Êxodo 5

मिसरोअ राजाअ सामने मोशे आन आरोन

1 तिहींइं फासाड़ी मोशे आन आरोन फारोअ सामने जात कोइत कोयो, "इस्राएलोअ यहोवा देवे एहें कोहे: जंगलोमेहें माआं काजे तिवार कोए तेहें काजे माआं माहुंहूं जाअहूं दे."

2 फारो राजा कोयो, "यहोवा कोडू होय के तियाआ गोठ उनाइत कोइत इस्राएल वालाहां जाअहूं देंव? आंय यहोवाहा ने ओलखीइत्लू, आन आंय ने जाअहूं देनारु."

3 मोशे आन आरोने कोयो, "इब्रीवालाआ देव आमुहूं सोताहाज मिल्युहू; तियाह काजे आमुहूं रानोमेहें तिन दिही जाआं वाटे सालीत जाअलोअ काजे परवांगी आप, काहाके आमाआ देव यहोवाहा गाराहा आपित सेको. एहेलोह ने ओवे के तो आमामेहें मोराय मोकले नेत तारवाअ सालाड़े."

4 मिसर देसोअ राजा मोशे आन आरोनोहो कोयो, "तुमू माहुंउं कामे काहा सोड़ावुहूं होदताहा? जावा तुमू, तुमा-तुमाआ वोजाआ काम कोआ." 5 आन फारो कोयो, "पाला, या देसोमेहें ते जास्ती वादीत गोयेहे. आन याहां वोजाआ कामोमेहें रोत आराम कोआड़ुहूं होदताहा!"

6 फारो राजा तेदिहींज तियां वेठाड़नाराहां जे तियां माअहूं पोअ ओता, आन तियांआं आधिकाऱ्योहों ओ आदेश आप्यू के: 7 "तुमू जे ओमे जाआं इटे बोणावे तेहें माहुंहूं पुहूटो आप्या कोअताते, ओमे आगाड़ी रोत मा आपहा; तें सोताहाज जात कोइत तियांआं कोअते खोड़ हाटवे. 8 तेबी जेतेहे इटे ओमे जाआं तियांहां बोणावुहूं पोड़तेते तेतेहेज आगाड़ी बी तियांहां बोणावुहूं लागाड़जा, इटाआ गणती वाहीं बी मा कमी कोअहा; काहाके तें उजग्ये होय, तियाह कोअते ते एहें कोइत आअड़ीइतेहे, ‘आमू जात कोइत आमाआ देवोअ काजे गाराहा आपित सेको.’ 9 तियां माहुंहूं फाशोअ बी कठीण काम होपा के तें तियांआं काम कोअते रोय आन ठोगोअ गोठीपोअ मोन ने लागाड़े."

10 ताहां माहुंहूं काम कोआड़नारा आन आधिकारी नेहें बाअथे जात कोइत तियांहां कोयो, "फारो एहेंकोइत कोहे, ‘आंय तुमुहूं पुहूटो ने आपो. 11 तुमूज जात कोइत जिहीं काबी पुहूटो जोड़े तिहीं रोत होदीत लेत आवजा; पोन तुमाआ कामोम किज बी कमी ने ओवे.’" 12 तियाहा कोअते तें माअहें पुरा मिसर देसोमेहें पुहूटो होदीइलाअ काजे वेरासेर ओत गोये. 13 काम कोआड़नारा ओं कोत कोइत तियांहां तावणी कोआड़ता रोया, के जेहें कोइत तुमू पुहूटो होदीत कोइत काम कोअया कोअतेते, तेहेंज कोइत तुमाआ हरेक दिहोअ काम ओमे बी पुरो कोआ, 14 आन इस्राएलोमेहें रोत जियांहां सिपाय कोत ठरव्याते तियांहां फारोअ काम कोआड़नारा मुकोड़दोमो आवित मार देदू आन फुश्यो, "काहा काजे तुमू तुमाआ ठरवीइल्या इटाआ गणतीइ पुरमाणे पेल ओते तेहें कोइत काल आन आज इटे पुरे नाहां कोआड़्ये?"

15 ताहां इस्राएलोअ सिपायों तकराट लेत जात कोइत फारोहो कोयो, "तू ताआ सिपायोंअरी एहें कोइत काहा सालेहे? 16 ताआ आधिकारी ते पुहूटो होदीत नाहां आपता आन ते आमुहूं कोया कोअताहा, ‘इटे बोणावा,’ आन ताआ सिपायों मार बी खादुहू; पोन सुक ताआज आधिकाऱ्योंअ होय."

17 फारो कोयो, "तुमू आलह्या होय आलह्या, कामोअ नेट्या; तियाहा कोत कोताहा, के ‘आमुहूं यहोवा देवोअ काजे गाराहा आपीइलाअ काजे जाअहूं द्या.’ 18 ओमे जात कोइत तुमाआ काम कोआ; आन तुमुहूं पुहूटो होदीत ने जोड़े, पोन इटाआ गणती तुमुहूं पुरी कोइली आवे." 19 जेहेलाम इस्राएलवालाआ सिपायी ए गोठ उनाअया के तियांआं इटाआ गणती कमी ने ओवे, आन हरेक दिही एतोहोज काम पुरो कोअहूं पोड़े, ताहां तियां जांइत लेदो के तियांआं ओड़सनीइ दिही आवीत लागाहा.

20 जेहेलाम ते फारोअ सामने रोत बाअथे निहींत आया, ताहां मोशे आन आरोन, जे तियांहां मिलीइलाअ काजे उबा रोयाते, तियांहां मिल्या; 21 आन तियां मोशे आन आरोनोहो कोयो, "यहोवा देव तुमापोअ नजर टाकीत न्याय कोए, काहाके तुमू आमुहूं फारोअ आन तियाआ आधिकाऱ्योंअ नजरेमेहें आमाआ सीस ओवे एहेलोहो आमाआ विरुद्दाम कोअयोहो; तुमू आमुहूं माआड़ीलोअ काजे तियांआं आथोम तारवाआ आपी देदीही."

देवोहो मोशेए तकराट

22 ताहां मोशे यहोवाआ जागे वोलीत कोइत कोयो, "प्रभु, तु यां माअहोंहों एहेलोहो दुख काहा आप्यो? आन तु माहूं इंहीं काहा मोकल्यू. 23 जोयोंअ रोत आंय ताआ नावसे फारोअ जागे गोठी कोइलाआ कोअते गोयु, तिहीं रोत तिये यां माअहोंअरी बाक्त वेवारो कोअयोहो, आन तुमे ताआ माअहुंहूं थोड़ीक बी मदत नाहां कोअयी."