर्‍यामेहें टाके जिहीं रोड़ीइलो आन दात कोकराविलोअ रोय."

आशिर्वादोअ वसन

3 "‘जें आत्मामेहें गरीब होय, तियांआं हाजो होय,

काहाके होरगाआ राज तियांआंज होय;

4 जें तारास कोअतेहे, तियांआं हाजो होय,

काहाके तियांहां होक जोड़े;✝

5 जें नम्र तियांआं हाजो होय,

काहाके तें धरतीइ आधिकारी बोणे;

6 जें सतीपणोअ काजे फुकल्ये आन तोरह्ये होय तियांआं हाजो होय,

काहाके देव तियांहां तारवे!✝

7 जें दयालू तियांआं हाजो होय,

काहाके तियांपोअ दया ओवे!

8 जें मोनोमेहें सोके होय, तियांआं हाजो होय,

काहाके तें देवोहो देखे;✝

9 जें होमजाड़ीलाआ काम कोअतेहे, तियांआं हाजो होय,

काहाके तियांहां देवोअ पोर्‍ये कोये.

10 सतीपणोअ काजे जियांहां तारास ओवू, तियांआं हाजो होय.

काहाके होरगाआ राज तियांआंज होय;’

11 "जाहां माआं काजे माअहें तुमाआं विरुद्धामेहें गोगे, तारास देय आन तुमाआं विरुद्धामेहें आखी जातीइ खाराब लबाड़ी कोइत गोगे, ताहां तुमाआं हाजो होय. 12 मोज्या कोआ, खुसीवाअहीं उसला, होरगामेहें तुमाआं इलाम वोडू होय; काहाके तुमा रोत पेल जे भविश्यवक्ता ओत गोया, तियांहां तियां एहेंज कोइत दुख वेठाड़्यो.✝

होरगाआ राजोमेहें वोडो कोडो

1 ✝ताहां सेला ईसुउ जागे आवित फुसा वोल्या, "होरगाआ राजोमेहें वोडो कोडो होय?"

2 ताहां ईसु एका हाना पोर्‍याहा आहने हादीत तियांआं विसमेहें उबो कोअयो, 3 ✝आन कोयो, "आंय तुमुहूं खोरो कोहो, के जाअहूं जाआं तुमू ने बोदलाअहा आन हाना पोर्‍याआ होस ने बोणहां, ताअहूं जाआं तुमू होरगाआ राजोमेहें नाहां जात सेकता. 4 जो कोडो सोताहा या पोर्‍याआ होस हानो बोणावे, तो होरगाआ राजोमेहें वोडो बोणे.

14 ईसु कोयो, "पोर्‍याहां माआं जागे आवुहूं देवा, आन तियांहां रुकाहा मा, काहाके के होरगाआ राज यांआं होसर्‍याआंज होये."

23 ताहां ईसु तियाआ सेलाहां कोयो, "आंय तुमुहूं खोरो कोहो के मालदारोअ होरगाआ राजोमेहें जाअलोअ जाअखो कठीण होय. 24 तुमुहूं फाशुउ कोहो के, देवोअ राजोमेहें मालदार जाय तेतोहो जी हुयीइ नाकोम रोत उटड़ो सोरकीत जाय तों जाआं सोपो होये."

25 ओं उनाइत सेला खुब बोगलात गोया. तियां फुशो, "ताहां कोडाआ तारण ओवे?"

26 ईसु तियांअहें पालीत कोयो, "माअहूं वाअहीं ते ओं नाहां ओत सेकतो, पोन देवोअ काजे आखो ओत सेकेहे."

5 माआं मेराला पाव्हीइला, उनाआ! जें गरीब होये तियांहां विश्वासोम कुन्बी ओवे तेहें काजे आन तियापोअ मेर कोअनाराहां तियाआ राजोअ वारिस ओवे तेहें देवे नाहां निवड़्ये के?

18 पोन वोडाम वोडा देवोअ सोका माअहुंहूं राज्य जोड़े, आन तें हादाफल्येए आधिकारी बोणित जाय.’"

आंय तुमुहूं केदिहींज नाहां ओलखीइतू

21 "जों माहूं ‘प्रभु, प्रभु’ एहें कोहे, तों हारेक माहुंउं होरगाआ राजोमेहें जायजे एहेलोहो कायनाहां, पोन जों कोडो माआं होरगामेर्‍याआ आब्हाआ मोर्जीइ पुरमाणे सालेहे तोज जाये.

