Daniel 7

दानियेलोअ दर्शन

शार जनवारे

1 बाबेलोअ बेलशस्सर राजाआ पेलठा वोरह्योम, दानियेले आथरुपोअ लोटलोटू होपनो पाल्यो. ताहां तिये तों होपनो लेख्यो, आन तियाहा फोड़ीत कोइत कोत बी देखाड़्यो. 2 दानियेले ओं कोयो,

"आंय राती ओं होपनो पाल्यो के वोडा दोर्‍यामेहें शारु वोल वादुउ सालू वोल्यु. 3 ताहां दोर्‍याम रोत शार वोडे वोडे जनवारे निहींत आवत्ले देखाअये, तें आखे जुदे जुदेज ओते. 4 पेलठो जनवार सिहांआ होस ओतो आन तियाआ फाके मोरागाआ होसर्‍येए ओते. माआं देखता देखता तियाआ फाकाआ फिसे उफड़ीत टाकाअये आन तों पुयींपोअ रोत आखलात गोयो, माहुंउं होस बेन गुडापोअ उबो रोत गोयो; आन मोनवीइ मोन तियाहा जोड़्यो."

5 "फाश्योअ मी एका जनवारोहो देख्यो, जों आसालाआ होस ओतो, आन तों फासल्याआ गुडापोअ उबो रोत रोयोतो, आन तियाआ सोबीम दातोअ विसमेहें तिन आडे ओते; आन माहें तियाहा कोतेते, ‘उठीत कोइत जाअखीलोहो माहां खा.’"

6 "तिहींइं फासाड़ी माहूं फाश्योअ एक बिलाड़्यावागोअ होसऱ्योअ जनवार देखाअयो. जियाआ टुंगोपोअ सिड़ाआ होस शार फाके होय; आन तिया जनवारोअ शार मुन्के ओते; आन तियाहा आधिकार जोड़्यू.

7 "तिहींइं फासाड़ी फाश्योअ आंय होपनाम देख्यो, के एक शोवथो जनवार होय, जों जुदो ताकतवालो आन बिवाड़े एहेलोहो आन जाअखीलोहो जोराखो होय; आन तियाआ वोड्डा-वोड्डाहा लोड़ाआ दात होय; तों आक्खो खात लेहे आन सुउवुन-सुउवुउ कोअहे, आन जों टोलीत जाहे, तियाहा गुडावाअहीं खुंदरीत टाकेहे. तों आखा पेल्लाआ जनवारो रोत आलाग होय; आन तियाआ दोहो हिंगे होय. 8 आंय तियां हिंगोहो दिहान लागाड़ीत पालतुतो, ताहां की देख्यो के तियांआं विसमेहें एक फाशोअ हान्नोहों हिंग उगो, आन तियाआ सेक्तीवाअहीं तियां पेल्लाआ हिंगोम रोत तिन हिंगे उफड़ीत टाक्ये; फाशोअ आंय देख्यो के या हिंगोम माहुंउं होसर्‍याआ डोआ, आन वोडी वोडी गोठी सोड़नारी सोब होय."

हादाजलम रोनाराआ दर्शन

9 "आंय पालता-पालताम आखरीपोअ की देख्यो, के राजगादी मांड्यी, आन एक वेगुउ डायु तिहींपोअ बोठू; तियाआ आंगड़ो बर्फाआ होस आसो, आन तियाआ मुन्काआ सिंग्ये कापाहोअ होस पांडेपांडेज ओते; तियाआ राजगादी आगीइ होस आन तियाआ साके जलजल कोअत्ला आराआ होस देखाअताते. 10 तिया डायाआ सामने रोत आगीइ खाड निहीत वोहतीते; ताहरेए हाजारो हाजार माअहें तियाआ सेवासाकरी कोअतेते, आन लाखेनलाख माअहें तियाआ सामने हुजुर ओते; ताहराआ न्यायी बोहीत गोया, आन पुस्तके उगाड़्ये."

11 "तेहेलाम तों हिंग वोडी वोडी गोठी सोक्या कोअतोतो, आन आंय उनाइत कोइत पालतीज रोयु, आन पालता पालता आखरीमेहें देख्यो के तिया जनवारोहो माइत टाक्यो, आन तियाआ डील तुदड़ीइत्ली आगीम टाकी देदो. 12 बाकी जनवारोंअ अधिकार मागीत लेदू, पोन तियांहां थोड़ाक दिही जिवे तेहें काजे सोड़ी देदे.

