Êxodo 35

आरामोअ दिहोहो नियम

1 मोशे इस्राएलोअ आखी मंडड़ीही टोलू वालित कोइत तियांहां कोयो, "जे कामे कोइलाआ आदेश यहोवा आप्युहू तो ओ होय: 2 सोव दिही काम काज कोअजा, पोन हांतवु दिही तुमाआ काजे सोकू आन यहोवाआ काजे वोडू आरामोअ दिही ठोरे; तियामेहें जो कोडो काम काज कोए तियाहा मोइत टाकजा;✝35:2 निर्ग 20:8-11; 23:12; 31:15; 34:21; लेवी 23:3; 5:12-14 3 आरामोअ दिहे तुमू तुमाआ कोअमेहें आग बी मा पेटाड़हा."

सोका तोंबाआ कोअते भेट

4 फाशोअ मोशे इस्राएलोअ आखा माअहोंहों कोयो, "जियी गोठीइ आदेश यहोवा देवे आप्युहू तो ओ होय: 5 तुमू यहोवा देवोअ काजे भेट लेत आवुहूं जोवे; देवोअ काजे भेट कोइलोअ जियांआं मोन से इश्शा ओय तें यहोवा देवोअ होनो, सांदी, तांबो; 6 निला, जामण्या आन रात्ला रंगोअ हुत आन पात्ला हुतोअ कपड़ो; बोकड़ाआ सिंग्ये; 7 रात्ला रंगोवाअहीं रंगल्यो मेडाआ सांबड़ो, सुस नावोअ मासाआ सांबड़ो; बाबल्योअ लाकुड़, 8 उजालो आपे तेहें तेल, सोको कोअल्यो तेल आन आगरबत्तीइ काजे गोंदाण्यो मासालो, 9 आन एपोद आन सातीइ पोट्टाआ कोअता सुलेमानी मोंड्ये आन जुड़ीइलोअ काजे मोंड्या लेतावुहूं जोवे."

यहोवा देवोअ हजरीइ तोंबाआ काजे जाती जातीइ वस्तु

10 "तुमाआ विसमेहें जेतेहे जोएं हुशार कारागीर ओय, ते आखे आवीत कोइत जियी जियी वस्तुउ आदेश यहोवा आप्यू ओय तों आखो बोणावुहूं जोवे. 11 देवोअ हजरीइ तोंबू, तोंबू तियाआ टापीइलोअ पोड़दू, आकड़ा, रिपे, सोवकट, खांबा, आन कुर्सी; 12 फाश्योअ शप्पतोअ पेटी आन तियाआ डांडा, आन दयासनोअ टापणो, आन विसमेऱ्युउ पोड़दू; 13 डांडाआ आन आखा सामानोअरी टेबल, आन भेटेए रोटा; 14 उजालाआ काजे दिवाआ खांब, तियाआ बाकी सामान आन उजालो आपे तेहें तेल; 15 डांडाअरी आगरबत्तीइ देवान्यो, सोको तेल, हाजो गोंदाण्यो आगरबत्ती, आन रोअलाआ मंडपोअ बाओअ पोड़दू; 16 तांबाअ सारी, डांडू एतोहो आखो सामान आन आगीइ देवान्यो, तोपल्यो; 17 खांब आन तियाआ कुर्सीइरीज खोलीइ पोड़दा, आन खोलीइ बाअणाआं पोड़दा; 18 रोअलाअ आन खोलीइ बेनुउं खुटा, आन दोअड़ी; 19 सोका जागा मेहें सेवा कोअनारा काजे विंइल्ये आंगड़े, पुंजाराआ काम कोइलाआ काजे आरोन याजकोओ सोके आंगड़े, आन तियाआ पोऱ्याअ आंगड़े."