19 तिहीं वाअहीं जों कोडो या वाहीं एवडा आदेशोमेहें रोत एकदू काडीत टाके आन तेहेंज कोइत माअहुंहूं सिकाड़े, तों होरगाआ राजोमेहें जाअखो हानो गोणाय; पोन जों कोडो तियाहा माने आन सिकाड़े, तों होरगाआ राजोमेहें वोडो गोणाय. 20 आंय तुमुहूं कोहो, कायदाआ सिकाड़नारा मास्तर आन फरिसी यांआं सतीपणो रोत तुमाआं सतीपण वादार ओया सिवाय तुमू होरगाआ राजोमेहें ने जात सेकनारा.

9 "तिहीं वाअहीं तुमू एहें कोइत प्रार्थना कोआ:

"‘ओ आमाआं होरगामेर्‍याआ बा,

ताआ नाव सोको मानाअहूं जोवे.

10 ताआ राज आवुहूं जोवे. जेहें कोइत होरगामेहें तेहें कोइत धरती पोअ बी

ताआ ईश्शाआ परमाणे ओवुहूं जोवे.

बाप्तिस्मा कोअनारु योहान आन तियाआ बाशण

1 तियां दिहोमेहें बाप्तिस्मा आपनारु✝ योहान यहुदीयाआ जंगलोमेहें आवित एहेलुहू परसार कोउ वोल्यू के, 2 "तुमाआं पापोहो सोड़ीत मोन फिरवा!" "काहाके होरगाआ राज✝ आहने आवित लागोहो."

17 तेहेलाम रोत ईसु संदेश कोनु वोल्यू के, "तुमाआं पापोअहें रोत फिरा, काहाके होरगाआ राज आहने आयोहो!"

7 आन जाता जाता ओं परसार कोअताज जाजा के, ‘होरगाआ राज आहने आयोहो!’✝

11 फाशुउ आंय तुमुहूं कोहो के, दिही उगताआ वोगेहे आन दिही बुड्ताआ वोगेहे रोत जाअखीलेहे जोएं आवे, आन होरगाआ राजोमेहें अब्राहाम, इसाहाक, आन याकोबोअ पांगातीम बोहे.

11 आंय तुमुहूं नक्की कोहो, के जें बोईंप रोत उब्ज्येहे तियांम रोत कोडोज बाप्तिस्मा वाला योहानो रोत वोडो कायनाहां ओवो; पोन जो होरगाआ राजोमेहें हानाम रोत हानू होये, तो योहानो रोत वोडू होये. 12 बाप्तिस्मा कोअनारा योहानोअ दिहोमेहें परसार ओवुहूं तोयोंअ रोत ओमें जाआं होरगा राजोमेहें माअहें जोर देत फोहतेहे, आन जोरावार तियाहा बुउसीत लेताहा.

28 तियाहा काजे आपुहूं एहेलोहो टिकनारो राज जोड़ेहे जो आलीत नाहां सेकतो, आवा, आपू देवोअ धन्यवाद कोअहूं, आन आदरमान, भक्तिभावो वाअहीं तियाहा गोमे एहेलिही आराधना कोअहूं; 29 काहाके आपाआ देव खाँआन खाँआं वालीत टाकनारी आग होय.*

10 तियाहाकोत माआं पाव्हीइला, तुमाआं बाप्तिमेऱ्यीइ देवोअ निवड़ आन देवोअ पसंती पाक्की कोइलोअ काजे खास कोशित कोआ. जर एहें कोअहा ताहां तुमू विश्वासोम रोत केदिहीं ने सुटहा. 11 आन तेहेंज कोइत आपाअ प्रभु आन तारनारु ईसु ख्रिस्त याआ जलमजुग्याआ राजोमेहें पुरा हक्का वाअहीं तुमू फोहीत सेकाहा.

18 आन प्रभु माहूं हारेक खाराब कामोम रोत वासाड़े, आन होरगाआ राजोमेहें हाजीहुतायी पोताड़े. तियाआज महिमा सादाजलम ओवती रोअहूं जोवे. आमेन.

होरगाअ मालधन

32 "ए हाना गोवारा बिही मा, काहाके तुमुहूं होरगाआ राज्य आपिइलोअ तुमाआं आब्हाहा गोम्योहो.

5 काहाके तुमू ओं जांअतेहे के सिनालो, खाराब कामे कोअनारे, लालसी मांअहें, ओं मुर्तीपुजाआ होस होय. एहलेहे माहें ख्रिस्ताआ आन देवोअ राजोअ वारसदार नाहां ओवनारे.