1 जेहेलाम माअहों पाल्यो के डोगो पोअ रोत उतरीइलामेहें मोशेहे वाआ लागेहे, ताहां तें आरोनोअ जागे टोलू वोलीत कोइत कोने वोल्ये, "ओमे आमाआं काजे देव बोणाव, जो आमाआ काजे आगाड़ी आगाड़ी साले; काहाके तिया आमुहूं मिसर देसोम रोत काडीत लेतावनारा मोशेए की ओवो तों आमुहूं नाहां मुंदू?"✝

2 आरोन तियांहां कोयो, "तुमाआ बोईंइ आन पोऱ्याअ पोऱ्यीइ कानोमेहें होनाआ जे बिजल्ये ओय तियांहां काडा, आन माआ जागे लेतावा." 3 ताहां आखा माअहों तियांआं कानो मेहें रोत होनाअ बिजल्ये काडीत कोइत, आरोनोअ जागे लेताये. 4 आरोने तियांआं आथोम रोत होनो लेत आवीत विंजणा वाअहीं कोड़ीत कोइत तियाआ एक वासड़ो बोणायो.

ताहां माअहें कोने वोल्ये, "ए इस्राएल, ताआ देव जो ताहूं मिसर देसोम रोत काडीत लेतायुहू, तो ओज होय."✝

5 ओं पालित कोइत आरोनो तियाआ आगाड़ी एक देवान्यो बोणायो; आन ओं परसार कोअयू, "हांदाअ यहोवाअ काजे तिवार रोये." 6 आन बिहीरा दिही वेगीइ उठीत कोइत आगीइ गाराहा कोअयो, आन शांतीबली लेताये; फाशेए बोहीत कोइत खानेन पिने वोल्येन मोस्ती कोए वोल्ये.✝

7 ताहां यहोवा मोशेहे कोयो, "निसे उतरीत जा, काहाके ताआ माअहें, जियांहां तु मिसर देसोम रोत काडीत लेतायुहू तें ते खाराब कामे कोए वोल्येहे; 8 आन जियी वाटे पोअ सालीइलाअ आदेश आंय तियांहां आप्युतो तियाहा सोड़ीत कोइत तियां एक वासड़ो बोणावीत लेदोहो, तियाहा ते पागे पोड़्ये, आन तियाहा गाराहा बी आप्यू, आन ओं कोयो, ए इस्राएल, तुमाआ देव जो तुमुहूं मिसर देसो मेहें रोत सोड़वीत लेतायू तो ओ होय." 9 फाश्योअ यहोवा मोशेहे कोयो, "आंय यां माहुंहूं पाल्योहो, आन उनाआ, एं माअहें डांबऱ्ये होय. 10 ओमें माहूं मा रुकही, माहूं तियांपोअ खोत सोड़्यीही, खोतोअ वाअहीं तियांहां आरवी देअहूं दे; पोन आंय तावाअहीं एक देस बोणाविहीं."

11 ताहां मोशे तियाआ देव यहोवाहा ओं कोत कोइत विनंती कोउ वोल्यू, "ए यहोवा, ताआ खोत ताआ माअहूं पोअ काहा आयीही, जियाहा तु वोडी सेक्तीवाला आथो वाअहीं मिसर देसोम रोत काडीत लेतायुहू? 12 मिसरवाले एहें काहा कोअहूं जोवे, के ‘तो तियांहां माईंत कोइत धरती पोअ रोत आरवीत टाकीइलोअ काजे खाराब मोनो वाअहीं काडीत लेत गोयुहू?’ तु ताहूं लागली खोतेहे आवरीत ले, आन ताआ माअहूंपोअ एहेलिही ओड़सन मा लेत आवही, रुकाइत जा."

13 "ताआ सेवक अब्राहाम, इसाहाक, आन याकोबोहो ओर कोअ, जियांहां तु ताआज शप्पत खात कोइत एहें कोयोतो, ‘आंय तुमाआ पारवाड़ीही जुगोअ ताराआ होस वादाड़ीहीं, आन ओ आखु देस जियाआ आंय गोठी कोअयीही, तो तुमाआ पारवाड़ीही आपिहीं, मोन्ज्ये ते तियाआ आधिकारी कायम रोत सेके.’"✝ 14 ताहां यहोवा तियाआ माअहोंअ नुकसान कोइलाम रोत तिये तियाआ मोन बोदल्यो.

15 ताहां मोशे फिरीत कोइत साक्शीइ बेनू पाटीही आथोम लेत कोइत डोगो पोअ रोत उतरीत आयू. तियी बेनू पाटी पोअ बेनू वोल लेख्योतो, 16 आन ते पाटी देवोअ बोणावल्यी ओती, आन तियांपोअ जो कोरवीत कोइत लेखाअयोतो तों देवोअ लेखल्यो ओतो.

17 जेहेलाम यहोशवाहा माअहोंअ गर्दी होंबलाअयी, ताहां तिये मोशेहे कोयो, "पोड़ावाअहीं रोत लोड़ायीइ जेहे आवाज होंबलाअहे."