13 "आंय राती दर्शनोमेहें पाल्यो, ताहां पाला, मोनवीइ बेटाह्हाआ होस कोडू तेबी जुगोम वाद्लापोअ बोहीत आवतुतो, आन तो वेगाआ डायाआ जागे जात पोतू, आन ते तियाहा राजाआ सामने आगाड़ी लेत आये. 14 ताहां तियाहा एहेलुहू अधिकार, महिमा आन राज्य आप्यो, के देस देसोअ आन राज्या राज्याआ माअहें आन जुदी जुदी बाशा गोगनारे आखे माअहें तियाआ ताबामेहें ओवे; तियाआ आधिकार कायम टिकीत रोय, आन तियाआ राज केदिहीं ने आरवाय."

दर्शनोअ अर्थ

15 "आंय दानियेल, माआं मोन फिकरेम पोड़ीत गोयो, आन जों किबी आंय पाल्योतो तिहीं वाअहीं आंय काबरात गोयुतो. 16 ताहां जें माअहें जागे उबे ओते, तियांमेर्‍याआ एकाआ जागे जात कोइत तियीं आखी गोठीइ अर्थ फुशो, तिये ओं कोत कोइत तियीं आखी गोठीइ अर्थ कोयो, 17 ‘तियां शार वोडा वोडा जनवारोंअ अर्थ शार राजा*7:17 शार राजा राज्य होय, जे धरतीपोअ थापन ओवे. 18 पोन वोडाम वोडा देवोअ सोका माअहुंहूं राज्य जोड़े, आन तें हादाफल्येए आधिकारी बोणित जाय.’"

19 "ताहां माआ मोनोमेहें ए इश्शा ओवी के, तिया शोवथा जनवारोअ अर्थ बी जाईंत लेंव, जों बिहीरा तिनू रोत आलाग आन जुदो बिवाड़े एहलोहो ओतो, आन जियाआ दात लोड़ाआ आन नोखे तांबाआ ओते; तों किज बी सावीत सुउवान सुउवा कोअतोतो, आन बाकी रोल्याहां गुडाआ निसे रोंद्लीत टाकतोतो. 20 फाशोअ तियाआ मुन्कामेहें दोह हिंगे ओते, आन तिहींरोत फाशोअ एक नवो हिंग निहींयो तिहींवाअहीं जें तिन हिंगे ओते तें ओदरात पोड़्ये; तिया हिंगोअ डोआ आन वोडाय कोअनारी सोब ओती आन तों हिंग बाकी हिंगो रोत पेडो देखाअतोतो, तियाआ अर्थ जाइंलाआ बी माआं इश्शा ओवी."

21 "फाशोअ आंय पाल्योतो के, तों हिंग सोका माअहोंअरी लड़ायी कोइत तियी वेलेए कोअते जिकीत बी लेदो, 22 जाअहूं जाआं तो जुनू डायु ने आयु, आन देवोअ सोका माअहोंअ न्याय ने ठऱ्यु, पोन तिहीं रोत तियां सोका माअहोंअ राज्याआ आधिकारी बोणिइलोअ वेल ने आयी."

23 "तिये कोयो, ‘तिया शोवथा जनवारोअ अर्थ, एक शोवथो राज्य होय, जों धरतीपोअ ओत कोइत आन आखा राज्या रोत आलाग रोय, आन आखी धरतीही आरवीत टाकी देय, आन गुडाआ थुड़ी मोलीत सुउवी देय. 24 तियां दोह हिंगोअ अर्थ ओं होय, के तिया राज्यामेहें रोत दोह राजा उबा रोय, आन तियांआं फासाड़ी तियां पेल्लाआ रोत फाशुउ आलाग एक राजा उबु रोय, जो तिनू राजाहां जिकीत लेय. 25 आन तो देवोअ विरुद्दाम गोगे, आन देवोअ सोका माअहोंहों पिइड़ीत टाके, आन वेल आन नियमोहों बोदलीइलोअ आशा कोए, आन साड़े तिन वोरह्ये जाआं आखो तियाआ आथोमेहें होपात जाय. 26 पोन तेहेलाम न्यायी बोहे, आन तियाआ अधिकार बुउसीत लेय; आन नावासट आरवी देय. 27 ताहां राज आन आधिकार आन महिमा, देवोअ माअहोंहों मोन्ज्ये तियाआ सोका माअहोंहों होपाय, तियाआ राज हादाफल्योअ रोय, आन आखे आधिकार सालवीइनारे तियाआ ताबामेहें रोय आन तियाआ आदेश माने.’"

28 "यीं गोठीइ वर्णन मी ओमे कोअयोहो, आन आंय दानियेल, माआं मोनोमेहें वोडी बिक फोहीत गोयी, आन आंय काबरात गोयु; यीं गोठीहीं आंय माआं मोनोमेहें मिक्यी."