माअहें भेट लेत आवत्ले

20 ताहां इस्राएलवालाआ आखे माअहें मोशे सामने रोत जाते रोये. 21 आन जियांआं मोनोम लागो आन इश्शा ओवी, तियां मिलापवाला तोंबाआ कामोअ काजे आन तिहींमेएं आखी सेवाआ काजे आन सोका आंगड़ाआ काजे यहोवा देवोहो भेट लेताये. 22 जियांआं मोनोमेहें इश्शा ओवी तें आखे बोईंन माटी आये आन तें आखे नाकन्यी, बिजल्ये, मुंदी, गोलामेर्‍यीइ होनाआ हाकोल आन आखी जातीइ होनाआ सामान लेताये, एहें कोइत आखे माअहें यहोवा देवोअ काजे होनाआ भेट लेताये. 23 आन जिया जिया माट्योपोअ निला, जामण्ये नेत रात्ला रंगोअ आंगड़े, सिणा हुतोअ साअको, नेते बोकड़ाआ सिंग्ये, सुस नावोअ मासाआ सांबड़ो नेत रात्ला रंगोवाअहीं रंगल्ये मेडाआ सांबड़े, ते तों लेताया. 24 फाशेए जेतेहे माअहें सांदी, आन तांबाआ भेट आपनारे ओते ते यहोवा देवोअ काजे तेहेलीही भेट लेताये; आन जिया जियापोअ सेवाआ कामोअ काजे बाबल्योअ लाकड़े ओते तें लेताये. 25 आन जियीं बोईंइ मोनोम बुद्दीइ कला ओती, तियीं सोताआ आथोवाअहीं हुत विंइ-विंइइ निले, जामण्ये आन रात्ला रंगोअ, आन पात्ला हुतो वाअहीं विंइल्ये साअके लेतायी. 26 आन जेती बोईंइ मोनोमेहें एहेलिही कला ओती, तियीं बोकड़ाआ सिंग्ये बी विंइये. 27 आन पुडारी माटी एपोद आन सातीइ पोट्टाआ काजे सुलेमानी मोंड्या, आन जुड़ीइलोअ काजे मोंड्या, 28 आन दिवाआ काजे आन अभिशेकोअ काजे तेल आन आगरबत्तीइ गोंदाण्यो मासालो लेत आया. 29 जे जे वस्तु बोणाविलोअ आदेश यहोवा मोशेए वाअहीं आप्युतो, तियाहा कोत जों किबी गरज ओती, तियाहा तें आखे माटीन बोईं मिलीत लेत आये, जियांआं मोनोमेहें एहेलिही इश्शा ओवीते. एहें कोइत इस्राएलवाले यहोवा काजे तियांआं इश्शा वाअहीं भेट लेताये.

मिलापवाला तोंबाआ काजे कारागीर

30 ताहां मोशे इस्राएलोहो कोयो, "उनाआ, यहोवा देवे यहुदाआ पारवाड़ी बसालेलोहो, जो ऊरीइ बेटुह्हू आन हुरोअ घराणाआ होय, तियाहा नाव लेत कोइत हाद्युहू; 31 आन तिये तियाहा देवोअ आत्मावाअहीं आपित कोइत ओकल, बुद्दी, समज आन कला आप्यीही. 32 काहाके तो कारागिरीइ कामे कोइत सेकुहूं जोवे, आन होनो, सांदी आन तांबो याआ काम कोइत सेके; 33 आन जुड़ीइलोअ काजे मोंड्या तोड़ीत सेके, आन लाकड़ूपोअ नक्शी कोरवीइलोअ काम, आन आखी जातीइ कारागिरीइ कामे कोइत सेके. 34 फाशोअ यहोवा देवे तियाआ मोनोमेहें दानोअ पारवाड़ीइ अहिसामाकोअ पोऱ्यु अहलियाबोअ मोनोमेहें बी सिकाड़ीलोअ सेक्ती आप्यीही. 35 नक्शीइ कामे कोइला मेहें आन कारागिरीइ कामे आन निला, जामण्या, आन रात्ला रंगोअ आंगड़े, आन पात्ला हुतो वाअहीं बोणावल्या कपड़ापोअ गुथनारे, आंगड़े विंइनारे आन आखी जातीइ कारागिरीइ कामे कोअनारे बाहरी कामोअ योजना कोअनारे एहेला आखाआ काजे तिये यां बेन जोओंअ मोनोमेहें बुद्दी पोअयी."