18 तिये कोयो, "ओ जो आवाज आवेहे ओ जिकनाराआ जेहें बी नाहां आन ने हारवाअनाराआ जेहें बी नाहां, पोन माहूं ते गावानाराआज शब्द होंबलाअहे."

19 पोड़ावाआ जागे आवताज मोशेहे तों वासड़ो आन नासीइलोअ देखात पोड़्यो, ताहां मोशेहे तियांपोअ खोत लागी, आन तिये पाटीही तियाआ आथोम रोत डोगोअ निसे आस्टीत फोड़ीत टाक्यी. 20 ताहां तिये तियांआं बोणावल्या वासड़ाहा लेत कोइत आगीम टाकीत ओगलावी देदो. आन तियाहा कुटीत सुउवीत पाअयोंमेहें टाकी देदो, आन तों पाईं इस्राएलवालाहां पिअहूं लागाड़्यो. 21 ताहां मोशे आरोनोहों कोनु वोल्यू, "या माअहों ताअरी एहलोहो कि कोअयो के तु एता वोडा पापोमेहें फोसीत गोयू?"

22 आरोने उत्तर आप्यो, "मालिख, मापोअ खोत मा कोअही; तु यां माअहुंहूं ते ओलखेहे के तें खाराब गोठी पोअ मोन लागाड़ीत रोतेहे. 23 आन तियां माहूं कोयो, ‘आमांआं काजे देव बोणाव जो आमाआ आगाड़ी आगाड़ी साले; काहाके तिया माटी मोशेहे, जो आमुहूं मिसर देसोम सोड़वीत लेतायुहू, आमू नाहां जांअते के कि ओवोहो?’✝ 24 ताहां आंय तियांहां कोयो, ‘जिया जियापोअ होनाआ सामान ओय, तों तें काडीत लेतावे;’ आन जेहेलाम तियां माहुं तो आप्यो, आंय तियाहा आगी मेहें टाकी देदो, ताहां ओं वासड़ो निहींत आयो."

25 आरोन तियां माहुंहूं खुल्ले सोड़ी देदे आन ते तियांआं दुस्मोनोअ कोअते तियांआं तोमाशु बोण्ये एहलोहो मोशे देख्यो. 26 मोशे पोड़ावाआ बाअणाअहीं उबू रोत कोइत कोयो, "जों कोडो यहोवा देवोअ वोल ओय तों माआ जागे आवुहूं जोवे;" ताहां आखे लेवी कुटूंबो तियाआ जागे टोलू वोल्ये. 27 तिये तियांहां कोयो, "इस्राएलोअ देव यहोवा ओं कोहे के तुमू तुमाआ जांगीपोअ तलवार बांदीत कोइत पोड़ावाआ एकी मेरे रोत एकी मेरे जाआं सोमकीर फिरीत तुमाआ खाजगी पाव्हीइला, दोस्ती आन जागेवालाहा माईंत टाका." 28 मोशेए या आदेशोअ पुरमाणे लेवी उनाअया; आन तेदिहीं तिन हाजार एतेहे माअहें मोये. 29 ताहां मोशे कोयो, "तुमू आज्याआ दिही यहोवाअ काजे तुमाआ पुंजारकाआ कामोअ काजे निवड़ कोअयीही, तुमाआ खाजगी पोऱ्याआ आन पाव्हीइलाअ विरुद्दाम ओते, आन तो तुमुहूं आशिर्वाद आपे."

30 बिहीरे दिही मोशे माअहुंहूं कोयो, "तुमु जास्ती वोडू गुनू कोअयुहू. ओमे आंय यहोवाआ जागे सोड़ीत लागीहीं; ओत सेकेहे तुमाआ पापोअ माफीइ काजे रावणी कोइत सेकाय." 31 ताहां मोशे यहोवाअ जागे जात कोइत कोनु वोल्यू, "तियां माअहों होनाअ देव बोणावीत कोइत जुदो वोडो पाप कोअयोहो. 32 तेबी ओमे तु तियांआं पापोहो माफ कोअ नेत तुमे लेखल्या पुस्तकोमेहें रोत माआ नाव काडी दे."✝

33 यहोवा मोशेहे कोयो, "जियां माआ विरुद्दाम पाप कोअयुहू तियांआज नाव आंय माआ पुस्तकोमेहें रोत काडी देहीं. 34 ओमें तु जात कोइत तियां माअहुंहूं तिया जागामेहें लेत साल जे गोठ आंय ताअरी कोअयीते; पाल, माआ देवदूत ताआ आगाड़ी आगाड़ी साले. पोन जेदिहीं आंय मिलीहीं तेदिहीं यांआं पापोअ डोंड बी आपिहीं."

35 आरोने बोणावल्यो वासड़ो तियां माअहूंज बोणायोतो, तियाहा काजे यहोवा देव तियांपोअ पिड़ा टाक्यी.